Oyinyima 18 - IWE ỌNỊNỊ

Ẹnẹyịmavara ô wo oto ozi ọnọrụ yị Abụrahamị

¹ Ẹkụhị ọnya, ịnị ụmẹ ọọdụ gàaga, dị Abụrahamị yaayịtẹ enoze ajẹngụ anị iruvo ọchị Imamire nị. Ọ mẹ̀ vavọọ ya ịzọọ, dị Ẹnẹyịmavara rẹ sị ẹngụ zụ ọ nị.

² Di Abụrahamị vene re ka anọrụ ẹẹta jẹẹ ọvịdị anị nị. Ó mè re wa di o wuse zwe hụụnị oze ajẹngụ ne tù wa, dị ọ tana tụra ẹtẹ yị wa nị.

³ Dị ọ ka, “Nda, aarịhịnị wẹ yị jẹẹ ịzẹnị chee. Ọ kà ẹ̀

⁴ jẹẹ à ká enyi vẹ dị ẹ̀ sị nyịna ahụ ẹnịnị, dị ẹ̀ yà iruvo ọchị ọnọnị dị ẹ̀ẹ tụ́ ụhwọ.

⁵ Dị Abụrahamị rẹ ka ọnị ee nee sì ịsọyịrị chee vaa yị wa, ẹ̀ẹ raà sị za ayị zụ, dị ẹ vaa na. Ọ kà ẹnịnị ệ yẹ ka ịda ozida ẹnịnị ẹ vẹ aanị nị.” Dị ẹnịnị ka, “Ooho, ọ̀ vavọọ na mẹ̀ ẹ kẹ.”

⁶ Di Abụrahamị wụsẹ ne tù Isera ịnị ajẹngụ dị ọ ka: ọ̀ wụsẹ mọ̄ ayị ene zoza ẹnya ẹẹta, di ò pō o dị ọ sị jị akara.

⁷ Di Abụrahamị wụsẹ nọ ịzị ọ pá ịsụpa hị́, dị ọ sị ozi imaaru ọnya ene zoza dị ọ banyị, dị ọ sị yị ozi ahụ anị ọnya nị. Di ozi ahụ ọnọọ wụsẹ na mẹ̀ ẹ nị.

⁸ Di Abụrahamị na sị ịrẹva ụnọ ana zá ọnịrị enyeenyi anị, dị ọ kụ́ ọ beri ozi imaaru ana a chịnẹ yị wa nị. Dị ọ jẹẹ pè wa ẹ màa rị ịsa iruvo ọchị ịzọọ nị.

⁹ Di aza ẹnẹẹ ka, “Isera ose ẹwụ yọ?” Di Abụrahamị ka, “Ọ yà ịnị ajẹngụ.”

¹⁰ Dị ọnya ịnị ẹnịnị ka: ẹ yị zụ nyị ka ọnị ọ yị vavẹ ve tù ọ ụmẹ aanị ụpọsa, ọnị ee vee tù ka Isera ose anị ô sị ozi ọnọrụ rị ụvọ. Isera ọnị yà ịrẹma oze ajẹngụ ọ tangwa ee batọ.

¹¹ Abụrahamị ọnịrị Isera ẹ sị vịra ẹtẹẹtẹrẹ. Isera ọnị ọ yị hyakụ kụkụ re ịsa ọnyẹnẹẹ anị.

¹² Di Isera ee nyinyii tụ́ ịnị ịnẹ dị ọ ka: oni ò si bo, ọva anị o si bo, ọnị ẹẹ kụkụ zụ sụ ara?

¹³ Dị Ẹnẹyịmavara va kà a yị Abụrahamị dị ọ ka, “Sị ẹ vẹ dị Isera ee nyinyi, dị ọ ka ọnị ọ́ọ́ kụkụ zụ ma ozi ọnị mẹ̀ sị vịra aanị?

¹⁴ Áá nyị ịsị ẹ tụ́ akanya yị Ẹnẹyịmavara Ịnị ụmẹ ọnị aa vaa vẹ vee tù ọ, oni ee vee tù ka Isera ộ si ozi rị ụvọ.”

¹⁵ Di Isera aa kụ́ dị ọ ka ọnị ẹ yi nyinyi. Angwa kụkụ ee hị́ ọ. Dị Ẹnẹyịmavara kà: “Ireche, ô nyinyi.”

Abụrahamị ô da ịpẹ ịrẹyị Isodọmị ọnịrị Igomora

¹⁶ Anọrụ ẹnẹẹ ệ hụụ ịzọọ, di e zi oze Isodọmị aa na nị. Di Abụrahamị sị wa na tụ́ nị.

¹⁷ Dị Ẹnẹyịmavara ee rò o dị ọ ka, “Ịsị maa vaa mẹ aanị, máá zụ sị tẹ yị Abụrahamị?

¹⁸ Abụrahamị ọnọnị ọ vaa vara anẹkụra ọbanyị ana nyị ụkata nị. Avaba anẹhẹ vaa mẹ̀ aduwa ka ò zee yi ẹnị anka o mè zee yi Abụrahamị.

¹⁹ Mẹ yị vavọọ zụ mẹ. Ma raà nyị Abụrahamị ka ò hú ezi anị ọnịrị aneehi anị ụvọ ka ẹ̀ va tụra oze amị ka ẹ̀ẹ mẹ̀ ịsa ana vọrọ ini eyi ẹmị Ẹnẹyịmavara, dị ẹ̀ẹ mẹ ịzẹyịza. Ọnọọ vaa mẹ ka ịsa ọnị mị ka maa mẹẹ yị Abụrahamị me re oze mẹ̀ ẹ yọ.”

