Ọdọvịdị 8 - IWE ỌNỊNỊ

Igidiyọnị ọọ wụ ọga isoja ẹẹva ọnị ọ za.

¹ Ịrẹkụ ọnọọ mẹ vavọọ aa naa, dị Anehwireemi nịnị ve tu Igidiyọnị dị ẹ họ̀ ọ use ka, ebira ịsị ọ mẹ hi ẹnị aanị? Ịsị ẹ vẹ dị ẹ hị́ ẹnị dị ẹnị ẹ na gụ wa ụvọ kụ ịrẹkụ? Anehwireemi nịnị ẹ zyaazị hi Igidiyọnị ẹtẹẹtẹrẹ.

² Ẹ mẹ vavọọ aa ka ịrẹyị ọnọọ dị Igidiyọnị va ka ẹ yị wa ka vị ịsa ọnị mẹ aanị wáá nyị ịzị o tu ịsa ẹnịnị mẹ nị? Dị ọ rẹ ka, vị avaba ẹnị Anabiyeza wáá ya anka atẹ ẹnị ẹnị Anehwireemi jị hi ẹtẹ nị?

³ Ẹ yẹ ka Ohomorihi ọ mẹ ka ẹnịnị ẹ nyị ẹbẹẹba ọdọvịdị Animidiya ẹyịva anaā hị́ Orebi ọnịrị Ịzẹba nị. Áá nyị ịsị ọnị yaanị zụ mẹ ene huna ọnọọ nị? Ịjị Igidiyọnị maanị sị ịrẹyị ka dị ayị ẹnịị sị nẹtẹ dị ẹnịnị ẹ yị kụkụ kụ ayị hi ọ nị.

⁴ Ịjị ẹ sị ịrẹyị ẹnịnị ka ta, dị Igidiyọnị ọnịrị isoja anị ẹnị akavarẹchẹhị (300) jịnẹ irehu Ijodani tụ akẹnẹ eyi ọsa nị. Ọ sị ngụ wa ẹngụ ẹtẹẹtẹrẹ ụmẹ avọọ, ama dị ẹnịnị yị́ ku chire ọnịvị ẹnịnị nị.

⁵ Ịjị Igidiyọnị tu ẹkụra ọnya anaa hị́ Isukoti, dị ọ da ịpẹ yị anịzọọ ka ẹ sị ịsọyịrị yị aza anị agụvị ka ọ sị ngụ wa ẹngụ. Dị ọ ka, ọnị vị anaa yịị dụ Ịzẹba ọnịrị Izarimuna ana vị ohinọyị Animidiya nịnị.

⁶ Dị ẹnị ọdọvịdị Isukoti họ̀ Igidiyọnị use ka, sị ẹ vẹ dị ẹnị aa sị ịsọyịrị yị wa ịrẹma anị ịrẹma ọnị ệ yị za Ịzẹba ọnịrị Izarimuna ẹnẹ ẹ yaa dụ?

⁷ Dị Igidiyọnị ka, oo zoza kẹ, ama ịjị Ẹnẹyịmavara ọọ raa gụ ọnị ụvọ dị ọnị sị Ịzẹba ọnịrị Izarimuna za nị, ọnị aa vaa vẹ ọnị vaa sị igegenechi tọ wa ụnava nị.

⁸ Ịjị Igidiyọnị vavọọ sị ịrẹyị ẹnẹẹ ka, dị ọ hụ ịzọọ dị ọ nọ ịzị aa hị́ Ịpẹnụwẹrị nị. Ịjị ọ na sị ngụ ịzọọ dị ọ rẹ da ịpẹ yị anịzọọ anka ọ mẹ vịdị rẹ da ịpẹ yị Anisukọtị nịnị ka ẹ sị ịsọyịrị yị aza anị nị. Dị ahịka ẹngụ ohi ana Anisukọtị nịnị tụ ọ gẹdẹ-gẹdẹ, Anịpẹnụwẹrị nịnị ẹnị rẹ tụ ọ nị.

⁹ Agụvị avọọ dị Igidiyọnị kà a yị Anịpẹnụwẹrị ka, ọnị ọ̀ọ na sị ẹngwọọrọ vavẹ, ọnị vee wu irehi ọgọdọ ẹnịnị ọnọnịị ha nị.

¹⁰ Ịzẹba ọnịrị Izarimuna beri isoja ẹnịnị vị ene hi ịzị aa hị́ Ikaakọ ụmẹ avọọ. Isoja ẹnịnị ẹẹ gụ akahị-akahị oze ẹwụrẹhị (15,000). Avaba ẹnị ana vọ ịnị isoja Anikẹdẹmụ ọ vị ọnọọ nị. Ọpa ẹnị aza anaa nọ ịrẹkụ ọnị Igidiyọnị wụ ẹẹ gụ akahị-akahị oze ẹchẹhị tụra oohu (12,000).

