Oyinyima 41 - IWE ỌNỊNỊ

Ijosẹẹhụ ộ kà iruvo ụra yị Ohinọyị Ijipiti

¹ Ịrayị ẹẹva ẹ sị para hu ọnị ịrẹyị ẹnẹẹ vavọọ mẹ. Ụmẹ ọnya di Ihwarawo ọnị rẹ va ra ụra ka ọnị ộ jẹẹ ụtọ okuha Anijipiti ana aā hi Ịnayịrị nị.

² Di o re ka imaaru ịhịmba ozoza nyọọnyọrọ ana banyị ệ jịnẹ hụụnị Oku Ovivi vẹ nị. Dị ẹ yaa rị ịkẹ ene hi ụtọ okuha nị.

³ Di o ve ne re re imaaru ịhịmba gawụ-gawụ aanị ka ệ jịnẹ hụụnị okuha Ịnayịrị vẹ, dị ẹ jẹẹ pè imaaru ẹbanyị ịhịmba ịpaapa ụtọ okuha nị.

⁴ Di imaaru ịhịmba gawụ-gawụ ẹnẹẹ za imaaru ẹbanyị ịhịmba ịpaapa ẹnẹẹ, dị ẹ rị wa nị. Di Ihwarawo sị ha nị.

⁵ Ô kù chee dị ara rẹ sị Ihwarawo dọ nị. Dị ọ rẹ ra ụra ọsa nị. Ô re ihwiti ịrẹsụ ịhịmba ana nyị ịsa di e zoza ka ệ mẹ hi ịrẹsụ ọchị akụ nị.

⁶ Di o re vene re ihwiti ịrẹsụ ịhịmba ọsa ẹnẹ ẹ̀ mẹ yị ẹtẹẹrẹ, dị ẹ ha hi ịrẹsụ ọchị ihwiti ọnọọ, dị ahị ịrịịra vẹ dị ọ wara a nị.

⁷ Di ihwiti ẹnẹ ẹ̀ yị mẹ aanị, za ihwiti ịrẹsụ ịhịmba ene zoza dị ọ nyị ịsa dị ẹ mụnẹ ẹ nị. Ịjị ohinọyị sị ha, dị ọ va yẹ ka ụra ọnị aa ra nị.

⁸ Ịjị eyi sị nị̄, ayị anị ọ yị nẹtẹ. Di ọ va tụ́ na hị́ avaba ọvavo ene hi Ijipiti ọnịrị ọyẹrẹyị, dị ọ kà ụra ọnị ọ ra zụ̀ wa nị. Ama ẹ yị va nyị ọza ikonya ana zụ kà iruvo ụra ẹnẹẹ yị Ihwarawo.

⁹ Dị ọga ọza anaā ká eche yị ohinọyị ve ne tù Ihwarawo dị ọ ka: ọnị ộ tamayị ajịnị ka ọnị ọ̀ mẹ̀ ebira odivi da.

¹⁰ Ọ kà ọnị mẹ̀ mẹ ayị kụ́ ọ ịnị anị dị ọ kụ́ ọnịrị ọza anaā mẹ̀ ịsaa yọ ne hi ịnị ẹngwa nị. Dị ọ rẹ ka ọga isoja ene ee sere irehi ohinọyị ọ sị eyi pe ẹngwa ọnọọ nị.

¹¹ Ọ kà ịrahụ ẹkụhị ọnya ọnịrị ọ ô dudu ra ụra. Ụra ọzọza vị ana nyị iruvo anị.

¹² Ọ kà a nyị ozwọọmụha ọnya aanị ẹnị ẹnịrị yà ịzọọ. Anihiburu ọ vị nị, dị ahịka ọnị ọ vị ozi ahụ ọga isoja ene ee sere ẹtẹ nị. Ọ kà dị ẹnị kà ụra ẹnịnị yọ ịhị ọnọọ nị, dị ọ kà iruvo anị yị ẹnị ịsa ụra ọzọza jẹẹ yị nị.

¹³ Ọ kà ọ mẹ̀ yị kà a yị ẹnị gẹdẹ-gẹdẹ ọ va vị nị. Â sị ọnị varẹma va tụ́ udi anị, dị a na kụ́ ọza anaā mẹ̀ ịsaa yị ohinọyị ẹ̀baachị nị.

¹⁴ Di Ihwarawo tụ́ na hị́ Ijosẹẹhụ, di a wụsẹ na sị ọ hụụnị ẹngwa vẹ nị. Ịjị ọ sị ịrẹsụ anị kụ́, dị ọ sị awuru ọsa chire, di o ve tù Ihwarawo nị.

