Ọyịkụra 9 - IWE ỌNỊNỊ

Ịsụpa Anijipiti nini ê sú ha.

¹ Dị Ẹnẹyịmavara rẹ kà a yi Imosiisi dị ọ ka ọ̀ na kà a yị Ihwarawo ka ọnị Ẹnẹyịmavara Ohomorihi Anihiburu ka ọ̀ hụrẹ aza anị ụvọ vị ẹ̀ na, dị ẹ̀ na hẹkẹ ọnị.

² Ọ kà òo yi ka ọnị ẹ yị zẹẹ ka ẹ̀ na, dị ọ zị za wa jẹẹ nị,

³ ọnị vaa pa ịva yị ịsụpa anị ene hì ịnị aarẹ, dị ụkụ odivi wụ̀ umaata anị ọnịrị ịkẹrịkẹtẹ anị ne beri ịnyaakụmị ọnịrị imaaru anị ọnịrị atẹmẹ beri ẹvụ anị nịnị.

⁴ Ama ọnị Ẹnẹyịmavara vaa tẹ ẹhwị tụ́ ịnị ịsụpa Anisirẹrị ọnịrị ịsụpa Anijipiti. Ẹ yị nyị ịsụpa Anisirẹrị ene vee sú.

⁵ Dị Ẹnẹyịmavara jị ụmẹ nị, dị ọ ka ụhwọọ ọnị vavọọ vaa mẹ ịnị ẹtẹ ọnọọ nị.

⁶ Ịzẹyịza eyinẹhẹ anị dị Ẹnẹyịmavara vavọọ mẹ nị. Dị avaba ịsụpa Anijipiti sú va ha nị. Ama ẹ yị nyị ịsụpa Anisirẹrị ikonya ene sú.

⁷ Di Ihwarawo tụ́ aza ka ẹ̀ na zama ịsụpa Anisirẹrị re nị. Di e re ka ẹ yị nyị ịsụpa Anisirẹrị ikonya ene sú nị. Ama ayị Ihwarawo ọ sị sị kà geri-geri. Ọ yị zẹẹ ka aza ẹnẹẹ ẹ̀ na.

Ịtahụ ộ tụra hi Anijipiti nịnị ẹngụ.

⁸ Dị Ẹnẹyịmavara rẹ kà a yị Imosiisi ọnịrị Eerọnị dị ọ ka ẹ̀ ká atịtọ ohihi ụvọ ẹyịva hụụnị arasị di Imosiisi ọ̀ yà eyi Ihwarawo dị ọ̀ tụ́ ọ ahị vaa hịrẹ.

⁹ Ọ̀ ka atịtọ ọnọọ vaa garaa hi avaba ẹtẹ Ijipiti. Dị ịtahụ edivi-edivi tụra hi ịnị ẹngụ aza ọnịrị ịsụpa ịnị avaba ẹtẹ Ijipiti.

¹⁰ Ịzẹyịza dị ẹ na ká atịtọ hụụnị arasị dị ẹ na jẹẹ ọvịdị Ihwarawo nị. Di Imosiisi tụ́ ọ ahị hi ẹbẹẹba nị. Dị ịtahụ edivi-edivi aa tụraa hi ịnị ẹngụ aza ọnịrị ịsụpa kẹnẹ nị.

¹¹ Ọnịvọpa nịnị ẹ yị kụkụ zụ jẹẹ pè Imosiisi agụvị ịtahụ ana tụra wa ọnịrị avaba Anijipiti.

¹² Ama Ẹnẹyịmavara ọ raà mẹ ka ayị Ihwarawo ọ katẹngụ. Ọ yị zẹẹ ka ọnị ọ dọ ịrẹyị Imosiisi ọnịrị Eerọnị tụ́ ịzọọ. Avọọ Ẹnẹyịmavara mẹ̀ vịdị kị kà a yị Imosiisi nị.