¹¹ Aa nyị oze ọnya aanị ana naa ngụ udi aza ẹnẹẹ anaa ra hị́ ịnị ajẹngụ. Oze ọnọọ va na ya eyi ọnị ọyị zị hụrẹ ẹ vẹ. Ịzọọ aa hị́ Inoba ọnịrị Ijabeha nị. Igidiyọnị ọ zị oze ọnọọ na ngụ udi Animidiya nịnị. Ịjị o tu ịzọọ, dị ọ ne tu ka isoja ene hị́ ịzọọ ẹ yị sị eyi pe ẹtẹ nị. Dị Igidiyọnị kwẹẹtẹ dị aa wụ̀ wa ha nị.

¹² Dị ẹnị ohinọyị Animidiya nịnị, Ịzẹba ọnịrị Izarimuna kụ zwe nị. Dị Igidiyọnị dụ wa dị ọ za ẹnị ẹyịva nị. Ịjị ọ sị wa za, dị ivovo sị avaba isoja ẹnịnị za nị.

Igidiyọnị ọọ wụ̀ Anisukọtị nịnị.

¹³ Ịjị Igidiyọnị, ozi Ijowasi sị ohinọyị ẹnẹẹ za, dị ọ zị oze ịnị ataba anaā hị́ Iherosi va hụrẹ eyi ịrẹkụ aa vẹ nị.

¹⁴ Ọ màa vẹ, dị ọ za ozwọọmụha Anisukọtị ọnya, dị ọ ka ozi ọnọọ ọ ka yị ọnị ẹnị vị odeyi Isukoti nị. Ịzẹyịza, dị ozwọọmụha ọnọọ chẹrẹ ịrẹha avaba odeyi ẹnịnị yị ọnị, beri ịrẹha avaba ẹnị ọdọvịdị Isukoti nị. Ẹnịnị vị ẹtarẹwụ tụra ịhịmba (77).

¹⁵ Ịjọnọọ dị Igidiyọnị ne tu Anisukọtị nịnị. Ịjị ọ tu ịzọọ, dị ọ ka ẹnịnị ré Ịzẹba ọnịrị Izarimuna ẹnẹ hụvị anị aa sị ọnị mẹ enyinyi ịhị ọnọọ. Ẹnịnị ệ kà a ka, ọnị aa dụ aza, ọnị ẹ yị vaa za wa, ọnị ee họ̀ use ịsọyịrị yị aza anị ka ụngwẹ aa kụ waa.

¹⁶ Ịjọnọọ dị Igidiyọnị za ẹnị ọdọvịdị ẹkụra ọnọọ dị ọ jị ọchị ikeyi-ikeyi hụụnị ụnọmị dị ọ sị pịva yị wa ẹtẹẹtẹrẹ nị.

¹⁷ Dị Igidiyọnị rẹ za irehi ọgọdọ Anipẹnụwẹrị dị o wu ọ, dị ọ rẹ wụ anẹkụra ẹnẹẹ va ha nị.

Igidiyọnị ọ wụ Ịzẹba ọnịrị Izarimuna.

¹⁸ Ịjị Igidiyọnị maa nị raa sị zụ anẹkụra Isukoti ọnịrị Ipanauwẹ dị ọ va họ̀ Ịzẹba ọnịrị Izarimuna ka, ẹngụ aza sị ẹ wụ ẹtẹ Ịtabọ ịhị ọnọọ? Dị ẹnịnị tu ọ ohi dị ẹ ka, aza ẹnẹẹ è vene Igidiyọnị nị, dị ẹ rẹ ya anka ezi ohinọyị avọọ nị.

¹⁹ Ịjọnọọ dị Igidiyọnị kà a yị wa ka, ẹyịnyara anị ana ma ọnịrị hụụ ịnị ịnẹ ọnya ẹ wụ nị. Dị ọ ka, ọnị ọ sị Ẹnẹyịmavara hị́ eku ka Ịzẹba ọnịrị Izarimuna ẹ yị yaa nị wụ̀ wa, ọnị ẹ yị rẹ yaa nị wụ ẹnị.

²⁰ Ịjị Igidiyọnị vavọọ sị ịrẹyị ka, dị ọ hị́ Ijeta ozi anị ana vị ọzọkụ ka ọ kwẹẹtẹ dị ọ wụ̀ Ịzẹba ọnịrị Izarimuna nị. Ama angwa ô hí ozi ọnọọ, dị ọ yị tụ́ ụhwọ́ anị hụụ ịnị ìhì anị agụvị ka ọ sị vị ozweyi.

²¹ Ịjọnọọ dị Ịzẹba ọnịrị Izarimuna va kà a yị Igidiyọnị ka ọnị ụvọta ọ kwẹẹtẹ dị ọ wụ̀ ẹnị agụvị ka ọnị ọ zụ mẹẹ nị. Ịzẹyịza dị Igidiyọnị kwẹẹtẹ dị ọ wụ̀ wa nị. Ịjị ọ sị wa wụ̀ dị ọ ngwara ịsa ọbẹ ana yị ịnị ọrọkọ ịnyaakụmị ẹnịnị nị.

