Aizaia 10 - Edo Bible (E Baibol Ẹdo) Version 1996

¹ Ọghe uwa fo nẹ! Wa ni yi uhi dan ne a ya gha wọ avbe emwa mwẹ uhunmwu.

² Erriọ ọ re uwa ru ẹe ne uwa i na gie emwi ne ọ khẹke avbe ivbiogue sẹ iran obọ, wa i gie a bu ohiẹn ẹmwata ne iran. Erriọ ọre uwa vbe ya viọ ukhu ne ọ sẹ ẹgbẹ kevbe emọ ne ẹ i mwẹ erha obọ.

³ Osanobua gha rria uwa ikhi nian, demwi ne uwa ra miẹn ru? Demwi ne uwa ra miẹn ru vbe ọ gha ke odẹ ne ọ rre tie ọfuan yan uwa uhunmwu? De ọmwa ne uwa gha lẹgbinna? De ehe ne uwa gha viọ avbe ẹfe uwa lẹre yi?

⁴ Iran gha gbele uwa a vbe okuo ra iran ghi silo uwa viọ gha rrie zẹ vbe oghunmwu. Ọ gha rhe ye rrio, ohu e Nọyaẹnmwa i he ye fo, obọ ẹre gha ye niẹn ladian ne ọ ya rria ikhi.

Ọgbaisi Asiria Zẹvbe Emwi Ne Osanobua Ra Lo

⁵ E Nọyaẹnmwa keghi kha wẹẹ, “Asiria, te imẹ lo Asiria zẹ vbe orhokhua ne I ra ya rria iran ne ohu ẹre mu mwẹ ikhi.

⁶ Mẹ gie Asiria ne ọ do khọn ẹvbo dan ne ọ ya ohu mu mwẹ. I gie iran ne iran ya fu emwi viọ, ne iran ya rha, kevbe ne iran ya owẹ rrilo emwa mu otọ zẹ vbe iruẹn vbe adesẹ ore.”

⁷ Sokpan, ọgbaisi Asiria wa vbe mwẹ iro ọkhọ ọghe obọ ẹre vbe ekhọe. Te irẹn wa mu egbe ne ọ fuẹn uhunmwu ẹvbo nibun uan.

⁸ Rẹn keghi rhuọ wẹẹ, “Ọba ọ re ọkpọkpa vbe uwu avbe ọkaokuo mwẹ khin!

⁹ I khọn avbe ẹvbo ne a tie ẹre Kalno kevbe Kakẹmis, e Hamat kevbe Apad. I khọn e Sameria kevbe Damaskọs.

¹⁰ I kevbe niẹn obọ ya rri avbe ẹvbo ni gho ẹbọ oya, avbe ẹbọ ni bun sẹẹ ni rre Jerusalẹm kevbe Sameria.

¹¹ I rẹnkhẹẹn e Sameria a, deba avbe ẹbọ ẹre hia erriọ I ra vbe ru e Jerusalẹm deba avbe amazẹ ne iran gho vbe evba.”

¹² Sokpan, I gha ru emwi ne I ru vbe Oke Zaiọn kevbe Jerusalẹm nẹ, I gha rri ọgbaisi Asiria oya ye orhuọ hia ne ọ rhuọ kevbe uhiomwẹ ne ọ hio.

¹³ Ọgbaisi Asiria gha rhuọ, ọ wẹẹ, “Ekuabọ mwẹ ọ re I ya ru ehia, I wegbe, I waan, I vbe rẹn emwi. Mẹ ọ re ọ khiẹn uwu ne ọ rre ẹkpo uhunmwu ẹvbo hin rre, I ghi ya viọ evbare ne iran te ya gbakhua hinrre. I keghi ya igiawẹ gbele emwa ni rre evba vbene ekhuia ẹmila ru.

¹⁴ Avbe uhunmwu ẹvbo hia keghi yevbe oko ahianmwẹ. I keghi viọ ẹfe iran vbe ne edogbandogban i na rrọ, zẹ vbene a viọ ekẹn ahianmwẹ vbe oko. A ma vbe miẹn ne ọ gbe ifuẹn ya ghagha mwẹ; ra ne ọ vbe rhan ukpe ya tu da mwẹ!”

¹⁵ Sokpan, e Nọyaẹnmwa khare wẹẹ, “Ughanmwa gha kha ighe rẹn ọ re ọ sẹ ọmwa ne ọ ya ẹe winna ra? Ọsara ọ re ọ vbe kpolo sẹẹ ọmwa ne ọ yae va erhan ra? Orhokhua i tọn ọmwa mu, ọmwa ọ re ọ tọn orhokhua mu.”

