Oyinyima 1 - IWE ỌNỊNỊ

Ịtọpa Óhomorihi mẹmẹ tụ́ ẹhẹ

¹ Ịjị Ohomorihi nyima aa tụ́ ẹhẹ ộ tụ́ ẹbẹẹba ọnịrị ẹtẹ.

² Ẹtẹ vị ana vịdị tịtẹ juguu kẹnẹ, di o vi osusu nị. Enyi ọbanyị vi ene kú avaba ẹtẹ, dị avaba ẹtẹ vị ịrahụ ruma-ruma nị. Dị Ụhwẹ Ohomorihi yà ẹbẹẹba enyi ọnọọ, dị aa mẹ nanana nị.

³ Ohomorihi ộ kà a ka à nyị ẹtohweyi, dị a nyị ẹtohweyi nị.

⁴ Ohomorihi ô re ka ẹtohweyi ọnọọ ô zoza. Di Ohomorihi mẹ ẹhwị yị ẹtohweyi ọnịrị ịrahụ nị.

⁵ Di Ohomorihi ka ẹtohweyi ọ vị ọọdụ, di etohozi ọnị ọ̀ vị ịrahụ nị. Hụụnị ẹnẹnẹ na ngụ oruva dị ọ vị ẹkụhị ọnya nị.

⁶ Ịrẹma ọnọọ di Ohomorihi rẹ ka à nyị eguhi dị ọ̀ yà ịnị akakana enyi ọnọọ dị ọ̀ gà enyi ọnọọ hi ẹẹva.

⁷ Dị Ohomorihi mẹ̀ ịsa ọnya ana ya anka itu avọọ dị ọ há enyi ọnọọ hì ẹẹva nị. Ọnya yà iruvo itu dị ọsa yà ẹbẹẹba anị nị. Ịzẹyịza dị ọ vavọọ yà nị.

⁸ Ohomorihi ka itu ọnọọ ọ rị ẹbẹẹba nị. Hụụnị ẹnẹnẹ na ngụ oruva dị ọ rẹ vị ẹkụhị ọhụva nị.

⁹ Di Ohomorihi rẹ ka enyi ene hi iruvo itu ẹ̀ kụ́ gụ hi aha ọnya di eteesu ò re oze tụ́ ẹhẹ. Dị ọ rẹ vavọọ yà nị.

¹⁰ Dị ọ ka eteesu ọnọọ ọ vị ẹtẹ, di enyi ana kụ́ gụ ọnị vị òkū nị. Ịjị Ohomorihi vavọọ re e ô zee e eyi.

¹¹ Ohomorihi ọ rẹ kà a ka ọchị nịnị ẹ̀ chị hụụnị ẹtẹ hi ẹhẹ, ọchị irenyi-irenyi anaā nyị ẹtụtụ ọnịrị ihu evere ẹnịnị. Dị ẹ rẹ vavọọ, chị hi ẹhẹ nị.

¹² Dị ọchị irenyi-irenyi vavọọ chị hi ẹhẹ nị, ochị anaā nyị ihu evere ẹnịnị ọnịrị anaā tụ́ ẹtụtụ evere ẹnịnị. Ohomorihi mẹ vavọọ re e, ô zee e eyi.

¹³ Hụrị ẹnẹnẹ na ngụ oruva, dị ọ rẹ tụ́ ọ ẹkụhị ọhụta nị.

¹⁴ Dị Ohomorihi rẹ ka à nyị ẹtohweyi hi ini eguhi ẹbẹẹba, dị ọ̀ há ọọdụ ọnịrị ịrahụ hi, dị à rẹ zụ sịị yẹ ẹkụhị, ịrayị ọnịrị ụmẹ eche ahẹkẹ.

¹⁵ Etohweyi ẹnẹẹ vaa za ẹbẹẹbẹ, dị ẹ̀ sị ẹtohweyi tụ́ ịnị ẹhẹ. Dị ọ rẹ vavọọ yà nị.

¹⁶ Ohomorihi ộ mẹ̀ ịsa ẹbanyị ẹẹva anaā sịị ẹtẹẹ hweyi. Ana banyị hu aa zẹtẹ ọọdụ, di oweyi ọnị aa zẹtẹ ịrahụ nị. Di Ohomorihi rẹ mẹ ụzọmị nị.

