Ọdọvịdị 6 - IWE ỌNỊNỊ

Animidiya ệ mẹ ẹvaya yị Anisirẹrị nịnị

¹ Anisirẹrị nịnị ệ mẹ̀ ebira odivi hi Ẹnẹyịmavara, dị ọ hụrẹ wa ụvọ yị Animidiya ịrayị ịhịmba nị.

² Agụvị ka Animidiya nịnị aa chamayị yị wa di e zwe na tẹ̀ ịnị ataba ọnịrị ụtẹha nịnị nị.

³ Ụmẹ ọnị Anisirẹrị nịnị ẹ̀ẹ sị chire ịsa tụ ịnị aarẹ, dị Animidiya beri Anamarẹkị ẹnịrị anẹkụra nịnị ene hi eyi ịzị ọyịị̄ vẹ rẹ kụ ịrẹkụ tu wa.

⁴ Dị ẹ jị ajẹngụ ẹnịnị tụ ịnị ẹtẹ ẹnịnị, di e du ịsa ịnị aarẹ ẹnịnị ha hụrẹ eyi ụvẹtẹ va ngụ ojesikara Igaza, dị ẹ kụ avaba atẹmẹ, imaaru, ịkẹrịkẹtẹ Anisirẹrị nịnị, dị ẹ tụ wa avosusu.

⁵ Ẹnịnị àa vẹ dị ẹ kụ ịsụpa ọnịrị ajẹngụ ẹnịnị, dị ẹ rụrụ anka akụvarịva avọọ. Ọza ẹ yị zụ za wa ịrịka ẹ mẹ rụrụ ẹnẹmẹhị, di e du ẹtẹ nị.

⁶ Agụvị ka Animidiya ệ tụ Anisirẹrị nịnị avosusu, di e nowu na za Ẹnẹyịmavara kà ẹ mẹ ọgụ yị ẹnị nị.

⁷ E mee nowu na za Ẹnẹyịmavara Ohomorihi ẹnịnị agụvị Aninimidiyani nịnị,

⁸ dị ọ tụ́ ọnịsẹ ana ka enube yị wa nị. Ẹnẹyịmavara kà ọnị ọ sị wa hụụnị udi ọrịhị ana a za wa Ijipiti nị.

⁹ Ọ kà ọnị ọ dọ wa hụrị ụvọ Anijipiti nịnị ọnịrị aza ene beri wa kụ́ ịrẹkụ ịnị ẹtẹ ọnọnị nị. Ọnị ộ dụ wa jịnẹ Anisirẹrị maa ngụ ịzọọ, dị ọnị sị ẹtẹ ẹnịnị yị wa nị.

¹⁰ Ẹnẹyịmavara kà ọnị ọ vị Ohomorihi ẹnịnị nị. Asị ẹ hẹkẹ ori Anamọrị ana nyị ẹtẹ ịzị ẹ ra. Ama Anisirẹrị nịnị ẹ yị wụ́ anị.

Ẹnẹyịmavara ộ nyị Igidiyọnị

¹¹ Ẹkụhị ọnya, dị anggẹẹrị Ẹnẹyịmavara na yaatụ iruvo ọchị ooki ana ya ohwira. Ijowasi ana vị Anabiyeza ộ nyị ọchị ọnọọ nị. Ozi anị Igidiyọnị ô were-were ee tụ́ ihwiti ịnị ụkọ, agụvị asị Animidiya re e.

¹² Ịzọọ anggẹẹrị ya sị ẹngụ zụ ọ, dị ọ pe Igidiyọnị ka ịrẹyị nị, ọ kà Ẹnẹyịmavara ya pe e wu, ọkụrẹkụ ọbanyị.

¹³ Dị Igidiyọnị kà, Aarịhịnị àa zẹ ka ọnị họ̀ use ịrẹyị, Nda, Ẹnẹyịmavara ọ̀ọ ya pe ẹnị, sị ẹ vẹ dị avaba odivi ẹnẹnị ee tụ́ ẹnị? Ịzị ohyozirenu ọnị ohiku ẹnịnị pa ịta ka Ẹnẹyịmavara ộ mẹ̀ ọnị ọ kụ wa hụrẹ Ijipiti ya? Ẹnẹyịmavara ọ raà va ịrẹma ẹnịnị, dị ọ hụrẹ ẹnị ụvọ yị Animidiya.

