Oyinyima 25 - IWE ỌNỊNỊ

Ezi ọsa ana Abụrahamị vana ma.

¹ Abụrahamị ộ vana nyị ọnẹẹ ọsa ọnị ịrẹha anị rị Iketura.

² Ezi oni Iketura ma yị Abụrahamị ẹ vị Izimirani, Iyokisani, Imedani, Imidiyani, Isibaki ọnịrị Isuwa.

³ Di Iyokisani ọnị ma Ịsẹba ọnịrị Idedanị nị. Di Idedanị ọnị vị ada ịrẹsụ ẹnẹnị nị: Asuri, Iretusimi, ọnịrị Irewumimi.

⁴ Ezi Imidiyani ẹnị rẹ vị Ehwa, Ehwẹrị, Ịhanọkị, Abida ọnịrị Eridaha. Avaba ẹnẹẹ ẹ vị ezi ọnịrị aazị Iketura nị.

⁵ Abụrahamị vị ana kụ́ avaba ogu anị yị Ayiziiki.

⁶ Ama di o ve sú, ộ kụ́ ịsa mẹ ezi oni ese anị ọsa ma yọ ẹyịza. Dị ọ va ka ẹ̀ hụụnị eehi yị Ayiziiki nị. Ộ ka ẹ̀ nọ ẹkụra ana yà oze ọnị ọyịị̄ zịị vẹ.

Isu Abụrahamị

⁷ Abụrahamị o si bo ẹtẹẹtẹrẹ, ọ sị gụ ịrayị ẹchịhịnta tụra ẹwụrẹhị,

⁸ Abụrahamị vị ana nyayịnẹ bo di o ve sú. Ó ku orubo ẹtẹẹtẹrẹ, dị ẹhẹ anị zoza nị. Ộ vaa ụhwẹ ha dị o ne tu ohiku anị nịnị ene vịdị su nị

⁹ Di Ayiziiki ọnịrị Isimẹrị ezi anị ne e tụ́ ịnị ụtẹha Imakipera nị. Ụtẹha ọnọọ vị ana yà ịnị ẹtẹ Ehwironi ana vi ozi Izohari Anihiti. Ọ maanị gụrị Imamire.

¹⁰ Ẹtẹ ọnọọ Abụrahamị hị́ hụụnị ụvọ Anihiti nị. Ịzọọ e ne Abụrahamị ọnịrị Isera ose anị tụ́ nị.

¹¹ Abụrahamị mè wusu, Ohomorihi ộ mẹ̀ ka ò zee yị Ayiziiki ozi anị. Di Ayiziiki kwẹẹtẹ na ra ọgụrị ịzị aa hị́ “Ịbẹẹrị-Ịraha-Ịrọyị” (ịkangga ọza ana yàrà eneē re mị).

Ezi Isimẹrị

¹² Isimẹrị vi ozi Abụrahamị. Ihaga ana vị Anijipiti ozi ahụ Isera ọ ma a yọ nị.

¹³ Ịrẹha ezi Isimẹrị ọnọọ yị. Ẹ mẹmẹ vị̀ yị ẹngụ a sị hị́ wa aanị nị. Inebayoti, Isimẹrị vịdị ma nị. Ana vọ ẹ rị: Ikeda, Adibeeri, Imibisami,

¹⁴ Imisima, Iduma, Imasa

¹⁵ Ihadadi, Itema, Iyeturi, Inahasi ọnịrị Ikedema.

¹⁶ Ẹnẹẹ ẹ vị ezi Isimẹrị nị. Ịrẹha ẹnịnị aā sịị hị́ ẹkụra ọnịrị udi ọzọza nị. Ẹnị ẹwụrẹva ẹnẹẹ ẹ vị ohiku ịrẹsụ ẹnẹẹ nị.

¹⁷ Isimẹrị vị ịrayị ẹchịhịnọnyị tụra ẹwụrịhịmba di o ve sú.

¹⁸ Ezi Isimẹrị vị ana ra ịnị ẹtẹ ana yà ịnị akakana Ihavira ọnịrị Isuri. Ịzọọ vị ana và eyi ọnị ọyịị̄ zị hụrẹ ịnị ẹtẹ Ijipiti ózee Asiriya. Ọ yị ra va hura ezi Abụrahamị ana vọ.

Ịtọpa Iisọ ọnịrị Ijekọvụ

¹⁹ Ịtọpa Ayiziiki ozi Abụrahamị yị.

²⁰ Ayiziiki vị ịrayị ẹbẹẹva dị ọ va nyị ose anị ana aā hị́ Irebeka. Irebeka ọnọọ vị ozi Ibetuwẹrị Anarami ịnị akẹbẹẹba Imesopotamiya. Irebeka rẹ vị ọyịnyara Ịrabanị.

