Aizaia 14 - Edo Bible (E Baibol Ẹdo) Version 1996

Iran Ni Ke Iwe Rre

¹ E Nọyaẹnmwa gha dọlegbe tohan Izrẹl ne emwa rẹn, ọ ghi hannọ iran zẹ ya ru ọghọe. Ọ gha gie iran dọlegbe gha rre otọ ẹvbo iran, avbe orhunmwuyẹn ghi deba iran gha rre evba.

² Uhunmwu ẹvbo nibun gha ru iyobọ ne Izrẹl ne iran ya dọlegbe gha die otọe ne Nọyaẹnmwa mu ne iran, evba nii, avbe uhunmwu ẹvbo nii hia ghi vbe gha ga Izrẹl zẹ vbe ọviẹn. Avbe iran ni te khọn miẹn Izrẹl otọ, Izrẹl ghi khọn miẹn iran otọ, ivbi Izrẹl ghi gha kha yan iran ni te ka gha wọ iran uhunmwu.

Ọba E Babilọn Vbe Ẹvbo Iran Ni Wulo Nẹ

³ E Nọyaẹnmwa gha rhan ivbi Izrẹl yotọ vbe obọ obalọ iran kevbe usẹ iran kevbe iwinna ne ọ wegbe ne a ya ẹtin munọ iran gha winna.

⁴ Ọ gha ghi ru ọna nẹ, iran ghi do gha giẹ ọha e Babilọn wẹẹ: “Ọba ne ekhọe dan nii dee gbotọ! Ẹ i ghi dọlegbe wọ ọmwa rhọkpa uhunmwu ọvbehe.

⁵ E Nọyaẹnmwa rhie ufomwẹ ye ẹtin avbe enikhaemwisẹ dan nẹ,

⁶ iran ni ya ohu wọ avbe emwa nii uhunmwu, vbe ne iran i na vbe dobọ ẹvbo ni iran khọnrẹn ne iran zẹ kpokpo yi.

⁷ Banbanna nian, te otọ uhunmwu ghi fu otọ agbọn hia rre, te iran ghi miẹn ehe na hẹwẹ, ihuan oghọghọ ọ re dọmwadẹ ọghọe ghi so.

⁸ Avbe ohia kevbe isida ni rre Lebanọn gha ghọghọ ọba ne ọ dee gbotọ nii, rhunmwuda, vbe ne irẹn ghi na kpao nian, ọmwa ne ọ gha tọnnọ iran gbotọ ighi rrọọ.

⁹ “Agbọn avbe emwa ni wulo nẹ, wa mu egbe ne iran ya gbe ọbokhian ne ọba e Babilọn. Orhiọn avbe emwa ni gha mwẹ ẹtin vbe agbọn, gha khian yo khian rre. Orhiọn avbe ọba gha guakpao vbe ẹkete iran.

¹⁰ Iran hia gha niẹn urhu gu ẹe guan wẹẹ, ‘Vbene ima ye mitanmitan ọ re uwẹ ghi vbe ye na! Ọkpa vbe uwu ima ọ re uwẹ ghi vbe khin.

¹¹ Akpata ne a kpee ọ re a te ya mu ọghọ ye uwẹ egbe, sokpan, banbanna nian, ghe ruẹ vbe ẹvbo iran ni wulo nẹ. Ukpo ne a vbiẹ ọghe ọkhọe ọ re u lovbiẹ yi na, a keghi vbe ya igbu ukpọn ọghe ọkhọe hiin ruẹn egbe.’

¹² “Ọba e Babilọn, orhọnmwowiẹ ne ọ baa siẹẹn, u dee ke ẹrinmwi rre nẹ, vbe ẹghẹ ne ọ gberra, wẹ kegha khọn avbe uhunmwu ẹvbo muotọ. Sokpan te a ghi rhie uwẹ fianmwẹ otọ na.

¹³ Te u te wa tae wẹ u ra hin gha rrie ẹrinmwi, ne u ya mu ẹkete ruẹ ye odukhunmwu avbe orhọnmwẹ ne ọ yo sẹẹ. U te gha ro wẹ te u ra tota yan uhunmwu oke zẹ vbe ọba, oke ne ọ rre odẹ okuọ nii, ehe ne avbe ẹbọ na do sikoko.

¹⁴ U wẹ, u gha la odukhunmwu ikpakpaiso ne u do gha yevbe Oghodua.

¹⁵ Sokpan ne ọ gha na te gha yerriọ, a sii ọ fi ehe ne ọ dinmwi sẹẹ vbe ẹvbo ne iran ni wulo nẹ ye vbe ototọ.

¹⁶ “Avbe iran ni wulo nẹ ghi yan unuan tanro ye uẹ egbe, iran ghi kha wẹẹ, ‘Ọmwa nii ne ọ mu agbọn rueghe ọ re ọna khin ra, ne ọ na ru ẹe ne avbe otọe arriọba gha guọ gbẹghẹgbẹghẹ?

¹⁷ Ọmwa nii ne ọ guọghọ avbe okpẹvbo ua ọ re ọ na khin ra, ọ na ya otọe agbọn khian otọe ne ọ gbe ẹvbi. Ọmwa nii ne ẹ i fannọ oleghan rẹn kua ra ne ọ gie iran gha rrie owa ọ re ọna khin ra?’

