Oyinyima 50 - IWE ỌNỊNỊ

A mẹmẹ mẹ oku Ijekọvụ

¹ Ijosẹẹhụ mè re ka ada anị ô wusu, di o ne ne kú ada anị, di ee sụ ùnè nị.

² Di ọ ka ezi ahụ anị ana vi idokita ẹ sị ahọ̀nọ sisi ada anị ẹngụ agụvị asị ọ vụ̀ nị. Ịzẹyịza di idokita ẹnẹẹ vavọọ mẹ oku Isirẹrị nị.

³ Ẹkụhị ẹbẹẹva ọ dọ wa dị ẹ vavọọ ve zụ tenyi oku ọnọọ ẹngụ ka asị ọ vụ̀ nị. Avọọ o mèe kù di e ve zụ tenyi oku ka asị ọ vụ̀ nị. Anijipiti nịnị ệ jị òrèrè Ijekọvụ mẹ ẹkụhị ẹtarẹwụ.

⁴ Ịjị ẹkụhị ana aa sịị jị òrèrè Ijekọvụ sị gụ, di Ijosẹẹhụ va na kà a yị aneehi Ihwarawo dị ọ ka, “Aarịhịnị ọ̀ọ nyị ọnị iyi ò pè ọnị kà a yi Ihwarawo nịnị ka ada anị ộ

⁵ mẹ ka ọnị ọ̀ hị́ eku ọnya yọ, kà a ka ọ ka ọnị òo sú, ọnị ọ̀ navọ ọnị o ne ọnị tụ́ ini ụtẹha ọnị ọnị tenyi yị ẹngụ anị tụ́ ini ẹtẹ Ikanaani. Dị ọ Kà ọ ka ọnị ka aarịhịnị ọ̀ jẹẹ ọnị ò ne ne ada anị dị ọnị ọ̀ vavẹ.”

⁶ Di Ihwarawo ka, “Ọ̀ọ na ò ne ne ada anị anka ọ mẹ̀ vịdị hị́ eku yọ.”

⁷ Ịzẹyịza di Ijosẹẹhụ si hu ee nee ne ada anị nị. Di avaba ezi ahụ Ihwarawo ọnịrị azọkụ aneehi anị ne beri ọdovịdị Anijipiti saasa a na nị.

⁸ Avaba aneehi Ijosẹẹhụ ọnịrị ẹnẹbẹnị anị ne beri aneehi ada anị vị ana rẹ saasa a. Ezi ẹnịnị ọnịrị imaaru ne beri atẹmẹ ọnịrị ẹvụ ẹnịnị kẹnẹ ọ vọ tụ́ ẹtẹ Igoseni nị.

⁹ Ụkẹkẹ oni umaataā tura ọnịrị onumaata nịnị vị ana saasa a na. Ẹnị ana na ệ rụrụ ẹtẹẹtẹrẹ.

¹⁰ Ẹnịnị ẹ va sị ngụ ịzị eē tú ịsa ịnị ẹtẹ Atadi, ana yà oze ọnị ọyịị̄ zịị̄ hụrẹ ini Okuha Ịjọdanị. Dị ẹ yà ịzọọ dị ẹ zị ẹngụ Ijekọvụ ẹtẹẹtẹrẹ nị. Dị Ijosẹẹhụ jị òrèrè ada anị mẹ ẹkụhị ịhịmba nị.

¹¹ Ịjị Anikenaani ene hị́ ịnị ẹtẹ ọnọọ vavọọ re ka aza ẹnẹẹ vavọọ aa zị ẹngụ ịnị ẹkụra Atadi ịzị a yàa tụ́ ịsa, dị ẹ ka, “Ịrẹyị ọnọnị ộ dà zị Anijipiti nịnị kẹnẹ. Wáa wụ́ e mèe sụ ùnè.” Agụvị avọọ dị a kụkụ aa hị́ ịzọọ Ẹba Imizirayimi ịzị Anijipiti yà ee sụ ùnè. Ịzọọ vị ana yà ịzị ọyịị̄ zịị hụrẹ Ijodani.

¹² Ịsị Ijekọvụ ka ezi anị ẹ̀ mẹ yị ọnị ọnị òo sú, avọọ gẹdẹ-gẹdẹ ẹ mẹ̀ mẹ̀ ẹ nị.

¹³ Ezi anị vị ana sị oku anị nọ ịnị ẹtẹ Ikanaani di e ne ne e. Â nyị ụtẹha ana yà ịnị aarẹ Imakipera. Aarẹ ọnọọ vị ana gụrị ẹtẹ Imamire. Abụrahamị ọ hị́ ụtẹha ọnọọ ne beri ẹtẹ ana yà ịnị anị hụụnị ụvọ Ehwironi ana vi Anihiti, ka oni òo ne oku ịzọọ nị.

