Oyinyima 3 - IWE ỌNỊNỊ

Ọnọrụ ọnịrị Ọnẹẹ ệ mẹ ịvị

¹ Ịnị avaba uye ịnị avị ọnị Ẹnẹyịmavara Ohomorihi tụ́, ẹ́wụ́ ọ vị ọnọbọ hu kere-kere nị. Ẹkụhị ọnya o vẹ tù ọnẹẹ ọnọọ dị ọ họ̀ ọ ka: Ho, aanị ka ẹ yị nyị ẹtụtụ ọchị ọnị Ohomorihi zẹẹ ka ẹ̀ẹ rị ịnị ẹtụtụ ene hi ini ụbazị ọnọnị aanị?

² Dị ọnẹẹ ọnọọ tụ́ ẹ́wụ́ ohi dị ọ ka: ẹnị ê re oze rị ẹtụtụ ọchị ene hi ịnị ụbazị aanị,

³ ama Ohomorihi ka ẹnị ẹ yị nyayịnẹ rị ẹtụtụ ọchị ana yà ịnị akakana ụbazị avọọ, ọ ka asị ẹnị hyakụ sị ụvọ kanyị ọ, ka ẹnị ve su.

⁴ Dị ẹ́wụ́ ọnọọ kà a yị ọnẹẹ ọnọọ dị ọ ka, “Sị ọọ yị, wẹ yị hyakụ ee sú vụrụ-vụrụ.”

⁵ Ọ kà agụvị ka Ohomorihi ộ yẹ ka ẹ̀ẹ rị ọ vi eyi ẹnịnị ee hweyi nị, dị ẹ kụkụ yà anka Ohomorihi mẹ̀ yà. Ọ kà dị ẹ sị ịsa ozoza ọnịrị ịsa odivi yẹ.

⁶ Ịzẹyịza ọnẹẹ ọnọọ ô re ka ẹtụtụ ọchị ọnọọ ọ rụra rị. Ô re ka ộ ngụ ọza eyi, o re ka ọ zụ mẹ ka eyi ọza ò hweyi ọ mẹ ka o zee e eyi hu avọọ ọ sị ẹtụtụ anị dị ọ rị ọ nị. Dị ọ rẹ sị ịnị anị yị ọva anị nị dị ọnị rẹ rị ọ nị.

⁷ Ẹ mẹ̀ yị rị ọ kẹnẹ eyi ẹnịnị ẹ si hweyi, di e re ka ịnị ahwaahụ ẹnị yà nị. Dị ẹ na dị ẹ na jị avị, dị ẹ gẹ ẹ di e si kú ẹngụ nị. Ịrẹha ọchị ọnọọ ọ rị itena, dị a rẹẹ hị́ ọ ihwigi nị.

⁸ Ọyị mẹ̀ sị rọ ịhị ọnọọ, dị ẹ wụ́ ka Ẹnẹyịmavara Ohomorihi aa vẹ ịnị ụbazị nị. Dị ọnọrụ ọnọọ ọnịrị ose anị si zwe na tẹ̀ ịnị ọchị ẹnẹẹ nị ka asị Ẹnẹyịmavara Ohomorihi re ẹnị.

⁹ Di Ẹnẹyịmavara Ohomorihi hị́ ọnọrụ ọnọọ dị ọ ka, “Ịzị ụ yà nịnị?”

¹⁰ Di ọnọrụ ọnọọ ka: ọnị ọ wụ́ ọ maa zị ụsẹ ịnị ụbazị, di angwa ee hí ọnị agụvị ka ahwaahụ ọnị vị nị. Agụvị avọọ dị ọnị na tẹ̀ nị.

¹¹ Di Ohomorihi kà: Ẹ̀nị ẹ kà a yọ ka ahwaahụ ọ vi nị? Dị Ohomorihi họ̀ ọ ka ọ́ọ́ na rị ẹtụtụ ọchị ọnị ọnị kà a ka asị ọ rị ịhị ọnọọ rị nị?

¹² Dị ọnọrụ ọnọọ ka: Aaa vị ọnẹẹ ọnị ọ sị ve pe ọnị tụ́ ịzẹnị ọ sị ẹtụtụ ọchị ọnọọ yị ọnị dị ọnị va rị ọ.

¹³ Di Ẹnẹyịmavara Ohomorihi va họ̀ ọnẹẹ ọnọọ use ka: Sị ọ mẹ aanị? Dị ọnẹẹ ọnọọ ọnị rẹ ka, Ẹ́wụ́ o vene ọnị dị ọnị va na rị ọ nị.

