Oyinyima 11 - IWE ỌNỊNỊ

Irehi ọgọdọ ana a ka à da tụ́ Ịbabịrọnị

¹ Ịnị ịyẹẹyẹ avaba anẹhẹ vị ana aa kà ẹkụra ikonya. Ẹ yị nyị irenyi ịnị ịrẹyị ẹnịnị.

² Ịnị ụmẹ ọnọọ aza ẹnyị ệ kụ̀rà hụrẹ eyi ọnị ọyịị̄ zịị vẹ di e ne tù ọnya ịnị ẹtẹ Isinari nị. Dị ẹnịnị yà ịzọọ nị.

³ Ẹkụhị ọnya kẹnẹ dị ẹ hị́ ẹngụ dị ẹ ka, “À vẹ dị ẹnị ẹ̀ jị ụvụrọkụ dị ẹnị ẹ̀ hù ọ ẹtẹẹtẹrẹ dị ọ̀ vẹchị.” Ịzẹyịza dị ẹ vavọọ jị ụvụrọkụ ana a vọrọ ka ẹ̀ sị dà irehi, anka a mẹẹ sị ịrẹta dà irehi avọọ nị. Dị ẹ rẹ sị ọda ẹnị ẹ vaa sị kụ́ ụvụ ọnọọ gẹ nị, anka a mẹẹ sị Isementii kụ́ irehi gẹ avọọ nị.

⁴ Dị ẹ hị́ ẹngụ dị ẹ ka, “À vẹ ẹnị ẹ̀ dà ẹkụra ẹnịnị, di ẹnị ẹ̀ dà irehi ọgọdọ ọnya tụ́ ọ dị ọ̀ gọdọ na ngụ ịnị ihinẹba. Di aa sị ọnọọ hị́ ịrẹha ẹnịnị. Ẹ ka à yị vị avọọ vị ẹnị aa garaa hi ẹhẹ kẹnẹ nị.”

⁵ Di Ẹnẹyịmavara chi vẹ di o ve re ẹkụra ọnọọ ọnịrị irehi ọgọdọ ana aza ẹnẹẹ dà nị.

⁶ Di Ẹnẹyịmavara kà: “Aza ẹnẹnị vị ọnya, dị ẹ rẹ yaa kà ẹkụra ọnya nị. Ịsị ẹ vaa mẹ̀ ẹ yaa dà ahụụ hụrẹ ẹhẹ aanị nị. Òo nee kú ẹ yị nyị ịsị ẹ ka ẹnị aa mẹ dị ẹ̀ yị mẹ̀ ẹ.

⁷ Ọ kà vẹ eni è chi ne tụ́ wa, dị ẹnị ẹ̀ và ẹkụra ẹnị ẹ yaa kà zị dị asị ẹ kụkụ wụ́ ịrẹyị ẹngụ.”

⁸ Ịzẹyịza di Ẹnẹyịmavara gara wa hụụ ịzọọ hi avaba ẹhẹ nị. Dị ẹnịnị ẹ̀ yị kụkụ dà ẹkụra ọnọọ nị.

⁹ Agụvị avọọ aā hị́ ẹkụra ọnọọ Ịbabịrọnị nị, agụvị ka ịzọọ Ẹnẹyịmavara yà kụ́ ẹvazi ngụ ẹkụra ana anẹhẹ aa kà nị. Hụrẹ ịzọọ a yà gara wa hi avaba ẹhẹ nị.

Ụnanka Ịsẹmị

¹⁰ Aza ana chi hụụnị ịpa Isemi vẹ m maa vaa hị́ aanị nị. Ịsẹmị vị ịrayị ẹchẹhị (100) dị ọ ma Aripakisadi Ịnị ịrayị ọhụva ọnị ọhaara enyi kụ́ ẹhẹ ọ yà ma a nị.

¹¹ Isemi mẹ̀ sị Aripakisadi ma, ộ vana ra ẹhẹ mẹ ịrayị akanarẹchẹhị, (900) dị ọ vana ma ezi anọrụ ọnịrị anẹẹ nị.

¹² Aripakisadi mẹ̀ sị gụ ịrayị ohurẹẹwụ tụra ẹẹhị (35) dị ọ ma Ịsẹẹra nị.

¹³ Ịrẹma ọnị ọ si Ịsẹẹra ma, Aripakisadi ọ vana mẹ ịrayị akana tụra ẹẹta, (83) dị ọ ma ezi anọrụ ọnịrị anẹẹ nị.