¹⁴ Ịjị Ijosẹẹhụ sị ada anị ne, dị ọnịrị ẹnẹbẹnị anị ne beri avaba aza ana saasa a na varẹma nọ Ijipiti nị.

Ijosẹẹhụ ka asị ẹnẹbẹnị anị hị́ angwa

¹⁵ Ẹnẹbẹnị Ijosẹẹhụ nịnị mè re ka ada ẹnịnị ô wusu, dị ẹ ka, “Wáá yẹ ka Ijosẹẹhụ ọ nyayịnẹ nyị ịhyẹrẹ ẹnịnị, dị ọ ka oni ee si ẹnị atọ ịsa odivi ọnị ẹnị mẹ̀ ẹ?”

¹⁶ Dị ẹnịnị va tụ́ hi Ijosẹẹhụ dị ẹ ka, “Ịrẹyị ana ada anị kà yị ẹnị di o ve sú yọ.

¹⁷ Ọ kà ọnị ọ̀ kà a yọ ka aarịhịnị ọ̀ vagu ẹnị agụvị ịsa odivi ẹnị ẹnị mẹ̀ ẹ. Ọ kà ebira ẹnị ẹnị mẹ̀ ẹ ô divi. Ọ kà aarịhịnị ọ̀ navọ ọ̀ vagu ẹnị. Ẹ rẹ ka ẹnị rẹ vi ezi ahụ Ohomorihi ana ada ẹnịnị hẹkẹ.” Ịjị ẹ maanị na kà yi Ijosẹẹhụ, di Ijosẹẹhụ ee sụ ùnè nị.

¹⁸ Dị ẹnẹbẹnị anị nịnị rẹ vẹ, dị ẹ tana tụra ẹtẹ dị ẹ ka: Ezi ahụ anị avaba ẹnịnị vị nị.

¹⁹ Di Ijosẹẹhụ tụ́ wa ohi dị ọ ka, “Asị o hí angwa. Ọ kà ọnị wáá vị Ohomorihi nị?

²⁰ Dị ọ rẹ ka ẹnịnị vi ene ro ka ọnị ẹ̀ mẹ̀ ọnị ịrẹyị ọhịmị nịnị, ama Ohomorihi ọ sị ọ vara ọyịza. Ọnị ọ mẹ ka aza ọrụrụ-ọrụrụ ẹ zụ ha aanị nị;

²¹ avọọ asị e hí angwa. Ọ kà ọnị vaa sị ịsọyịrị yị ẹnịrị ezi ẹnịnị.” Avọọ Ijosẹẹhụ mẹ̀ kà ịrẹyị yị wa, dị ọ sị wa ayị nẹtẹ nị, dị ọ tụ́ wa ọtụtụrụma nị.

Ijosẹẹhụ meme sú

²² Ijosẹẹhụ ọnịrị aneehi ada anị vị ana rị ra Ijipiti. Ijosẹẹhụ ọ sị gụ ịrayị ẹchẹhị tụra ẹẹwụ di o ve sú.

²³ Ijosẹẹhụ ô re ezi Ehwireemi ọnịrị aazị anị. Imakiri ozi Ịmanasẹ ộ ma ezi, dị ọnị rẹ kú wa yi Ijosẹẹhụ nị.

²⁴ Di Ijosẹẹhụ va hị́ ẹnẹbẹnị anị dị ọ ka, “Mee vee sú. Ama Ohomorihi vaa jẹẹ wụ nịnị ịrẹma dị ọ sị wụ nịnị hụụnị ẹtẹ ọnọnị nọ ịnị ẹtẹ ọnị ọ hị́ eku ka ọnị aa sịị yị Abụrahamị ọnịrị Ayiziiki ne beri Ijekọvụ.”

²⁵ Di Ijosẹẹhụ kà a yị ezi Isirẹrị dị ọ ka, “Mâ yẹ ka Ohomorihi vaa gụ wụ nịnị ụvọ. Ama hị́ eku mị nịnị ka ụ vaa kụ́ ẹchụkụ amịị za wàa nọ ịnị ẹtẹ ọnọọ nịnị.”

²⁶ Di Ijosẹẹhụ sú nị. Ịrayị ẹchẹhị tụra ẹẹwụ ọ mẹ ịnị ẹhẹ nị. Dị a sị ahọ̀nọ sisi ọ ẹngụ ka asị ọ vụ̀, dị a sị ọ tụ́ ini iposi tụ́ Ijipiti nị.