Oyinyima 42 - IWE ỌNỊNỊ

Ẹnẹbẹnị Ijosẹẹhụ ệ nọ Ijipiti na hị̀ ịsa.

¹ Ijekọvụ ộ wụ́ ka â nyị akụ ịnị ẹtẹ Ijipiti. Dị ọ va hị́ ezi anị dị ọ ka: Vị e hi ẹtẹ ee re ẹngụ nịị?

² Ọ kà ẹ́ẹ́ yẹ ka ọnị ộ wụ́ ka a ka â nyị akụ Ijipiti. Ọ kà a nọ ịzọọ dị ẹ na hị́ akụ vẹ, dị ẹnị ẹ rị ọ di asị ẹnị su va ha.

³ Ịzẹyịza dị ẹnẹbẹnị Ijosẹẹhụ ẹẹwụ si hu aa nọ Ijipiti ka ẹnị ẹ̀ na hị́ akụ nị.

⁴ Ama Ijekọvụ ọ yị tụ́ Ịbẹnjamịnị ọyịnyara Ijosẹẹhụ saasa wa. Angwa ee hi ọ ka ọnị ọ yị yẹ ịsa odivi ọ zụ na mẹ Ịbẹnjamịnị.

⁵ Avọọ ezi Ijekọvụ ẹnị mẹ̀ rẹ saasa aza ana aa nọ Ijipiti na hị́ ịsa nị. Ụngwẹ ọnị vị ana rẹ tụra ịnị ẹtẹ Ikanaani.

⁶ Ijosẹẹhụ ọ kụkụ sị eyi pè ẹtẹ Ijipiti nị. Ọnị aa ná ịsaa yị avaba aza ana àa vẹ ka ọnị àa vaa hị́ ịsa nị. Dị ẹnẹbẹnị Ijosẹẹhụ nịnị vẹ, dị ẹ tana tụra ẹtẹ kụ́ ọ nị.

⁷ Ijosẹẹhụ mè re ẹnẹbẹnị anị, ộ yẹ wa, ama dị ọ mẹ̀ ebira hi wa anka ọza ọnị ọza ọ̀ yị yẹ avọọ nị. Dị ọ kara eyi hi wa dị ọ ka: Ịzị ẹ hụrẹ vẹ? Dị ẹ ka, “Ịnị ẹtẹ Ikanaani ẹnị hụrẹ vẹ ka ẹnị ẹ̀ va hị́ ịsọyịrị nọ.

⁸ Ịzẹyịza di Ijosẹẹhụ sị yẹ ka ẹnẹbẹnị anị ẹ vị nị. Ama ẹnịnị ẹnị ẹ yị yẹ Ijosẹẹhụ.

⁹ Di Ijosẹẹhụ raà tamayị ụra ọnị ọ vịdị ra ịyẹẹyẹ ini oze ẹnịnị nị. Dị ọ kà a yị wa dị ọ ka: Oyn ẹ vị nị. Ọ kà vị ẹ vẹ ka ẹnị è ve re ẹtẹ ọnọnị ẹnya ịrẹkụ ẹnịnị ọ̀ọ mẹmẹ yà nị.”

¹⁰ Dị ẹnịnị ka, “Eyiye, ada ayị, ịsọyịrị kẹnẹ ẹnị ka ẹnị ẹ va hị́ nọ.

¹¹ Ẹ ka Ada ọnya ọ ma avaba ẹnịnị nị, ka ẹnị e mē cheeche. Ẹ rẹ ka ẹnị e yi ve yi ẹtẹ re.”

¹² Di Ijosẹẹhụ ka, “Ireche yọ, vị ẹ vẹ ka ẹnị è ve re ẹnya ịrẹkụ ẹnịnị mẹmẹ yà nị.”

¹³ Di e re tụ́ ohi dị ẹ ka, “Nda, ẹyị ẹwụrẹva áda ayị ma nị. Ada ayị vị ana ra ịnị ẹtẹ Ikanaani. Ajịmọ ayịị yà pè ada ayị tụ́ eehi. Ọza ịnyara ayị kụkụ yà ịzọọ.”

¹⁴ Di Ijosẹẹhụ ka, “Ọnị ọ kị kà a ka vi e ve yi ẹtẹ ọnọnị re nị.

