Oyinyima 33 - IWE ỌNỊNỊ

Ijekọvụ ọnịrị Iisọ ẹ na gẹ

¹ Ijekọvụ ộ kana eyi di o re ka Iisọ aa vẹ nị. Ọ màa vé ộ kụ́ aza ẹnị akava saasa ẹngụ. Ijekọvụ mẹ̀ vavọọ re e, dị ọ gà ezi anị yị Iriya, ọnịrị Irechẹrị ne beri ezi ahụ ẹnịnị anẹẹ ẹyịva nị.

² Dị ọ kụ́ ezi ahụ anẹẹ ẹnẹẹ ẹnịrị ezi ẹnịnị hi ọvịdị, di Iriya ọnịrị ezi anị và tụra wa, di Irechẹrị ọnịrị Ijosẹẹhụ eni hi ịrẹma nị.

³ Di Ijekọvụ ọnị ụvọta dọ ọvịdị ẹnịnị nị. Ọ màa vaa gẹrị ẹnẹbẹnị anị, dị ọ và kú ẹtẹ ụpẹ ịhịmba di o ve tù ọ nị.

⁴ Ama di Iisọ zwe na gẹrị Ijekọvụ, dị ọ hara a kú ayị nị. Dị ẹnị ẹyịva mẹ orere kẹ̀ di eyee sụ́ ùnè nị.

⁵ Ịjị Iisọ kụ̀rà eyi di o re anẹẹ ọnịrị ezi, dị ọ ka, “Ene hi ẹtẹ pè e aanị?” Di Ijekọvụ ka, “Ezi oni Ohomorihi nyị ozi ahụ awụ iyi sị yọ.”

⁶ Di ezi ahụ ẹnẹẹ ẹnịrị ezi ẹnịnị tere pè Iisọ, di ẹ va ku ẹtẹ kụ́ ọ nị.

⁷ Di Iriya ọnịrị ezi anị ẹnị re tere pè e dị ẹnị rẹ và kú ẹtẹ kụ́ ọ nị. Di Ijosẹẹhụ ọnịrị Irechẹrị ẹnị rẹ tere pè e, dị ẹnị rẹ và kú ẹtẹ kụ́ ọ nị.

⁸ Di Iisọ ka, “Ịsụpa ọnị ọnị gẹrị ịjọọ yọ, a màa mẹ wa.” Di Ijekọvụ ka, “Vị ọnị ka ịsavọọ ọnị ọ̀ sị da ịpẹ yọ nọ.”

⁹ Di Iisọ ka, “Ọhụva anị, ọnị ọnị nyị ộ hụ ọnị, ọ̀ kụ́ aanị tụ́ ịda anị.”

¹⁰ Di Ijekọvụ ka, “Eyiye de, oo sì ọnị, ọ̀ dọ ịsị ọnị sị va mẹ̀ ẹ ẹyịza aanị. Ọ kà ọnị m mè si eyi anị re aanị, vị ọ sị mẹẹ ka eyi Ohomorihi ọnị re nị. Ọ kà éē re ka o yi pè ọnị zyaazị.

¹¹ Agụvị avọọ aarịhịnị ọ dọ ịsị ọnị sị vẹ. Dị ọ rẹ ka Ohomorihi vị ana nyayịnẹ mẹ̀ ẹ yị ọnị, ịsị ọnị nyị vị ana hụ ọnị.” Avọọ ọ mẹ̀ da ịpẹ yị Iisọ, dị ọ va zẹẹ ka ọnị ọ̀ dọ ọ nị.

¹² Di Iisọ va ka: Ọ̀ vẹ vị ẹnị ẹ̀ẹ na, dị ọnị ọ dọ ọvịdị.

¹³ Di Ijekọvụ ka: Eyiye de, ộ yẹ ka ezi ẹnịnị ệ yị nyị ụkata. Ịsụpa ẹnẹnị ana aa ká ozi ịrẹva aanị rẹ vị ụgẹnggẹnẹ. Ẹ̀ẹ zị ụsẹ baaba ẹkụhị ọnya, vị avaba ẹnịnị ee sú nị.

¹⁴ Ọ kà ọ̀ navọ ọ dọ ọvịdị ọ̀ọ na, ka ọnị tangwa aa vẹ anka ọpa ụsẹ ọnị ịsụpa ọnịrị ezi ẹnịnị zụ zị. Ọ kà ọnị tangwa aa vẹ pooro di oni ò ve tù ọ Ịsẹyị.

¹⁵ Di Iisọ kụkụ ka, “Ọ̀ jẹẹ ọnị ọ̀ kà a ka aza anị chee ẹ̀ jẹẹ pè e kẹ.” Di Ijekọvụ ka, “Sị ẹ yaa mẹ? Aarịhịnị de, ọnị ọ mẹ aanị ô zee.”

¹⁶ Ịhị ọnọọ di Iisọ varẹma di o si hu aa nọ Ịsẹyị nị.

¹⁷ Di Ijekọvụ ọnị aa nọ Isukuti nị. O mè tù ịzọọ, dị ọ dà irehi ịzị ọ vaa yà nị. Dị ọ jị ajẹngụ yị ịsụpa anị nị; ajẹngụ ẹnẹẹ, a kụkụ aa hị́ ịzọọ Isukoti nị.

¹⁸ Ijekọvụ ọ và hụrị akẹbẹẹba Imesopotemiya vẹ, ẹ yị va nyị ịrẹyị. Ọ va ngụ ẹkụra Ịsẹkẹmị ịnị ẹtẹ Ikanaani. Dị ọ na jị ajẹngụ tụ́ ịnị avị ọgụrị ẹkụra nị. Ijekọvụ ọ zị hụrẹ akẹbẹẹba Imesopotamiya vẹ. Ọ mẹ hụrẹ Isukoti na ngụ Ịsẹkẹmị ẹ yị nyị ịrẹyị.

¹⁹ Ijekọvụ ộ hị́ ẹtẹ ọnọọ hụụnị ụvọ ezi Ihamori ana vị ada Ịsẹkẹmị. Atẹmẹ ẹchẹhị ọ si hị́ ẹtẹ ọnọọ nị. Ịnị ẹtẹ ọnọọ ọ jị ajẹngụ anị tụ́ nị.

²⁰ Ọ̀ mẹ aha ịsọvọ tụ́ ịzọọ, dị aa hị́ ọ Ohomorihi ana vi Ohomorihi Anisirẹrị nị.