Oyinyima 22 - IWE ỌNỊNỊ

Ohomorihi ộ zama Abụrahamị re.

¹ Ộ dà kù che ẹnị ẹ maanị hị́ eku yị ẹngụ, di Ohomorihi va zama Abụrahamị re ịnị ụmẹ ọnya nị. Di Ohomorihi hị́ Abụrahamị, di Abụrahamị ka, “Hèé, ụmẹ ka.”

² Di Ohomorihi ka ọ sị ozi anị Ayiziiki, ozi anị ikonya gene-gene ọnọọ ọnị ọ vavọọ sì ịrẹyị anị, dị ọ̀ọ nọ ịnị ẹtẹ Imoriya. Ọ kà òo tù ịzọọ, dị ọ nọ ịnị ataba ọnya ọnị ọnị vaa sị zụ̀ ọ, dị ọ wụ̀ ozi anị ọnọọ, dị ọ̀ rị ọ ịra mẹ̀ ịsọvọ yị ọnị.

³ Ịzẹyịza, ẹnẹnẹ viri-viri ini eyinẹhẹ anị, dị ọ dà ọkụ ọnị ọ vaa sị rị ịsọvọ ọnọọ ịra, di o tenyi ịkẹrịkẹtẹ anị, Dị ọ kụ́ ezi ahụ aanị ẹẹva beri Ayiziiki, dị ẹ kwẹẹtẹ dị ẹ yaa nọ ịzị Ohomorihi kà yọ nị.

⁴ Ịhyẹgwẹta eni e nyima ụsẹ, di Abụrahamị kana eyi, di ee re ịzọọ ẹ́nẹẹnẹ nị.

⁵ Dị Abụrahamị kà a yị ezi ahụ ọnị ọnịrịị zị dị ọ ka, “Ẹnịrị ịkẹrịkẹtẹ ọnọnị ọ̀ jẹẹ ịzẹnị zi ọnị, ka ọnịrị ozi ọnọrụ ọnọnị aa nọ ịzọsọọ naa hẹkẹ Ohomorihi dị ẹnị ẹ vavẹ ve tù wa.”

⁶ Dị Abụrahamị kụ́ ọkụ ana aa sị naa rị ịsa ịsọvọ ọnọọ ịra dị ọ sị tụra Ayiziiki ozi anị nị. Dị ọnị sị ịra ọnịrị ụhwọ nị, di ẹnị ẹyịva aa na nị.

⁷ Di Ayiziiki va kà a yị ada anị dị ọ ka, “Ada amị.” Di ada anị ka, “Hèé, ụ mẹ̀ kà, ozi emi?” Di Ayiziiki ka, “Ho! ịra ọnịrị ọkụ yị, ye re atẹmẹ ọnị ẹnị aa sị naa mẹ̀ ịsọvọ ọnọọ?”

⁸ Dị Abụrahamị ka, “Ozi emi, Ohomorihi ọnị ụvọta vee re ka â nyị ọnị ịdẹbaa ọnị ị vaa sị mẹ̀ ịsọvọ ọnọọ.” Dị ẹnịnị a nịị na nị.

⁹ Ịjị e tù ịzị Ohomorihi kà yị Abụrahamị, dị Abụrahamị mẹ aha ụta ịsọvọ ọnya tụ́ ịzọọ nị. Dị ọ tụ́ ọkụ ọnọọ hi ọ, dị ọ sị Ayiziiki ozi anị dị ọ sụ́ ọ dị ọ sị ọ tụra ụta ọnọọ nị.

¹⁰ Di Abụrahamị tana ụvọ sị ụhwọ ka ọnị ọ̀ sị wụ ozi anị nị.

¹¹ Ama di anggẹẹrị Ẹnẹyịmavara vana yà ẹbẹẹba dị ọ hị́ Abụrahamị dị ọ ka, “Abụrahamị, Abụrahamị.” Di Abụrahamị ka, “Hèé, ụ mẹ ka?”

