Oyinyima 47 - IWE ỌNỊNỊ

Ijosẹẹhụ ộ sị ada anị ọnịrị ẹyịnyara anị na kụ

¹ Ijosẹẹhụ ộ nọ ịda Ihwarawo dị ọ na kà a yọ dị ọ ka: Ada anị ọnịrị ẹnẹbẹnị anị nịnị ẹ raà kụ́ atẹmẹ ọnịrị ẹvụ beri imaaru ẹnị ẹnyị ọnịrị ogu ẹnịnị hụrẹ ẹtẹ Ikanaani vẹ. Ọ kà ẹnịnị hi Igoseni booro aanị.

² Ọ màa na, dị ọ kụ́ ẹnẹbẹnị anị ẹẹhị za na zụ̀ Ihwarawo nị.

³ Dị Ihwarawo họ̀ ẹnẹbẹnị Ijosẹẹhụ ẹnẹẹ use dị ọ ka, “Sị ẹ vị ụkọrọ ẹnịnị.” Dị ẹnịnị ka, “Taarụ, ịsụpa ẹnị pa nị. Ẹ ka ụkọrọ oni ohiku ẹnịnịị̄ mẹ ọ vị ọnọọ nị.”

⁴ Dị ẹ rẹ ka, “Taarụ, vị ẹnị vẹ ka ẹnị ẹ̀ va ra ịnị ẹtẹ ọnọnị nị. Ẹ ka Ịda ẹnịnị ọ yị kụkụ nyị avị ana vọrọ ka ịsụpa ẹnịnị ẹ̀ẹ rị. Ẹ ka ụngwẹ ọnọnị vị ana nyayịnẹ aa kụ̀ ịnị ẹtẹ Ikanaani. Dị ẹ rẹ ka aarịhịnị vị ẹnị ka ẹnị ẹ̀ dá ịpẹ yọ ka ọ̀ na vọ ẹnị e yà Igoseni nọ.”

⁵ Di Ihwarawo ka yị Ijosẹẹhụ ka, “Ô zoza áda anị ọnịrị ẹnẹbẹnị anị mè ve tù ọ aanị.

⁶ Ọ kà Ẹtẹ Ijipiti ọ nya ẹtẹ ha aanị nị, ẹ̀ sị ịzị èe zoza hu keekere yị ada anị ọnịrị ẹnẹbẹnị anị dị ẹ ra ịnị anị. Dị ọ ka ọ̀ kà a ka ẹ̀ na ra Ígoseni. Àa nyị ọza oni o re ịnị ẹngụ ẹnịnị ana zụ mẹ̀ ụkọrọ, dị ọ kà a yị wa ka è pè ọnị si eyi pè ịsụpa anị.”

⁷ Di Ijosẹẹhụ rẹ sị Ijekọvụ ada anị na zụ̀ Ihwarawo nị. Di Ijekọvụ kụ́ Ihwarawo nị.

⁸ Di Ihwarawo họ̀ Ijekọvụ dị ọ ka, “Ịrayị anị yà?”

⁹ Di Ijekọvụ ka, “Ịrayị ẹchịhịnọnyị tụra ẹẹwụ kẹnẹ ọnị mẹ ịnị ẹhẹ da nọ. Ọ kà ọnị ộ yị vịra, ẹhẹ anị vị akanya-akanya. Ọnị ệ yị hyakụ nyị ịzị ọnị tù ịnị ẹkụhị oni ohiku anị nịnị mẹ ịnị ẹhẹ.”

¹⁰ Di Ijekọvụ kụ́ Ihwarawo, dị ọ hụụ ịzọọ nị.

¹¹ Di Ijosẹẹhụ sì aha yị ada anị ọnịrị ẹnẹbẹnị anị ịnị ẹtẹ Ijipiti nị. Dị ọ sị ẹtẹ ene zoza hu keekere yị wa ini okokooro Íramesisi anka Ihwarawo mẹ̀ kà a yọ nị.