¹⁵ Di Ihwarawo kà a yị Ijosẹẹhụ dị ọ ka, “Ọnị ọ ra ụra ọnya, ana ẹ yị nyị ọza ana zụ kà iruvo anị yị ọnị. Ọ kà ọnị ọ va wụ́ ka ọza ọ̀ọ kà a yọ ụra ọnị ọ ra ọ zụ sị iruvo anị zụ̀ ọ.”

¹⁶ Di Ijosẹẹhụ tụ́ ohi dị ọ ka, “Taarụ ẹ yị vị ọnị ọ vavọọ yà. Ọ kà Ohomorihi vaa sị iruvo ụra ọnọọ zụ̀ ọ vaa nyị ịrẹyị.”

¹⁷ Di Ihwarawo kà ụra anị yị Ijosẹẹhụ dị ọ ka, “Ọnị ọ ra ụra ka ọnị jẹẹ ụtọ okuha Ịnayịrị,

¹⁸ di ọnị re ka imaaru ịhịmba ẹbanyị-ẹbanyị nyọọnyọrọ aanị ệ jịnẹ hụụnị okuha Ịnayịrị vẹ, dị ẹ yaa rị ịkẹ ụtọ okuha nị.

¹⁹ Di oni vene re imaaru ịhịmba ọsa gawụ-gawụ aanị nị. Ọ kà ọnị ọọ yị vịdị vavọọ re ẹngụ imaaru ana vavọọ kwọrọ da ịnị ẹtẹ Ijipiti.

²⁰ Di imaaru gawụ-gawụ ẹnẹẹ za imaaru ịhịmba ẹbanyị-ẹbanyị ịpaapa ẹnẹẹ, dị ẹ rị wa nị.

²¹ Ẹ mẹ̀ vavọọ sị wa rị wèe re wa wẹ yị yẹ ka â nyị ịsị ẹ rị. Vị ẹnịnị tị tịtẹ gawụ-gawụ anka ẹ mẹ̀ vịdị yà nị. Ọ kà dị ọnị sị ha nị.

²² Ọ kà ọnị ọ rẹ ra ụra ọsa. Ọ kà ọnị ô re ihwiti ịrẹsụ ịhịmba ịrẹsụ ọchị ihwiti ọnya. Ẹnịnị ệ nyị ịsa ẹtẹẹtẹrẹ.

²³ Dị ịrẹsụ akụ ịhịmba ọsa hyeke-hyeke aanị ana ahị sị banyị va ha chị pè akụ ozoza ẹnẹẹ nị.

²⁴ Dị ihwiti hyeke-hyeke ẹnẹẹ za akụ ozoza ẹnẹẹ dị ẹ mụnẹ wa nị. Dị ọ ka ọnị ộ ka ụra ọnọnị yị ọnịvọpa nịnị, ama ẹ yị nyị ọza ikonya ana zụ sị iruvo anị zụ̀ ọnị.”

²⁵ Di Ijosẹẹhụ ka, “Taarụ, Ohomorihi ọ ra à sị zụ ọ ịsị aa vaa mẹ. Ụra ẹnẹnị vị ikonya.

²⁶ Ọ kà imaaru ịhịmba nyọọnyọrọ ẹnẹẹ ọnịrị ịrẹsụ akụ ịhịmba ene zoza avọọ vị ana jẹẹ yị ịrayị ịhịmba. Ụra ọnya ẹnị ẹyịva vị nị.

²⁷ Imaaru gawụ-gawụ ịhịmba ẹnẹẹ ọnịrị ịrẹsụ akụ ịhịmba hyeke-hyeke ẹnẹẹ ana ahị sị banyị ha avọọ ana chị pè akụ ozoza vị ana jẹẹ yị ịrayị ịhịmba ọnị ụngwẹ vaa kụ̀.

²⁸ Di Ijosẹẹhụ rẹ ka Taarụ anka ọnị mẹ̀ vịdị kà a yọ ịsọọnị, Ohomorihi ọ ra à sị zụ̀ ọ ịsa ana aa vaa mẹ.

²⁹ A vaa nyị ịrayị ịhịmba ọnị ịsọyịrị vaa chakaa hi ẹtẹ ịnị avaba ẹtẹ Ijipiti.

³⁰ Ịrẹma ọnọọ dị ịrayị ịhịmba ọsa tụra a vẹ ọnị ụngwẹ vaa kụ̀ dị ayị hi ka â vịdị nyị ịsọyịrị gwẹtẹ ịnị ẹtẹ Ijipiti da. Ụngwẹ ọnọọ vaa kụ̀ ẹnẹmẹhị.

³¹ Ayị vee hi ka ịsọyịrị ộ vịdị pọ̀ hi ẹtẹ ịnị ẹtẹ Ijipiti da, ịsị ụngwẹ ọ̀ọ sị ọza mẹ.