Ata ihinẹba ộ zụ̀ hi ẹtẹ

¹³ Dị Ẹnẹyịmavara rẹ kà a yị Imosiisi dị ọ ka, “Ọ kwẹẹtẹ ẹnẹnẹ viri-viri dị ọ̀ vara gẹrị Ihwarawo. Ọ kà dị ọ̀ kà a yọ ka ọnị Ẹnẹyịmavara ana vị Ohomorihi Anihiburu ka ọnị ka ọ̀ hụrẹ aza anị ụvọ dị ẹ̀ na hẹkẹ ọnị.

¹⁴ Ọ kà ọ̀ kà a ka ọ̀ yị hụrẹ wa ụvọ ọnị vaa kụ́ ẹngụkataa tù ọnịrị anụkọrọ anị ne beri aza anị. Ọ kà ọ̀ kà a ka ọnọọ vaa mẹ ka ọ̀ yẹ ka ẹ yị nyị ọza anka ọnị Ẹnẹyịmavara ịnị avaba ẹhẹ.

¹⁵ Ẹnẹyịmavara kà Imosiisi ọ̀ rẹ kà a yọ ka ọnị yaanị nyẹngụ sị ụkụ za ọnịrị aza anị dị ọnị wụ̀ avaba ẹnịnị hụrẹ ẹhẹ.

¹⁶ Ama ọnị ộ navọ wa ka ẹ̀ yị yà ẹhẹ agụvị dị ẹ̀ yẹ ka ọnị ọ nyị ụkata. Ọ kà ọnọọ ọ̀ vaa mẹ ka aa kà ịrẹkụkụ anị ịnị avaba ẹhẹ nị.

¹⁷ Ọ kà ọ̀ kà a ka ọnị ka a vi ee yii wù, dị ọ̀ yị zẹẹ ka ẹ̀ naa,

¹⁸ ụmẹ aanị ụhwọọ, ọnị vaa zụ̀ ata orihi hi ịnị avaba ẹtẹ Ijipiti. Ọ kà ẹngụ ata orihi ọnọọ ộ yị vịdị vavọọ zụ̀ da hụrẹ ụmọrụmọ vẹ ịnị Ijipiti pooro ve tù ajịnị.

¹⁹ Dị ọ rẹ ka Imosiisi ọ̀ kà a ka Ihwarawo ọ̀ kà a yị aza anị ka ẹ̀ kụ́ ịsụpa ẹnịnị ọnịrị avaba ịsị ẹ̀ẹ nyị hi ịnị aarẹ zwe na tẹ̀ ịzị ata orihi ò yi ve zuu tụ́ wa. Ọ ka ọ̀ kà a yọ ka ata orihi ọnọọ vaa zụ̀ kú aza ọnịrị ịsụpa ene ịnị aarẹ dị ẹ̀ yị na tẹ̀, di e sú.”

²⁰ Anụkọrọ Ihwarawo ẹnị ê hí angwa agụvị ịrẹyị ẹnị Ẹnẹyịmavara kà. Di e wuse zwe dị ẹ na kụ́ ọrịhị ẹnịnị ọnịrị ịsụpa ẹnịnị hụụnị aarẹ vẹ ini eehi nị.

²¹ Ama â nyị aza ẹnyị ẹnịnị ene ro ka ịrẹyị ẹnị Ẹnẹyịmavara vị ịrẹyị ịyẹyẹ, dị ẹ navọ ọrịhị ẹnịnị ọnịrị ịsụpa ẹnịnị hi ịnị aarẹ nị.

²² Dị Ẹnẹyịmavara kà a yị Imosiisi dị ọ ka ọ tana ụvọ tụ́ ẹba di ata orihi ọ̀ zụ̀ hị́ avaba ẹtẹ Ijipiti. Ọ kà ata orihi vaa zụ̀ụ hi ịrẹsụ ọza ọnịrị ịsụpa ne beri avaba ịsa ịnị aarẹ Ijipiti.

²³ Ịzẹyịza di Imosiisi tana okutẹ anị hi ẹbẹẹba nị. Dị Ẹnẹyịmavara mẹ ka apaana ihinẹba ọ̀ọ há di ata orihi aa zụ̀, dị ịnyanya aa rị vee-vee nị. Dị Ẹnẹyịmavara vavọọ zụ̀ ata orihi hi ẹtẹ ịnị avaba ẹtẹ Ijipiti nị.

