Ọyịkụra 12 - IWE ỌNỊNỊ

Eche Ọyịparahu ịpaapa

¹ Ẹnẹyịmavara ộ kà a yị Imosiisi ọnịrị Eerọnị e mè hi Ijipiti, dị ọ ka:

² Ụhwẹ ọnọnị ọ vaa sị mẹ ụhwẹ ịpaapa nị. Ọ kà ọnị ọ vaa vị ụhwẹ ịpaapa ịnị ịrayị yị wa nị.

³ Dị ọ ka ọ kà a yị avaba Anisirẹrị ka ịhị ẹ tụ́ ọ ẹkụhị ẹẹwụ ịnị ụhwẹ ọnọnị ọzọza vaa hị́ atẹmẹ ọnya yị aneehi anị. Ovwoovu ọnya vaa hị́ atẹmẹ ọnya.

⁴ Dị ọ ka àa nyị ovwoovu ẹnẹ ẹ̀ yị rụrụ dị ẹ̀ yị zụ sị atẹmẹ ọnya nị, ò ne sì ovwoovu oweyi ọsa ana gụrị ọ. Ovwoovu ene èe sì, ọ̀ yẹ ọpa aza yà ene hi ịzọọ. Ọ kà ẹ̀ẹ sị yẹ ọpa ọnị ọzọza vaa rị dị ẹ̀ yẹ ẹhụ atẹmẹ ana vọrọ ka ẹ̀ hị́.

⁵ Ọ kà atẹmẹ ẹnị ẹ̀ẹ sị ọ vị ịdẹba ịrayị ọnya, dị asị a nyị ịsị ẹ mẹ̀ ẹ vụrụ-vụrụ. Dị ọ ka òo zee wa eyi ahịka ẹvụ ẹ vavọọ sị nị.

⁶ Dị ọ rẹ ka ẹ̀ tangwa sị eyi pè e dị ọ̀ mẹ ẹkụhị ẹwụrẹna ịnị ịhị anị Anisirẹrị ọzọza vaa sị wụ aanị ịnị ụmẹ oruva.

⁷ Ọ kà ẹ̀ẹ sị ọ wụ, ẹnịnị ẹ̀ sị ịnị anị di è che e sẹ́ uhweremi oze ẹyịva ọnịrị ọbana oze irehi ẹnịnị ịzị ọzọza yà rị uye ọnọọ.

⁸ Ọ kà ịnị ịrahụ ịhị ọnọọ gẹdẹ-gẹdẹ, ẹnịnị è hù uye ọnọọ ịnị ịra dị ẹ sị avị ọnyịrẹyị beri Ịbụrẹẹdị ẹnẹ ẹ̀ yị nyị òwù rị ọ.

⁹ Ọ kà asị a nyị ẹnị ẹ rị ẹrẹẹrẹ, asị a nyị ẹnị ẹ rẹ sị enyi chịnẹ, ama dị ẹ̀ sị ịra hu ịrẹsụ anị ọnịrị ahụ anị ne beri ẹnyịnịnẹ anị.

¹⁰ Ọ kà asị ẹ̀ zẹẹ ka à nyị ana vọ tù ẹnẹnẹ eyinẹhẹ anị. Ọ kà àa nyị ana vọ, ẹ̀ rị ọ ịra di eyi ọ̀ va nị.

¹¹ Dị aa ka yị wa ka aanị ẹ mẹmẹ vaa rị ọ nị. Ọ kà ẹ̀ sị obo sụ́ ịta ẹnịnị za ọtẹ, dị ẹ̀ kụ́ adava ẹnịnị hi ahụ, dị ẹ̀ rẹ sị okutẹ ẹnịnị rị ụvọ, Dị ẹ wụsẹ rị ọ eyiha-eyiha. Ọ kà ịsọvọ ọnị ọnị Ẹnẹyịmavara kà ẹ̀ mẹ dị ọnị ọ̀ para irehi ẹnịnị huu ọ vị ọnọọ nị.

¹² Ọ kà ịrahụ ịhị ọnọọ gẹdẹ-gẹdẹ, ọnị vaa parahu ịnị ẹtẹ Ijipiti. Avaba ozi ọzọkụ ẹnịnị, ọ́ọza ọnịrị ịsụpa vị ọnị ọnị aa wụ. Dị ọnị mẹ̀ ọkarẹyị yị avaba ori Anijipiti. Dị ọ ka ọnị Ẹnẹyịmavara ọ ka avọọ nị.

¹³ Dị ọ rẹ ka eni e che sẹ́ oze irehi ẹnị ẹ vaa vị apọtẹrẹwa tụ́ ọ. Ọ kà ọnị o re ọnọọ dị ọnị para wa hu. Ka ẹ yị nyị ụkụ ana vaa kanyị wa ịjị ọnị àaa tana ụvọọ za Anijipiti.