¹⁵ Dị ọ ka ịsị ọnị aa vaa kà aanị ọnị vaa sị yẹ iruvo ẹnịnị nị. Dị ọ ka ọnị ộ sị ịrẹsụ ohinọyị hị́ eku ka à yị vị ọhụva ẹnịnị ana vị ozweyi vẹ ịzẹnị, ẹ yị nyị ọza ẹnịnị ana aa hụụ ịzẹnị.

¹⁶ Dị ọ ka ọ Tụ́ ọza ịnyara ẹnịnị dị ọ̀ na sị ọhụva ẹnịnị ọnọọ vẹ dị ẹnịnị ana vọ ò hi ịnị ẹngwa ịzẹnị. Ọ kà ọnọọ ẹnị vaa sị zama ịrẹyị ẹnịnị re àa vị ịzẹyịza yọ nị. Ọ kà à yị vị avọọ, ọnị ộ sị ịrẹsụ ohinọyị hị́ eku tụ́ ọ ka vi e ve yi ẹtẹ ọnọnị re nị.”

¹⁷ Dị ọ kụ́ wa ne hi ini otumare, dị ẹ mẹ ẹkụhị ẹẹta ịzọọ nị.

¹⁸ Ịhyẹgwẹta anị di Ijosẹẹhụ va hị́ wa dị ọ ka, “Ọnị ộ nyị angwahi Ohomorihi. Ẹ̀ẹ mẹ ịsị ọnị kà ọza ọ yị vaa wụ̀ wa.

¹⁹ Ọ kà ẹ̀ẹ ka ẹnị ẹ nyị ịzẹyịza, ẹ̀ navọ ọza ịnyara ẹnịnị ọ̀ yà ini otumare. Ọ kà ẹnịnị ana vọ ọ̀ sị akụ na yị anda ẹnịnị agụvị ngwẹ ana aa kụ̀ wa.

²⁰ Dị ọ rẹ ka ẹ sị ọhụva ẹnịnị ana vi ozweyi keekere vẹ. Ọ kà ọnị ọ vaa mẹ ka ọnị ẹ yẹ àa vị ịzẹyịza ẹ yaa kà di asị e sú nị.” Dị ẹnịnị ka ooho nị.

²¹ Dị ẹnẹbẹnị Ijosẹẹhụ vaa kà a yị ẹngụ dị ẹ ka, ẹnị ẹ yẹ ka ẹnị ẹ sị ịvị rị agụvị ebira ọnị ẹnị mẹ hi ọhụva ẹnịnị. Ọ kà ẹnị ê re ọ màa rị ụya, dị aa dá ịpẹẹ yị ẹnị, ama ẹnị e yi tụ́ ohi. Dị ọ ka ọnị ọ mẹ ka ịrẹyị ẹnẹnị ẹ maanị tù ẹnị aanị nị.

²² Di Irubẹnị ve tụ́ wa ohi dị ọ ka, “Aanị ka ọnị ọ yị kà a ka asị ẹnị mẹ̀ ebira odivi hi ozi ọnọọ ịhị ọnọọ di è yi tụ́ ohi. Dị ọ ka éē re ka vi Ohomorihi aa họ̀ ẹnị oponu anị aanị nị.

²³ Ẹ mẹ̀ maanị aa ka, ẹ yị yẹ ka Ijosẹẹhụ ộ wụ́ ẹkụra ẹnịnị. Vị a vịdị aa dọ Ijosẹẹhụ ịrẹyịị kà a yị wa nị.

²⁴ Di Ijosẹẹhụ hụụ ịda ẹnịnị, dị ọ na jị òrèrè nị. Di o re ve tù wa di o pè wa kà ịrẹyị nị. Dị ọ yà eyi ẹnịnị dị ọ za Isimiyọnị dị ọ ka à sị ẹba tụ́ ọ nị.

²⁵ Di Ijosẹẹhụ va hi ezi ahụ anị dị ọ ka ẹ̀ kụ́ ayị hi ịnị achuchu ẹnịnị ohihi nị. Ọ kà à sị ẹkẹhị ọzọza varẹma tụ́ ịnị achuchu anịị yọ, dị à sị ịsa yị wa ẹnẹ vaa rị ẹ̀ẹ yaa na oze. Ịzẹyịza dị a vavọọ mẹ̀ ẹ yị wa nị.

²⁶ Dị ẹ kụ́ akụ tụra ịkẹrịkẹtẹ ẹnị ẹ za vẹ nị, di e si hu aa na nị.

²⁷ É mè tù ịzị azaā chi, dị ọza ịnyara ẹnịnị ngwara achuchu anị ka ọnị ọ̀ sị ịsa yị ịkẹrịkẹtẹ anị nị. Di o ne tù ka â sị ẹkẹhị anị tụ́ irenu achuchu anị.

