Ụhịrẹyị 20 - IWE ỌNỊNỊ

Ịrẹyọyẹ o huni igooru nị

¹ Ọza ọnị e hu eche ahaahara vị ọnị echee jị ụra. Ọnụra oō hu eche dị a mẹrị ọ nị.

² Hi angwa ohinọyị ana a kụ ayị anka ọza meē hí angwa idu avọọ, ọza ene e du ohinọyị ayị vi ene si ẹngụ anị usu.

³ Ọza enee zwe yị ịrẹyị vị ana sị ụbanyị yị ẹngụ anị, ama ọnụra kẹnẹ o si ka ọnịrị ọza ẹ zyaazị nị.

⁴ Onuworo ẹnẹ ẹ yị da aarẹ ịnị ụmẹ ụrụkụ ọ yị mā nyị ịsa ịnị aarẹ.

⁵ Ayị ọza ọ nyịnẹ hụụnị ịkangga, ama ọza ọnị eyi anị hweyi ọ zụ yẹ nị.

⁶ Ọzọza vị anaa kà a ka ọnị ọ wụra chị ayị za, ama ene kụkụ zụ re ọza ana wụra chi ayị tụra kẹ?

⁷ Ọza ọyịza vị anaā ra a mẹ vọrọ, ịrẹma anị vị eneē zee yị ezi anị.

⁸ Ohinọyị ana ya ịrẹsụ ode aa mẹ̀ ọkarẹyị, ọ yẹ ịsa ẹnẹ ẹ yị vị ịzẹyịza.

⁹ Áá nyị ọza ana zụ sị ụvọ nya ịrachị ka ayị anị ọ nị saka-saka? Ẹnẹ zụ kà a ka ọnị ẹ yị nyị ebira odivi ọnyọọnyị?

¹⁰ Ẹnẹyịmavara ọ nyị ịhyẹrẹ ọza anaā mẹ ọzaa rị ịnị ịsa anaa ná.

¹¹ Ebira ezweyi a sịị̄ yẹ wa nị, ịsị ẹnịnị à mẹ ọ̀ọ vọrọ dị ọ rẹ vị ịzẹyịza nị.

¹² Ẹnẹyịmavara ọ mẹ eyi yị ka ye sii re ẹtẹ, dị ọ rẹ mẹ ụtọ yị ka ya sịị wụ́ ịrẹyị nị.

¹³ Ọza anaā sịị avaba ụmẹẹ sụ ara vị enee re osiye, ọza anaā mẹ̀ ịsa ọọ̄ rịị vọ ku nị.

¹⁴ Ọza anaa hị́ ịsa vị anaā jị ọza anaa na ụra òo si hu dị a gá ẹngụ anị ka ọnị ọ yara hị́ ịsa.

¹⁵ Ịrẹyọyẹ o huna ẹkẹhị nị.

¹⁶ Ọza anaa kụ ụra ẹngụ anị na jẹẹ yị ọnụta ọnị ẹ yị yẹ vị ana vọrọ ka a dọ awuru anị sị ụta.

¹⁷ Ịsa ọnị ọza sị asịvu nyị vị ene hine ẹtẹẹtẹrẹ ama dị ọvavịrẹma anị sị mẹẹ ọza ọ̀ọ ka ata hi irenu aa rị avọọ nị.

¹⁸ Ajuwe ọyịza vị anaā sịị ọzaa ha. Ọza ọ̀ họ̀ use ajuwe obooro dị ọ vaa nọ ịrẹkụ.

¹⁹ Ọza ọnị irenu anị ọ yị ma tịtẹ hẹẹ vị anaā kụ ọza iruvoo hi ẹhẹ. Asị ụ zị ògù anị o.

²⁰ Ọza ana àa kụ ada anị ọnịrị ọnyị anị ụhụ, vị anaa jị ọyị yị ẹngụ anị.

²¹ Ọza ọ zụ sị ọhọha ne si ogu ẹnẹnẹ viri-viri ama ẹzẹtẹ anị o me zoza.

²² Asị ụ kà a ka wee si atọ odivi ọnị ọza mẹ wụ, sị chire Ẹnẹyịmavara ụvọ, o vee si atọ yị wụ.

²³ Ẹnẹyịmavara ọ nyị ịhyẹrẹ aza anaa mẹ ọzaa rị ịnị ịsa anaa ná. Amẹrị ẹ yị zoza.

²⁴ Ẹnẹ ka ọnị ọ yẹ oze ẹhẹ anị kẹ? Ẹnẹyịmavara kẹnẹ ọọ̄ zụ ọza oze nị.

²⁵ Ròo dị wa va zẹ ịzẹzẹ yị Ẹnẹyịmavara, ẹyị vavọọ ụ vana sụ ụmayịyẹ ịrẹma anị.

²⁶ Ohinọyị ana yẹ ịrẹyị vị enee si iruvo aza ana mẹ odivi, dị ẹ yị tẹsị aa sị ụyaa rị wa.

²⁷ Ẹnẹyịmavara ọ nyị ayị ọnịrị ivehu ayị nị, agụvị avọọ yẹ yị zụ tẹ yọ.

²⁸ Ohinọyị anaā mẹ ịzẹyịza dị ọ rẹ vayị ọza vị eneē ku orubo ịrẹsụ ode.

²⁹ Ụkata ezwọọmụha nịnị ọ vị ụbanyị ẹnịnị nị, ama ẹwa ịrẹsụ ọzọkụ ọ vị ụbanyị anị nị.

³⁰ Á mẹẹ̄ nya ọza ịsa ka ọ zị ọ, avọọ a mẹẹ sị ụya rị ọza agụvị ọ ngụ ịhyẹrẹ odivi ha nị.