Ọyịkụra 3 - IWE ỌNỊNỊ

Ohomorihi ộ hị́ Imosiisi

¹ Â nyị ụmẹ ọnya dị ahịka Imosiisi ọọ̄ kụ́ atẹmẹ ọnịrị ẹvụ Ijetiro ọyẹ anị na rị. Ijetiro a rẹẹ̄ hị́ Iruweri nị. Ọnị ọ vị ohirẹsụ irehi Ohomorihi tụ́ Imidiyani nị. Ẹkụhị ọnya ộ kụ́ Ịsụpa ẹnẹẹ na ngụ ịnị ụnọmị na huu. Ọ na ngụ ịnị ataba Ịhọrẹbị ana aā hị́ ataba Ohomorihi.

² Di Imosiisi re anggẹẹrị Ẹnẹyịmavara nị. Vị ọ sị mẹẹ anka ịra avọọ nị. Dị ahịka vị ọ vana aa za ịnị ọchị oweyi ọnya aanị nị. Imosiisi mè re e, o si hị́ ọ eyi. Ô re ka ịra aa za ịnị ọchị, ama ọchị ọnọọ ọ yị rị ịra.

³ Di Imosiisi ka Ịmọrịmọ yọ, ọnị ee nee re e dị a re. Sị ẹ vẹ dị ọchị ọnị ọ̀ yị rị ịra?

⁴ Ẹnẹyịmavara mè re ka Imosiisi aa kà a pè e ka oni ò ne re e, dị ọ vana yà ịnị ọchị ọnọọ dị ọ hị́ ọ nị. Dị ọ ka, “Imosiisi, Imosiisi!” Di Imosiisi ka hèé nị.

⁵ Di Ohomorihi rẹ ka, “Asị ọ kà vẹ hu avọọ. Ọ kà Imosiisi ọ̀ tụ̀ adava anị hị́ ẹtẹ agụvị ka ọnị Ohomorihi yà ịzị ọ jẹẹ avọọ.”

⁶ Di Ohomorihi rẹ ka, “Ọnị ọ̀ vị Ohomorihi ana ada Imosiisi hẹkẹ nị. Ọnị ọ̀ rẹ vị Ohomorihi ana Abụrahamị, Ayiziiki ọnịrị Ijekọvụ hẹkẹ nị.” Di Imosiisi wụsẹ sị eyi anị tẹ nị. Angwa ee hi ọ ka ọnị ve re Ohomorihi.

⁷ Di Ẹnẹyịmavara va kà a yi Imosiisi dị ọ ka: Ọnị o re a màa chamayịị yị aza anị ene hi Ijipiti. Ọ kà a màa za waa mẹ̀ ụkọrọ, di e yee nowu, ọnị ộ wụ́. Dị ọnị rẹ yẹ avaba ụya ẹnị ẹ yaa rị nị.

⁸ Ọ kà ọnị o reè chi vẹ ka ọnị ọ vaa dọ waa ha hụụnị ụvọ Anijipiti nịnị. Ọ kà ọnị aa kụ́ waa hụụnị ẹtẹ ọnọọ dị ọnị ọ̀ kụ́ wa nọ ịnị ẹtẹ Ikanaani. Ẹtẹ Ikanaani ô zoza ẹtẹẹtẹrẹ. Ộ nyị avị ana vọrọ ka ịsụpa ẹ̀ rị, avọọ ọ mẹ̀ rẹ zụ mẹ̀ ịsa nị. Aza ana vịdị ra hi Ikanaani ẹ vị Anihiti, Anamọrị, Aniperizi ọnịrị Anihivi ne beri Anijebusi.

⁹ Di Ohomorihi rẹ ka ọnị ộ wụ́ owu ana aza anị Anisirẹrị aa na. Ọ kà ọnị ô re Anijipiti màa chamayịị yị wa.

¹⁰ Dị ọ ka ọnị aa tụ́ Imosiisi nee tù Ihwarawo dị ọ̀ na kụ́ Anisirẹrị aza anị hụrẹ Ijipiti.

¹¹ Di Imosiisi ka: Ọnị, ẹnẹ rị ọnị. Ọ kà ẹnẹ vị ọnị ana aa naa jẹẹ ọvịdị Ihwarawo ka vị ọnị aa naa kụ́ Anisirẹrị jịnẹ hụrẹ Ijipiti nị?

¹² Di Ohomorihi ka Ọnị vaa jẹẹ ịrẹma anị. Ọ kà ọnọọ vaa sị zụ̀ ka ọnị ọ tụ́ ọ nị. Dị ọ rẹ ka ọ̀ọ raà kụ́ aza ẹnẹẹ jịnẹ hụrẹ Ijipiti, dị ọ̀ va hẹkẹ ọnị Ohomorihi ịrẹsụ ataba ọnọọ.

