Ụhịrẹyị 6 - IWE ỌNỊNỊ

Asị ụ jẹẹ yị ọnụta

¹ Ozi emi, wàa jẹẹ yị ọnụta ẹnyẹnyị,

² ịrẹyị irenu awụ aa vị ịrẹpa za wụ nị.

³ Ka wa sị ngụ ọza ọnọọ ụvọ, ịsị vaa mẹ dị wa ha yị. Na da ịpẹ yọ, dị wa tụ ụvọ awụ hụụnị anị.

⁴ Asị u du ụmẹ ha, asị ụ sụ ara tụra ịrẹsụ.

⁵ Tụ̀ ẹngụ awụ hụrẹ ẹ ụvọ anka akọnọ mee zwe yị ozube avọọ, a vị inomi mẹẹ tụ̀ ọza ụvọ avọọ.

⁶ Ẹwụ nịnị onuworo, ne re ihine dị wa kọsẹ ịrẹyọyẹ hụụnị ẹhẹ ẹnịnị.

⁷ Ẹnịnị ẹ yị nyị ọdọvịdị ẹnyẹnyị.

⁸ Ama ẹnịnị vị ana kụ ịsọyịrị ẹnịnị tẹ ịnị ụmẹ ọnị ịsa ịnị aarẹ ọ̀ọ sị hụrẹ.

⁹ Onuworo, ụ́ụ́ sụ ara pooro kẹnẹ nị? Yere ụmẹ ọnị ụ vaa ha hụụnị ara?

¹⁰ Waa sụ ara, dị ụ ha nị, dị ụ jị ụvọ za ẹngụ tụ ịnị osusu.

¹¹ Osiye vị ana vaa tụ wụ ahwaahụ anka anako nịnị mẹẹ̄ dọ ọza ịsa ọnị ọ nyị avọọ.

¹² Aza odivi vị ene eē cheeche yẹrẹ-yẹrẹ zị.

¹³ Ẹ sị eyi kà a, dị ẹ sị ahụ kà a, dị ẹ sị ụvọọ jị uwe.

¹⁴ Ẹnịnị vi eneē ro ịrẹyị odivi ọza pooro, dị ẹ yaa kụ aza ịrẹsụ nya ẹngụ;

¹⁵ avọọ, odivi vị ana sụ wa avaavo, dị ẹ yị zụ ha.

Ịsa ịhịmba ọnị Ẹnẹyịmavara nyị ịhyẹrẹ anị.

¹⁶ Aa nyị ịsa ịhịnọnyị ọnị Ẹnẹyịmavara nyị ịhyẹrẹ anị. Dị a nyị ịhịmba ana vị enyisi yị ọ nị.

¹⁷ Ẹnẹyịmavara ọ nyị ịhyẹrẹ ọza ana a sị ẹngụ tụ ẹba, ọza ene cheeche ọnịrị ọza ana a wụ̀ ọza kẹnẹ-kẹnẹ.

¹⁸ Avọọ ọ mẹ rẹ nyị ịhyẹrẹ ọza anaā sịị ọhịmị ọza tu ịnị ayị ọnịrị ọza ọnị ahịka odivi ọọ hụụ ọ ịra mẹ̀ nị.

¹⁹ Dị ọ rẹ nyị ịhyẹrẹ ọza anaā dọ ivenu ireche, dị ọ tụ́ ịrẹyị tụ ịnị akakana ẹyịnyara.

Ọgụ ọza ana wụ́ ịrẹyị aza ana ma a

²⁰ Ozi emi, wụ́ ịrẹyị ada awụ. Asị ụ hi ayị ịrẹyị ọnị ọnyị awụ kà yị wụ.

²¹ Waa tamayị anị ụmẹ tụra ụmẹ, dị asị ụ hi ayị anị.

²² Navọ ịrẹyị ẹnịnị ọọ zụ wụ oze, dị ọọ sere wụ ịrahụ, dị ọ vị ọnịwọjị awụ ọọdụ.

²³ Ịrẹyị ọnị ẹ yaa sị zụ ọza vị ana sị eyi ọzaa hweyi tu ịrẹyị, dị ohuvọ ọnị ẹ tụ́ ezii mẹ ka ọza ọ yẹ tu ẹhẹ nị.

Asị ụ sẹ̀ ịrẹka

²⁴ Ịrẹyị ẹnẹẹ vaa dọ wụ ha hụụnị ụvọ anẹẹ odivi anaā sịị ịbẹhị vene ọnọrụ zị.

²⁵ Asị ụ zẹ ka uzoza anị ọ dọ wụ ayị. Asị ụ zẹ ka eyi ọyịmẹ̀ anị o vene wu ngụ ọ ụvọ.

²⁶ Ọnọrụ ọ hyakụ nyẹngụ sị apapa sị ọsẹrẹka, ama ịbẹhị vị anaā va ọnọrụ hu.

²⁷ Ọza ọ́ọ́ zụ ka ịra hi ịta vwụ dị asị ịra rị ọ?

²⁸ Ọza ọ́ọ́ zụ zị ụsẹ ịrẹsụ akịna dị ahụ anị ẹ yị hụ?

²⁹ Avọọ ọza ana dụ ose ọzaa zị mẹ vee re nị. Ọ yị zụ mẹ̀ ẹ dị ọọ sị rị.

Ọgụ ịrẹkọyịsẹ

³⁰ Ẹ yị divi, ọza ọnị ụngwẹ aa kụ òo nee yi ịsọyịrị na rị.

³¹ Ama aa za a, dị ọ si ụta ụpẹ ịhịmba, dị aa dọ avaba ọnị ọ nyị tụ ịnị eehi anị.

³² Ọnọrụ ana aa sị ose ọza ọ yị yẹ ịrẹyị. Ẹngụ anị kẹnẹ aa va nẹtẹ nị.

³³ Ẹngụ ọza ọnọọ vị anaa tọ ụnava, dị aa mẹ̀ ụhị nyị ọ, dị ọ vị ụhụ yọ pooro.

³⁴ Ọva ọnẹẹ ana a za ọnịrị ọ, ọ yị vaa va ịrẹma anị. Ayị anị vee du agụvị ka a kụ́ ụ́hị́.

³⁵ Ọ yị vaa dọ ịsa ẹnyẹẹnyị sị ụta ịsị ana mẹ̀ ẹ. Ọ yị vaa dọ ochirerenu, ọ̀ọ daka banyị.