³² Dị ọ rẹ ka Taarụ iruvo ọnị ọ sị ra ụra ọnọọ ụpẹ ẹẹva ọ vị ka Ohomorihi ọ mẹ eto ịrẹyị ọnọnị nị. Ọ yị vaa za a tụra ẹtẹ dị ọ̀ mẹ̀ ẹ.

³³ Dị ọ rẹ ka Taarụ, ịsị ọ zụ mẹ ọ vị ka ọ yaanị sì ọza ana yẹ ịrẹyị ẹtẹẹtẹrẹ, dị wa sị ọ ka ò sị eyi pè ẹtẹ Ijipiti.

³⁴ Dị ọ̀ nyị aza dị ẹ̀ sị eyi pe okokooro-okokooro ịnị ẹtẹ Ijipiti. Dị ọ̀ sị eyi pè ẹtẹ Ijipiti ịnị avaba ịrayị ịhịmba ọnị ịsọyịrị vaa chakaa hi ẹtẹ aanị, ọ kà a ka è tenyi ẹtẹ Ijipiti; ọza ọ yị yẹ iruvo ịrẹyị ọnọnị ẹtẹẹrẹ. Dị ẹ dọ agẹhị ịsa ịnị aarẹ ini ẹtẹ Ijipiti.

³⁵ Ịsa ọyịrị ẹnị ẹ̀ẹ vavọọ dọ ịnị ịrayị ọnị ịsọyịrị sị pō hi ẹtẹ aanị, ẹ̀ kụ́ ọ tẹ tụ́ ịnị ụhwọ ịnị ẹkụra. Taarụ, dị ahịka ẹwụ ụvọta ọ mẹ ọda ka à vavọọ kụ ọ tẹ nị.

³⁶ Aanị a mẹ̀ zụ kụ́ ịsọyịrị tẹ zi ịrayị ịhịmba ana aa vẹ ọnị ụngwẹ vaa kụ̀ ịnị ẹtẹ Ijipiti nị. Ọ kà àa maanị mẹ, ụngwẹ ọ yị vaa wu avaba aza ha.”

 sị Ijosẹẹhụ mẹ ọga tụ́ Ijipiti.

³⁷ Ịrẹyị oni Ijosẹẹhụ kà ô hine Ihwarawo ọnịrị aza ene ee pè e juwe.

³⁸ Di Ihwarawo hị́ ezi ahụ anị dị ọ ka, “Ẹnị ẹẹ kụkụ zụ maanị re ọza ẹnẹsa ana maanị nyị ịrẹyọyẹ Ohomorihi.”

³⁹ Di Ihwarawo va hị́ Ijosẹẹhụ dị ọ ka, “A mẹ̀ hị́ ka ọnị Ohomorihi maanị sị ịsa ẹnẹnị zụ̀ aanị nị, ẹ yị nyị ọza ẹnẹsa ana maanị nyị ịrẹyọyẹ ọnị ọ nyị aanị.

⁴⁰ Ọ kà ọnị ọ vaa sị eyi pè ẹkụra anị nị. Ọ kà ịsị ọọ ka aza anị ẹ̀ mẹ kẹnẹ avaba ẹnịnị vaa mẹ nị. Ọ kà ini oze ka ọnị vị ohinọyị nị kẹnẹ oni ve sii huna a nị.”

⁴¹ Dị ọ rẹ kà a yị Ijosẹẹhụ dị ọ ka, “Ọnị ọ raà sị avaba ẹtẹ Ijipiti chire e ụvọ.”

⁴² Di Ihwarawo tụ̀ ochirigege anị, dị ọ sị tụ́ Ijosẹẹhụ ụvọ nị. Dị ọ kụ́ ịta ozoza dị ọ kụ́ ọ hi Ijosẹẹhụ ẹngụ nị. Dị ọ sị ịsọbẹ igooru tụ́ ọ ọrọkọ nị.

⁴³ Dị ọ sị ọ tụra ịkẹkẹ oni umaataā tura ọnị ọgụ ọhụva ohinọyịị̄ tụra nị. Dị aza hi ọvịdị Ijosẹẹhụ di eyee nowu dị ẹ ka, “Hụrẹ oze nịnị!” Avọọ Ihwarawo mẹ̀ sị avaba ẹtẹ Ijipiti chire Ijosẹẹhụ ụvọ nị.

⁴⁴ Dị Ihwarawo kà a yị Ijosẹẹhụ dị ọ ka, “Ịzẹyịza ọnị ọ vị ohinọyị nị. Ama ẹ yị nyị ọza ana va nyayịnẹ sị ụvọ ọ̀ọ vị ahụ ịnị ẹtẹ Ijipiti à yị vị Ijosẹẹhụ ọ sị oze yọ.”