¹⁴ Ẹkụhị ọnọọ vị ọnị ụ vaa tamayị anị nịnị pooro. Ezi ịrẹma-ịrẹma ana aa vẹ vị ana vaa tamayị ẹkụhị ọnọnị, dị ẹ yaa rị eche anị dị ẹ̀ sịị kụ́ ọnị Ẹnẹyịmavara avọ. Eche ọnọọ vị ẹnị ẹ vanaa rị pooro zịna.

¹⁵ Dị ọ ka Eche ọnọọ òo si tù, ẹ vaa rị Ịbụrẹẹdị ẹnẹ ẹ̀ yị nyị òwù pooro mẹ ẹkụhị ịhịmba. Ịnị ẹkụhị ịpaapa ēni eche nyima, dị ẹ kụ́ avaba owu hụụnị eehi ẹnịnị. Ọ kà àa nyị ọza ana rị ịsa ana nyị owu pooro dị ẹkụhị ịhịmba ọnọọ ọ̀ mẹ, ọ̀ yẹ ka aanị ộ ta ịnị Anisirẹrị.

¹⁶ Ọ kà ịhị eche ọnọọ ọ̀ọ hụrẹ ọnịrị ịhị ẹ tụ́ ọ ẹkụhị ịhịmba, dị ẹ kụ́ ẹngụ gụ dị ẹ hẹkẹ ọnị Ohomorihi. Ọ kà ama asị ẹ mẹ̀ ụkọrọ vụrụ-vụrụ ịnị ẹkụhị ẹnẹẹ. Ịsa ọyịrị kẹnẹ ẹ vaa mẹ dị avaba aza ẹ̀ rị nị.

¹⁷ Dị ọ ka Eche ọnọnị ọnị ọza ọ̀ yị mā yà ịnị anị rị Ịbụrẹẹdị ana nyị òwù aanị vị ẹnị ẹ vaa rị pooro, agụvị ka ịhị ọnọọ gẹdẹ-gẹdẹ ọnị kụ́ wa nini ogu-ogu hụrẹ Ijipiti nị. Ọ kà ẹnịrị ezi ẹnịnị ịrẹma-ịrẹma vị ana vaa rị eche ọnọnị pooro zịna.

¹⁸ Ọ kà ịnị ụhwẹ ịpaapa, hụụnị oruva ẹkụhị ẹwụrẹna na ngụ oruva ẹkụhị oohu tụra ọnya, ịsọyịrị ẹnẹ ẹ̀ yị nyị owu ẹ vaa rị nị.

¹⁹ Ọza ọ yị nyayịnẹ re òwù ini eehi ẹnịnị pooro dị ẹkụhị ịhịmba ọ̀ mẹ. Ọ kà àa nyị ọza ana rị ịsa ana nyị owu, ọọza ọnọọ ộ ta ịnị Anisirẹrị. Òo zee eyi ọ̀ vị ọzọga.

²⁰ Dị ọ rẹ ka asị ẹ rị ịsa ọnyọọnyị ana a sị òwù tụ́ ịnị anị nị. Ọ kà aha tụra aha ọnị ẹ̀ẹ yà, ịsa ẹnẹ ẹ̀ yị nyị òwù ẹ vaa rị nị.

²¹ Di Imosiisi hị́ avaba azọkụ Anisirẹrị dị ọ ka, “Ọzọza ọ̀ wụsẹ na, dị ọ̀ na sì ẹvụ yị ovwoovu anị dị ẹ wụ̀ ọ agụvị ịsọvọ ọyịparahu ọnọọ. Ọ kà ẹ sị ẹnya pè anị, dị ẹ̀

²² jị avị ana aā hị́ ihisopu dị ẹ̀ sị mẹ ụ̀hụ́, dị ẹ jị ụ̀hụ́ ọnọọ ngụ ịnị ẹnị ẹ dọ tụ́ ịnị ẹnya, di è che e sẹ ihweremi ẹyịva ọnịrị ọbana oze. Dị ọ rẹ ka asị a nyị ọza ana kụkụ jịnẹ tụ́ ẹhẹ pooro ne tù ẹnẹnẹ eyinẹhẹ anị.

²³ Ọ kà ịjị Ẹnẹyịmavara aa ngụ Ijipiti di aa wụ ozi ọzọkụ ẹnịnị nị, o vee re ọnọọ ini ihweremi oze ẹyịva ọnịrị ịnị ọbana oze, dị ọ para oze ọnọọ hu. Ọ kà ọ yị vaa zẹẹ ka ọwọza ọnọọ ọ̀ ngụ ini eehi na wụ̀ ọza.

