Oyinyima 16 - IWE ỌNỊNỊ

Ihaga ọnịrị Isimẹrị ozi anị.

¹ Isarayi ana vi ose Abụramị ọ yị ma ozi. Ama ộ nyị ozi ahụ ọnya ana vị ọnẹẹ. Anijipiti ọ vị nị, di ịrẹha anị rị Ihaga nị.

² Ẹkụhị ọnya dị Isarayi va kà a yị Abụramị dị ọ ka, “Wéē re aanị, Ẹnẹyịmavara ọ yị si ozi yi ọnị ma. Ọ kà ọ rẹ nọ ịda ozi ahụ anị ọnọnị, ịsavọọ ọ̀ ma ozi yị ọnị.” Di Abụramị ka ooho nị.

³ Ịjị ọ sị gụ ịrayị ẹẹwụ ana Abụramị hụrẹ yà ịnị ẹtẹ Ikanaani, di Isarayi ose anị sị Ihaga ozi ahụ anị ana vị Anijipiti, dị ọ sị yị Abụramị ọva anị ka ọ̀ rẹ nyị ọ nị.

⁴ Abụramị ộ nọ ịdị Ihaga, di ee zyẹẹ nị. Íhaga mè re ka ọnị ee zyẹẹ, dị ọ kụkụ aa sị eyii wụ ọnyirehi anị nị.

⁵ Di Isarayi va kà a yị Abụramị dị ọ ka: Ọnị ọ kụ́ ịrẹyị ọnọnị tù ọnị nị. Ọ kà ọnị ọ sị ozi ahụ anị yọ ka ọ nyị ọ, o si re ka oni ee zyẹẹ kẹnẹ dị ọ kụkụ aa sị eyii wụ ọnị nị. Dị ọ rẹ ka Ẹnẹyịmavara ọ vaa mẹ̀ ọkarẹyị ọnịrị ọ nị o!

⁶ Di Abụramị va kà a yi Isarayi dị ọ ka: ee re e, ozi ahụ anị yọ. Ịsị èe zee e eyi ọ sị mẹ̀ ẹ. Di Isarayi kụ́ ọ du ọ eyi, di o si zwe hụụ ịdị anị nị.

⁷ Ọ màa na, di anggẹẹrị Ẹnẹyịmavara ne tù ọ ọgụrị enyi ẹtẹ ọnya aanị ịnị ụnọmị nị. Enyi ọnọọ vi ana yà oze Isuri.

⁸ Di Anggẹẹrị ọnọọ ka, “Ihaga ozi ahụ Isarayi, ịzị ụ hụrẹ aa vẹ? Ịzị waa nọ?” Di Ihaga ka, “Ịdị onyirehi amị Isarayi ọnị zwe hụrẹ nị.”

⁹ Di Anggẹẹrị Ẹnẹyịmavara ọnọọ rẹ kà a yọ ka: Ọ̀ varẹma nọ ịda onyirehi anị dị ọ naa wụ́ụ chire e.

¹⁰ Di Anggẹẹrị Ẹnẹyịmavara ọnọọ rẹ kà a yọ ka: Ọnị vaa mẹ ka ịpa ezi anị ẹ̀ rụrụ ẹtẹẹtẹrẹ ana ahịka ọza ọ yị va zụụ za wa ịrịka.

¹¹ Di Anggẹẹrị Ẹnẹyịmavara ọnọọ rẹ kà a yọ ka: ee re, ee zyẹẹ booro aanị, ozi ọnọrụ ọ vaa ma nị. Ọ kà ọọ sị ọ ma dị ọ yị ọ Isimẹrị, ka Ẹnẹyịmavara ọ raà wụ́ ọ mẹ̀ hị́ ọ agụvị ụya ọnị aa rị.

¹² Ọ kà ozi anị ọnọọ vị ana vaa mẹ̀ ebira anka ịkẹrịkẹtẹ ịnị avị avọọ. Ọnịrị avaba aza vị ana vaa vị ọnịrẹyị. Ọnịrị anda ẹnịnị ẹ yị va zụụ raa vaabẹ.

¹³ Di Ihaga hị́ ịrẹha Ẹnẹyịmavara ene pè e kà ịrẹyị dị ọ ka ọnị ọ rị Ohomorihi ene re mi nị! Ọ kà Ohomorihi mi re, dị mị yị yàra nịị?

¹⁴ Agụvị avọọ aā sịị hị́ Ịkangga ọnọọ Ibeeri-Irahayi-Ịrọyị, ọza ana yara ene ee re mi. Ịkangga ọnọọ vị ana yà ịnị akakana Ikadesi ọnịrị Ịbẹrẹdị.

¹⁵ Ihaga ộ va ma ozi ọnọrụ ọnya yị Abụramị, di Abụramị yị ozi ọnọọ Isimẹrị nị. Iruvo Isimẹrị ọ vị Ohomorihi ộ wụ́.

¹⁶ Abụramị vị ịrayị ẹbẹẹna tụra ịhịnọnyị di Ihaga va ma Isimẹrị yọ.