¹⁶ E Nọyaẹnmwa ne Oghodua ra gie emianmwẹ ya rri iran oya ighe avbe emwa ni miẹn evbare re ẹsẹse nian. Erhẹn ne ọ yọn kpoo gha rre iran uwu egbe.

¹⁷ Osanobua ne uwanmwẹ Izrẹl gha khian erhẹn, Osanobua Nọhuanrẹn ọghe Izrẹl gha khian ogidi erhẹn ne ọ gha giẹn emwi hia a vbe ẹdẹ ọkpa, ya sẹ egbe ogigban kevbe ọkọsọ.

¹⁸ Avbe ẹgbo ni wo nii kevbe avbe otọe ugbo hia gha khian ne a mu rhia zẹ vbene emianmwẹ dan mu ọmwa rhia.

¹⁹ Erhan ne a gha sẹ rae gha re ne ẹ i ghi bun sẹrriọ wẹ te ọvbokhan kherhe gha sẹtin ka iran.

Ikpibo Gha Werriegbe Rre

²⁰ Ẹghẹ dee, ne a gha na miẹn wẹ iran ni miẹn uhunmwu vbe ivbi Izrẹl i ghi ra gha mu ẹtin yan avbe uhunmwu ẹvbo ni te ra wa fuẹn iran an fẹẹrẹ. Iran gha mu ẹtin yan e Nọyaẹnmwa ne ọ re Osanobua nọhuanrẹn ọghe ivbi Izrẹl, vbe ẹmwata.

²¹ Ibozẹghẹ vbe uwu ivbi Izrẹl gha dọlegbe bu Osanobua iran ne ọ mwẹ ẹtin gha dee.

²² A gha rhe miẹn wẹ banbanna, te ivbi Izrẹl ye vbe ekhae ni rre ọkpẹn okun vbe ubunmwẹ, ibozẹghe ọ re ọ ra werriegbe rre. Ọfuan wa diakhẹ emwa na, vbene ọ wa ma iran zẹẹ.

²³ Ẹn, e Nọyaẹnmwa ne Ogie ne Udazi gha gie ọfuan la ẹvbo nii khinkhian, zẹ vbene ọ tae ighe rẹn gha ru ẹe.

E Nọyaẹnmwa Gha Rri Asiria Oya

²⁴ E Nọyaẹnmwa ne Ogie ne Udazi keghi tama emwa rẹn ni rre Zaiọn wẹẹ, “Wa ghẹ gie afianma ivbi Asiria fian uwa, a gha rhe miẹn wẹ iran wọ uwa uhunmwu vbene ivbi Izrẹl ka vbe gha ru ẹe.

²⁵ Vbe ọma he kpee na, I gha rrii uwa oya sẹ vbene I ho nẹ, I ghi dobọyi, I ghi ya fuẹn iran an.

²⁶ Mẹ ne Nọyaẹnmwa ne Udazi gha ya asan gbe iran zẹ vbene I ru ivbi e Midian vbe Okuta Orẹb. I gha rri Asiria oya zẹ vbene I rri Igipt oya.

²⁷ Ẹghẹ nii gha sẹ I gha fannọ uwa yotọ hin obọ ẹtin Asiria rre, urọnghọn iran i ghi ra ye dọlegbe gha re ihẹ vbe izabọ uwa.”

Iran Ni Mu Okuo Rre Fi Emwi

²⁸ Ivbi iyokuo avbe eghian khọn mu Eai nẹ! Iran la Migrọn gberra nẹ! Iran sẹ evbare iran rae ye Mikmas!

²⁹ Iran fian uwu rra nẹ, iran ra hẹwẹ la asọn ni vbe Geba! Ohan mu emwa ni rre Rama, emwa ni rre Gibea ne ẹvbo e Sọl lẹ kua.

³⁰ Wa datu, wa ne ivbi e Galim! Wa danmwehọ, wa ne ivbi e Laisia! Wa khuẹnniẹn wa ne ivbi Anatọt.

³¹ Ivbi e Madmena kevbe Gebim gha lẹ ne obọ ghẹ vba iran ya gbe.

³² Vbe ẹdẹnẹrẹ na, avbe eghian wa rre Nob nian, iran gha ke evba niẹn obọ ye Oke Zaiọn aro, deba ore nọkhua e Jerusalẹm.

³³ E Nọyaẹnmwa ne Oghodua gha rrua iran guọghọ ua vbe abọ erhan ne a gia hin erhan rre. Ne ọ tọn egbe mu sẹẹ, kevbe ne ọ kpọlọ sẹẹ; vbe uwu iran, a gha gia ehia gbotọ, a ghi fa iran an.

³⁴ E Nọyaẹnmwa gha tọnnọ iran gbotọ vbene a ya ughanmwa tọnnọ erhan kua vbe uwu ẹgbo, zẹ vbene erhan ni maa sẹẹ vbe Lebanọn dele.