Ụhịrẹyị 2 - IWE ỌNỊNỊ

Aha ana yà ịnị ịrẹyọyẹ

¹ Ozi emi, si ụtọ pe ịrẹyị ọnị mị kà yị wụ. Asị ụ hi ayị anị.

² Sị ụtọ pe ịrẹyọyẹ, dị wa yẹ ịrẹyị.

³ Họ̀ use ịrẹyọyẹ, dị ụ wa pa ka eyi awụ o hweyi.

⁴ Waa dụ ka wa nyị ịrẹyọyẹ anka u mee si ẹkẹhị a vị ogu avọọ.

⁵ Ịjọnọọ ụ́ vaa yẹ Ẹnẹyịmavara dị wee hí angwa anị nị.

⁶ Ẹnẹyịmavara ọọ̄ mẹ̀ ka ọza ọ yẹ ịrẹyị, dị ọ nyị eyohweyi nị.

⁷ Ẹnẹyịmavara e sere ọnịzẹyịza, dị ọ raa gụ wa ụvọ nị.

⁸ Ọnị ee sere aza anị ana a mẹ̀ ịzẹyịza ka azaa na nị. Ọnị ee sere aza anaa saasa ịrẹyị anị nị.

⁹ Wàa wụ́ ịrẹyị Ẹnẹyịmavara, ụ vaa yẹ ịsị ẹ vọrọ, dị waa mẹ ịzẹyịza, dị waa mẹ̀ ebira ozoza.

¹⁰ Ụ vaa yẹ ịrẹyị, dị ayị awụ e hine.

¹¹ Ịrẹyọyẹ vee sere wu, dị eyohweyi awụ aa dọ wụụ tụ́.

Sị ẹtẹ tịtẹ yị aza edivi

¹² Ịrẹyọyẹ vị anaā dọ ọzaa há hụụnị ebira odivi. Ọọ̄ mẹ ka ọza o noze hi enevene nịnị,

¹³ ene reè ne ịzẹyịza ta naa ra ẹhẹ odivi.

¹⁴ Ebira odivi ve eneē hine wa, dị ẹ yaa jẹ ịnị udivi ẹnịnị.

¹⁵ Ẹnịnị ẹ yị nyị ịzẹyịza. Ọza ẹ yị zụ sị ayị tụra wa.

Ịrẹyọyẹ ọnịrị ịrẹkọyịsẹ

¹⁶ Ịrẹyọyẹ ọ zụ mẹ ka ọza ọ há hụụnị evene ọsẹrẹka nị.

¹⁷ Ọsẹrẹka vị ana hụrẹ ọva anị ụvọ agụvị ka ọ raà sị ayị hụụnị eku ọnị ọnịrị ọva anị hị́ yị ẹngụ.

¹⁸ Ọza anaa nọ ịdị anị vị ana sị ẹhẹ anị mẹ usu ẹyịza. Ẹngụ ọza ọnọọ vị ana sị ẹhẹ anịị pe usu mẹ aahẹ.

¹⁹ Ọza anaa nọ ịdị anị ẹ yị vaa há, ẹhẹ anị ọ yị vaa nọ orubo.

²⁰ Agụvị avọọ, saasa ebira aza ana aa ra ẹhẹ ozoza, dị waa sị ịzẹyịza ra ẹhẹ awụ.

²¹ Ka ọnịzẹyịza ọ̀ vaa mẹ ẹhẹ nị. Ọnị aa ra ịnị ẹhẹ nị.

²² Ama Ohomorihi vị ene vee vu aza ana mẹ̀ ebira edivi ẹtẹ hụụnị ẹhẹ. Ọ́ vaa kụ wa hụrẹ ẹtẹ anka a mee hu avịị hụrẹ ẹtẹ avọọ nị.