Ụhịrẹyị 15 - IWE ỌNỊNỊ

Ebira ozoza

¹ Ụmẹnẹ ọyị sị tụ́ ohi ịrẹyị vị ene hunẹnẹ ọza ayị ama ọjanagụ ọyị kà vanaā kụ ọyịkụ kwẹẹtẹ.

² Ọza ana yẹ ịrẹyị vị anaā ka ịrẹyị ịrẹyọyẹ ama ọnụra vị anaā kà ututu.

³ Ẹnẹyịmavara e re avaba ịsa ana a ná. Ee re odivi ọnịrị ọyịza ana aza aa mẹ̀.

⁴ Ịrẹyị ana a sị ayị ọza nẹtẹ vị ana a mẹ̀ ẹhẹ rọ ọza ẹngụ ama ireche vi enee du ọza ayị.

⁵ Ọnụra kẹnẹ ọọ sị eyi wụ́ ịrẹyị ada anị nị, ama ọza ana yẹ ịrẹyị vị ana a dọ ịrẹyị ada anị wụ.

⁶ Ọza ọyịza vị anaa nyị ịsa rị ụvọ ama ọza ọhịmị vị ọnị akanya tụ́ avosusu.

⁷ Aza ẹ mā kọ ịrẹyọyẹ hụụnị ụvọ ọnụra, ịnị ụvọ aza ana yẹ ịrẹyị aa kọsẹ ịrẹyọyẹ nị.

⁸ Ẹnẹyịmavara ọ nyị ịhyẹrẹ ịsọvọ ọza ọhịmị ama ọọ̄ wụ́ aduwa ọza ọyịza.

⁹ Ẹnẹyịmavara ọ nyị ịhyẹrẹ ọza ana a mẹ̀ odivi ama o sì ịrẹyị ọza anaa mẹ̀ ịsa ana vọrọ.

¹⁰ Ẹnẹyịmavara vaa pa ịva yị ọza anaa mẹ̀ ebira odivi, ọza ọnị ẹ mā dọ ịrẹyị ọza wụ vị enee vú ẹtẹ.

¹¹ Ẹnẹyịmavara mẹ re avaba ịsa ana na ịda aneku, avọọ o me re ré ayị ọzọza nị.

¹² Ọza anaā sịị eyi wụ̀ ọza ọ̀ mā dọ ka a tụ ọnị ohuvọ, ọ yị ma rẹ họ̀ use ajuwe hụụnị ụvọ ọza ana yẹ ịrẹyị.

¹³ Ayohine ọọ̄ sị ọza nyinyi nị, ama ayodu vị anaā sịị ọza va ẹngụ hi.

¹⁴ Ọza ana yẹ ịrẹyị vi ene sì ka ọnị ọ yẹ huu avọọ ama ọnụra vị anaa va ụva ụra.

¹⁵ Onosiye vị anaa ra ẹhẹ ụyụya, ama ọza ana dọ ka ịsa ọnị ọ nyị ọ̀ hụ ọnị vị ọnị ayị anị hine pooro.

¹⁶ O vene zoza ka ọza ọ nyị ịsa chee di o hí angwa Ẹnẹyịmavara huuni ka ọza nyị ogu ẹnẹmẹhị tụra ịrẹsụ akanya.

¹⁷ Ọza ọ rị ụka ịdị ọza ene sì ịrẹyị anị, ọ mẹ hụụnị ka ọ na rị iya ịdị ọza anaa kụ ayị anị nị.

¹⁸ Ọnọyịkụ vị anaā kụ́ ahankata hi ẹtẹ ama ọza ọnị ayị anị nẹtẹ oo ji ịrazị nị.

¹⁹ Onuworo vị anaā vị ọnịrị akanya pooro kẹnẹ, ama ọnịzẹyịza vị ọnị ẹhẹ anị zoza yị.

²⁰ Ozi ana yẹ ịrẹyị vị ana mẹ̀ ayị ada anị hine ama onututu vị anaa sị eyi wụ ọnyị anị.

²¹ Ọnụra vị ana ayị anị hine tụ ịnị ụra ana aa mẹ̀ ama ọza ana yẹ ịrẹyị vị anaa mẹ̀ ịsa ana vọrọ.

²² Ọza ọnị ẹ yị dọ ajuwe ọza vị anaa hyẹdụ, ama ọza anaa dọ ajuwe aza ọ yị me nyee eyi.

²³ Ọza anaa yẹ ohi ịrẹyị ana vọrọ tụ vị ọnị ayị ọza hine tu.

²⁴ Aza ana yẹ́ ịrẹyị vị anaā mẹ̀ ebira anaā sịị ọzaa ku orubo; ẹnịnị ẹ́ mā mẹ̀ ebira anaā sịị ọza naa gẹrị isu.

²⁵ Ọza anaā sịị ẹngụ tụ ẹba vị ọnị Ẹnẹyịmavara gara irehi anị, ama ogu osoku vị ọnị oō sere.

²⁶ Ịsị eenyisi aro aza edivi vị yị Ẹnẹyịmavara nị, ama ịrẹyị irenu aza ọyịza vị enee hine e ayị.

²⁷ Ọza anaa mẹ̀ karakara ka ọnị ọ̀ zị oze asuvu rị ọgụ vị anaā kụ ẹngụkata tu anineehi anị, ama ọza anaā nyị ịhyẹrẹ ochirerenu ọyịdọ vị eneē ku orubo.

²⁸ Aza ọyịza vị eneē rò ịrẹyị dị e vee tu ọza ohi ịrẹyị ama aza edivi e mē rò o dị e tụ́ ohi akụvị eyiha-eyiha.

²⁹ Ẹnẹyịmavara wụ́ aduwa aza ọyịza, ama aza edivi vị ọnị ọọ̄ sị eyi jịnẹ.

³⁰ Eyirẹsụ ọza anaa jẹ ịrajẹ vị anaā sịị ayị ọzaa hine, dị enube ọyịza ọnị ọza wụụ mẹ ka ẹngụ ọza òo hi ahị hu avọọ nị.

³¹ Ọza ana tụ ohuvọ ka ẹhẹ anị ò zoza, dị ọ dọ vị ana vaa yẹ́ ịrẹyị.

³² Ọza eneē yi ka ọnị ẹ mā kọsẹ vị anaā mẹ ẹngụ anị ọnya, ama ọza anaā dọ ka àa tụ ọnị ohuvọ vị anaā yẹ́ ịrẹyị hu avọọ.

³³ Ọza ọ̀ọ hí angwa Ẹnẹyịmavara vị a kọsẹ ịrẹyọyẹ nị. Ọza ana ka ẹngụ anị chi vị ana aā sị ụbanyị yị.