Ọdọvịdị 5 - IWE ỌNỊNỊ

Ahẹ ọnị Idebora ọnịrị Ịbarakị jị

¹ Ịhị ịrẹkụ ọnọọ ji gẹdẹ-gẹdẹ, Idebora ọnịrị Ịbarakị ozi Abinowami jị ahẹ ọnọnị nị.

² Ga Ẹnẹyịmavara! Anisirẹrị nịnị ê tenyi ẹngụ ịrẹkụ; Ịnị ayohine aza hụrẹ ẹngụ ẹnịnị ụvọ nị.

³ Batọ, ẹwụnị ohinọyị! Sị ụtọ pe ẹtẹ ẹwụnị ọdọvịdị Mị vaa jị ahẹ, dị mị hu ịsa tụ́ ọ yị Ẹnẹyịmavara Ohomorihi Anisirẹrị.

⁴ Ẹnẹyịmavara ụ̀ụ mẹ hụrị Ịsẹyị, ịjị ụ jịnẹ tụ́ ẹhẹ ịnị ẹtẹ Edomi, dị avaba ẹtẹ ziizi, di orihi zụ nị. Ịzẹyịza, dị orihi va hi ẹtẹ nị. Anati

⁵ Ataba nịnị vi ene ziizi ọvịdị Ẹnẹyịmavara ana nyị Ịsịnayị Ọvịdị Ẹnẹyịmavara Ohomorihi Anisirẹrị nịnị.

⁶ Ịnị ụmẹ Ịsamịgarị ozi Anati, Ịnị ụmẹ Ijayẹrị, Osohu ẹnịrị ịnyaakụmị ẹnịnị ệ yị vana nyayịnẹ zị oze ọnọọ parahu. Anusoze nịnị vị ana vana zị oze ọsa.

⁷ Ẹkụra ene hi ịnị ẹtẹ Isirẹrị vị ana tụ́ osusu. Ẹ tịtẹ osusu kẹnẹ dị ụ vavẹ, Idebora Dị ụ kwẹẹtẹ anka ọnyị yị Isirẹrị nị.

⁸ Agụvị ka Anisirẹrị nịnị ệ nyị ka ẹnị aa hẹkẹ ori, dị ịrẹkụ ne gu wa hi oze ọbanyị ọbanyị ẹkụra ẹnịnị ene hi ịzọọ nị. Ẹ yị nyị ọza ana nyị ogonto a vị ọha ọyị sị kụ ịrẹkụ ịnị ẹnị akawụ-akawụ oze oohu.

⁹ Maa ga wụ, Ẹnẹyịmavara, dị ayị amị o hine tu ẹnị ọdọvịdị ọnịrị isoja Isirẹrị nịnị ana dọ ka ẹnị hụrị ẹngụ ụvọ ịnị akakana aza ana vọ.

¹⁰ Ẹwụ nịnị ana tụra ịkẹrịkẹtẹ ọnịrị ẹwụ nịnị ana yaatẹ ịrẹsụ achị beri ẹwụ nịnị ana aa na oze wee ro o.

¹¹ Wụ́ ahẹ aza aa dà enyi ịnị ịkangga. Ẹ yaa kà a Ẹnẹyịmavara mẹmẹ nyị ẹbẹẹba ana mẹ ka Anisirẹrị nịnị ệ nyị ehuna.

¹² Kwẹẹtẹ, kwẹẹtẹ Idebora! Kwẹẹtẹ wa jị ahẹ! Kwẹẹtẹ Ịbarakị wa za ọrịhị ịrẹkụ awụ, ozi Abinowami.

¹³ Aza Ẹnẹyịmavara ana vọ ẹ̀ vaberi ọdọvịdị ẹnịnị. Aza Ẹnẹyịmavara e chi ka ọnị vẹ, di e tenyi ẹngụ ịrẹkụ.

¹⁴ Isoja ộ rẹ hụrị Ehwireemi, ịzị Anamarẹkị vịdị ra Aza ẹnyị ệ hụrị Ịbẹnjamịnị vẹ; Ẹnị ọga isoja nịnị ệ hụrị Imakiri vẹ dị ọdọvịdị ẹkụra nịnị ệ hụrị Izeburuni

¹⁵ Ọdọvịdị Aniisaka nịnị ệ saasa Idebora; Ịzẹyịza, Aniisaka ệ vẹ, Ịbarakị ọnị ọ rẹẹ̀ vẹ. Dị ệ saasa Ịbarakị nọ ịrẹkụ ịnị inozi. Ama ịrẹsụ Irubẹnị vị ana ga hi. Ẹnịnị ẹ rẹ vaa zụ dọ yị ẹngụ ka ẹnị aa nọ.

