Ụhịrẹyị 10 - IWE ỌNỊNỊ

Ụhịrẹyị ọnị Isoromọnị che

¹ Ẹsẹnị ẹ vị ụhịrẹyị ọnị Isoromọnị che nị: Ezi ana yẹ ịrẹyị vị anaā mẹ ayị ada ẹnịnị hine ama ọnụra vi eneē du ọnyị ẹnịnị ayị

² Ogu ọnị ọza sị ebira odivi si ọ mā nyị ịrẹma ama ịzẹyịza vị ana sị ọza ku orubo.

³ Ẹnẹyịmavara ọ yị vaa zẹ ka ụngwẹ ọ kụ aza ọyịza, ama ọ yị vaa zẹ ka ọza ọhịmị ọ re ịsị e yee si.

⁴ Uworo vị ana a sị ọza re osiye ama ọza ana aa sị ụvọ anị mẹ vị ana aā nyị rị ụvọ.

⁵ Ọnịrẹyọyẹ vi ana a kụ ịsa ọyịna ịnị ụmẹ anị, ama ụhị vị ana nyị ọza ana kara ụvọ chire agada.

⁶ Ọza ọyịza vị ọnị o zee yị, ama ọza odivi vị ana jị avị ku udivi anị.

⁷ Ịrẹkụkụ ọza ọyịza ọ mē vu ama ọza odivi ẹ yị nyị ọyịza ana aa sị tamayị anị.

⁸ Ọnịrẹyọyẹ vị ana a wụ́ ịrẹyị ọza ama ọnụra ana ka kẹnẹ-kẹnẹ vị ana kụ ịrẹyị tu ẹngụ anị

⁹ Ẹ yị nyị ịsị ee chire ọza ana aā mẹ ịrẹyị ana vọrọ angwa ama ụvọ vee ku ọza ana a mẹ asuvu.

¹⁰ Ọza ana a jị ọza eyi tụ ịrẹyị vị ene du ẹtẹ ama ọza ana a ka ịzẹyịza yị ọza o si ẹngwọọrọ yọ nị.

¹¹ Ịrẹyị irenu ọnịzẹyịza vị ana rọ ọza ẹngụ, ama ọza odivi vị ana a sị ịrẹyị ẹnyị tụ ịnị ịnẹ ka ọsa.

¹² Ayamụkụ vị ana tụ ịrẹyị ụka ama oyisì vị ana sị ọza eyi hụụnị ịrẹyị.

¹³ Ọnịrẹyọyẹ vị ana a ka ịrẹyọyẹ ama inori ẹ yị tara ọnụra.

¹⁴ Ọyẹrẹyị vị ana kọ ịrẹyọyẹ pooro ama ịrẹyị irenu ọnụra aa wụ̀ ọ nị.

¹⁵ Ẹkẹhị ọọ̄ dọ ọnyẹkẹhịị tụ nị ama iruwa ọọ̄ wụ̀ onosiye nị.

¹⁶ Ebira ọyịza ọ sị ọza na orubo nị, ama ọza odivi vị ana sị ẹhẹ anị mẹ odivi.

¹⁷ Oō zee yị ọza ana wụ́ ịrẹyị ọza nị ama irezi ene vu ọ mā wụ eesi.

¹⁸ Anapẹ ọ sị ẹnyị tụ ịnị ịnẹ ka ọsa nị, ọnụra oō du ọza nị.

¹⁹ Ireche ọ mā tara ọza ẹnẹ ẹ yị ma sị irenu anị kwoku, ama ọza ana yẹ ịrẹyị vị ana sị ụvọ za irenu anị.

²⁰ Ịrẹyị irenu ọnịzẹyịza o hụụnị ẹkẹhị, ama ịrẹyị kẹnẹ-kẹnẹ ọnụraa ro nị.

²¹ Aza ọrụrụ-ọrụrụ aa rị aha ịrẹyị ọza ọyịza nị, ama ụra ọnụra ọọ wụ ọ nị.

²² Ẹnẹyịmavara ọ ga ize tu ọza, ọ mā nyị ayodu.

²³ Ebira odivi vị ene hine ọnụra ama ebira ịrẹyọyẹ vị ene hine ọnịrẹyọyẹ ayị.

²⁴ Ịsa ọnị ọza odivi e hí angwa anị oo tụ́ ọ nị, ama Ẹnẹyịmavara vị ana a mẹ̀ ịsa ọnị ọnịzẹyịza e si.

²⁵ Ịzị ẹngụkata yaa vu ọza ọhịmị ẹtẹ ọnịzẹyịza vị anaa jẹẹ geri-geri ịzọọ.

²⁶ Ayodu ọza ana tụ onuworo ụtụ re nị. Vị ọ mẹ ẹgọ ka ọza eyi, dị ọza ọnọọ ẹ yị nyị irenu ha nị.

²⁷ Ọza ene hí angwa Ẹnẹyịmavara vị ene ku orubo ama ẹhẹ aza ọhịmị vị ana vaa da ẹjịjị.

²⁸ Ayị ọza ọyịza vị ene hine tụra ịsa ana a tụra eyi ama ọza ọhịmị ọ yị vee re ịsa ene zi eyi anị.

²⁹ Ẹnẹyịmavara e sere ọza ana a mẹ ịzẹyịza ama aza ọhịmị vi ene vee vú ẹtẹ.

³⁰ Ọza ọyịza vị ana vaa ha, ama ọza ọhịmị ẹ yị vaa ra.

³¹ Ọza ọyịza vị anaa kà ịrẹyọyẹ ama irenu anaa kà ọhịmị vị ene vee vú ẹtẹ.

³² Ọnịzẹyịza ọ yẹ ịrẹyị ana vọrọ ka ọ kà ama aza ọhịmị vị ana a kà odivi.