Oyinyima 32 - IWE ỌNỊNỊ

Ijekọvụ ô tenyi ẹngụ na gẹrị Iisọ

¹ Di Ijekọvụ ọnị rẹ kwẹẹtẹ dị ọ sị oze anị nị. O mè tù aha ọnya, dị ọnịrị anggẹẹrị Ohomorihi nịnị na sị gẹ nị.

² Ijekọvụ mè re wa dị ọ ka: Anggẹẹrị Ohomorihi nịnị ẹ ku udi tu ịzẹnị nọ. Agụvị avọọ di Ijekọvụ aa hị́ ịzọọ Imahanayimi nị. Imahanayimi vị udi ẹẹva ịnị ẹkụra Anihiburu.

³ Ịnị ụmẹ ọnọọ Ijekọvụ ộ tụ́ hi Iisọ ẹnẹbẹnị anị ana yà ịnị ẹtẹ ịnị ataba Ịsẹyị. Ịsẹyị ọnọọ vị ana yà ịnị ẹkụra Edomi.

⁴ Dị ọ ka ọnụtụ ẹnẹẹ ẹ kà a yị Iisọ ọga anị ka, “Ijekọvụ ozida anị ka ịdị Ịrabanị ọnị ra, di ahịka vị ọnị vaa vẹ aanị nị.

⁵ Ộ nyị imaaru, ịkẹrịkẹtẹ, atẹmẹ, ẹvụ ne beri ezi ahụ anẹẹ ọnịrị ọnọrụ. Ọ raà tụ́ hì wu ka ịsavọọ ẹwụrị ọnị ò zụ zee.”

⁶ Di ọnụtụ ẹnẹ vavẹ ve tù Ijekọvụ dị ẹ ka, “Ẹnị ẹ ne tù Iisọ ẹnẹbẹnị anị. Ẹ ka ộ kụ́ aza ẹnị akava tụra ẹngụ aa vaa gẹrị Ijekọvụ.”

⁷ Di Ijekọvụ ee hí angwa ẹtẹẹtẹrẹ, dị ayị anị sị vazi nị. Dị ọ gà aza anị ọnịrị ịsụpa anị hi oze ẹẹva nị.

⁸ Ọ kà, “Iisọ ọ̀ọ vẹ dị ọ va wụ oze ọnya anị, ana vọ vaa ha.”

⁹ Di Ijekọvụ aa mẹ̀ aduwa dị ọ ka, “Kwogwo, Ohomorihi ana Abụrahamị ada anị ọnịrị Ayiziiki ada anị hẹkẹ, ọ ka kwogwo, Ẹnẹyịmavara ọ kà a yị ọnị ka ọnị ọ̀ varẹma nọ eehi anị ọnịrị ịda anda anị. Ọ kà ọ rẹ kà a ka ọnị vaa mẹ̀ ọnị ọyịza.

¹⁰ Dị ọ rẹ ka avaba ịrẹyị anị oni ọ maanị sì, dị ọ̀ yị mẹ̀ ọnị apẹ aanị, ẹ yị vị ka ọnị vavọọ yà nị. Ọ kà Okutẹ anị kẹnẹ ọnịrị jịnẹ Okuha Ịjọdanị ọnọnị nị. Dị ọ ka ọnị ọnọọ ọrụrụ pooro di ọnị sị vara udi ẹẹva aanị nị.

¹¹ Dị ọ ka aarịhịnị kwogwo, ọ̀ dọ ọnị hụụnị ụvọ Iisọ ẹnẹbẹnị anị. Ọ kà angwa anị vi ene ee hí ọnị. Ọ nyayịnẹ va wụ ẹnị và ha. Ọ kà ọ zụ wụ ọnyị ezi ẹnẹnị beri ezi ẹnịnị.

¹² Dị ọ ka aarịhịnị ọ̀ tamayị ka ọ sị ọ kà ka ọnị vaa mẹ̀ ọnị ọyịza, dị ọ̀ mẹ ka ezi anị ịrẹma-ịrẹma ẹ̀ rụrụ anka ààrẹ ụtọ ókụ̄ ana ahịka ọza ọ yị zụ za ịrịka.”

¹³ Ijekọvụ vị ana na aa sụ ịzọọ ịhị ọnọọ. Dị ọ nyị hụụnị ogu anị ka ọnị ọ̀ si mẹ Iisọ ẹyịza nị.

¹⁴ Ộ kụ́ ọnyẹvụ ịrẹka beri ịdẹ oohu, dị ọ rẹ kụ atẹmẹ ịrẹka beri ịdẹba oohu nị.

¹⁵ Ọ rẹ kụ́ ịnyaakụmị ohurẹẹwụ ọnị ịrẹva anị nyị inono beri ezi anị ne beri imaaru anẹẹ ẹbẹẹva ọnịrị imaaru araka ẹẹwụ. Dị ọ rẹ kụ́ ịkẹrịkẹtẹ anẹẹ oohu ne beri ịkẹrịkẹtẹ araka ẹẹwụ

¹⁶ dị ọ gà wa yị ezi ahụ anị dị ọzọza sị eyi pe ogu anị nị. Dị ọ kà a yị ezi ahụ anị dị ọ ka, “Tụ́ ọvịdị ẹẹ naa zi ọnị nị. Ọ kà ogu ẹnyị ọ̀ vọ ẹtẹ tịtẹ yị ọsa.”