²⁴ Dị ọ rẹ ka ẹnịrị ezi ẹnịnị ịrẹma-ịrẹma è si eyi pè ọda ọnọnị dị ẹ̀ẹ saasa a pooro.

²⁵ Dị ọ rẹ ka ịhị ẹ̀ẹ na sị ngụ ịnị ẹtẹ eni Ẹnẹyịmavara kà ọnị vaa sịị yị wa, re ka anị aa mịị mẹ ido ọnọnị.

²⁶ Ọ kà Ezi ẹnịnị vee họ̀ use ka sị ẹ vị iruvo ido ọnọnị ẹnị ẹ yaa mẹ aanị,

²⁷ dị ẹ̀ kà a yị wa ka ịsọvọ ọyịparahu ọnị sịị mẹ yị Ẹnẹyịmavara nị. Ọ kà ẹ̀ kà a ka ọ mẹ̀ ngụ Ijipiti na para hu dị ọ wụ̀ wa, dị ọ para irehi avaba Anisirẹrị hu nị.” Dị aza ẹnẹẹ tana tụra ẹtẹ dị ẹ kụ́ Ohomorihi avọ nị.

²⁸ Di Anisirẹrị na mẹ anka Ẹnẹyịmavara mẹ̀ mẹ ọda yi Imosiisi ọnịrị Eerọnị nị.

Ezi ọzọkụ Anijipiti ê sú

²⁹ Ịzẹyịza ịnị agẹvịrahụ, ịhị ọnọọ, dị Ẹnẹyịmavara wụ̀ avaba ezi ana vi ezi ọzọkụ ịnị ẹtẹ Ijipiti nị. Ô nyima hụụnị ozi ọzọkụ Ihwarawo ana vọrọ ka ọ̀ dọ ada anị ịrẹsụ huu ne tụ́ ozi ọzọkụ aza ana za hi ịnị ẹngwa. Ezi ọzọkụ avaba ịsụpa vi ene re sú bẹẹ.

³⁰ Ịrahụ ịhị ọnọọ owu ộ sụ́ ịrẹyị ịnị avaba ẹtẹ Ijipiti. Owu ọnọọ ọ sị Ihwarawo ọnịrị anụkọrọ anị ne beri avaba Anijipiti ha. A rẹ vaa nyị irehi ọnya ọnị ọza ò yi sú ịnị anị.

³¹ Ịnị ịrahụ ọnọọ di Ihwarawo tụ́ na hị́ Imosiisi ọnịrị Eerọnị dị ọ ka, “Buru-buru, ẹnịrị Anisirẹrị anda ẹnịnị ọ̀ wụsẹ kwooze yị aza anị. Ọ kà ẹ̀ wụsẹ na, dị ẹ na hẹkẹ Ẹnẹyịmavara anka e mè họ̀ use nị.

³² Ọ kà ẹ̀ẹ yaa na ẹ̀ kụ́ atẹmẹ ọnịrị ẹvụ beri imaaru ẹnịnị anka ẹ mẹ̀ vịdị kà a. Dị ọ ka aarịhịnị ẹ̀ mẹ̀ aduwa yị ọnị bẹẹ nị.”

Anisirẹrị nini ệ hụrị Iramesisi na ngụ Isukọtị

³³ Anijipiti nịnị aa há Anisirẹrị eyi ka ẹ̀ wụsẹ jịnẹ hụụnị ẹkụra ẹnịnị. Ẹnịnị ka ẹnị aa vaa taa súu ha.

³⁴ Di Anisirẹrị kụ́ Ịbụrẹẹdị eni e pō ẹnẹ ẹ̀ yị nyị òwù, dị ẹ kụ ọ hi ịnị ẹnya ẹnị ẹ sịị̄ jị Ịbụrẹẹdị nị. Dị ẹ sị ịta ẹnịnị gụ ọ ịrẹgụ, dị ẹ kụ ọ tụra ịza nị.

³⁵ Anisirẹrị nịnị ệ mẹ ịsị Imosiisi kà a ka ẹ̀ mẹ. Dị ẹ ka Anijipiti ẹ kụ́ ịsa ẹkẹhị ọnịrị igooru ne beri ịta yị ẹnị nị.

³⁶ Ẹnẹyịmavara ộ mẹ̀ ka Anijipiti è re Anisirẹrị eyi, dị ẹ kụ́ ịsa eni e họ̀ use anị yị wa nị. Dị Anisirẹrị nịnị nyayịnẹ kụ́ ẹnya hụrẹ Ijipiti nị.

Anisirẹrị ệ jịnẹ hụrẹ Ijipiti.