²⁴ Ata orihi ộ zụ̀, dị ịnyanya aa rị vee-vee nị. Ata orihi ộ yị vịdị vavọọ zụ̀ rata da ịnị ẹtẹ Ijipiti.

²⁵ Dị ata orihi tụ́ avaba ịsa ene hi Ijipiti nị. Ô tụ́ aza ọnịrị ịsụpa ne beri avaba ịsa ana chị tụ́ ịnị aarẹ, dị ọ dà ọchị va ha nị.

²⁶ Ini okokooro Igoseni ịzị Anisirẹrị nịnị hi kẹnẹ ata orihi ọ̀ yị rẹ vaa zụ̀ụ hi nị.

²⁷ Di Ihwarawo va tụ́ na hị́ Imosiisi ọnịrị Eerọnị nị. Dị ọ ka ọnị ộ dọ booro aanị ka ọnị ọ sị ebira odivi mẹ̀. Ịsị Ẹnẹyịmavara mẹ ọ gẹ ẹ nị. Dị ọ ka ọnịrị avaba aza anị e si nyeeyi nị.

²⁸ Dị ọ ka aarịhịnị Imosiisi ọ̀ dá ịpẹ yị Ẹnẹyịmavara kà opomi ọnịrị ata orihi ọnọnị ô zee ọgọnị. Ọ kà ọnị aa hụrẹ wa ụvọ ka ẹ̀ẹ na. Ọ kà asị ẹ kụkụ yà ịzọọ.

²⁹ Di Imosiisi tụ́ ohi dị ọ ka ọnị ọ̀ọ sị jịnẹ hụụnị ẹkụra, ọnị vaa tụ́ ụvọ dị ọnị dá ịpẹ yị Ẹnẹyịmavara Opomi vaa zaa jẹẹ dị ata orihi ana aa zụ̀ jị, ka ịjọnọọ Ihwarawo vaa yẹ ka Ẹnẹyịmavara ọ nyị avaba ẹhẹ nị.

³⁰ Dị ọ ka ama ọnị ọ yẹ ka ọnịrị anụkọrọ anị ee yị ve hí angwa Ẹnẹyịmavara ana vị Ohomorihi.

³¹ Ọchị ẹnyị aanị ana aa sị omi ini ịnẹ anị hị́ ịta ọnịrị ịsa ịnị aarẹ ana aā hị́ ibaari vi ana ata orihi du ha hi ịnị aarẹ. Ibaari ẹnị ẹ sị chaka ịrẹsụ hi ẹhẹ ụmẹ ọnọọ dị ọchị ana aa sị omi ini ịnẹ anịị̄ hi ịta ọnị maanị aa jị ododo nị.

³² Ata orihi ọnọọ o rè vee di ihu ana aā hị́ ihwiti ọnịrị ihu ọsa ene venee ana aā hị́ ikumini, agụvị ka eni e mē jintu mẹ.

³³ Di Imosiisi hụụ ịda Ihwarawo dị ọ jịnẹ hụụnị ẹkụra nị. Dị ọ gana ụvọ anị, dị ọ dá ịpẹ; yị Ẹnẹyịmavara nị. Di opomi ọnịrị ata orihi jị, dị orihi ọ̀ yị kụkụ zụ̀ hi ẹtẹ nị.

³⁴ Ịjị Ihwarawo re ka opomi ọnịrị ata orihi ne beri orihi e si ji, dị ọ raa mẹ̀ ebira odivi anị nị. Dị ọnịrị anụkọrọ anị rẹ sị ayị ẹnịnị kà geri-geri nị.

³⁵ Anka Ẹnẹyịmavara mẹ vịdị mẹ ka Imosiisi ọ̀ kà a, ayị Ihwarawo ọ rẹ sị kà geri-geri. Ọ yị zẹẹ ka ọnị ọ̀ hụrẹ Anisirẹrị ụvọ ka ẹ̀ na.