¹² Di Ijosẹẹhụ aa sị ịsọyịrị yị ada anị ọnịrị ẹnẹbẹnị anị ne beri avaba aneehi ada anị nị. Avaba aza ana yà pè wa huu na ngụ ezweyi vị ọnị ọ sị sị ịsọyịrị yị.

¹³ Ịsa ọyịrị ộ ta hụụnị avaba ẹtẹ, agụvị ka ụngwẹ ọnọọ ộ katẹngụ. Anijipiti ọnịrị Anikenaani ee vee sú agụvị ụngwẹ ọnọọ.

¹⁴ Anijipiti ọnịrị Anikenaani ẹ raà sị avaba ẹkẹhị ẹnịnị na hị́ ịsọyịrị. Di Ijosẹẹhụ dọ ẹkẹhị ẹnẹẹ dị ọ kụ́ ọ na ịda Ihwarawo nị.

¹⁵ Ịjị Anijipiti ọnịrị Anikenaani raà sị ẹkẹhị ẹnịnị hị́ ịsa ta, dị avaba Anijipiti wara ne tù Ijosẹẹhụ nị. Dị ẹnịnị ka: Ọ̀ Sị ịsọyịrị yị ẹnị ka ẹnị ve wusu! Ẹ ka Ẹkẹhị ẹnịnị ộ ta.

¹⁶ Di Ijosẹẹhụ ka: Ẹ̀ kụ́ ịsụpa ẹnịnị vẹ, dị ọnị ọ̀ sị sị ịsọyịrị yị wa ẹ̀ yị kụkụ nyị ẹkẹhị.

¹⁷ Dị ẹ kụ́ ịsụpa ẹnịnị va yị Ijosẹẹhụ di Ijosẹẹhụ sị sị ịsọyịrị yị wa nị. Ệ kụ́ umaata, atẹmẹ, ọnịrị ẹvụ beri imaaru ọnịrị ịkẹrịkẹtẹ vẹ. Di Ijosẹẹhụ sị sị ịsọyịrị yị wa ịnị ịrayị ọnọọ nị.

¹⁸ Ịjị ịrayị ọnọọ ta, dị ẹ rẹ kụ́ ẹngụ ve tù Ijosẹẹhụ ịnị ịrayị ana tụra a nị. Dị ẹ ka, “Nda, ẹkẹhị ẹnịnị ộ ta, ẹnị ẹ̀ yị zụ sị tẹẹ yọ. Ẹ ka ẹnị ẹ rẹ raà kụ́ ịsụpa ẹnịnị va yọ. Ẹ ka ẹ yị nyị ịsị ẹnị kụkụ nyị à yị vị ẹngụ ẹnịnị ọnịrị ẹtẹ ẹnịnị kẹnẹ.

¹⁹ Dị ẹ ka vị ẹnị wéé vee su vaa ha kẹnẹ dị ẹtẹ kụkụ vị osusu nị? Ẹ ka ọ̀ kụkụ sị ịsọyịrị yị ẹnị, dị ọ̀ sị ẹnịrị ẹtẹ ẹnịnị si ụta anị. Ẹ ka ẹnị ụvọta ọ̀ kụkụ vị ọrịhị Ihwarawo, dị ọ̀ sị ẹtẹ ẹnịnị vaka a. Dị ẹ rẹ ka aarịhịnị ọ̀ sị akụ yị ẹnị ka ẹnị ve wusu va ha, ẹ ka ọ̀ rẹ sị ịsa ọyịnaa yị ẹnị dị ẹnị è chire e”.

²⁰ Ịzẹyịza di Ijosẹẹhụ hị́ avaba aarẹ Anijipiti dị ọ sị yị Ihwarawo nị. Avaba Anijipiti ẹ sị aarẹ ẹnịnị ná, agụvị ka ụngwẹ ọnọọ ô chi ẹtẹ ẹngụ. Di ahịka Ihwarawo ọ kụkụ nyị ẹtẹ ọnọọ nị.