¹⁸ avbe ọba agbọn hia lovbiẹ ye uwu idin iran ne mose mose,

¹⁹ sokpan wẹ i mwẹ idin, a mu ikun ruẹn fi fua ne ọ kẹkẹ ua. A silo ikun avbe ivbiyokuo ne a gbele vbe okuo rhu uẹ ginna otọ, a fi ẹe lele iran ku uwu uvun okuta, a na ya owẹ mamaẹn ginna otọ.

²⁰ Rhunmwuda ne u na mu ẹvbo ruẹ rhia, u keghi vbe gbele avbe emwa ruẹn, a i khian re ruẹ vbene a re avbe ọba nekpa. Ne ọ khian miẹn uhunmwu vbe ẹgbẹe ruẹ ne ẹgbẹe dan nii, ẹ i rrọọ.

²¹ Wa suẹn iran gha rẹnkhẹn uan! Ivbi ọba na gha wulo, rhunmwuda orukhọ ne avbe erha iran odede ru. Ọkpa vbe uwu iran ne ọ gha dọlegbe gha khaemwisẹ yan otọ agbọn i rrọọ, a ma ghi wẹ ne ọ bọlọ okpẹvbo vuọn otọ agbọn.”

Osanobua Gha Fuẹn Otọ E Babilọn

²² E Nọyaẹnmwa ne Oghodua khare wẹẹ, “I gha dekun e Babilọn, I ghi rẹnkhọẹn ruan. I i ra vbe sẹ emwiọkpa rae yọ, ọ re emọ nọ ra emwa, ni gha miẹn uhunmwu irrọọ. Mẹ ne Nọyaẹnmwa ọ re ọ tae.

²³ I gha ya e Babilọn khian otọe ne ọ gbe ẹvbi, avbe esughusughu ọ re ọ ghi gha rre evba. I gha ya owẹ ne ọ gha, kpolo emwi hia gha rrie, kpolo e Babilọn, Mẹ ne Nọyaẹnmwa ne Udazi ọ re ọ tae.”

Osanobua Gha Fuẹn Emwa Siria

²⁴ E Nọyaẹnmwa ne Oghodua vẹn ihẹn nẹ wẹẹ, “Te emwi ne I mwamwaẹn gha sunu. Emwi ne I kha nẹ wẹ a gha ru ẹe, te a ra ru ẹe.

²⁵ I gha rẹnkhẹn ivbi Asiria ni rre otọe Izrẹl ne ọghomwẹ, I ghi ya owẹ rrilo iran ginna otọe vbe uhunmwu oke mwẹ, I gha fannọ emwa mwẹ yotọ hin urọnghọn Asiria rre kevbe hin ihe ne a wẹ ne iran mu.

²⁶ Emwi ne I mwamwa ẹn vbe ekpa agbọn na ọ re ọnii khin, I niẹn obọ mwẹ ladian nẹ, ne I ya rri avbe uhunmwu ẹvbo oya.”

²⁷ E Nọyaẹnmwa ne Udazi tae ne ighe te irẹn ra ru emwi na. Ọ niẹn obọ ẹre ladian nẹ ne ọ ya rri emwa oya, ọmwa okpa i rrọ ne ọ gha sẹtin da ẹre obọ yi.

Osanobua Gha Fuẹn Emwa Filistia

²⁸ Uhunmwu ne a giee rre vbe ukpo ne Ehaz wu ọ re ọna khin.

²⁹ Ivbi e Filistia, orhokhua ne ọ ya gbele uwa bunnọ, sokpan, emwi ne uwa gha ghọghọ yi i zẹdẹ rrọọ. Ẹyẹn okpa gha wu, ọvbehe ne ọ rhia sẹẹ ọre ghi rhie ihe ẹre. Ekẹn ẹyẹn ghi gbe Ugbogiorinmwi ne ọ tin ladian.

³⁰ E Nọyaẹnmwa gha ru ọsuohuan avbe emwa rẹn ne ivbiogue, ọ ghi vbe gie iran gha rrọọ vbe a i mwẹ ẹbe. Sokpan, ọ gha gie ukhunmwu nọkhua gie uwa ne ivbi e Filistin, ẹ i ra vbe sẹ okpa rae ye agbọn vbe uwu uwa.

³¹ Wa gha go, ne uwa vbe gha tu nọ iyobọ, wa ne avbe okpẹvbo e Filistin hia. Wa runran, wa hia fẹẹrẹ. Amẹ ne ọ bii ne ọ re ebubẹ, ke odẹ okuọ dee, ivbiyokuo ne avbiẹrẹ okpa i rre otu ẹre.

³² Vbe ima ra ya wanniẹn ọre ẹmwẹ hẹ yi ighe ọmwa ne iran gie ẹre uhunmwu ke Filistia gie ima? Ma gha tama rẹn wẹ e Nọyaẹnmwa gbe Zaiọn ẹkun sotọ nẹ kevbe wẹ emwa rẹn ni sẹ usẹ gha di evba ya vbe a i mwẹ ebe.