⁴⁵ Di Ihwarawo ka Ijosẹẹhụ ọ kụkụ rị Izahwenati Ipaniya nị. Di ohinọyị sị Asenati ozi Ipotihera gà Ijosẹẹhụ dị ọ nyị ọ nị. Ipotihera ọnọọ ọ vị ohirẹsụ irehi Ohomorihi tụ́ ẹkụra Oni nị. Di aza sị yẹ ka Ijosẹẹhụ ọ kụkụ sị eyi pe Ijipiti nị.

⁴⁶ Ijosẹẹhụ vị ịrayị ohurẹẹwụ di o nyima ee pè ohinọyị Anijipiti mẹ̀ ụkọrọ. Di Ijosẹẹhụ hụụ ịda Ihwarawo, di o ne chire avaba ẹtẹ Ijipiti ahụ nị.

⁴⁷ Ịnị ịrayị ịhịmba ọnị ịsọyịrị chaka hi ẹtẹ aanị, ịsa ịnị aarẹ vị ana nyayịnẹ mẹ ẹtẹẹtẹrẹ.

⁴⁸ Di Ijosẹẹhụ ka à kụ́ ịsọyịrị gụ ịnị avaba ẹtẹ Ijipiti ịnị ịrayị ịhịmba ẹnẹẹ ọnị ịsọyịrị pọ̀ hi ẹtẹ nị. Dị ọ kụ́ ịsa ẹnẹẹ tẹ hi ịnị ẹkụra nị. Ịsa ana àa kụ́ hụụnị aarẹ ana gụrị ẹkụra ọzọza, dị aa kụ́ ọ tẹ ịnị ẹkụra ọnọọ.

⁴⁹ Ijosẹẹhụ vị ana nyayịnẹ hara ihwiti tẹ; wèe re e vị ọ sị mẹẹ ààrẹ ụtọ ókụ̄ avọọ nị. Ô tù ụpẹ ọnya ọ yị kụkụ za a ịrịka agụvị ka ọza ọ yị kụkụ zụ za a.

⁵⁰ Dị ịrayị ọnị ụngwẹ aa sịị kụ̀ vavẹ, Ijosẹẹhụ ộ ma ezi anọrụ ẹẹva. Asenati ozi Ipotihera ana vi ohirẹsụ irehi Ohomorihi tụ́ Oni ộ ma ezi ẹnẹẹ yọ nị.

⁵¹ Ịpaapa vị oni Ijosẹẹhụ hị́ Ịmanasẹ. Iruvo Ịmanasẹ ọ vị, “Ộ mẹ ka me hi ayị.” Ọ kà, Ohomorihi ọ ra à mẹ ka ọnị o hi ayị ụya ọnị ọnị rị ọnịrị aneehi ada anị.

⁵² Dị ọ ka ọsa ọ rị Ehwireemi nị. Ọ kà, Ohomorihi ọ ra si ozi yi ọnị ịnị ẹtẹ ịzị ọnị va ya aa rị ụya.

⁵³ Ịrayị ịhịmba ọnị ịsọyịrị chaka hi ẹtẹ ịnị ẹtẹ Ijipiti ộ vẹ, ộ ta.

⁵⁴ Dị ụngwẹ ịrayị ịhịmba sị nyima nị anka Ijosẹẹhụ mẹ̀ vịdị kà a. Ụngwẹ vị ana aa kụ̀ avaba aha ana vọ, ama â nyị ịsọyịrị ịnị avaba ẹtẹ Ijipiti.

⁵⁵ Ịjị ụngwẹ aa kụ̀ avaba Anijipiti, di e nowu na za Ihwarawo ka ọ̀ sị ịsọyịrị yị ẹnị nị. Avaba Anijipiti ene ee ve tụ̀ Ihwarawo dị ọ rẹ kà a yị wa ka, “Ne tù Ijosẹẹhụ nịnị, ịsị ọ̀ọ ka wa mẹ dị ụ mẹ̀ ẹ nịnị.”

⁵⁶ Ịjị ụngwẹ sị ngụ avaba aha, di Ijosẹẹhụ ka à nā avaba ụhwọ dị à ná ịsọyịrị yị Anijipiti. Ụngwẹ ọnọọ ộ kụ̀ ẹtẹẹtẹrẹ ịnị ẹtẹ Ijipiti.

⁵⁷ Ụmẹ ọnọọ dị avaba anẹhẹ aa nọ Ijipiti nee tù Ijosẹẹhụ ka ẹnị ẹ̀ na hị́ akụ nị, agụvị ka ụngwẹ ọnọọ vị ana nyayịnẹ aa kụ̀ avaba aha.