Ụhịrẹyị 30 - IWE ỌNỊNỊ

Ịrẹyị ọnị Agụ kà

¹ Â nyị ọnọrụ ọnya aanị ana aā hị́ Agụ ana vị ozi Ijake. Anẹkụra ana a hị́ Imasa ọ vị nị. Ịrẹyị ẹnẹnị ọ ka yị Itiyẹrị ọnịrị Ụkarị nị.

² Ộ ka ụra vị ana nyayịnẹ chi ọnị ẹngụ, ọnị ọ yị nyị apara ọza tụ ẹngụ.

³ Ọnị ọ yị kọsẹ ịrẹyọyẹ, dị ọnị ọ va yẹ ẹngụ ọza ọnị Ohomorihi vị.

⁴ Ẹnẹ na ẹbẹẹba, ene chi vẹ da? Ẹnẹ sị ụvọ za ahị da? Ẹnẹ sị achị gụ enyi ịrẹgụ da? Ẹnẹ tẹ ẹhị ẹhwị ẹtẹ avaba ẹhẹ? Ịrẹha ọza ọnọọ rị? Ịrẹha ozi anị rị? Kà a mị ẹnẹ ọ vị?

⁵ Avaba ịrẹyị Ohomorihi vị ịzẹyịza. Ọnị ọọ̄ dọ aza ene zwe na rị ọ tụ anka ogonto avọọ nị.

⁶ Asị ụ da tụ́ ịnị ịrẹyị anị agụvị asị ọ tụ̀ wụ ohuvọ ka onireeche ụ vị nị.

⁷ Agụ kà ịsa ẹẹva ọnị pa Ohomorihi ka ọ sị yị ọnị dị ọnị o vee su nị.

⁸ Ộ ka Ohomorihi ọ sị apẹ ọnịrị ireche noze rịịrị ọnị. Asị ọ zẹ ka iruwa ọ za ọnị, dị asị ọ rẹ mẹ̀ ogu hi ẹtẹ yị ọnị baaba, ama ọ sị ẹhụ ịsọyịrị anị kẹnẹ yị ọnị.

⁹ Asị ịnẹ na ha ọnị baaba, dị ọnị o hi ayị Ẹnẹyịmavara. Asị osiye ọngwọọngụ za ọnị, dị ọnị o vee yi ọ tịtẹ, dị ọnị vaa mẹ̀ ụhị nyị yọ.

¹⁰ Asị ụ du ozi ahụ zụ ọga anị, agụvị asị ọ vaa tụ ozirenu hi wụ, dị ọ za wụ.

¹¹ Aa nyị aza ẹnyị anaā kụ̀ ada ẹnịnị ụhụ. Avọọ ẹ mẹ rẹẹ̀ ka chire ọnyị ẹnịnị nị.

¹² Aza ẹnyị vị ene ro ka ẹnị ẹ gụ ịnị eyi ẹnịnị, ama ẹnịnị e divi anka ụsẹmụsẹ ịnị ututu.

¹³ Aza ẹnyị vị anaā sịị ẹngụ ẹnịnị tụ ẹba, dị ẹ yaa sị eyii wụ̀ aza ana vọ.

¹⁴ Aza ẹnyị vị ana aa ha ọhọha, dị ẹ yaa za onosiye ọnịrị anarịmanyị nịnị mẹ ụngwẹ.

¹⁵ Ọnọhọha vị anaā sịị ụvọ ẹẹva rị ịsa. Ẹẹ̄ pa ịsa pooro kẹnẹ nị. Â nyị ịsa ẹẹna ọnị ẹ yị mā hụ ọza.

¹⁶ Ịnẹ ọ yị mā ha ẹtẹ anaā rị ọza. Ọbọrị ọ yị mā hụụnị ozi oyi si. Enyi ọ mā hụ ẹtẹ hu. Ọkụ ọ mā hụ ịra rị.

¹⁷ Ozi anaā sịị ada anị ọnịrị ọnyị anị mẹ̀ enyinyi, dị ẹ yị wụ́ ịrẹyị ọnyị anị vị ana vaa vị oku ụ̀ba.

¹⁸ Aa nyị ịrẹyị oze ẹẹta a vị ẹẹna enee hi mi irenu ọnị mẹ yị yẹ tu.

¹⁹ Ẹ yị nyị ọza ana yẹ oze ọnị ọkasịmẹẹ̄ vatụra hịrẹ nọ ẹbẹẹba, a vị ụparị ọnị ẹ́wụ́ụ̄ vatụra ịrẹsụ ịrẹta, a vị oze ọnị ẹpa zị ịrẹsụ enyi, a vị oze ọnị ọnọrụ ọnịrị ọnyẹnẹẹ zịị si ẹngụ.

²⁰ Aanị ẹhẹ ọsẹrẹka mẹ ya nị. Ọ̀ọ na sị ẹnya hụ, di o tenyi ẹngụ anị chịmị-chịmị va jẹẹ. E yi re ka akụvị ọnị aa mẹ̀ nị.

²¹ Ịsa ẹẹta a vị ẹẹna anaā kata ẹhẹ ẹngụ:

²² ọrịhị ọ̀ọ vị ohinọyị, a vị ọnụra ọ̀ọ nyị avaba ịsọyịrị ọnị e sì,

²³ a vị ọnyẹnẹẹ ọnị aza nyị ịhyẹrẹ anị ọ̀ọ nyị ọnọrụ, a vị ozi ahụ ọ̀ọ dọ ọnyirehi anị ọnọrụ.

²⁴ Â nyị ịsa ẹẹna ịrẹsụ ẹtẹ ene weyi ama dị ẹ nyị ịrẹyọyẹ ẹnẹmẹhị nị:

²⁵ Ihine ẹ yị nyị ụkata ama ịsọyịrị ẹnịnị vị ẹnẹẹ̄ kụ tẹ̀ ịnị ụmẹ ịsa ọyịna.

²⁶ Avụyẹ ẹ yị nyị ụkata ama ụsị ẹnịnị vị ana yị ịnị akakana ịrẹta.

²⁷ Akụvarịva nịnị ẹ yị nyị ohinọyị ama ẹẹ̄ va tụra ẹngụ e mẹmẹ huna ẹngụ nị.

²⁸ Azịzẹngụ vị ịsa ọnị ọza nyẹngụ sị ụvọ za, ama ọzaā re wa ini eehi ohinọyị.

²⁹ Â nyị ịsa ẹẹta a vị ẹẹva enee hu ahụ ohi:

³⁰ Udu ana nyị ụkata huu ịnị avaba uye o yi mē hí angwa,

³¹ a vị ụkọkọrọ ana va ọga hịrẹ, a vị ịdẹ ịnị ataba, a vị ohinọyị ọ yaatụ ịrẹsụ ode ọvịdị aza anị nị.

³² Wàa mẹ̀ ụra di u wee wu ụka nị, a vị wàa mẹ̀ eto odivi, za ụvọ jẹẹ wee rò o daa.

³³ Anka ịrẹva ana a kama mẹẹ̄ nyị angwẹ, aa pịrị ọza aahị baaba vị aa jịra, avọọ ọza yị yara ee si ọza ịrẹyị ọ vara ịrazị nị.