Aizaia 13 - Edo Bible (E Baibol Ẹdo) Version 1996

Osanobua Gha Rrii E Babilọn Oya

¹ Uhunmwu ne a giee rre vbe ekpa e Babilọn ọ re ọ na khin, zẹ vbene Aizaia ne ovbi Amọz họn ẹẹn ke ehe ne Osanobua ye gha dee.

² Tọn afiala okuo nii mu vbe uhunmwu oke ne ọ dihoi rua nii. Da tie avbe ivbiyokuo nii ne u vbe tọn obọ ruẹ mu da iran zẹ vbe igiemwi wẹ ne iran dekun onurho ẹvbo ne ọ tengbemu nii.

³ E Nọyaẹnmwa tie avbe ivbiyokuo ẹre ni hio ke ni vbe din nii ladian ne iran do khọn okuo nọhuanrẹn, ne iran vbe rri iran ne ohu ẹre mu oya.

⁴ Wa danmwehọ owogho ne ọ rre uhunmwu oke, owogho emwa ni wa bun ẹsẹse, owogho agbọn ẹvbo kevbe otọe arriọba ni sii egbe koko. E Nọyaẹnmwa ọghe Ivbiyokuo gha mu ivbiyokuo ẹre egbe yotọ khẹ okuo.

⁵ Ẹvbo ne ọ rrei ẹsẹse vbe odẹ ehe ne agbọn sẹe ọ re iran ke dee. Vbe uwu ohu ẹre, e Nọyaẹnmwa dee do duẹ ẹvbo nii hia a.

⁶ Wa gha tulo utumwẹ obalọ. Ẹdẹ e Nọyaẹnmwa sẹ otọ fo, ẹdẹ ne Oghodua ra mu ọfuan rre.

⁷ Obọ edọmwadẹ ọghọe gha luẹluẹ ginna ẹre egbe, ẹtin gha fo edọmwadẹ ọghọe.

⁸ Ehia gha runran, obalọ ghi la iran egbe, zẹ vbe obalọ okhuo ne emwi ubiẹmwẹ ru. Iran gha ya ohan tanro ye egbe egbe, ekhue ghi giẹn iran aro hia a.

⁹ Ẹdẹ e Nọyaẹnmwa dee, ẹdẹ ọkhọ nii ọghe ohu kevbe okuosu ẹre nọkhua. Otọe agbọn gha khian ato, a ghi fuẹn avbe emwa orukhọ hia a.

¹⁰ Dọmwadẹ orhọnmwẹ, kevbe avbe orhọnmwẹ ni mama kugbe, erhọkpa ne ọ ghi ra gha baa irrọọ, ovẹn gha yanrre, ọ ghi so ebiebi, uki i ghi ra vbe baa.

¹¹ E Nọyaẹnmwa khare wẹẹ, “I gha fian ọfuan fi otọ agbọn, I ghi vbe rria avbe emwa dan hia ikhi ye orukhọ iran. I gha vbokho iran hia uhunmwu rri otọ ighe avbe iran ni tọn egbe mu. I gha rria iran ikhi ighe iran ni hio kevbe emwa dan.

¹² Iran ni miẹn uhunmwu vbo gha vbee sẹẹ igoru.

¹³ I gha ya ẹrinmwi gha guẹ zẹzẹzẹ, a gha vbe rueghe agbọn, a ghi sua ẹre hin ihe ẹre rre vbe ẹdẹ nẹdẹrriọ, ẹdẹ ne imẹ ne e Nọyan ne Oghodua gha rhie izohu mwẹ ma.

¹⁴ “Avbe orhunmwuyẹn ni rre Babilọn gha lẹ gha rrie ẹvbo iran, iran ghi zagha a vbe ẹrhuẹ ni lẹ ne ohuẹ kevbe avbe ohuan ni i mwẹ ne ọ su iran.

¹⁵ Ọmwaikọmwa ne obọ a rhirhi vba, a gha ye agbada bi ẹre gbua.

¹⁶ Vbe ne iran wa ghe iran nii, a gha sirra iran salọ ivbi iran uhunmwu vbe otọ gbelua, a gha fu emwi ni rre owa iran viọ, a ghi gha mu avbe amwẹ iran ya gha.”

¹⁷ E Nọyaẹnmwa khare wẹẹ, “I gha bọọ avbe ivbi e Medis yọ ne iran dekun e Babilọn. Iran i zẹ ye ẹmwẹ esiliva, a i vbe sẹtin ya igoru danmwẹ iran ghe.

¹⁸ Iran gha ya uhanbọ kevbe ifẹnmwẹ gbele avbe igbama, iran i ra vbe tohan avbe emobọ ra ibiẹka.

¹⁹ E Babilọn ọrọre otọe arriọba ne ọ mose sẹẹ vbe uwu ehia, emwi ne emwa rẹn ya hio nọ. Sokpan mẹ ne Nọyaẹnmwa gha dunmwu e Babilọn uan zẹ vbene i ru e Sọdom kevbe Gomorra.

²⁰ Ọmwarhọkpa i ghi ra dọlegbe yin evba ọvbehe. Igabari ne ọ zozo khian i ghi ra dọlegbe bu agọ ye evba, ọsuohuan i ghi viọ ohuan rẹn ya rria vbe evba ọvbehe.

²¹ Ọ gha khian ehe ne avbe aranmwẹ oha dia, ke ne avbe esughusughu bọlọ oko yi. Avbe ugomugo gha rre evba, avbe ẹwe oha ghi gha khọn yo khọn re vbe itowa ni rrọọ.

²² Owa ọkhẹ ni te rrọọ, kevbe avbe ẹguae, avbe akpakomiza kevbe ekuaghagha ọ re ọ ghi gha tulo vbe evba. Ẹdẹ e Babilọn rre nẹ. Te ẹdẹ ọ re ghi ra gberra.”