Ụhịrẹyị 27 - IWE ỌNỊNỊ

Asị u wo oto ụhwọọ

¹ Asị ọza wo oto ịrẹyị ụhwọọ agụvị ka ọza ọ yị yẹ eyi ana vaa nị.

² Navọ ọzẹnẹsa ọ ga wụ, asị ẹwụ ụvọta ga ẹngụ awụ. Anusoze ọ yẹ akụ ọ̀ọ hụ và nị.

³ Ẹngwẹngụ ọnị ọyịkụ ụraa kụ tu ọza o divi huni ka ọza o kune ịrẹta za, a vị ka ọza za ààrẹ nị.

⁴ Ọza anaā kụ ayị óo divi, ama ọza anaā kụ́ ụhị o divi hu nị.

⁵ Ọza ọ̀ tụ ọza ohuvọ ịnị eyigede ọ mẹ hụụnị ka ọza oo gu ụra hi ọza ẹngụ ka vị́ ọnị vị ọta anị nị.

⁶ Ọza ene re ịrẹyị ọza dị ọ kà a, ọnị ọ vị ọta anị huni anayịmụkụ ana sị ọhịmị ọza tụ ịnị ịnẹ dị aa za a ku ayị nị.

⁷ Ịnẹ ọ̀ọ sị ọza ha ịsa ọ̀ọ daka hine pooro vị ee du ọ eyi nị, ama ọza ọnị ụngwẹ aa kụ̀ ọ mā yẹ ịsa ọ̀ọ daka nyịrẹyị.

⁸ Ọza ana para eehi anị hu sị mẹ̀ anka inomi ene vu para ịrẹngwẹ anị hu avọọ nị.

⁹ Ajuwe ọnị ọta obooro sị yị ọza óo hine ọza ayị huni agụ ozoza ọnị eturare aa da nị.

¹⁰ Ịrẹyị òo tu wu, asị u hi ayị ọta awụ ọnịrị ọta ada awụ. Ọsụgụrẹngụ a ka ọ rụra re ẹngụ nị.

¹¹ Ozi emi, navọ waa mẹ̀ ebira ịrẹyọyẹ, dị ayị amị oō hine. Dị ma zụ va ohi yị aza ene du mị

¹² Ọza ana yẹ ịrẹyị vị ene zwe yị ịrẹyị, ama ọnụra vị ana a na gẹrị ọ dị ọ̀ vaa sụ́ ụmayịyẹ.

¹³ Ọza ana àa na jẹẹ yị ọzọga ịnị ụta ọnị ori, vị a vọrọ ka à dọ ọ ẹnya si ụta nị. À dọ ọ ịsa ọ̀ọ sị tịtẹ yị anẹkụra ọsa.

¹⁴ Ọza ana ha ara ẹnẹnẹ nee nowu ka vị ọnị aa kụ́ ọta anị nị, vị ana sị mẹ̀ ẹ anka ọza anaa tụ ozirenu avọọ.

¹⁵ Ọnẹẹ ana vị ọnịrẹyị vị eneē du ọza ayị anka orihi ana dọ ẹkụhị dị ọ yị jị avọọ nị.

¹⁶ Ọ rẹ sị mẹ anka ahị ọnị ọza ẹ yị zụ za jẹẹ avọọ nị. Ọ́ ya anka angwẹ ana ka hi ụvọ ohihi di e sii ẹngụ ọmọọma avọọ nị.

¹⁷ A mẹẹ̄ sị enyusẹ ẹnyị ne ọsa, avọọ ụvọ ẹẹva mẹẹ̄ nyịna ẹngụ nị.

¹⁸ Ọ́za eneē tenyi aarẹ mẹẹ rị ịnị anị, avọọ ọza eneē sere ọga anị mẹẹ rị aha anị nị.

¹⁹ Ọza meē re ẹngụ anị ịnị enyi, avọọ ayị ọza mẹ sịị̄ zụ ịsị ọza vị nị.

²⁰ Ịnẹ ọ mā ha iswọọza ọnịrị ikuta, avọọ ọza ẹ̀ yị ma zụ nyị avaba ịsa ee sì nị.

²¹ Ịra a sịị̀ zama igooru ọnịrị isiriva re nị, ịsị aza aa kà ịnị ịpa ọza a sịị̀ yẹ ẹngụ ọza ọnị ọ vị nị.

²² Ọza ọ daka tụ́ ọnụra anka a meē tu ayị ọnịrị ụra anị aa yịị zị nị.

²³ Re ka waa yẹ ịsị aa na ịnị ẹngụ ịsụpa awụ, dị waa tẹsị ẹnịnị ẹtẹẹtẹrẹ,

²⁴ agụvị ka ogu ọ maā jẹẹ ọza ụvọ pooro, ọza ịnyara ọ mā rẹ rị ohinọyị pooro.

²⁵ Àa ka avị ọnị ịsụpa aa rị hụrị aha, dị a rẹ na ka avị hụụnị ataba nị, dị ọsa nyị tu udi anị.

²⁶ Wa zụ sị ẹyị ezi atẹmẹ awụ hi ịta ku ẹngụ, wa rẹ zụ nyị ẹvụ awụ ná dị ụ sị hị́ ẹtẹ tịtẹ.

²⁷ Enyi ịrẹva ẹvụ awụ ana vọ vaa hụ ẹwụrị aza awụ mẹ ịsọyịrị. Dị ezi ahụ awụ anẹẹ ẹnị raa rị bẹẹ.