Ọyịkụra 11 - IWE ỌNỊNỊ

Ezi Ọzọkụ Anijipiti ê sú.

¹ Ẹnẹyịmavara ộ rẹ kà a yị Imosiisi dị ọ ka ọ sị vọ ẹngụkata ọnya ọnị ọnị aa kụ́ vee tù Ihwarawo ọnịrị Anijipiti. Ọ kà ọnị ọ̀ọ raà sị ọnọọ vẹ, ọ vaa hụrẹ wa ụvọ ka ẹ̀ hụụ ịzẹnị. Ọ kà vị ọ hyakụ vaa dụ avaba ẹnịnị ka ẹ̀ẹ na nị.

² Ọ kà ọ̀ kà a yị Anisirẹrị ka ọzọza, ọnọrụ ọnịrị ọnẹẹ ka ẹ̀ kà a yị Anijipiti ẹnị ẹnịrịị ra ka ẹ̀ kụ́ ịsa yị ẹnị. Ọ kà Imosiisi ọ̀ kà a ka ẹnịnị ẹ̀ dọ wa ịsa ẹkẹhị ọnịrị igooru.

³ Dị Ẹnẹyịmavara mẹ ka Anijipiti nịnị è re Anisirẹrị eyi ẹtẹẹtẹrẹ nị. Anụkọrọ Ihwarawo ọnịrị Anijipiti vị ana nyayịnẹ aa sị eyi ọbanyịị re Imosiisi.

⁴ Di Imosiisi kà a yi Ihwarawo dị ọ ka: Ẹnẹyịmavara kà ọnị vee che Ijipiti naa parahu ịnị agẹvịrahụ.

⁵ Ọ kà avaba ozi ọzọkụ ana vị ọnọrụ Anijipiti vee sú. Hụụnị ozi ọzọkụ Ihwarawo ana a vọrọ ka ọ̀ dọ ada anị ịrẹsụ huu ne tù ozi ọzọkụ ọrịhị ọnẹẹ ana aa kwọ ayị vee sú. Avaba ezi ọzọkụ ịsụpa vi ene re vee sú bẹẹ.

⁶ Orere vaa sụ́ ịnị avaba Ijipiti. Ọza ộ yị vịdị vavọọ wụ́ orere da. Ọza ọ ma rẹ vana vavọọ wụ ẹngụ orere ọnọọ.

⁷ Ama irezi ọ yị hyakụ vaa ha ọza àa vị ịsụpa ịda Anisirẹrị nịnị. Ọ kà ịjọnọọ ẹnịnị vaa yẹ ka Ẹnẹyịmavara ộ tẹ ẹhwị tụ́ ịnị Anisirẹrị ọnịrị Anijipiti.

⁸ Dị ọ rẹ ka Ẹnẹyịmavara kà avaba anụkọrọ Ihwarawo vaa vẹ dị ẹ va tana tụra ẹtẹ yị ọnị Imosiisi, dị ẹ dị ẹ ka ọnịrị avaba aza ana saasa ọnị, ẹnị ẹ̀ẹ na. Di Imosiisi ka ọ̀ọ vavọọ sị mẹ, dị ọnị aa na ọgọnị. Ịjọnọọ ayị ọ sị kụ́ Imosiisi, dị ọ jị ayị hụụ ịda Ihwarawo nị.

⁹ Ẹnẹyịmavara ộ vịdị sị ọ ka yị Imosiisi ka Ihwarawo ọ yị vaa dọ ịrẹyị anịị tụ́ ịzọọ, agụvị di oni ò re oze mẹ ịvọpa rụrụ ịnị ẹtẹ Ijipiti.

¹⁰ Imosiisi ọnịrị Eerọnị ệ mẹ avaba ịvọpa ẹnẹẹ éyi Ihwarawo. Ama Ẹnẹyịmavara ọ raà mẹ ka ayị Ihwarawo ọ̀ katẹngụ; ọ yị zẹẹ ka Anisirẹrị ẹ̀ jịnẹ hụụnị ẹkụra anị.