¹² Dị anggẹẹrị ọnọ ka, “Asị ọ sị ụvọ kanyị ozi ọnọọ, asị a nyị ịsị ọ sị mẹ̀ ẹ. Ọ kà ọnị ọ sị yẹ aanị ka ô hí angwa Ohomorihi ọ yị kà a ka ọnị aa si ozi anị ana vị ozi anị ikonya gene-gene tẹẹ yị ọnị.”

¹³ Di Abụrahamị kụ̀rà eyi tụ́ ẹba nị. Ọ mẹ̀ kana eyi, di o re ka â nyị ịdẹba ọnya aanị ẹnị ẹchịchị za ọpanyị tụ́ ịrẹma anị nị. Di Abụrahamị na sị ịdẹba ọnọọ, dị ọ wụ̀ ọ dị ọ rị ọ ịra mẹ̀ ịsọvọ yị Ohomorihi nị. Ọnị ọ vana sị dọ ozi anị ịrẹsụ nị.

¹⁴ Di Abụrahamị kụkụ ka ịrẹha ịzọọ ọ rị Ẹnẹyịmavara vee re tụ ọ. Avọọ a mẹ̀ kụkụ aa hị́ ọ pooro ve tù ajịnị nị. Ịrẹsụ ataba anị ọnọọ Ẹnẹyịmavara vee re tụ́ ọ nị.

¹⁵ Di anggẹẹrị Ẹnẹyịmavara yà ẹbẹẹba dị ọ rẹ hị́ Abụrahamị ụpọhụva,

¹⁶ dị ọ ka: Ẹnẹyịmavara kà ọnị ọ raà sị ẹngụ anị hị́ eku ka ọnị vaa mẹ ka ò zee yọ ịzẹyịza, agụvị ịsa ọnị ọ mẹ dị ọ yị sị ozi ọnị, ana vị ozi anị ikonya gene-gene tẹ yị ọnị.

¹⁷ Ọ kà ọnị vaa mẹ ka ezi anị ịrẹma-ịrẹma ẹ̀ rụrụ anka ụzọmị avọọ ọnịrị ààrẹ ene hi ụtọ òkū. Ọ kà ụnaka anị e vee huna ọnịvị ẹnịnị nị dị ẹ dọ wa ẹkụra ẹnịnị.

¹⁸ Ọ kà ọ mẹ̀ maanị wụ́ ịrẹyị anị, ọ ka anẹkụra vị ana vaa kà a ka ọ maa navọ ò zee yị ẹnị anka o mè zee yị ezi anị ịrẹma-ịrẹma.

¹⁹ Di Abụrahamị varẹma ne tù ezi ahụ anị di e dudu kwẹẹtẹ, dị ẹ varẹma nọ Ịbẹẹsẹba nị. Di Abụrahamị ra Ịbẹẹsẹba ịzọọ nị.

Evere Ịnahọ̀

²⁰ Ịrẹma ọnị ịrẹyị ẹnẹnị maanị sị mẹ, dị a va ka à yị Abụrahamị dị a ka: Ọ́ọ́ yẹ ka Imirika ọnị ọ rẹ si ezi ma yị Ịnahọ̀ ọyịnyara Abụrahamị

²¹ Ozi ịpaapa anị ọ rị Uzi, dị ọhụva anị rị Ibuzi nị. Ana vọ yị: Ikemụwẹrị ana vana vị ada Aramị,

²² Ikesedi, Ihazo, Ipiridasi, Ijidirahwi, ne beri Ibetuwẹrị.

²³ Ibetuwẹrị ọ vana vị ada Irebeka nị. Ezi ịhịnta ẹnẹnị Imirika ma yị Ịnahọ̀ ana vị ọyịnyara Abụrahamị nị.

²⁴ Onyeehi Ịnahọ ana rị Iruma ọ ma Iteba, Igahami ọnịrị Itahasi ne beri Imaaka yọ nị.