Igidiyọnị ộ mẹ̀ ori ọnị a naa hẹkẹ

²² Ẹkụhị ọnya, dị Anisirẹrị nịnị kụ ẹngụ ne tu Igidiyọnị dị ẹ kà a yị ọ ka ẹnị e si ka Igidiyọnị ọnịrị ezi anị ẹ va vị ohinọyị ẹnịnị agụvị ka ọnị ọ va dọ ẹnị hụrẹ Animidiya nịnị ụvọ nị.

²³ Dị Igidiyọnị ka, “eyiye de” ọnịrị ezi anị ẹ yị va rị ohinọyị tụra wa ịrẹsụ. Ọ kà, Ẹnẹyịmavara Ohomorihi ọ va vị ohinọyị ẹnịnị nị.

²⁴ Dị ọ rẹ kà a yị wa ka, aa nyị ịsa ọnị ọnị e sị hụụ ịnị ụvọ ẹnịnị. Ọ kà ọza ịnya-ọza ịnya ẹnịnị ẹ sị ịsụtọ igooru ẹnị ẹnịnị kụ hụụnị ụvọ Anisimẹrị eyirẹkụ va yị ọnị.

²⁵ Dị Anisirẹrị ẹnẹẹ ka ooho, ẹnị vaa kụ ọ yị ọ nị, ịzẹyịza dị ẹnịnị tụ ịta tịtẹ dị ọzọza kụ ịsụtọ ẹnịnị ana sị igooru mẹ ẹnị ẹ kụ hụrẹ eyirẹkụ vẹ ve hi ịnị anị nị.

²⁶ Ochire ụtọ ana sị igooru mẹ̀ ọnị Igidiyọnị maa nị họ̀ use anị aa nị ọ rata chee aa mẹ sị ọ tụ ịnị ịngọ. Avaba anị va na sị igooru mẹ̀. Ẹnịnị ẹ rẹ kụ ẹnya ọvị ọnịrị ịsa ọbẹ irenyi renyi beri ịta ọkatarihi ọrụrụ-ọrụrụ ọnị ohinọyị Animidiya nịnị za va kà a yị Igidiyọnị. Dị ẹ rẹ kụ ịsa ọbẹ ẹnị ẹ kụ mẹ ịnyaakụmị ẹnịnị tụ ọ yị ọ nị.

²⁷ Dị Igidiyọnị dọ avaba ịsụtọ ana sị igooru mẹ aanị, dị ọ sị mẹ awuru oweyi ọkụ ụvọ tụ ịza anaa hị́ ẹhwọọdụ nị. Ịjị ẹ sị ẹhwọọdụ ọnọọ mẹ dị ọ sị ọ tụ ẹkụra anị ịzị aa hị́ Ọpaara nị. Dị Anisirẹrị nịnị kụkụ nyima dị ẹ yaa hẹkẹ ẹ nị.

²⁸ Avọọ Anisirẹrị nịnị mẹmẹ vana nyị ẹbẹẹba Animidiya nịnị, dị ẹnịnị ẹyị vana nyayịnẹ hira hi Anisirẹrị nịnị nị, pooro dị ọ mẹ ịrayị ẹtarẹwụ dị Igidiyọnị ve su, Anisirẹrị nịnị ẹyị vana kụ ịrẹkụ.

Usu Igidiyọnị

²⁹ Ịnị ụmẹ ọnya aanị, dị Ijerubaari ana vị ozi Ijowasi na ra ịnị irehi anị nị.

³⁰ Igidiyọnị ọnị ụvọta ọ ma ezi ọnọrụ ẹtarẹwụ ọ vavọọ ma ezi rụrụ agụvị ka ọ nyị ọnẹẹ rụrụ.

³¹ Dị onyeehi anị ana ya Ịsẹkẹmị ọnị rẹ ma ozi ọnọrụ ọnya yị ọ nị. Ịrẹha ozi ọnọọ ori Abimẹrẹkị nị.

³² Igidiyọnị ana vị ozi Ijowasi o ku orubo ẹtẹẹtẹrẹ dị o ve su. Ịjị o wusu, di e ne e tụ Ohwira ana vị eehi anị ịzị e ne anda ẹnịnị ana vọ tụ ịnị ẹtẹ ịrẹsụ Anabiyeza nị.

³³ Ịjị Igidiyọnị vavọọ wụ su kwooze kẹnẹ dị Anisirẹrị nịnị rẹ nyima kụkụ raa hẹkẹ ori ana hị́ Ịbaarị nịnị nị. Ẹ hyakụ mẹ ori ana hị́ Ịbaarị-Iberiti yị ẹngụ ẹnịnị bẹẹ.

³⁴ Ẹnịnị ẹ yị rẹ va na tamayị avaba ọyịza ọnị Ijerubaari ana ra hị́ Igidiyọnị mẹ yị wa Anisirẹrị nịnị dị ẹ hyakụ va mẹ ọyịza yị evere anị bẹẹ.

³⁵ Ẹnịnị ẹ yị rẹ va na tamayị avaba ọyịza ọnị Ijerubaari ana ra hị́ Igidiyọnị mẹ wa Anisirẹrị nịnị dị ẹ hyakụ va mẹ ọyịza yị evere anị bẹẹ.