Ọyịkụra 2 - IWE ỌNỊNỊ

A mẹmẹ ma Imosiisi

¹ Ịnị ụmẹ anị Anisirẹrị maanị aa rị ụya aanị â nyị ọnọrụ ọnya aanị, Anireevi ọ vị nị. Dị ọ rẹ nyị ozi ọnẹẹ Ireevi nị.

² Ọnẹẹ ọnọọ ộ ma ozi ọnọrụ ọnya aanị yọ. Ọnẹẹ ọnọọ mè re ka ozi ọnọọ ô zoza ẹtẹẹtẹrẹ, dị ọ tangwa sị ọ tẹ pooro dị ọ mẹ ụhwẹ ẹẹta nị.

³ Ịjị ọ̀ yị kụkụ zụ sị ọ tẹ, dị ọ na sị agaga ọnya aanị ana a sị ịkẹ mẹ dị ọ nyị oku nị. Dị ọ sị ọda sisi ọ ka asị enyi zụ ngụ ọ nị. Dị ọ sị ozi ọnọọ tụ́ ọ dị ọ sị na tụ́ ịnị ịkẹ ụtọ okuha nị.

⁴ Di onyeyiza ozi ọnọọ tangwa na jẹẹ ẹnẹẹnẹ ka ọnị ò re ịsị ẹ̀ẹ vaa mẹ ozi ọnọọ nị.

⁵ Di ozi Ihwarawo ọnya ana vị ọnẹẹ va nọ ịnị okuha ka ọnị ọ̀ na hụ enyi nị. Dị aza ịrẹma anị saasa a na nị. Di ozi Ihwarawo ọnọọ re agaga ọnọọ ka ọ yà ịnị ịkẹ nị. Di ọ tụ́ ozi ahụ anị ọnya ana vị ọnẹẹ ka ọ̀ na sị agaga ọnọọ va yị ọnị nị.

⁶ Ịjị ozi Ihwarawo ọnọọ hụ agaga ọnọọ, di o re ka ozi yà ịnị anị di ee nowu nị. Ayị ozi ọnọọ ọ́ va a, dị ọ ka, “Wáá yẹ ka ọnya ini ezi Anihiburu nịnị yị.”

⁷ Di onyeyiza Imosiisi ve tù ozi Ihwarawo ọnọọ dị ọ ka, “Ụ waa ka me ne pè wu sì ọnẹẹ Anihiburu vẹ di ò ve pè wu pa ozi ọnọnị nị.”

⁸ Di ozi Ihwarawo ka, “Na kẹ.” Di onyeyiza Imosiisi na, dị ọ na hị́ ọnyị ozi ọnọọ vẹ nị.

⁹ Di ozi Ihwarawo ọnọọ kà a yị ọnẹẹ ana a na hị́ vẹ aanị dị ọ ka, “Ọ̀ va sị ozi ọnọnị di ò ne pè ọnị pa a. Ọ kà ọ̀ọ sị ọ pa, di ọnị ọ̀ si ọ ụta.” Ịzẹyịza dị ọnẹẹ ọnọọ na sị ozi ọnọọ dị ọ na pa a nị.

¹⁰ Ịjị ozi sị vịra, dị ọ sị ọ na yị ozi Ihwarawo ọnọọ nị. Di ozi ọnọọ kụkụ vị ozi ọnẹẹ Ihwarawo ọnọọ nị. Dị ọ yị ozi ọnọọ Imosiisi nị. Ọ kà ini okuha oni ne tura a hụrẹ nị.

Imosiisi mẹmẹ zwe hụrẹ Ijipiti

¹¹ Imosiisi ọ sị hụ ọmụha. Ẹkụhị ọnya o mè ne hee anda ẹnịnị Anihiburu, di o re ẹ màa rị ụya nị. Di o re ka Anijipiti ọnya ộ ngụ Anihiburu ọnya chire ẹtẹ ee wure e nị.

¹² Di Imosiisi kana eyi kara ẹngụ nị, ẹ yị nyị ọza oni o re. Dị ọ za Anijipiti ọnọọ dị ọ và ịsa hi ọ ẹngụ, dị ọ wụ̀ ọ nị. Dị ọ sị ọ dị ọ kà a chire ààrẹ nị.

