Aizaia 17 - Edo Bible (E Baibol Ẹdo) Version 1996

Osanobua Gha Rri E Siria Kevbe Izrẹl Oya

¹ E Nọyaẹnmwa khare wẹẹ, “E Damaskọs i ghi ra sẹtin gha re okpẹvbo ọvbehe, utete itowa ọ re ọ ghi ra gha khin.

² Emwa gha lẹkua hin avbe okpẹvbo e Siria rre ẹdẹdẹmwẹdẹ. Iran gha khian ehe ne ohuan kevbe ẹmila na rria, ọmwa ne ọ gha vbe khulo iran hin evba rre i rrọọ.

³ Izrẹl ghi khian ne ẹ i ghi mwẹ ne ọ degue ẹre, e Damaskọs ghi do khian ne ọ ma ghi yan egbe ẹre. Avbe ivbi e Siria ni ghi miẹn uhunmwu vbọ ghi do gha re emwa ne a faraa zẹ vbene ivbi Izrẹl ye. Mẹ mwẹ ne Osa ne Udazi tae ne.”

⁴ E Nọyaẹnmwa khare wẹẹ, “Ẹdẹ dee ne ukpọlọmwẹ Izrẹl gha sẹ ufomwẹ, a ghi ya ogue rọ ẹfe ne ọ te mwẹ.

⁵ Izrẹl ghi do ye vbe ugbo ne a na fian ọka rhọ emwiokọ ni rrọ nẹ. Ọ ghi dihoi rua zẹ vbe ugbo ni rre iya e Refeim vbe a ghi wa gbẹn ọẹn mu otọ nẹ.

⁶ Ibozẹghẹ ọ re ọ khian miẹn uhunmwu. Izrẹl gha do yevbe erhan oliv ne a kọlọ ọmọ rẹn fo, a na ghi sẹẹ eva ra eha rae ye ọre uhunmwu, ra ezaghazagha ne a sẹrae ye ọre abọ ni rre ototọ. Mẹ ne Nọyaẹnmwa ne Osanobua Izrẹl ọ re ọ tae.”

⁷ Ọ gha sẹ ẹdẹ nẹdẹrriọ, emwa gha lẹ bu Ayi ne ọ yii iran ne ọ re Osanobua Nọhuanrẹn ọghe Izrẹl rre ne ọ do ru iyobọ ne iran.

⁸ Iran i ghi ra dọlegbe mu ẹtin yan avbe Ogiukpo ne iran ya obọ iran ma, ra ne iran mu ẹtin yan iwinna obọ iran, avbe amazẹ ọghe Asiẹrra ne ẹbọ nokhuo kevbe avbe Ogiukpo ne a na giẹn eturari.

⁹ Ọ gha sẹ ẹdẹ nẹdẹrriọ, avbe ẹvbo ne a gbe ekẹn gaa hia gha khian ne emwa na lẹkua, iran ghi sẹ ehia rae zẹ vbe itowa, ọ ghi yevbe avbe ẹvbo ne ivbi Hivi kevbe Amọri lẹẹ sẹraa ẹghẹ ne iran na gha lẹẹ ne ivbi Izrẹl.

¹⁰ Izrẹl, wa mianmian Osanobua ne ọmwa ne ọ fannọ uwa kua, ọ na degue uwa zẹ vbe okuta nọkhua. Wa keghi ya gha fian erhan gbọọ, ne uwa miẹn ehe na gha ga ẹbọ ẹrrẹe vbe evba.

¹¹ Gia kha wẹ iran gele gbọọ, iran na họn ebe ẹsẹse vbe owiẹ ne uwa gbọọ iran zẹẹ, wa i ra kọlọ ọmọ iran. Ọlọghọmwa kevbe obalọ ne ẹ i mwẹ ukhunmwu ọkpa ọ re uwa ra miẹn vbọ.

Obọ Kee Ukhunmwu Ne Avbe Ẹvbo Eghian

¹² Owogho nọkhua rre avbe uhunmwu ẹvbo ni wegbe, ọ yevbe uvannọ mwẹ nọkhua ọghe okun, ọ yevbe ne ubimwẹ ẹzẹ nọkhua mu vẹ.

¹³ Avbe uhunmwu ẹvbo rhulẹ ghe odaro zẹvbe amẹ ne ọ lẹ ogbigbi sokpan, Osanobua guu iran gui, iran ke lẹẹ werriegbe, a khulo iran werriegbe zẹvbe ebubẹ ne ọ rre ehanhan oke, zẹ vbe ebe nọkakae vbe ẹhoho ẹziza.

¹⁴ Iran si ohan rre vbe ẹghẹ ota, sokpan, ọ gha sẹ owiẹ, iran kpao nẹ. Erriọ ọ ra rruan iran hia ni fu emwi viọ vbe ẹvbo mwa.