²¹ Ose Ayiziiki vị ọbọrị, dị Ayiziiki aa dá ịpẹẹ yị Ẹnẹyịmavara nị. Ẹnẹyịmavara ộ wụ́ aduwa anị, di Irebeka ee zyẹẹ nị.

²² Ezi ẹnẹẹ vị ẹẹva di eyee zigi ẹngụ ịnị ịrẹka Irebeka nị. Di Irebeka ka, “Ọnọnị rẹ rị aanị?” Dị ọ ka ọnị aa naa họ̀ Ẹnẹyịmavara kà ọ̀ kà a yị ọnị nị.

²³ Ọ mẹ na họ̀ ọ, Di Ẹnẹyịmavara tụ́ o ohi dị ọ ka: Anẹkụra ẹẹva e hi ịnị ịrẹka anị nị. Anẹkụra ẹẹva ọ vaa ma nị, ama vị ẹ vaa gàa hi nị. Ọnya ọ vaa nyị ụkata hu ọsa nị. Ana vị ọzọkụ ọ vaa hẹkẹ ana vi ozweyi nị.

²⁴ Ụmẹ mẹ̀ si tù ka ò ma ozi, di ahịka ịzẹyịza adẹgụnẹva ọ ma nị.

²⁵ Ịpaapa mẹ jịnẹ vẹ, dị ọ vi ovivi, dị ẹngụ anị vị ẹyị-ẹyị anka ịta ẹyị-ẹyị avọọ nị, agụvị avọọ di aa hị́ ọ Iisọ nị. Iruvo Edomi ô vene ịrẹyị ẹnị ẹẹ̄ hị́ ovivi ịnị ẹkụra Anihiburu.

²⁶ Dị ọhụva anị ọnị rẹ jịnẹ vẹ nị, dị ahịka vị ọ sị ụvọ za Iisọ ibezi ahụ nị, agụvị avọọ di aa hị́ ọnọọ Ijekọvụ nị. Ayiziiki vị ịrayị ẹbẹẹta di Irebeka vavọọ ma ezi ẹnẹẹ. Ijekọvụ ini Ihiburu, ô vene ịrẹyị ẹnị ẹẹ̄ hị́ ibezi ahụ (Oyn 27.36).

Iisọ mẹmẹ sị ọzọkụ anị yị Ijekọvụ

²⁷ Ezi ẹnẹẹ mẹ̀ sị hụ̄, Iisọ ọnị vị ozube obooro, dị ọọ̄ ngụ avị nị. Ijekọvụ ọnị vị ọza hẹẹ aanị, di ahịka ini eehi ọọ̄ yà nị.

²⁸ Ayiziiki vị ana nyayịnẹ sì ịrẹyị Iisọ agụvị ka ọ nyị iravu uye ịnị avị. Ama di Irebeka oni sì ịrẹyị Ijekọvụ nị.

²⁹ Ẹkụhị ọnya Iisọ ộ hụụnị avị vẹ, ụngwẹ aa kụ̀ ọ ẹtẹẹtẹrẹ, dị ahịka vi o ve tù ka Ijekọvụ ee ne ẹpẹ nị.

³⁰ Di Iisọ ka: Ijekọvụ, ọ̀ ká ọọmẹ ovivi anị ọnọọ yị ọnị dị ọnị ọ rị ọ de, ka ụngwẹ aa vaa wụ̀ ọnị: (Iruvo ana a sịị hị́ Iisọ Edomi ọ vị ọnọọ nị.)

³¹ Di Ijekọvụ ka, “Ọ̀ọ ka ọnị ọ̀ ká yọ, ọ sị udi ọzọkụ awụụ yị ọnị kẹ.”

³² Di Iisọ ka: Ọnị mèe vee sú aanị, sị ọnị aa rị ịnị udi ọzọkụ?

³³ Di Ijekọvụ ka: Ọ̀ hị́ eku kẹ ka ộ sị udi ọzọkụ anị yị ọnị. Ịzẹyịza dị ọ hị́ eku, dị ọ sị udi ọzọkụ anị yị Ijekọvụ nị.

³⁴ Di Ijekọvụ va sị ịbụrẹẹdị, dị ọ ká ẹpẹ tụ́ ọ yị Iisọ, di Iisọ rị ọ di o hú enyi tụ́ ọ dị ọ kwẹẹtẹ di aa na nị. Aanị Iisọ mẹ̀ za udi ọzọkụ anị, dị ọ si eyi wụ̀ ọ nị.