Ụhịrẹyị 4 - IWE ỌNỊNỊ

Ịrẹyọyẹ ọnị ada a sị pa ozi

¹ Ẹwụ nịnị ezi, wụ́ ịrẹyị ada awụ nịnị. Sị ụtọ pe ịrẹyị ẹnịnị agụvị wa yẹ ịrẹyị.

² Ajuwe ozoza ma sị wụ aanị nị. Asị ụ ne e ta o.

³ Ụmẹ ọnị mị sị vị ozinụvọ, dị mị vị ọnọrụ ikonya tụ ọnyị ọnịrị ada amị ụvọ.

⁴ Ada amị ọ kà a yị mị ka asị mị hi ayị ịrẹyị anị. Ọ kà ma saasa a agụvị ẹhẹ amị o zee yị mị.

⁵ Asị mị hi ayị ịrẹyị anị, dị asị va ịrẹma ka a agụvị ma nyị ịrẹyọyẹ, dị eyi amị o hweyi.

⁶ Ọ kà asị mị ne ịrẹyọyẹ ta agụvị vị o sere mị. Màa sị ụvọ za a ọ̀ vaa dọ mị tụ.

⁷ Aanị ọza mẹẹ nyima ọyị nyị ịrẹyọyẹ nị. Vịdị dụ ịrẹyọyẹ da, dị wa vaa dụ ịsa ana vọ.

⁸ Waa dụ ka wa yẹ ịrẹyị. Ọnị ọ vaa sị wụ tụ ẹba, dị ụ nyị ụbanyị nị.

⁹ Ịrẹyọyẹ vị anaā jị ọza ubobo ohinọyị.

Ịrẹyọyẹ vi ene sere ọza, dị ọ̀ sị ọ ku orubo

¹⁰ Ozi emi, wụ́ ịrẹyị amị. Wàa dọ ịrẹyị amị tụ ịzọọ, u vee ku orubo nị.

¹¹ Ma raa zụ ụ ịrẹyọyẹ ọnịrị a mẹ vọrọ ka wa ra ẹhẹ awụ.

¹² Wàa zị ụsẹ, ẹ yị nyị ịsị ẹ vaa jẹ oze awụ. Wèe zwe echi, wẹ yị vaa tụ ahụ.

¹³ Sị ụvọ za ịrẹyị ana a ka yị wụ. Ịrẹyọyẹ ọza sị mẹ̀ ẹhẹ nị.

¹⁴ Asị ụ hama aza anaā mẹ̀ ebira odivi, asị ẹwụrị wa zị ụsẹ vabẹ.

¹⁵ Asị ụ hama wa, asị ụ saasa wa, sị oze ẹnịnị tịtẹ yị wa.

¹⁶ Aza ọhịmị ẹ mā zụ sụ ara ẹ vị ẹ mẹ̀ ịsa odivi. Ẹnịnị vị anaā jị areyi agụvị dị ẹ kụ odivi tu ọza.

¹⁷ Ebira odivi ọ vị ịsọyịrị ẹnịnị, dị ezigi ọyị mẹ̀ sị mẹ anka enyi oyihú yị wa avọọ nị.

¹⁸ Ọnịrẹyịzẹyịza ọọ̄ ma hụrẹ ayịnẹ. Ẹhẹ anị ọ mā nyị ọjịrẹka.

¹⁹ Ẹhẹ aza edivi vị ana sị mẹ anka ịrahụ ruma-ruma avọọ. Ẹẹ̄ vangga jịnẹ ịsa ọnị ẹnịnị e yi re nị.

²⁰ Ozi emi, wụ́ ịrẹyị ana a ka yị wụ. Sị ụtọ pe ẹtẹ.

²¹ Asị ụ hi ayị ịrẹyị ẹnẹẹ, waa tama ayị anị.

²² Ịrẹyị ẹnẹẹ vị ana a mẹ̀ ẹhẹ zee yị aza, dị ẹ nyị ẹngwọọrọ.

²³ Sị eyi pe ẹtẹ ụ mẹmẹ e ro ịrẹyị. Ọza mee ro ịrẹyị ọọ ra ẹhẹ anị nị.

²⁴ Asị ụ cheeche, asị ụ vene ọza.

²⁵ Navọ ịsị ụ và tụ ọvịdị kẹnẹ ọ jị wụ areyi.

²⁶ Sị eyi pe oze ọnị waa zị, agụvị wa yẹ ịsị waa mẹ.

²⁷ Asị ụ há hụrẹ oze nọ eyi ụvọrị a vị eyi ụvọha. Va hụụnị ebira odivi.