Aizaia 15 - Edo Bible (E Baibol Ẹdo) Version 1996

Osanobua Gha Fuẹn Moab

¹ Uhunmwu ne a gie rre vbekpa e Moab ọ re ọna khin. Iran rẹnkhẹẹn avbe okpẹvbo ne a tie ẹre Aa kevbe Kẹẹ vbe asọn ọkpa, otọ e Moab na ghi wa hunwan hiii.

² Emwa ni rre ẹvbo ne a tie ẹre Dibọn hin uhunmwu oke ya gha viẹ vbe aro ẹbọ. Ivbi e Moab gha viẹ, iran gha vbe khiẹ avbe ẹvbo ne a tie ẹre Nebo kevbe Mẹdeba. Iran khiokhio eto kevbe ẹtu iran muotọ ba ẹmwẹ akhiẹ na.

³ Emwa ni khian vbe ore viọ ukpọn akhiẹ rhuan, emwa gha viẹ, iran vbe khiẹ vbe adesẹ ughe kevbe ẹrhunrhun owa.

⁴ Ivbi e Hesbọn kevbe Elealẹ gha go, a vbe họn urhu eve iran vbe ehe ne ọ rrei gban vbene Jahaz ye. Uhin ighe te avbe ivbiyokuo ghi guọ zẹzẹzẹ, udu iran kpan fi ẹko.

⁵ Orhiọn mwẹ wa viẹ ne Moab. Emwa ni rrọ lẹẹ gha rrie Zoa kevbe Eglat Siekisiya. Eso lẹẹ la odẹ Luhit, iran viẹ khian, eso lẹẹ gha rrie Horonaim, iran gha kporhu eve khian:

⁶ Ẹzẹ e Nimrim kae irunmwu ni rre ọkpẹn ọnrẹn luẹluẹe, emwi ne ọ mwẹ ebe nekhui i ghi rrọ.

⁷ Avbe emwa nii fian Iya e Wilo rra, iran ho ne iran lẹ kua ke iran ke emwi ne iran mwẹ hia.

⁸ Urhu eve ọ re a ghi họn vbe ehe hia ne otọ e Moab lae. A họn nẹẹn vbe ẹvbo Eglaim kevbe Biarelim.

⁹ Ẹzẹ ne ọ rre ẹvbo Dibọn khian ne ọ ghi baa ba ẹmwẹ esagiẹn, Osanobua ye vbe zẹ emwi ne ọ rhia sẹẹ ọnii yotọ khẹ emwa ni rre evba. Ẹn, ugbe yan agbanmwẹ diakhẹ emwa hia ni rre Moab.