¹⁶ Sị ẹ vẹ dị ẹ jị tụ ịrẹma pe ịga atẹmẹ? Agụvị dị ẹ wụ́ oseratẹmẹ mee hu okokoro hị́ ịsụpa wáá yọ Ịzẹyịza, ịrẹsụ Irubẹnị vị ana ga hi. Ẹnịnị ẹ yị rẹ vaa zụ dọ yị ẹngụ a vị ka ẹ vẹ.

¹⁷ Ịrẹsụ Igiriyadi vị ana ya eyi ịzị ọyịị̄ zị vẹ akẹnẹ Ijodani, Ịrẹsụ Ịdaanị vị ana jẹẹ pe ẹpa enyi nịnị. Ịrẹsụ Aseri vị ana ya ụtọ enyi. Dị ẹ jẹẹ ụtọ enyi ịzọọ.

¹⁸ Ama isoja Anizeburuni ọnịrị Inahwitari vị ana sị ịrẹsụ ẹnịnị tụ́ usu nọ eyi ịrẹkụ.

¹⁹ Ohinọyị Anikenaani nịnị ê ve beri eyi kụ́ ịrẹkụ ịzị aā hị́ Itaanaki ọgụrị orosi Imegido. Ama ẹnịnị ệ zụ dọ isiriva.

²⁰ Hụrị ẹbẹẹba ụzọmị nịnị kụ ịrẹkụ nị Ẹbẹẹba ẹ ya va eyi ịrazị ka Isisera nị.

²¹ Ọhaara irehu Ikisoni ộ kụ isoja Isisera ne hu nị. Ikisoni, irehu ịyẹẹyẹ. Mi vaa zị ụsẹ tụ́ ọvịdị ịnị ụkata nị.

²² Umaata isoja Isisera ee ji iriga na. Ẹtụpa ẹnịnị aa sụ ịrẹyị ẹ màaa varẹma.

²³ Anggẹẹrị Ẹnẹyịmavara kà a tụ́ ozirenu hi Imerozi. Nyayịnẹ tụ́ ozirenu hi aza ana ra ịzọọ, Ẹnịnị ẹ yị vaa gụ Ẹnẹyịmavara ụvọ, anka isoja, dị ẹẹ kụ́ ịrẹkụ yọ.

²⁴ Ga Ijayẹrị hụụnị anẹẹ ana vọ Ijayẹrị ose Iheberi ana vị Anikeni Ọnị ọ nyị ịrẹsụ ọyịza huu ịnị avaba anyẹnẹẹ ana ra ịnị ajẹngụ nị.

²⁵ Isisera ô họ̀ use enyi, ama dị Ijayẹrị sị enyi ịrẹva ụnọ yị ọ nị. Dị ọ sị ẹnya ozoza sị angwẹ va yọ nị.

²⁶ Ộ sị ụvọ ọnya sị ẹka ajẹngụ, dị ọ sị ụvọ ọsa sị ịhama anụkọrọ, dị ọ kanyị ẹka ọnọọ hi Isisera. Ịnị ịrẹsụ anị ộ kanyị ọ hi, dị akokoro ịrẹsụ anị chaka nị.

²⁷ Ahụ Isisera ộ jị ọ ụvọ, dị ọ nya ẹtẹ ha, Agada Idebora ọ nya ẹtẹ, di o su tụ nị.

²⁸ Ọnyị Isisera ô da eyi gẹ ini ozokete anị, dị ọ họ̀ use ka sị ẹ vẹ di e ku? Sị ẹ vẹ dị ẹtụpa umaata anị ee ku ọyị sụ ịrẹyị varẹma vẹ eehi?

²⁹ Ọnịrị anyẹnẹẹ ọyẹrẹyị vi ene tụ ohi ịrẹyị ọnyọọnya.

³⁰ Ẹ ka Isisera ọnịrị isoja nịnị e yee re ogu ọnị ẹ vaa ga. Ọnẹẹ ọnya a vị ẹẹva vee tụ́ ọzịnya-ọzịnya ẹnịnị, achị ozozoza vaa vị anị, dị achị ozozoza ana a mẹ̀ ụkọrọ hi vị oose anị.

³¹ Ẹnẹyịmavara ọ navọ ọ wụ̀ avaba ọnịvị anị nini ha, dị ọta awụ nịnị ẹ zẹtẹ anka ọyị òo nyima aa ha avọọ. Ẹtẹ ô vene hi ahị ịrayị ẹbẹẹva.