¹⁷ Dị ọ kụ́ wa hi ini eguhi ẹbẹẹba ka ẹ̀ẹ sị ẹtohweyi yị ẹhẹ,

¹⁸ dị ẹ̀ẹ zẹtẹ ọọdụ ọnịrị ịrahụ, dị ẹ̀ rẹ há ẹtohweyi ọnịrị ịrahụ hi. Ohomorihi mè re e, ô zee e eyi.

¹⁹ Hụụnị ẹnẹnẹ na ngụ oruva, dị ọ rẹ tụ ọ ẹkụhị ẹẹna nị.

²⁰ Ohomorihi rẹ ka ịsa anaā ra ini enyi ọrụrụ-ọrụrụ ẹ̀ chaka hi ini enyi, di inomi nịnị eè hira ẹbẹẹba ini eguhi.

²¹ Ịzẹyịza di Ohomorihi mẹ uye ẹbanyị-ẹbanyị eneē hi ini enyi ọnịrị avaba ịsa anaā ra ini enyi beri inomi nịnị nị. Ohomorihi mè re e, ô zee e eyi.

²² Di Ohomorihi ka vi o vee zee yị wa nị. Dị ọ ka wa naa ma dị waa rụrụụ hu avọọ nịnị, dị wa gwẹtẹ hi ini enyi nịnị ọnịrị ịnị òkū. Dị inomi nịnị ẹ̀ gwẹtẹ hi ẹhẹ.

²³ Hụụnị ẹnẹnẹ na ngụ oruva, dị ọ vị ẹkụhị ẹẹhị nị.

²⁴ Di Ohomorihi rẹ ka evere ịsa ana aa tụ́ ụhwẹ irenyi-irenyi ẹ̀ chaka hi ịrẹsụ ẹtẹ, ẹhụụ uye ẹbanyị uye eneē tura, ọnịrị uye ịnị avị. Evere ọzọza ẹ̀ gara hi ẹhẹ. Dị ọ rẹ vavọọ yà nị.

²⁵ Di Ohomorihi mẹ uye ini avị evere irenyi-irenyi ọnịrị ịsụpa ne beri uye eneē tura anka evere ọzọza nị. Ohomorihi mè re e ô zee e eyi.

²⁶ Di Ohomorihi va ka, “Jẹẹ ya mẹ ọza vene ẹngụ ayị, dị ẹ̀ yà anka ị mẹ̀ yà. Ẹnị ẹ vaa vị ohirẹsụ ivovo ene hi ini enyi ọnịrị inomi ene hi ẹbẹẹba ne beri avaba uye nịnị, oweyi, ọbanyị, ini eehi ọnịrị ịnị avị.”

²⁷ Ịzẹyịza di Ohomorihi mẹ ọza, dị ọ mẹ wa vene ẹngụ anị nị. Ọnọrụ ọnịrị ọnẹẹ ọ mẹ nị.

²⁸ Ohomorihi ka o vee zee yị wa, dị ọ ka, “Ẹ vaa ma ozii rụrụ, ezi ẹnịnị vaa ra avaba ẹhẹ, dị ẹ vi ohinọyị tụra ịrẹsụ ịsa ene hi ẹhẹ. Ẹ vaa nyị ọda tụra ivovo ọnịrị inomi ne beri avaba uye irenyi-irenyi.

²⁹ Mâ sị akụ ọnịrị apaapa ne beri ẹtụtụ irenyi-irenyi yị wụ nịnị ka waa rị wa nịnị.

³⁰ Ama inomi ọnịrị uye nịnị vị ọnị mị sị avị yị ka ẹẹ̀ rị ọ.” Ịzẹyịza dị ọ rẹ vavọọ yà nị.

³¹ Ohomorihi mẹ̀ re avaba ịsa ọnị ọ mẹ, ô zee e eyi ẹtẹẹtẹrẹ. Hụụnị ẹnẹnẹ na ngụ oruva dị ọ vị ẹkụhị ịhịnọnyị nị.