¹³ Di Imosiisi họ̀ Ohomorihi dị ọ ka: oni òo ne si tù Anisirẹrị dị ọnị kà a yị wa ka Ohomorihi ana ada ẹnịnịị̄ hẹkẹ ọ tụ́ ọnị vẹ nị, èe họ̀ use ka ịrẹha anị rị yọ, dị ẹ ka Sị ọnị zụ mẹ̀ nị, sị ọnị ọ̀ọ kà yị wa?

¹⁴ Di Ohomorihi kà a yi Imosiisi dị ọ ka Ọnị ọ rị Ẹmị ana vị Ẹmị Di Ohomorihi rẹ kà a yọ dị ọ ka: Ọ̀ kà a yị Anisirẹrị ka Ẹma vị Ẹmị ọ tụ́ ọ vẹ nị.

¹⁵ Di Ohomorihi rẹ kà a yị Imosiisi dị ọ ka: ọnị Ẹnẹyịmavara ana vị Ohomorihi ana Abụrahamị, Ayiziiki, ọnịrị Ijekọvụ hẹkẹ ọ tụ́ ọ hi wa nị. Ọ kà Ịrẹha anị ọ vị ọnọọ nị pooro zịna-zịna. Ịrẹha ọnọọ ezi ịrẹma-ịrẹma vaa hị́ ọnị nị.

¹⁶ Dị ọ rẹ ka ọ̀ na kụ azọkụ Anisirẹrị gụ dị ọ̀ kà a yị wa ka Ẹnẹyịmavara ana vị Ohomorihi ana Abụrahamị, Ayiziiki ọnịrị Ijekọvụ ohiku ẹnịnị hẹkẹ ọ raà sị ẹngụ zụ̀ ọ. Ọka ọ̀ kà a ka ọnị ka ọnị ee re wa ịsị aa sị waa mẹ ịnị ẹtẹ Ijipiti.

¹⁷ Ọ kà ọnị ọ sị ọ kà ka ẹ yị nyị ịsị ẹẹ̄ mẹ ka, ka ọnị ọ yị kụ́ wa hụụnị ụya ana aa sịị rị wa ịnị ẹtẹ Ijipiti. Ọ kà ọnị aa kụ́ wa nọ ịnị ẹtẹ Ikanaani. Ịzọọ Anihiti ọnịrị Anamọrị ne beri Aniperizi ọnịrị Anihivi beri Anijebusi ra hi aanị nị. Ọ kà ẹtẹ ọnọọ ộ nyị avị ana vọrọ ka ịsụpa ọ̀ rị, avọọ ọ mẹ rẹ zụ mẹ̀ ịsa nị.

¹⁸ Ohomorihi rẹ ka ẹnịnị vaa dọ ịrẹyị Imosiisi. Ọ kà ọnịrị azọkụ Anisirẹrị è dudu zị nọ ịda ohinọyị Anijipiti dị ẹ̀ kà a yọ ka Ẹnẹyịmavara ana vi Ohomorihi Anihiburu nịnị o ve tù ẹnị nị. Ọ kà ẹ̀ kà a yọ ka aarịhịnị ọ̀ sị oze yị ẹnị dị ẹ̀ zị ụsẹ ẹkụhị ẹẹta nọ ịnị avị, ka ẹ yaa naa mẹ ịsọvọọ yị Ohomorihi ẹnịnị ana vị Ẹnẹyịmavara.

¹⁹ Ohomorihi ka ama ọnị ộ yẹ ka ẹ yị nyị ịsẹ vaa mẹ̀ ka ohinọyị Anijipiti ọ̀ zẹẹ ka ẹ̀ na, ọnị ọ̀ọ daka tị tana ụvọ za a.

²⁰ Di Ohomorihi ka ama vị ọnị vaa tana ụvọ za Anijipiti dị ọnị mẹ ịvọpa irenyi-irenyi eyi ẹnịnị. Ọ kà ọnị ọ̀ọ vavọọ sị ọ mẹ, ọ vaa navọ ka ẹ̀ na.

²¹ Ọ rẹ ka ọnị vaa mẹ ka Anijipiti ẹ̀ sị eyi ọyịza re wa ẹ̀ẹ yaa na. Ọ kà ẹnịnị ẹ yị vaa na avọ osusu.

²² Ọ rẹ ka ọnyẹnẹẹ ọzọza ọ̀ dọ Anijipiti ana ra gụrị wa ọnịrị anẹẹ ana àa ra ini eehi anị igooru ọnịrị ogu ẹkẹhị-ẹkẹhị. Ọ kà ẹ̀ rẹ dọ wa ịta eni e ve sii kú ezi ẹnịnị ẹngụ. Dị ẹ̀ nyayịnẹ kụ́ ogu Anijipiti na ẹtẹẹtẹrẹ.