Oyinyima 29 - IWE ỌNỊNỊ

Ijekọvụ ọ na ngụ ịda Ịrabanị

¹ Di Ijekọvụ sị ụsẹ anị hụụ ịzọọ dị ọ na ngụ ịnị ẹtẹ aza ana ra éyi ọnị ọyịị̄ zịị vẹ nị.

² Ẹkụhị ọnya di o re ịkangga ọnya ịnị avị ịzọọ nị. Ô re ka atẹmẹ ọnịrị ẹvụ ọgụ ẹẹta ệ hụtụ pè ịkangga ọnọọ agụvị ka ịzọọ aa dà enyi hụrẹ yị wa di é hú ọ nị. Ịrẹta ene e si kú ịkangga ọnọọ ộ banyị ẹtẹẹtẹrẹ.

³ Avaba ịsụpa ẹ̀ẹ sị gụ hi ịzọọ, di aza ana aa kụ́ waa rị dudu zina ịrẹta ọnọọ hụụnị ịkangga ọnọọ, dị ẹ sị enyi yị ịsụpa ẹnịnị. Ẹ̀ẹ raà sị enyi yị ịsụpa ẹnịnị, di e re dudu sị ịrẹta ọnọọ kú ịkangga ọnọọ irenu.

⁴ Ijekọvụ mè re wa dị ọ ka, “Ọhụva amị, ịzị ụ hụrẹ vẹ nịnị?” Dị ẹ ka Ịharanị ẹnị hụrẹ vẹ nị.

⁵ Di Ijekọvụ rẹ ka: Wáá yẹ Ịrabanị ozi Ịnahọ̀? Dị ẹnịnị rẹ ka ẹnị ệ yẹ ẹ nị.

⁶ Di Ijekọvụ ka, “Ọ́ọ́ dà hi kẹ?” Dị ẹnịnị ka, “Ọ dà hi. Irechẹrị ozi anị ọ hyakụ kụ́ atẹmẹ aa vẹ avọọ nị.”

⁷ Di Ijekọvụ ka ọyị ọ sị zẹtẹ, óò yi tù ka à kụ́ ịsụpa gụ. È sị enyi yị atẹmẹ ẹnẹẹ, dị ẹ̀ kụ́ wa na rị.

⁸ Dị ẹnịnị ka, “Ho! à yị vị avaba ịsụpa gụ ta, ẹnị dudu zina ịrẹta ene kú ịkangga aanị, ẹnị e yi zụ ká enyi yị wa ọ.”

⁹ Ijekọvụ mẹ maanị ee yii pè waa kà ịrẹyị kẹnẹ, di Irechẹrị ộ kụ́ atẹmẹ ada anị aa vẹ nị. Ọnị ọọ̄ kụ́ waa rị nị.

¹⁰ Ijekọvụ mè re Irechẹrị ozi Ịrabanị ẹnẹbẹnị ọnyị anị ọnịrị atẹmẹ ada anị, di Ijekọvụ wụsẹ na, di o ne zina ịrẹta hụụnị irenu ikangga ọnọọ nị. Dị ọ ká enyi yị atẹmẹ Ịrabanị ẹnẹbẹnị ọnyị anị nị.

¹¹ Ịjị o si enyi ká yị wa, di Ijekọvụ na hara Irechẹrị nị. Ộ jẹ pooro dị ọ mẹ orere kẹ, di ee sụ ùnè nị.

¹² Di Ijekọvụ kà a yị Irechẹrị ka aazị ada anị ọnị vị nị. Ọ kà Irebeka ọ ma ọnị nị. Irechẹrị mẹ̀ maanị wụ́, di o zwe na kà a yị ada anị nị.

¹³ Ịrabanị mẹ̀ wụ́ ịrẹyị Ijekọvụ ozi ọyịnyara anị, di o zwe na gẹrị ọ, dị ọ hàrà a kú ayị, dị ọ sị ọ vẹ ini eehi nị. Di Ijekọvụ kà avaba ịsa ana mẹ yị Ịrabanị nị.

¹⁴ Di Ịrabanị ka, “Ho, ozi anị ọ vị nọ.” Di Ijekọvụ yà ịda anị ụhwẹ ọyịvụrụ ọnya nị.

Ijekọvụ mẹmẹ nyị Iriya ọnịrị Irechẹrị

¹⁵ Ẹkụhị ọnya di Ịrabanị hị́ Ijekọvụ dị ọ ka, “Vị ọ́ọ́ maanị vaa hẹkẹ ọnị kẹnẹ ọọhẹ agụvị ka ẹnị ẹ mẹhị vị anda nị? Ọ kà ọ kà a yị ọnị dàre sị a vọrọ ka ọnị o si si ọ ụta.”

¹⁶ Ịrabanị ộ ma ezi anẹẹ ẹẹva. Ana vị ọzọkụ ọ rị Iriya, di ozweyi ọnị rị Irechẹrị nị.

¹⁷ Â nyị ịsị ẹ ka ọnị ọ̀ maanị mẹ Iriya eyi, ama Irechẹrị ọnị ô zoza, wèe re e kẹnẹ aa vá wụ.

¹⁸ Irechẹrị Ijekọvụ sì nị. Dị ọ kà a yị Ịrabanị dị ọ ka: Ọ̀ jẹẹ ọnị ọ̀ mẹ̀ ụkọrọ yọ ịrayị ịhịmba dị ọ si Irechẹrị ozi anị ana vi ozweyi gà ọnị.