³⁷ Anisirẹrị nịnị vị ana aa na anka isoja anaā sịị ahụ zị. Oze Iramesisi ẹ zi jịnẹ, di e zi oze Isukoti aa na nị. Ẹnị ana na vị akahị-akahị oze akata (600,000). Ẹnị anọrụ ana sị hụ ọmụha kẹnẹ ọ vị ọnọọ nị. Ọza ọ yị za anyẹnẹẹ ọnịrị ezweyi tụ́ ọ.

³⁸ A rẹ nyị otomiroku aza ẹnyị aanị ana saasa wa. Avọọ ọkọnị atẹmẹ ọnịrị ẹvụ ne beri imaaru mẹ̀ hara saasa wa ẹ màa na nị.

³⁹ Di Anisirẹrị nịnị sị Ịbụrẹẹdị eni e pō ẹnị ẹ̀ yị nyị òwù ẹnẹ za hụrẹ Ijipiti, dị ẹ jị ọ dị ẹ̀ yị nyị òwù nị. A mẹ̀ dụ wa eyiha-eyiha hụrẹ Ijipiti, ẹnịnị ẹ yị vana nyị eyi tenyi ẹngụ ịsọyịrị. E yi re re oze jị akara ana nyị òwù.

⁴⁰ Anisirẹrị ẹ yà ẹkụra Ijipiti mẹ ịrayị akava tụra ohurẹẹwụ.

⁴¹ Ịhị ọnị ịrayị akava tụra ohurẹẹwụ ọnọọ gụ gẹdẹ-gẹdẹ ịhị ọnọọ dị aza Ẹnẹyịmavara jịnẹ hụrẹ Ijipiti ogu-ogu nị.

⁴² Ịrahụ ịhị ọnọọ vị ẹnị Ẹnẹyịmavara jị areyi dị ọ kụ́ wa jịnẹ hụrẹ Ijipiti nị. Ịrahụ ọnọọ vị ẹnị ẹ vanaa tamayị anị pooro zịna-zịna. Anisirẹrị vị ana vaa jị areyi ịnị ịrahụ ẹkụhị ịhị ọnọọ dị ẹ̀ẹ sịị tamayị ịsị Ẹnẹyịmavara mẹ yị wa.

Ido Eche ọyịparahu.

⁴³ Dị Ẹnẹyịmavara rẹ kà a yị Imosiisi ọnịrị Eerọnị dị ọ ido ana yà ini eche ọyịparahu yị. Ọ kà ọzọga ọ mā rị ịnị ịsa eche ọnọọ.

⁴⁴ Ọ rẹ ka ẹ̀ẹ hị́ ọrịhị dị ọ sị ụvẹvẹnẹ jị nị, ô re oze rị ịnị ịsa eche ọnọọ.

⁴⁵ Ọ kà ama ọza ana va ya ịda Ẹnịnị yị ụmẹ chee ọnịrị ọnụkọrọ ẹnị ẹ dọ e yi re oze rị ịnị ịsa eche ọnọọ.

⁴⁶ Dị ọ rẹ ka ịnị eehi a vaa yàa rị ịsa eche ọnọọ nị, ka asị a nyị ẹnị ẹ sị jịnẹ tụ́ ẹhẹ ini uye ọnọọ. Ọ rẹ ka asị ẹ rẹ zẹẹ ka à chaka ẹchụkụ ọnyọọnyị ịnị ẹchụkụ uye eche ọnọọ.

⁴⁷ Ọ kà avaba Anisirẹrị ẹ vaa rị eche ọnọọ nị.

⁴⁸ Ọ rẹ ka àa nyị ọzọga ini eehi ẹnịnị di o sì ka ọnị aa rị ịnị ịsa eche Ẹnẹyịmavara nị, â nyị ka ọ̀ vịdị na jị avaba anineehi anị ana vị ọnọrụ ụvẹvẹnẹ da. Ọ kà ọ̀ọ kụ́ wa jị ụvẹvẹnẹ, ịjọnọọ ô re oze rị ọ anka ozi ẹtẹ. Ọ kà ọnọrụ ẹnẹ ẹ̀ yị jị ụvẹvẹnẹ ọ yị nyayịnẹ rị ịnị ịsa eche ọnọọ.

⁴⁹ Ọda ọnyọọnya ọ za ozi ẹtẹ ọnịrị ọzọga ana ra pè wa nị.

⁵⁰ Ịzẹyịza dị avaba Anisirẹrị mẹ̀ ịsa ẹnị Ẹnẹyịmavara mẹ ọda anị yị Imosiisi ọnịrị Eerọnị nị.

⁵¹ Ịhị ọnọọ gẹdẹ-gẹdẹ dị Ẹnẹyịmavara kụ́ Anisirẹrị ogu-ogu jịnẹ hụrẹ Ijipiti nị.