Ụhịrẹyị 1 - IWE ỌNỊNỊ

Uruvo ene eē si che ụhịrẹyị

¹ Isoromọnị ozi Idevidi ana vị ohinọyị ẹtẹ Isirẹrị ịnị ụmẹ ọnya aanị ô che ụhịrẹyị ẹnẹnị nị.

² Ụhịrẹyị ẹnẹnị vị anaā sịị ọzaa nyị ịrẹyọyẹ, dị ọ ha ọza eyi tu ịrẹyị, dị ọ rẹ mẹ ka ọza ọ yẹ ajuwe ana vị ọyịza nị.

³ Ụhịrẹyị vị anaā sịị ọzaa nyị eyohweyi, dị ọ mẹ ka ọza ọ nyị ịzẹyịza, dị ọ mẹ ịsị ana vọrọ, dị ọ sị ayị ọnya mẹ̀ ịsa.

⁴ Ọnị ọọ̄ si eyi obeduu hweyi nị, dị ọ mẹ̀ ka ezweyi ẹ yẹ ịsa, dị ẹ yẹ ịrẹyị.

⁵ Ọza ana àa yẹ ịrẹyị ọ sị ụtọ pe ụhịrẹyị ẹnẹnị, dị ọ yẹ ịrẹyị hu avọọ. Ọza ọnị eyi anị hweyi vaa nyị eyohweyi hu avọọ,

⁶ ọ̀ọ yẹ ụhịrẹyị, dị ọ yara swẹ ụhị, dị ọ rẹ yẹ aa sị ịrẹyị ana hị́ ọsa nị, ọnịrị dị ọ yẹ a mẹẹ che ebira nị.

⁷ Ịrẹyọyẹ vị ene nyima hụụnị angwa Ẹnẹyịmavara oyi hi. Ọnụra kẹnẹ ọọ̄ sị eyi wụ̀ ịrẹyọyẹ ọnịrị ajuwe ọza nị.

Ajuwe ọza mẹmẹ nyẹngụ nyị ịrẹyọyẹ

⁸ Ozi emi, wụ́ ịrẹyị ada awụ, dị asị ụ si eyi wụ́ ịrẹyị ọnyị awụ.

⁹ Ịrẹyị ẹnịnị vị anaa sị ọza nyị ụbanyị anka ọza ana jị uboobo ohinọyị avọọ. Avọọ ọ̀ mẹ rẹ hụ ọza enyi anka ọmọ anaa sị tụ ọbẹ avọọ nị.

¹⁰ Ozi emi, aza edivi èe vene wụ, asị ụ dọ beri wa.

¹¹ Ẹ̀ẹ kà ẹwaa saasa ẹnị na tẹ̀ zi ọzọnọza, di wee dudu wụ̀ ọ nịnị,

¹² dị waa jị ọyị yị aza anaa mẹ ẹhẹ ẹnịnị.

¹³ Ẹ̀ẹ sị wa wụ̀, dị ẹ kụ ogu akàaka irenyi-irenyi aza ẹnẹẹ ne hí irehi ẹnịnị.

¹⁴ Ẹnịnị ẹ̀ẹ hị́ wụ ka waa saasa ẹnị agụvị dị ẹnị ẹ ga ogu ene e yi tu wu,

¹⁵ ozi emi, asị ụ saasa wa. Si oze ẹnịnị tịtẹ yị wa.

¹⁶ Ẹngụ vị anaā hụ ọyị mẹ̀ ebira odivi. Eyiha-eyiha ẹẹ̄ sị dọ ọza ụhwẹ nị.

¹⁷ Ọpa ọnị ọza re o mē che e.

¹⁸ Ama anako nịnị vi ene vee su usu ụkọrọ ụvọ ẹnịnị. Ebira odivi ẹnịnị vị anaa vụ ụhị tu wa.

¹⁹ Ẹ maa sị ako jị ọyị yị aza, avọọ ẹnị mẹ rẹ vee re nị.

²⁰ Ịrẹyọyẹ vị ana sị mẹ anka ọza ana a jẹẹ ozehinava ọnịrị ịnị orere dị aa nọ ọ ka ọzọza ọ vaa wụ́ ịrẹyị avọọ nị.

²¹ Avọọ ọ ma nọ ịnị ohu ọnịrị ịnị orere ka aza ẹ vaa wụ́ ịrẹyị.

²² Ẹwụ nịnị ọnụra tee! ịzị ụ vaa mẹ ụra nee tu nịnị? Ịhị eyi awụ nịnị vee hweyi? Ịzị ụ vaa ka ọsọọsa nee tụ nịnị?

²³ Sị ụtọ pe ohuvọ ọnị maa tụ wụ nịnị. Maa sị ịrẹyọyẹ pá wụ, dị wa yẹ ịrẹyị.

²⁴ Irezi ẹnịnị ẹ mā wụ eesi-eesi. Ẹnịnị ẹ yị ma wụ́ ịrẹyị ọza.

²⁵ Ẹnịnị ẹ yị mā dọ ịrẹyị ọza tụ ịzọọ. Ẹ yị mā dọ ka aa tụ ẹnị ohuvọ.

²⁶ Mi vee nyị wụ unyi ịrẹyị odivi òo tu wu nị. Dị maa mẹ̀ wụ isiya ụmẹ ọnị wàa hụrẹ ayịnẹ.

²⁷ Ayị vaa hụrẹ wụ ịnẹ anka opomi mẹẹ̄ tụ́ avọọ, di ezigi vee tù wụ nịnị anka okoruwa avọọ nị. Dị ahịka ayodu ọnịrị ayịhụrịnẹ o chi wụ ẹngụ nị.

²⁸ Ịrẹyọyẹ kà, ẹ́ vaa hị́ ọnị ịnị ụmẹ ọnọọ, dị ọnị e yi tu wa ohi. Ẹ vaa sị avaba ẹngụ-ẹngụ si ọnị, di e yi re ọnị.

²⁹ Ka ẹnịnị ẹ raà vịdị nyị ịhyẹrẹ anị, dị ẹ yị rẹ hí angwa Ẹnẹyịmavara nị.

³⁰ Wẹ yị dọ ịrẹyị ọza tụ ịzọọ. Àa tụ wụ ohuvọ, wẹ yi mā wụ.

³¹ Ịsa ọnị ụ chire ụ vaa ha nị. Ịrẹyị ẹngụ awụ vee du wụ eyi.

³² Ụra ọnụra awụ ọ vaa wụ̀ wụ nị. Eyogu ẹngụ awụ e vú ụ ẹtẹ nị.

³³ Ama ẹ yị nyị ịsị ẹ vaa mẹ̀ aza ana sị ụtọ pe ịrẹyị ịrẹyọyẹ. Angwa e yi vee hi wa.