²⁰ Dị Ẹnẹyịmavara va kà a yị Abụrahamị dị ọ ka: Ọnị ộ wụ́ aza mèe nowu ka ebira odivi ana anẹkụra Isodọmị ọnịrị Igomora aa mẹ̀ ọ sị banyị ẹnẹmẹhị.

²¹ Ọ kà ọnị ee nee re e àa vị ịzẹyịza ẹ vavọọ aa mẹ anka a mèe nowu anị nị. À yị vị avọọ ọ mẹ vị, dị ọnị yẹ.

Abụrahamị ộ da ịpẹ ịrẹyị Isodọmị

²² Dị aza ẹnẹẹ si hu, dị ẹ yaa nọ Isodọmị nị. Di Abụrahamị ọnị kụkụ yị jẹẹ pè Ẹnẹyịmavara nị.

²³ Di Abụrahamị kà pè Ẹnẹyịmavara dị ọ ka Aanị ka ọ vaa wụ̀ aza ọyịza ọnịrị aza edivii vaa bẹ nị?

²⁴ À kà a ka â nyị aza ọyịza ẹvarẹwụ tụ́ ịnị ẹkụra ọnọọ, ọ́ọ́ vaa yịị wụ̀ wa vaa ha nị? Ọ kà yị vaa hụ agụvị aza ọyịza ẹvarẹwụ ẹnẹẹ navọ avaba anẹkụra ọnọọ?

²⁵ Ọchị ọnọọ ị́rẹsụ, ọnị ọ yẹ ka ộ yị zụ vavọọ mẹ, ọ ka ọ yị vaa wụ̀ aza ọyịza ọnịrị aza edivii vaa bẹ, dị ahịka ịngọ ọnya ọ vana sị aza ọyịza ọnịrị aza edivi nị. Ọchọnọyịrẹsụ! Ọ kà Ohomorihi ana vị ọmọkarẹyị avaba anẹhẹ, ẹ yị zụ nyị ka ọ yị mẹ̀ ịsa ana vọrọ.

²⁶ Dị Ẹnẹyịmavara kà: ọnị òo re ọnịzẹyịza gụ ẹvarẹwụ ịnị ẹkụra ọnọọ, ọnị vaa hụ agụvị ẹnịnị navọ avaba anẹkụra ọnọọ.

²⁷ Di Abụrahamị rẹ ka ọnị eteesu ọnịrị atịtọ, ọnị ọ́ọ́ nyị irenu oni ọnị ee sii pè Ẹnẹyịmavara kà ịrẹyị?

²⁸ Ọ kà aarịhịnị ọza ọ mā yẹ, dị aza ẹnị ẹẹhị sị jị ha ịnị aza ẹnị ẹvarẹwụ ana vị aza ọyịza, ọ́ọ́ vaa wụ̀ avaba anẹkụra ọnọọ agụvị ẹẹhị ana jị ha aanị? Dị Ẹnẹyịmavara kà: “Àa nyị aza ẹnị ẹbẹẹva tụra ẹẹhị ana vị aza ọyịza, ọnị vaa hụ ụvị ẹnịnị dị ọnị ọ yị wụ anẹkụra ọnọọ va ha.”

²⁹ Dị Abụrahamị rẹ kà a yị Ẹnẹyịmavara dị ọ ka, “Àa na vị ka aza ọyịza ẹbẹẹva kẹnẹ e hi ịzọọ yọ?” Dị Ẹnẹyịmavara kà: “Ọnị ọ yị vaa wụ̀ wa agụvị ẹnị ẹbẹẹva ẹnẹẹ.”

³⁰ Di Abụrahamị rẹ ka, “Aarịhịnị, nyarị, ọyịkụ, vị ọnị ka oni ò họ̀ use ka àa vị ẹnị ohurẹẹwụ kẹnẹ ẹ vị aza ọyịza e ne re ịzọọ yọ?” Dị Ẹnẹyịmavara rẹ ka, “Ọnị ọ yị vaa wụ̀ anẹkụra ọnọọ ọnị oo re aza ọyịza ohurẹẹwụ ịzọọ.”

³¹ Dị Abụrahamị ka, “Aarịhịnị ọ nyị isuuru yị ọnị, ka vị ọnị ka ọnị ọ̀ họ̀ ka àa na vị aza ẹnị oohu kẹnẹ ẹ vị aza ọyịza ịzọọ yọ?” Dị Ẹnẹyịmavara kà: “Ọnị ọ yị vaa wụ̀ anẹkụra ọnọọ ọnị òo re aza ọyịza oohu ịzọọ.”

³² Di Abụrahamị kụkụ ka, “Aarịhịnị, ộ zụ ọgọnị, ọ sị vọrọ ka ọ kụ́ ayị hi ọnị, vị ọnị ka ọnị ọ̀ yaanị họ̀ use ụpẹ ọnya kẹnẹ tụ́ ọ nị. Àa na vị ka aza ẹnị ẹẹwụ pere ẹ vị aza ọyịza ene hi ịzọọ yọ?” Di Ẹnẹyịmavara kà: “Ọnị ọ yị vaa wụ̀ wa agụvị aza ẹnị ẹẹwụ ọnọọ.”

³³ Ịjị Ẹnẹyịmavara vavọọ sị Abụrahamị pè kà ịrẹyị, dị ọ si hu nị. Di Abụrahamị và nọ ịzị ọ yà nị.