Ụhịrẹyị 25 - IWE ỌNỊNỊ

Ụhịrẹyị Isoromọnị ana vọ

¹ Â nyị ụmẹ ọnya aanị ọnị Ihezekaya sị vị ohinọyị ẹtẹ Ijuda. Ịnị ụmẹ ọnọọ, ẹnị ọchẹrịsa ohinọyị nịnị ệ chẹrẹ ụhịrẹyị ọrụrụ-ọrụrụ Isoromọnị ana vọ tịtẹ nị.

² Ẹyị azaā sị ụbanyị yị Ohomorihi agụvị ka ọnị oō mẹ̀ ịsa ọnị ọza ẹ yị yẹ uruvo anị nị. Dị aza rẹ sị ụbanyị yị ohinọyị nịnị agụvị ka ẹnị ẹẹ̄ mẹ̀ ẹhahi ịrẹyị zụ aza nị.

³ Ọza ẹ yị zụ yẹ ịsị ẹ ya ịnị ayị ohinọyị. Ẹbẹẹba me noze, dị eteesu ọnị rẹ nyịnẹ, avọọ aro ohinọyị mẹ noze rịrị aza nị.

⁴ Aa raa sị ịra hụ akịka hụụnị enyusẹ anaā hị́ isiriva, dị ọ vị ịsa ọkụmị-ọkụmị ana a nyẹngụ sị tu ịsa ene ozoza.

⁵ Aa kụ anajuwe odivi kwooze yị ohinọyị, ọ vaa sị ịzẹyịzaa mẹ ịjọva.

⁶ Asị ụ sị zụ ka aa nyị ịsị ụ vị ọvịdị ohinọyị. Asị ụ vene ẹngụ awụ o.

⁷ Navọ a hi wụ na yaatụ aha ụbanyị, ọnọọ ọ mẹ̀ hụ ka a dụ wụ kwẹẹtẹ yị ọza ẹnẹsa ka ọ yaatụ aha ọnọọ nị.

⁸ Asị ọza ha eyi sị ịrẹyị nọ ikootu, onivenu ọ̀ọ na kụ ịrẹka za wụ. Ụ́ụ́ ma mẹ̀ ụhị ọnọọ?

⁹ Ẹwụrị ọza ọ̀ nyị ịrẹyị, mẹ̀ ọkarẹyị anị yị ẹngụ awụ nịnị dị asị ụ kụ ọ iruvo hi ẹhẹ.

¹⁰ Ụhị ọ vaa vị yị ụ nị, a sị ụ yẹ ka irenu awụ ọọ̄ ma tịtẹ.

¹¹ Ịrẹyị ọnị e tenyi tụ irenu kà sị mẹ anka igooru ana sị dọ achẹrẹ tụra ịrẹsụ isiriva avọọ nị.

¹² Ịrẹyị ọnị ọyẹrẹyị ka yị ọza ana nyị ụtọ sị mẹ anka àa sị ọmọ mẹ ọza ẹyịza.

¹³ Ọnụtụ obooro vị anaa sị ayị ọza ana tụ ọ ụtụ nẹtẹ anka ọza o hú enyi ohunẹnẹ ịnị ụmẹ ẹtẹ ọngụra avọọ.

¹⁴ Ọza anaa ka ịrẹyị, dị ọ yị mẹ̀ ẹ sị mẹ anka eguhi osusu avọọ nị.

¹⁵ Ayọnẹtẹ aa sị dọ ohinọyị ayị nị. Ịrẹyị anaa sị ụmẹnụmẹnẹ ka ọzaa sẹdẹ yị nị.

¹⁶ Wẹ̀ẹ re ẹhụ, rèé ẹ̀hụ awụ anị, ẹ̀ẹ vị avọọ ụ aa hẹrẹ ẹ nị.

¹⁷ Waa sị irehi ọnọhụva anị jị ọwụ, vị ịrẹyị awụ ee du ọ eyi, dị ọ kụkụ a nyị ịhyẹrẹ awụ nị.

¹⁸ Ọza anaa dọ ivenu ireche ku ọta anị sị mẹẹ anka ọza o che ọza ọpa, a vị ọza ọ̀ ka ọza ụhwọ, a vị ọza o hu ọza arubebe avọọ nị.

¹⁹ Ọyị sị ayị tụra ọza ẹnẹ ẹ yị wụra sị ayị tụra sị mẹẹ anka ọza ana anyị aa zị ana aa rị uye, a vị oswahụ ana ka ọnị a zị ụsẹ avọọ nị.

²⁰ Ọyị jị ahẹ zụ ọza ana yị ịnị ayodu sị mẹẹ anka ọza ọ̀ọ ka anọ hị́ ọza ịtahụ, a vị ikere aa rị ọza achị, a vị ukukurumi aa rị ọchị avọọ nị.

²¹ Ụngwẹ àa kụ ọnịvị awụ, dị ịsa yọ vị ọ rị ọ, onyi àa kụ ọ, ka enyi yọ dị o hu ọ.

²² Ụhị u waa mẹ̀ nyị ọ nị. Ẹnẹyịmavara vee sị wụ ụta anị.

²³ Ireche vị ana mẹ̀ ọzaa kụ ayị anka ahị ana hụrẹ eyi ẹbẹẹba mẹẹ̄ zụ orihi avọọ.

²⁴ Ọ́ọ sị ka ọnị ọza vaa sị ọnẹẹ ọnịrẹyị tụ ịnị eehi, ọ vana vị ọnịnya tụ oboka ọ mẹ hu nị.

²⁵ Enube ọyịza ana hụrẹ aha ẹnẹẹnẹ vẹ sị mẹ anka ọza ọ sị enyi ohunẹnẹ yị ọza ene enyi aa kụ ịnị ọhahị avọọ nị.

²⁶ Ọnịzẹyịza anaa dọ yị ọza ọhịmị sị mẹ anka ikangga ọnị enyi anị ẹ yị rụra hu avọọ nị.

²⁷ Ọza mẹẹ rị ẹhụ baaba dị a zama, avọọ ọza enee si ka aa ga ọnị mẹẹ nyị ẹngụkata nị.

²⁸ Ọza ọ̀ọ ya dị ọ̀yị ma zụ sị ụvọ za ẹngụ anị nị, vị ọza ọnọọ sị mẹ anka ẹkụra ọnị ọza ọ̀ yị jị ọvọ kara, dị ọ tịtẹ chaha avọọ nị.