Ọkarẹyị ịvị yị ẹwụ ọnịrị ọza.

¹⁴ Di Ẹnẹyịmavara Ohomorihi va kà a yị ẹ́wụ́ ọnọọ dị ọ ka: ebira ọnị ọ mẹ aanị ọnị aanị vee divii hu bemi ịnị avaba uye nịnị nị. Ọ kà ịrẹka o veneē sii tùraa zị nị, di ahịka ezi ọ vaa baa rị pooro ịnị ẹhẹ anị nị.

¹⁵ Ohomorihi ka ọnị vaa mẹ ka ẹwụ ọnịrị ọnẹẹ ọnọọ ọ̀ vị ọnịvị ẹngụ. Ọ kà Irima ezi anị ọnịrị irima ezi ẹwụ vị ana vaa vị ọnịvị ẹngụ. Ẹnị vị ana vaa chaka wụ ịrẹsụ, dị ẹwaa dà a ibezyahụ rị.

¹⁶ Di Ohomorihi kà a yị ọnẹẹ ọnọọ ka, “Ọnị vaa sị eyi anị re ịrẹyị ẹtẹẹtẹrẹ àa ma ozi. Vị ọ vaa zị ọ ẹnẹmẹhị nị. Ama vi o vee yii sì ka ọnị ọ̀ yà ịda ọva anị nị, di ahịka ọnị aa mẹ ọdaa tụra a nị”.

¹⁷ Di Ohomorihi kà a yị Adamị dị ọ ka, “Ịrẹyị ose anị ọ na sị mẹ̀ ụkọrọ, dị ọ na rị ẹtụtụ ọchị ọnị ọnị ka ọ yị nyayịnẹ rị nị Ọ kà avọọ, ọnị ọ raà hụ agụvị anị chì hi ẹtẹ. Ọ kà pooro ịnị avaba ẹhẹ anị vị ọ vaa rị ụya nị”.

¹⁸ Ọ kà ikeyi ọnịrị ịrarẹ ẹzụ ikeyi ó vee hi nị. Di ahịka vi o vee re osiye dị ọ̀ va rị ịsa nị.

¹⁹ Ọ kà dị ọ ve re ịsa rị, ọ vaa sị ụvọọ ka ẹhịị mi. Ọ rẹ ka avọọ ọ mẹ vaa mẹ pooro dị ọ̀ varẹma nọ ịnị eteesu nị, agụvị ka ezi a sị mẹ ẹ nị. Ezi ọnọọ ọ rẹ vaa vàa nọ ịnị anị nị.

²⁰ Adamị ộ sị ịrẹha yị ose anị ka ọnị ọ rị Iivi (Ọnyọza) nị, agụvị ka ọnị ọ vaa vị ọnyị avaba ọza nị.

²¹ Di Ẹnẹyịmavara Ohomorihi sị ịtụmpaha uye dị ọ sị jị ịta di o si kú Adamị ọnịrị ose anị ẹngụ nị.

Ohomorihi ộ dị ụ wa hụụnị ụbazị.

²² Di Ẹnẹyịmavara Ohomorihi ka: wéē re, ọnọrụ ọnọnị vị ana kụkụ yà anka ọnya ịnị ẹngụ ayị, ọ sị ịsa ozoza ọnịrị odivi yẹ. Ọ kà ọ nyayịnẹ na sị ẹtụtụ ọchị anaā mẹ ka ọza ọ̀ yàra dị ọ rị ọ, dị asị ọ kuku sú.

²³ Di Ẹnẹyịmavara Ohomorihi dụ ọ jịnẹ hụụnị ụbazị Edẹnị nị, ka ọ̀ naa dà aarẹ tụ́ ịnị ẹtẹ ana dà a di a sị mẹ̀ ẹ.

²⁴ Dị ọ vavọọ dụ ọnọrụ ọnọọ jịnẹ nị, dị ọ kụ́ ịsa ana nyị ụhwẹ ana aā hị́ icherubi nịnị, dị ọ kụ́ wa hi eyi ọnị ọyịị̄ zịị vẹ ịnị ụbazị Edẹnị nị. Dị ọ rẹ kụ ụhwọ ọbanyị ịrịịra hi ịzọọ ene ee jesii zị agụvị asị a nyị ọza ana kụkụ zụ ngụ ịzọọ ne tù ọchị ana zụ mẹ ka ọza ọ̀ yàra pooro.