¹³ Ịhị ọsa ọ rẹ jịnẹ nọ ẹhẹ. Dị ọ na hụrẹ hi Anihiburu ẹẹva aa zyaazị nị. Dị ọ hị́ ọza ene sì ịrẹyị di aa kà a yọ dị ọ ka: Sị ẹ vẹ di ee tụ́ ọhụva anị?

¹⁴ Dị ọnọọ ka: ẹnị ẹ nyị ọ mẹ ohinọyị ka ọ vị ọmọkarẹyị ẹnịnị. Ọ kà vị ọọ̄ raa vaa wụ̀ ọnị anka ọ mẹ̀ wụ Anijipiti ịhyọọ nị? Di angwa ee hi Imosiisi, dị ọ ka, “Wáá yẹ ka a sị yẹ aanị.”

¹⁵ Ihwarawo mẹ̀ wụ́ ịrẹyị oni Imosiisi mẹ, di ee sì ka ọnị ọ̀ wụ Imosiisi nị. Ama di Imosiisi si zwe hụụ ịda Ihwarawo, dị ọ na yà ịnị ẹtẹ Imidiyani nị. Ẹkụhị ọnya ọ mẹ̀ yà ụtọ ịkangga ọnya,

¹⁶ di ezi anẹẹ Animidiya ịhịmba nọ ịnị ịkangga ọnọọ ka ẹnị ẹ̀ na dà enyi nị. Dị ẹ dà enyi hi ini òkùnsèré yị atẹmẹ ọnịrị ẹvụ ada ẹnịnị nị. Ada ẹnịnị ọnọọ ọ vị ohirẹsụ irehi Ohomorihi ịnị ẹtẹ Imidiyani nị. Aā hị́ ọ Ijetiro.

¹⁷ Dị aza ana aā kụ́ ịsụpaa rị vẹ dị ẹ dụ ezi anẹẹ ẹnẹẹ hụụ ịzọọ nị. Di Imosiisi va na dọ wa tụ́, di o pè wa ká enyi yị atẹmẹ ọnịrị ẹvụ ẹnịnị nị.

¹⁸ Ịjị ezi anẹẹ ẹnẹẹ ve si tù ada ẹnịnị Iruweri dị ọ họ̀ wa dị ọ ka, “Ụsẹ ộ hụ wa ịra vẹ ajịnị oo!”

¹⁹ Dị ẹ ka Anijipiti ọnya aanị ọ va dọ ọnị tụ́ hụụnị ụvọ aza ana aā kụ́ ịsụpaa rị nọ. Ẹ ka ọ hyakụ pè ẹnị dà enyi dị ọ sị yị ịsụpa ẹnịnị nị.

²⁰ Di Iruweri kà a yi ezi anị dị ọ ka, “Ịzị ọnọrụ ọnọọ yà? Dị ọ rẹ ka sị ẹ vẹ dị ẹ̀ naavọ tụ́ ịzọọ? Dị ọ ka ẹ̀ na hị́ ọ vẹ ọ̀ va rị ịsa nị.”

²¹ A mẹ̀ vavọọ na hị́ Imosiisi, ộ dọ ka ọnị ọ̀ yà ịda Iruweri. Di Iruweri sị ozi anị ọnya ana aā hị́ Izipora dị ọ sị gà Imosiisi nị.

²² Izipora ộ ma ozi ọnọrụ ọnya, di Imosiisi yị ọ Igerisomi nị. Ọ kà, Ọzọga ọnị vịdị vị tụ́ ẹtẹ ọzọga nị. Igerisomi ô vene ịrẹyị Ihiburu oni iruvo anị vị “ọzọga mị vị tụ́ ịzọọ nị”.

²³ Ộ vana dà kù, di ohinọyị Anijipiti wusu nị. Anisirẹrị vị ana aa rịị rị ụya, di e yee nowu agụvị ụkọrọ ana a za wa ọrịhị aa mẹ nị. E yee nowu ka Ohomorihi ọ̀ gụ ẹnị ụvọ.

²⁴ Ohomorihi ộ wụ́ ẹ mẹ̀ vavọọ ee nowu. Di Ohomorihi tama ayị ịrẹyị ọnị ọnịrị Abụrahamị, Ayiziiki ọnịrị Ijekọvụ vịdị kà tịtẹ yị ẹngụ nị.

²⁵ Ohomorihi ô re Anisirẹrị nịnị, ô ro ịrẹyị ụya ana aa rị wa.