¹⁴ Ịsẹẹra ọnị mẹ̀ sị gụ ịrayị ohurẹẹwụ, (30) dị ọ ma Ẹba nị.

¹⁵ Ịsẹẹra mẹ̀ sị Ẹba ma, ọnị ọ rẹ vana yà ịnị ẹhẹ mẹ ịrayị akana tụra ẹẹta, (83) dị ọ rẹ vana ma ezi anọrụ ọnịrị anẹẹ nị.

¹⁶ Ẹba ọnị mẹ̀ sị gụ ịrayị ohurẹẹwụ tụra ẹẹna (34) dị ọ ma Ịpẹrẹgị nị.

¹⁷ Ịrẹma ọnị ọ ma Ịpẹrẹgị, Ẹba ộ vana ya ẹhẹ mẹ ịrayị akana tụra ohurẹẹwụ, (830) dị ọ rẹ ma ezi anọrụ ọnịrị ezi anẹẹ nị.

¹⁸ Ịpẹrẹgị ọnị vị ịrayị ohurẹẹwụ (30) dị ọ ma Irewu.

¹⁹ Ịpẹrẹgị ọnị mẹ̀ rẹ si Irewu ma, ộ vana ra ẹhẹ mẹ ịrayị ịrẹka tụra ịhịịna, (209) dị ọ vana ma ezi anọrụ ọnịrị anẹẹ nị.

²⁰ Irewu mẹ̀ sị gụ ịrayị ohurẹẹwụ tụra ẹẹva (32) dị ọ ma Iserugu nị.

²¹ Ọ mẹ̀ sị Iserugu ma, Irewu ộ vana ra ẹhẹ mẹ̀ ịrayị ịrẹka tụra ịhịmba, (207) dị ọ vana ma ezi anọrụ ọnịrị anẹẹ nị.

²² Iserugu mẹ̀ sị gụ ịrayị ohurẹẹwụ (30) dị ọ ma Inahọ̀ nị.

²³ Iserugu mẹ̀ sị Inahọ̀ ma, ộ vana ra mẹ ịrayị ịrẹka, (200) dị ọ vana ma ezi anọrụ ọnịrị anẹẹ nị.

²⁴ Ịnahọ̀ mẹ̀ sị gụ ịrayị oohu tụra ịhịmba, (27) dị ọ ma Ịtẹra nị.

²⁵ Inahọ̀ mẹ̀ sị Ịtẹra ma, ộ vana yà ẹhẹ mẹ ịrayị ẹchẹhị tụra ẹwụrịhịmba, (117) dị ọ vana ma ezi anọrụ ọnịrị anẹẹ nị.

²⁶ Ịtẹra mẹ̀ sị gụ ịrayị ẹtarẹwụ, (70) dị ọ ma Abụramị, Ịnahọ̀ ọnịrị Ịharanị.

Ụnanka Ịtẹra

²⁷ Aza ana chị hụụnị ịpa Ịtẹra m maa vaa hị́ aanị nị Ịtẹra ọ ma Abụramị, Ịnahọ̀ ọnịrị Ịharanị nị. Dị Ịharanị ọnị ma Ịrọọtị nị.

²⁸ Ịharanị o vịdị su tụ́ Ịtẹra ada anị ịnị ẹtẹ ịzị a yà ma a nị. Ịzọọ aā hi Ọọrị ịnị ẹtẹ Anikaridi nị.

²⁹ Dị Abụramị ọnịrị Ịnahọ̀ ệ nyị ọnẹẹ nị. Ose Abụramị ọ rị Isarayi, dị ose Ịnahọ̀ ọnị rị Imirika nị. Imirika ộ nyị ọyịnyara ọnẹẹ ana hị́ Isika vi ozi Ịharanị. Ẹnịnị vị.

³⁰ Ama Isarayi ọnị vị ọbọrị o yi re ozi ma.

³¹ Di Ịtẹra sị Abụramị ozi anị ne beri Ịrọọtị ozi Ịharanị nị. Ịrọọtị vị aazị Ịtẹra. Ịtẹra ọ rẹ sị Isarayi ose ozi anị Abụramị di e dudu hụrẹ Ọọrị ịnị ẹtẹ Anikaridi, ka ẹ̀ nọ ịnị ẹtẹ Ikanaani nị. Ama e mè tù ẹtẹ Ịharanị, dị ẹ kụkụ yà ịzọọ nị.

³² Ịtẹra vị ịrayị ịrẹka tụra ẹẹhị (205) di o ve su ịnị ẹtẹ Ịharanị.