Oyinyima 12 - IWE ỌNỊNỊ

Ohomorihi mẹmẹ hị́ Abụramị

¹ Ẹkụhị ọnya di Ẹnẹyịmavara hị́ Abụramị dị ọ kà a yọ ka: Ọ kwẹẹtẹ hụrị ẹkụra anị ana vị ịda anda anị ọnịrị eehi ada anị dị ọ̀ọ nọ ịnị ẹtẹ ọnya ọnị ọnị vaa sị zụ̀ ọ.

² Ohomorihi ka ọnị vaa mẹ ka ọ̀ vara anẹkụra ọbanyị, dị ọnị mẹ ka ò zee yọ, dị mị mẹ ka ịrẹha anị ọ̀ yārā. Ohomorihi ka agụvị anị ọnị vaa mẹ ka ò zee yị avaba anẹhẹ nị.

³ Ọza ana àa ka oze yọ, dị ọnị rẹ mẹ ka ò zee yọ. Ọza ọnọọ Ọza òo si eyi wụ, vi oni ee chii hi ọza ọnọọ nị. Di o re ka avaba anẹhẹ vaa mẹ̀ aduwa ka ò zee yị ẹnị anka o mè zee yọ.

⁴ Ịzẹyịza dị Abụramị kwẹẹtẹ aa na anka Ẹnẹyịmavara mẹ̀ kà a yọ nị. Di Ịrọọtị saasa a aa na nị. Abụramị vị ịrayị ẹtarẹwụ tụra ẹẹhị (75) dị ọ vavọọ kwẹẹtẹ hụrị Ịharanị.

⁵ Abụramị ộ sị Isarayi ose anị ọnịrị Ịrọọtị ozi ọyịnyara anị ne beri avaba ogu ọnị ọ nyị. Ọ rẹ kụ́ aza ọnị ọ nyị ọ mẹ̀ yà Ịharanị, di e si hu dị ẹ yaa nọ ịnị ẹtẹ Ikanaani nị. Ẹ mẹ̀ na sị ngụ Ikanaani,

⁶ di Abụramị che ẹtẹ ọnọọ na para hu na ngụ ịzị aā hị́ Ịsẹkẹmị, dị ọ na ngụ iruvo ọchị Imore nị. Ịnị ụmẹ ọnọọ Anikenaani nịnị ẹ vị anịzọọ nị.

⁷ Di Ohomorihi ve tù Abụramị ịzọọ dị ọ kà a yọ ka Ezi anị ịrẹma-ịrẹma ọnị vaa sị ẹtẹ ọnọnịị yị nị. Di Abụramị hi mẹ aha ịsọvọ tụ́ ịzọọ yị Ẹnẹyịmavara ene ne tù ọ ịzọọ nị.

⁸ Abụramị ộ kà nọ ịnị ataba ana yà eyi ọnị ọyịị̄ zịị hụrẹ Ị́bẹtẹrị, dị ọ jị ajẹngụ tụ́ ịzọọ nị. Ajẹngụ anị vị ana yà ịnị akakana Ịbẹtẹrị ọnịrị Àyị Ộ navọ Ịbẹtẹrị tụ́ oze ọnị ọyịị̄ zịị ngụ ẹtẹ, di Àyị ọnị yà oze ọnị ọyịị̄ zịị hụrẹ nị. Di o re mẹ aha ịsọvọ tụ́ ịzọọ yị Ẹnẹyịmavara dị aa mẹ̀ aduwa ịzọọ nị.

⁹ Dị Abụramị aa yịị na, pooro, dị ọ na ngụ eyi ụvẹtẹ ịnị ẹtẹ Ịnẹgẹvị nị.

Abụramị ộ nọ Ijipiti.

¹⁰ Ịnị ụmẹ ọnya ụngwẹ ô nyima aa kụ̀ ịnị ẹtẹ Ikanaani. Ụngwẹ ọnọọ vị ana aa kụ̀ ẹtẹẹtẹrẹ, agụvị avọọ di Abụramị si hu aa nọ Ijipiti ka ọnị ọ̀ na ra ịzọọ nị.

¹¹ Abụramị màa vaa ngụ ịnị ẹtẹ Ijipiti dị ọ kà a yi Isarayi ose anị dị ọ ka: Ọnị ộ yẹ ka ô zoza ẹtẹẹtẹrẹ.

¹² Ọ kà Anijipiti èe re e, ẹ vaa kà a ka ose anị yị. Ọ kà dị ẹ za ọnị di ẹ wụ ọnị, dị ẹ navọ Isarayi.

¹³ Dị ọ ka agụvị avọọ ọ̀ kà a ka ọyịnyara anị ọnị vị nị. Wàa vavọọ kà, ẹ vaa hụ agụvị anị dị ẹ yị wụ ọnị dị e sì ọnị.

¹⁴ Ịzẹyịza Abụramị mẹ̀ na ngụ Ijipiti Anijipiti ê re ka Isarayi ô zoza ẹtẹẹtẹrẹ.

¹⁵ Ịjị aza ene hi ini eehi ohinọyị re e, dị ẹ na kà a yi ohinọyị ka eni e re ọnẹẹ ana vavọọ zoza nị. Dị ẹ va sị Isarayi nọ ini eehi ịda ohinọyị nị.

¹⁶ Di Ohinọyị hụ agụvị Isarayi di aa mẹ̀ ebira ozozaa hi Abụramị nị. Dị ọ kụ́ atẹmẹ, ẹvụ, imaaru, ịkẹrịkẹtẹ araka, ọnyị ịkẹrịkẹtẹ ne beri ịnyaakụmị ezi ahụ anọrụ ọnịrị anẹẹ dị ọ kụ́ wa yị Abụramị nị.

¹⁷ Ama dị Ẹnẹyịmavara mẹ ka ụkụ ọ̀katẹngụ ọ̀ za ohinọyị ọnịrị aneehi anị agụvị Isarayi ose Abụramị nị.

¹⁸ Di Ihwarawo va hị́ Abụramị dị ọ ka, “Sị ọ mẹ̀ ọnị aanị? Sị ẹ vẹ dị ọ̀ yị kà a yị ọnị ka ose anị yọ nị?

¹⁹ Sị ẹ vẹ dị ọ kà a ka ọyịnyara anị yọ? Di ọnị na sị ọ ka ọnị a nyị ọ. Ọ kà ose ewu yị, sị ọ wa na.”

²⁰ Di Ihwarawo mẹ ọda yị aza anị, dị ẹ dụ ọ hụrị ẹkụra ọnọọ, ọnị ose anị ọnịrị avaba ogu ọnị ọ nyị.