²¹ Di Ihwarawo kụkụ za aza hụrẹ avaba ẹtẹ Ijipiti ọrịhị nị.

²² Ẹtẹ ohirẹsụ irehi Ohomorihi nịnị kẹnẹ ọ vọ ọnị ọ̀ yị rẹ vaa hị́ nị. Ohirẹsụ ahẹkẹ nịnị ẹnị ẹ yị ná ẹtẹ ẹnịnị agụvị ka ohinọyị vị ana aa sị ịsọyịrịị yị wa. Ịsa ọyịrị ọnọọ ộ hụ wa rị.

²³ Di Ijosẹẹhụ va kà a yị Anijipiti ẹnẹẹ dị ọ ka: Ẹ yẹ o, ka hụrẹ ẹhụ ajịnị na, ọnị ọ sị ẹnịrị ẹtẹ ẹnịnị hị́ yị Ihwarawo. Ọ kà ẹ̀ dọ ịsa ọyịna di è ne chire e.

²⁴ Dị ọ kà ama ịhị ọ̀ọ sị mẹ, dị ọ̀ sị agẹhị anị na yị Ihwarawo. Dị ẹnị ẹ kụ́ oze ẹẹna ana vọ dị ẹnịrị aza anị ne beri ezi ẹnịnị ẹ̀ rị, di è re chire ịnị anị.

²⁵ Dị ẹ ka: Ijosẹẹhụ ọ ka asị ẹnị sú nọ. Ẹ ka Taarụ, ọ̀ navọ ẹnị ẹ̀ vị ọrịhị Ihwarawo.

²⁶ Di Ijosẹẹhụ kụkụ mẹ̀ ẹ ịrẹyị ọda ẹtẹ Ijipiti pi pooro ve tù ajịnị nị. Ihwarawo ọ nyị agẹhị ịsa ana àa mẹ ịnị aarẹ nị. Ẹtẹ ohirẹsụ irehi Ohomorihi nịnị kẹnẹ Ihwarawo ọ̀ yị va dọ nị.

Ijekọvụ mẹ ka a mẹmẹ mẹ oku anị.

²⁷ Ijekọvụ nịnị vị ana ra hi okokooro Igoseni ịnị ẹtẹ Ijipiti. Ệ nyị ẹtẹ tụ́ ịzọọ, dị ẹ ma ozi, dị ẹ nyayịnẹ aa rụrụ nị.

²⁸ Ijekọvụ ộ ra Ijipiti mẹ ịrayị ẹwụrịhịmba. Avaba ịrayị oni Ijekọvụ mẹ ẹhẹ vị ẹchịhịmba tụra ịhịmba.

²⁹ Ịjị ụmẹ oni Ijekọvụ ee vee sú aa gụrị ẹtẹ, dị ọ tụ́ na hị́ Ijosẹẹhụ ozi anị dị ọ ka: Òo sì ịrẹyị anị ọ sị ụvọ chire agada anị dị ọ̀ hị́ eku yị ọnị. Ọ kà ọ̀ hị́ eku ka ọ vaa mẹ ịsị ọnị ọ ka ọ mẹ ka ọ yi vee vene ọnị. Ọ kà ọ̀ hị́ eku ka o yi vee ne ọnị tụ́ ịnị ẹtẹ Ijipiti.

³⁰ Ọ kà ò ne ọnị pè ohiku anị. Ọ kà ịhị oni òo sú ọ sị ọnị hụrẹ Ijipiti, di o ne ne ọnị tụ́ ịzị e ne wa tụ́. Di Ijosẹẹhụ ka ooho nị.

³¹ Di Ijekọvụ ka Ijosẹẹhụ ọ̀ hị́ eku ka ọnị vavọọ vaa mẹ. Di Ijosẹẹhụ hị́ eku yọ nị. Di Ijekọvụ hụtụ ịrẹsụ aha ọyịsụ anị dị ọ kụ́ Ohomorihi avọ nị.