¹⁷ Dị ọ kà a yị ana yà ọvịdị dị ọ ka: Iisọ ẹnẹbẹnị anị ọ̀ọ va gẹrị wa di o họ̀ use ka ẹnẹ vị ọga ẹnịnị ọnịrị ka ịzị ẹ yaa nọ nị, dị ọ rẹ họ̀ ka ẹnẹ nyị ịsụpa ẹnẹnị nị,

¹⁸ dị ẹ kà a yọ ka Ijekọvụ ozida anị ọ nyị nị. Ọ kà ẹ kà a ka vị ọnị ka à sị va yị Iisọ ọga anị nị. Ọ kà ẹ̀ rẹ kà a yọ ka ọnị yà ịrẹma aa vẹ.

¹⁹ Di Ijekọvụ rẹ vavọọ kà yị ọnọhụva ọnịrị ọnọhụta ọnịrị ana vọ ene si eyi pe ogu ịsụpa ẹnẹẹ nị. Dị ọ ka, “Ẹ̀ẹ na sị gẹrị Iisọ, dị ẹ̀ maanị sị irenu tẹ ọnya.

²⁰ Dị ẹ̀ rẹ kà a yọ ka Ijekọvụ ozida anị aa vẹ ịrẹma.” Ijekọvụ o si o ro ka: Ẹyịza ọnị ọnị kụ́ tụ́ naa yọ aanị daba vaa mẹ ka ayị anị ọ̀ nẹtẹ. Ọ kà ịjị ọnịrị ọ òo kuku ne re ẹngụ ọ vaa gu ọnị.

²¹ Agụvị avọọ ọ kụ́ ẹyịza ẹnẹẹ tụ́ ụtụ, dị ọnị ụvọta sụ ịnị ajẹngụ ịzọọ ịrahụ ịhị ọnọọ nị.

Ijekọvụ ọnịrị Ohomorihi ộ vụ̀ ịrẹvụ

²² Ịrahụ ịhị ọnọọ, di Ijekọvụ kwẹẹtẹ dị ọ kụ́ ese anị ẹyịva beri ezi ahụ anị anẹẹ ẹẹva ọnịrị ezi anị ẹwụrọnya, dị ẹ na jịnẹ okuha Ijaboki nị.

²³ Ọ̀ mẹ raa kụ wa na jịnẹ dị ọ rẹ kụ́ avaba ogu anị ana vọ na tụ́ akẹnẹ okuha nị.

²⁴ Ọ kụkụ sị vọ Ijekọvụ ọnịnya tụ́ ịzọọ. Dị ọza ọnya vẹ dị o vee pè Ijekọvụ vụ̀ ịrẹvụ, dị ẹ vụ̀ ọ pooro dị eyi aa vaa nị.

²⁵ Ịjị ọza ọnọọ re ka ọnị o yi zụ hu Ijekọvụ ẹtẹ, dị ọ nya a ịsa ini okokozi nị. Usi Ijekọvụ o si kene, o meè pe e vụ̀ ịrẹvụ.

²⁶ Di ọza ọnọọ ka, “Ọ̀ jẹẹ ọnị ọ̀ na ka eyi aa vaa nị̄.” Di Ijekọvụ ka, “Ọ̀ yị mẹ̀ aduwaa yị ọnị, ọnị ẹ yị zẹẹ ka ọ̀ na.”

²⁷ Dị ọza ọnọọ họ̀ ọ dị ọ ka, “Ị́rẹha anị rị?” Dị ọ ka Ijekọvụ ọnị rị nị.

²⁸ Dị ọza ọnọọ ka, “Vị Ijekọvụ a kụkụ vaa hị́ ọ, ọnị ọ ka ọnị ọ kụkụ rị Isirẹrị nị, agụvị ka o re è pè Ohomorihi ọnịrị aza vụ̀ ịrẹvụ, ọ sị wa hu.”

²⁹ Di Ijekọvụ ka, “Aarịhịnị, hị́ ịrẹha anị zụ̀ ọnị de.” Dị ọza ọnọọ ka, “Sị ẹ vẹ dị ee họ̀ use ịrẹha anị.” Dị ọ kụ́ ọ adịjọọ ịzọọ nị.

³⁰ Di Ijekọvụ kụkụ aa hị́ ịzọọ Ipeniyeri nị. Ọ kà, “Ọnị ô re Ohomorihi eyi gẹrị eyi, ama ọnị o rè vee sú.”

³¹ Ọyị ọ sị hụrẹ di Ijekọvụ va hụrẹ Ipeniyeri. Dị ahịka vi o kuku ee sika agụvị eyege anị nị. Ipeniyeri: Iruvo anị vị eyi Ohomorihi ịnị ẹkụra Anihiburu.

³² Hụrị ụmẹ avọọ ve tù ajịnị Anisirẹrị ẹ mā rị ọzị ene kú ẹchụkụ ini okokozi ana yà ịrẹsụ ẹchụkụ usi. Iruvo ọ vị ka ịzọọ ọza ọnọọ nya Ijekọvụ ịsa nị.