²⁸ Dị ọ hị́ anda ẹnịnị ana vọ dị ọ ka: Ẹkẹhị anị a sị varẹma tụ́ ịzẹnị aanị nọ. Ọnị ọ yà ịnị irenu achuchu anị aanị nị. Ịjị ẹ maanị wụ́, ayị ẹnịnị ẹ sị sụ enyi”. Dị ẹngụ ẹnịnị aa dá ẹgahị, dị ẹ va eyi kà ẹngụ dị ẹ ka: Si Ohomorihi mẹ ẹnị aanị.

²⁹ E mè ne si tù Ijekọvụ ada ẹnịnị Ikanaani, dị ẹ kà avaba ịsa ene tù wa ózee yọ nị.

³⁰ Dị ẹ ka, “Ọnọrụ ọnọọ ana sị eyi pè Ijipiti aanị vi ana nyayịnẹ kara eyi hi ẹnị. Ẹ ka Ọ kà vi ẹnị ve yi ẹtẹ ẹnịnị re nị.

³¹ Ẹ ka dị ẹnị va kà a yọ dị ẹnị ka ẹnị e mē cheeche, ẹnị e yi ve yi ẹtẹ re.

³² Dị ẹ rẹ ka dị ẹnị ka ẹnị ẹwụrẹva ada ẹnịnị ma nị. Dị ẹnị ka ọza ịnya ẹnịnị ô wusu di ozweyi ẹnịnị yà pè ada ẹnịnị tụ́ ịnị ẹtẹ Ikanaani nị.

³³ Dị ẹ ka dị ọza ọnọọ ana sị eyi pe ẹtẹ ọnọọ va ka ọnị vaa yẹ àa vị ịzẹyịza ẹnị aa kà nị, dị ẹ ka ọ ka ẹnị ẹ navọ ọhụva ẹnịnị ọnya pè ọnị, dị ẹnị ẹ sị akụ va yị anda ayị ẹnịnị ọnị ụngwẹ aa kụ̀. Ẹ ka ọ ka,

³⁴ ẹnị ẹ va sị ọhụva ẹnịnị ana vị ozweyi vẹ. Ọnị ọ vaa mẹ ka ọnị ọ̀ yẹ ka ẹ yị vị ẹnị ve yi ẹtẹ re nị, ka ẹnị ệ nyị ịzẹyịza. Dị ẹ ka ọ ka ẹ̀ẹ vẹ dị ẹnị sị ọhụva ẹnịnị yị ọnị di ẹnị kụkụ re oze aa ngụ ịnị ẹtẹ ọnọọ zị.”

³⁵ Ẹ maa và akụụ hụụnị achuchu ẹnịnị, dị ọzọza ne tù ka â sụ́ ẹkẹhị anị varẹma tụ́ ini achuchu anị nị. Ịjị ẹnịrị ada ẹnịnị vavọọ ree ẹkẹhị ẹnẹẹ, angwahi ọ sị ngụ wa ẹngụ.

³⁶ Di Ijekọvụ ada ẹnịnị va hị́ wa dị ọ ka, “Ẹ kụ́ ọnị ezi dọ wụ. Ọ kà Ijosẹẹhụ ọ yị kụkụ ya ịzọọ, Isimiyọnị ọnị ọ yị rẹ kụkụ yà ịzọọ, e ree sì ka ẹnị ẹ̀ va sị Ịbẹnjamịnị. Ọ kà Ịrẹsụ anị ịnya avaba ẹsẹnị maanị vẹ nị.”

³⁷ Di Irubẹnị ka, “Ọnị ọ yị sị ọ vavẹ va yọ, ọ wụ ezi anị ọnọrụ ẹyịva dọ ọ ịrẹsụ. Ọ kà ọ̀ navọ ọ̀ sị chire ọnị ụvọ, ka ọnị aa sị ọ vaa vẹ vaa yọ.”

³⁸ Di Ijekọvụ ka, “Ọchọnọyịrẹsụ! Ozi anị ọ yị saasa wa na. Ọ kà ọyịnyara anị ô wusu, ọnị ịnya ọ kụkụ vọ nị. Àa na nyị ịsị ẹ mẹ̀ ẹ ózee ẹ̀ẹ yaa na e va a mẹ ka ọnịrị orere ọ vaa zị naa ngụ ẹtẹ ini unobo anị avọọ nị.”