¹⁴ Dị Ẹnẹyịmavara ọnị ụvọta kà Igidiyọnị vaa nyị ụkata, agụvị avọọ ọnị aa gụ ọ ụvọ, dị ọnị sị ụkata yọ ka ọ sị dọ Anisirẹrị nịnị ha hụụnị ụvọ Animidiya.

¹⁵ Igidiyọnị tụ ọ ohi, dị ọ kà, “Ọga, Mmẹ mẹ zụ dọ Anisirẹrị nịnị ha? Ịrẹsụ amị ọ vị ọkụmị hu ịnị ẹtẹ Ịmanasẹ, ẹma rẹ va nẹtẹ hu kere-kere ịnị ovwoovu amị nị.”

¹⁶ Dị Ẹnẹyịmavara kà a yị Igidiyọnị ka ọ zụ mẹ̀ ẹ agụvị ka ọnị vaa gụ ọ ụvọ. O vee huna Animidiya nịnị anka ọza rere ee tu ọza ịnya avọọ nị.

¹⁷ Igidiyọnị ô va ohi ka, Ẹnẹyịmavara ọ̀ọ nyị ọnị iyi, ọ sị apọtẹrẹwa zụ ọnị ka ọnị ọ vị Ẹnẹyịmavara nị.

¹⁸ Dị ọ ka Ẹnẹyịmavara ọ jẹẹ zi ọnị, dị ọnị ọ sị ịsa ịsọvọ va yọ nị.

¹⁹ Ịzẹyịza, dị Igidiyọnị ngụ eehi, dị ọ wụ ozi ẹvụ, dị ọ sị ayị ikirogirami ẹẹwụ mẹ ụbụrẹẹdị ẹnẹ ẹ yị nyị owu nị. Ịjị uye sị vị, dị ọ kụ ọ hi ini uji, dị ọ va ẹpẹ hi ini ụnọkọ, dị ọ kụ avaba ịsa ẹnẹẹ na yị anggẹẹrị Ẹnẹyịmavara iruvo ọchị ooki nị.

²⁰ Dị anggẹẹrị Ohomorihi kà yọ ka ọ sị uye ọnịrị ụbụrẹẹdị tụ ịrẹsụ ịrẹta, dị ọ vaa ẹpẹ kụ ọ. Di Igidiyọnị mẹ̀ ẹ anka anggẹẹrị ọnọọ mẹ kà a nị.

²¹ Anggẹẹrị Ẹnẹyịmavara ộ sị ịrẹsụ okutẹ ọnị ọ sị rị ụvọ kanyị uye ọnịrị ụbụrẹẹdị, dị ịra kwẹẹtẹ hụụnị ịda, dị ọ rị ịsa ẹnẹẹ nị. Obobooro ọnọọ dị anggẹẹrị ọnọọ vu nị.

²² Ịjị Igidiyọnị vavọọ re e, eyi anị ve hweyi ka oni ô ree re Anggẹẹrị Ẹnẹyịmavara nị. Dị Igidiyọnị, da ịpẹ yị Ẹnẹyịmavara Ohomorihi ka ọnị ọ sị anggẹẹrị anị re.

²³ Ama dị Ẹnẹyịmavara tụ ọ ohi ka ọ sị ayị nẹtẹ, asị o hí angwa ka o yi vee su.

²⁴ Dị Igidiyọnị hì ụta tụ ịzọọ yị Ẹnẹyịmavara, dị ọ hị́ ọ Ẹnẹyịmavara Ẹngwọọrọ.

Igidiyọnị gara ụta ori Ịbaarị ha

²⁵ Ịrahụ ịhị ọnọọ, Ẹnẹyịmavara kà yị Igidiyọnị ka ọ̀ sị ụnọ ịrayị ịhịmba ana vị ọgwọhụva ịnị ụnọ ada anị ene zoza. O wu ụta Ịbaarị ana vị ori ada anị, dị ọ dà ọchị ana a sị mẹ uyi ori ọnẹẹ ana a hị́ Asẹra ene hi jẹẹ akaha anị.

²⁶ Ọ kà Igidiyọnị o re hi ụta a mẹ vọrọ yị ọnị tụ ịrẹsụ ataba, dị ọ kụ ọkụ ọchị uyi Asẹra ene e che hi ẹtẹ, dị ọ kụ ọ rị avaba ụnọ ịsọvọ ọnọọ ịra.

²⁷ Igidiyọnị ộ kụ ezi ahụ anị ịhịmba, dị ọ mẹ̀ ịsa ọnị Ẹnẹyịmavara kà yọ nị. Agụvị ka Igidiyọnị ô hí angwahi ịsị anovwoovu anị ọnịrị anẹkụra anị vaa mẹ̀, dị ọ mẹ avaba ịsa ẹnẹnị ịrahụ nị.

