Aizaia 11 - Edo Bible (E Baibol Ẹdo) Version 1996

Arriọba Ọfumwegbe

¹ Uniẹn ọghe Ọba Devid ye vbe erhan ne a tọn gbe otọ nẹ sokpan vbene ẹzi erhan vbe dọlegbe họn, erriọ ọ re ọba ọgbọn gha ke uniẹn e Devid zọ ladian.

² Orhiọn e Nọyaẹnmwa gha rhie ẹwaẹn ne ẹẹn, deba irẹnmwi kevbe iguemwi ne ọ gha ya gha khaemwisẹ yan avbe emwa rẹn, rẹn gha rẹn emwi ne Nọyaẹnmwa ho ọ ghi vbe gha ya ọghọ ne ẹẹn,

³ ọ gha ya ọyẹnmwẹ gha họn ẹmwẹ ọnrẹn. Rẹn i ra ghe ikpanro ra erriọ I họẹn ya bu ohiẹn,

⁴ ọ gha bu ohiẹn ẹmwata ne ivbiogue ọ ghi mu ẹzọ iran ne ẹ i mwẹ gui ọ ghi yi iyi wẹ ne a rri avbe emwa nii oya, avbe emwa dan gha vbe wulo.

⁵ Ẹmwata kevbe uhunmwu ẹmwẹ ọ re ọ ra ya gha khaemwisẹ yan emwa rẹn.

⁶ Avbe oduma kevbe ohuan gha gba gha rrọ kugbe vbe ọfumwegbe, avbe ogioha gha gu avbe ivbi ẹwe lovbiẹ ivbi ẹmila kevbe ivbi oduma ghi koko gha rri evbare ibiẹka giẹrẹ ghi gha gbearoghe iran.

⁷ Avbe ẹmila kevbe avbe akpakomiza gha gba gha rri evbare, ivbi ẹmila kevbe ivbi akpakomiza ghi gba gha rrọ vbe ọfumwegbe. Avbe oduma ghi gha rri irunmwu vbe ẹmila.

⁸ Ovbi ọmọ obọ sẹtin gha ku vbe ehe ne ẹyẹn ne ọ mwẹ obi ye vbe ne ẹ i na ho ẹre ẹmwẹ.

⁹ A i ra miẹn emwi dan okpa ra emwi ne ọ kuan ọmwa egbe vbe Zaiọn, ne oke nọhuanrẹn ọghe Osanobua. A rẹn e Nọyaẹnmwa gha vuọn otọe nii zẹ vbene amẹ vuọn okun.

Iran Ni Yo Iwe Gha Ke Iwe Rre

¹⁰ Ẹdẹ dee ne ọba ọgbọn ne ọ zọ ke uniẹn e Devid ladian, gha na gha re ama ne uhunmwu ẹvbo hia. Iran gha si koko vbe ẹvbo ọba ẹre, iran ghi gha rhie ọghọ ne ẹẹn.

¹¹ Ọ gha sẹ ẹdẹ nẹdẹrriọ, e Nọyaẹnmwa gha dọlegbe lo ẹtin ẹnrẹn, ọ ghi viọ iran gha die owa ighẹ avbe emwa rẹn ni ghi dekẹe vbe Asiria kevbe Igipt, vbe otọe Patros, e Sudan, Ẹlam, e Babilọn kevbe Hamat, deba ni rre avbe eghute kevbe avbe otọe ne amẹ lẹga vbe okun.

¹² E Nọyaẹnmwa gha tọn afiala ama mu ne ọ ya rhie ma avbe uhunmwu ẹvbo wẹẹ te irẹn ra dọlegbe si iran koko ighe avbe ivbi Izrẹl kevbe Juda, kevbe wẹ te irẹn viọ iran ke igienenẹ otọ agbọn dee.

¹³ Otọe arriọba Izrẹl i ghi ra vbe dọlegbe gha gu e Juda taekpẹn ọvbehe, e Juda i ghi ra vbe gha re oghian Izrẹl ọvbehe.

¹⁴ Iran gha koko dekun e Filistia ni rre odẹ ọlarrie owẹn, iran ghi vbe fu iran ni rre odẹ ahọ emwi viọ. Iran gha khọn ivbi Idọm kevbe Moab, ivbi Amọn ghi gha họn ẹmwẹ ne iran.

¹⁵ E Nọyaẹnmwa gha ka e Suẹz muotọ, ọ ghi ya ẹhoho ne ọ mwẹ ọghae ka Ẹzẹ Yufretes muotọ ọ ghi sẹ ivbiẹzẹ tẹghẹtẹghẹ kẹkan rae sẹrriọ wẹ ọmwaikọmwa sẹtin ye owẹ fian ẹn rra.

¹⁶ Odẹ nọ vbẹe ọkpa gha la Asiria ladian ne avbe ivbi Izrẹl ni miẹn uhunmwu vbe evba, zẹẹ vbene ọ vbe gha rrọọ ne avbe erha iran odede vbe iran kpao vbe Igipt rre.