¹⁹ Di Ịrabanị ka, “Ọ̀ọ sị ka ọnị ọnị va na sịị gà ọza ẹnẹsa, ọnị a vọrọ ka ọnị ọ̀ sị gà nị. Ọ̀ ka ọ̀ ya ịzẹnị pè ọnị.”

²⁰ Ijekọvụ ộ mẹ̀ ụkọrọ ịrayị ịhịmba yị Ịrabanị agụvị Irechẹrị. Ịrayị ịhịmba ẹnẹẹ vị ana yà anka ẹkụhị chee kẹnẹ ini eyi Ijekọvụ, agụvị ka o reè sì ịrẹyị Irechẹrị.

²¹ Ịrayị ịhịmba ẹnẹẹ mẹ̀ sị gụ, di Ijekọvụ va hị́ Ịrabanị dị ọ ka: Ọ sị ose anị yị ọnị dị ọnị ọ̀ nyị ọ agụvị ka ịrayị ịhịmba ọnị ọ jị ọ sị gụ.

²² Di Ịrabanị kụ́ avaba anẹkụra ọnọọ gụ, dị ọ mẹ̀ ịsa yị wa nị.

²³ Ẹtẹ mẹ̀ si hozi, di Ịrabanị sị Iriya na yị Ijekọvụ nị. Di Ijekọvụ ọnịrị Iriya sị sụ nị.

²⁴ Ịrabanị ộ sị ozi ahụ anị ọnẹẹ ọnya ana aā hị́ Iziripa yị Iriya ka ọ̀ naa zị ọ ụtụ nị.

²⁵ Eyi mẹ̀ sị nị, di Ijekọvụ ve re ka Iriya ọnịrị sụtụ nị, ẹ yị vị Irechẹrị. Di Ijekọvụ va hị́ Ịrabanị dị ọ ka, “Sị ẹ vẹ dị ọ mẹ̀ ọnị apẹ, Ọ kà Aanị ka ẹ yị vị agụvị Irechẹrị ọnị mẹ̀ ụkọrọ yọ, Sị ẹ vẹ dị ọ maanị vene ọnị aanị?”

²⁶ Di Ịrabanị ka, “Ọza ọ mā si ozweyi gà ọnọrụ tụ́ ọzọkụ ịnị ẹkụra ẹnịnị ọnọnị.

²⁷ Dị ọ ka ọ̀ jẹẹ ẹnị ẹ̀ jẹ ịrajẹ ọsọnị mẹ ọsẹ ọnya da, dị ọnị ọ̀ rẹ sị Irechẹrị yọ dị ọ mẹ̀ ụkọrọ ịrayị ịhịmba tụ́ ọ yị ọnị.”

²⁸ Di Ijekọvụ ka ooho nị. Ịjị a sị eche Iriya rị mẹ ọsẹ ọnya, di Ịrabanị sị Irechẹrị ozi anị ọsa yị Ijekọvụ dị ọ nyị ọ nị.

²⁹ Di Ịrabanị rẹ sị ozi ahụ anị ọnẹẹ ọnya ana aā hị́ Ibiriha yị Irechẹrị ozi anị ka ọ̀ naa zị ọ ụtụ nị.

³⁰ Di Ijekọvụ ọnịrị Irechẹrị aa mẹ ẹvarose nị. Ijekọvụ ô sì ịrẹyị Irechẹrị huna Iriya. Dị ọ rẹ mẹ̀ ụkọrọ ịrayị ịhịmba tụ́ ọ yị Ịrabanị nị.

Ezi ọnị Iriya ma yị Ijekọvụ

³¹ Ịjị Ẹnẹyịmavara maanị re ka Ijekọvụ o yi sì ịrẹyị Iriya, dị ọ mẹ ka Iriya ọ̀ ma ozi nị. Ama Irechẹrị ọnị vị ọbọrị.

³² Iriya ô zyẹẹ dị ọ ma ozi ọnọrụ ọnya nị. Dị ọ yị ọ Irubẹnị nị. Ọ kà, “Ẹnẹyịmavara o si re ka ọnị aa rị ụya. Ọ kà ọnị ộ yẹ ka ọva anị kuku vee sì ịrẹyị anị booro aanị.”

³³ Ộ dà kù di Iriya ree zyẹẹ nị. Dị ọ rẹ ma ozi ọnọrụ ọsa nị. Dị ọ ka, “Ẹnẹyịmavara ộ wụ́ ka ọza o yi sì ịrẹyị anị, agụvị avọọ ọ rẹ sị ozi ọnọrụ ọsa yị ọnị aanị nị.” Dị ọ ka ọnị ọọ ọ rị Isimiyọnị nị.

³⁴ Iriya o re zyẹẹ, dị ọ rẹ ma a ọnọrụ nị. Dị ọ ka, “Ọnị ộ yẹ ka ọva anị vaa vàa ka ọnị vẹ ọgọnị, ọnị mẹ̀ sị ozi ọnọrụ ẹẹta ma yọ aanị.” Dị ọ ka ọnọọ ọ rị Ireevi nị.

³⁵ Di Iriya re zyẹẹ, dị ọ rẹ sị ọ ma ọnọrụ nị. Dị ọ ka, “Ọnị kụkụ aa gā Ẹnẹyịmavara.” Dị ọ hị́ ịrẹha ọnọọ Ijuda nị. Ọnọọ ọ ma, dị ọ varẹma na jẹẹ nị.