²⁸ Ịjị anẹkụra ọnọọ ha ẹnẹnẹ viri-viri eyinẹhẹ anị, di e re ka â sị ụta Ịbaarị ọnịrị uyi Asẹra wu, dị a rị ụnọ ịra ịrẹsụ ụta ọwọọwa ene hi tụ ịzọọ nị.

²⁹ Ẹnịnị ệ họ̀ ẹngụ use ka ẹnẹ vavọọ mẹ̀? Dị ẹ tangwa kụ́ ahụ anị ne tu ka Igidiyọnị ozi Ijowasi ộ vavọọ mẹ nị.

³⁰ Dị Anẹkụra nịnị ka yị Ijowasi ka ọ sị ozi tụ ẹhẹ, dị ẹnị ẹ wụ̀ ọ. Oni o wu ụta Ịbaarị, dị ọ dà ọchị ana a sị mẹ uyi Asẹra tụ̀ akahị Ịbaarị nị.

³¹ Ama dị Ijowasi tụ́ aza ana zyaazị hi ọ ohi, dị ọ ka ẹnịnị wáá vụ ịrẹvụ yị Ịbaarị nị? Ẹ wáá họ̀ oponu ịrẹyị anị nị? Ọza tụra ọza anaa jẹẹ yị ibaari vị ana a vaa wụ̀ dị eyi ọ vaa nị. Ịbaarị ọ̀ọ vị ori, ọ vụ ịrẹvụ yị ẹngụ anị. Ọnị ọ nyị ụta ana wu nị.

³² Hụrị ụmẹ ọnọọ a kụkụ aa hị́ Igidiyọnị Ijerubaari agụvị ka ọ kà a ka Ịbaarị ọ vụ ịrẹvụ ẹngụ agụvị ụta anị ọnị ọnị wụ.

Igidiyọnị ô huna Animidiya

³³ Ụmẹ ọnọọ avaba Animidiya, ọnịrị Anamarẹkị ne beri Aza ene hi akẹnẹ Ijodani jịnẹ enyi na jị udi tụ inozi Ijezirẹẹrị nị.

³⁴ Ụhwẹ Ẹnẹyịmavara va ku Igidiyọnị dị ọ hu ọpanyị ịrẹkụ hị́ anọrụ Anabiyeza ka ẹ saasa ọnị nị.

³⁵ Dị ọ tụ́ aza ngụ avaba ẹtẹ Ịmanasẹ ka ẹ hị́ wa ka ẹ saasa a nọ ịrẹkụ nị. Avọọ ọ mẹ rẹ tụ́ hị́ Anaseri, ọnịrị Anizeburuni beri inahwitari nị. Dị avaba ẹnịnị saasa a nị.

³⁶ Dị Igidiyọnị ka yị Ẹnẹyịmavara kà ọ̀ọ ro o ka ọnị aa dọ Anisirẹrị ha zị oze ịnị ụvọ anị.

³⁷ Ọnị vaa sị òwù ochiche tụ́ ịrẹsụ ịda aha ụkọ nẹẹhẹ. Eyinẹhẹ anị eguhi òo chire ku o, dị ẹ yị tu eteesu, dị ọnị yẹ ka Ẹnẹyịmavara vaa sị ọnị dọ Anisirẹrị nịnị ha.

³⁸ Avọọ gẹdẹ-gẹdẹ Ẹnẹyịmavara mẹ mẹ̀ ẹ nị. Ịjị Igidiyọnị kwẹẹtẹ eyinẹhẹ anị, dị ọ kama enyi òwù ọnọọ ene hi ẹnya ọnyịnụvọ ọnya nị.

³⁹ Dị Igidiyọnị ka asị Ẹnẹyịmavara du ayị hi ọnị ka ọnị aa yịị họ̀ use ịrẹyị ọsa. Aarịhịnị, ọ jẹẹ ka ọnị ree tenyi zama eyi ọnọọ re. Ụpọhụva ọnọnị eteesu ana kara ọnị nyị ẹnyị ama dị ẹyị ọọ wụ.

⁴⁰ Ịrahụ ọnọọ, dị Ohomorihi vavọọ mẹ̀ ẹ gẹdẹ-gẹdẹ. Eyinẹhẹ dị ẹyị ọnọọ wụ́ kokoroko ama dị eteesu hunẹnẹ eguhi me chire nị.