Ọdọvịdị 3 - IWE ỌNỊNỊ

Anẹkụra ana vọ tụ ịnị ẹtẹ Ikanaani

¹ Ẹnẹyịmavara ộ navọ anẹkụra ẹnyị tụ ịnị ẹtẹ Ikanaani ka ọnị ọ sị zama Anisirẹrị nịnị ẹnẹ ẹ yị vịdị nọ ịrẹkụ re.

² Ọ vavọọ mẹ̀ wa agụvị dị anụmẹ ọzọza ẹ yẹ ịsị a hị́ ịrẹkụ, hu kere-kere ẹnị ẹnẹ ẹ yị vịdị nọ ịrẹkụ da.

³ Anẹkụra ọnị Ẹnẹyịmavara navọ ẹ vị: Anihwirisiti ana nyị ohinọyị ẹẹhị, avaba Anikenaani, Anịsayịdọnị, Ihivitiana ra ịrẹsụ ataba Ịrẹbanọnị hụrẹ ataba Ịbaarị Ihamọnị huu na ngụ oze Irebo-Ihamati.

⁴ Ẹnẹyịmavara vị ana sị wa zama Anisirẹrị nịnị re ka ọnị ọ yẹ ẹ̀ẹ vaa saasa ọda anị ọnị ọ tụ Imosiisi ka ọ mẹ yị ohiku ẹnịnị.

⁵ Avọọ Anisirẹrị nịnị mẹ ra ịnị akakana Anikenaani, Anihiti, Anamọrị, Aniperizi, Anihivi ọnịrị Anijebusi nịnị nị.

⁶ Ẹnịrị Anisirẹrị nịnị vị ana nyị ẹngụ vahi, dị Anisirẹrị nịnị aa hẹkẹ ori ẹnịnị nị.

Ọtịnẹrị

⁷ Anisirẹrị nịnị ệ rị ịvị Ẹnẹyịmavara agụvị ka ẹnịnị e hi ayị anị, dị ẹ na hẹkẹ ori Ịbaarị ọnịrị Asẹra.

⁸ Agụvị avọọ Ẹnẹyịmavara du ayị hi Anisirẹrị nịnị, dị ọ navọ ka Ikusani-Irisatayimi ana vị ohinọyị Arami-Inaharayimi ộ nyị ẹbẹẹba ẹnịnị, dị ẹ mẹ ịjọva tụra wa ịrẹsụ ịrayị ịhịnta.

⁹ Anisirẹrị nịnị ệ da ịpẹ yị Ẹnẹyịmavara kà ọ gụ ẹnị ụvọ, dị ọ nyị Ọtịnẹrị dị ọ dọ ẹnị ha. Ọtịnẹrị vị ozi Ikenazi ana vị ọhụva Ịkarẹbị ana vị ozweyi.

¹⁰ Ụhwẹ Ẹnẹyịmavara ộ dọ Ọtịnẹrị ayị, dị ọ kụ Anisirẹrị nọ ịrẹkụ Ikusani-Irisatayimi. Dị Ẹnẹyịmavara sị ọ nyị ẹbẹẹba anị nị.

¹¹ Â nyị ẹngwọọrọ ịnị Isirẹrị ịrayị ẹbẹẹva dị Ọtịnẹrị ozi Ikenazi ve su.

Ehudi

¹² Ịrẹma anị, Anisirẹrị rẹ mẹ̀ ebira odivi hi Ẹnẹyịmavara nị. Agụvị avọọ, ọ sị ụkata yị Egirọnị ohinọyị Imowabi ô huna Anisirẹrị nị.

¹³ Egirọnị ộ va ụvọ beri Anamọnị ọnịrị Anamarẹkị, dị ẹ nyị ẹbẹẹba Anisirẹrị nịnị, dị ẹ dọ Ijeriko ana vị ẹkụra ọsọchị.

¹⁴ Ộ mẹ ịjọva tụra wa ịrẹsụ ịrayị ẹwụrịhịnta, dị ọ sị ụkata za wa ka ệ tụ ẹkẹhị irehi ẹbanyị-ẹbanyị.

¹⁵ Ụmẹ ọnọọ Anisirẹrị nịnị ê na owu na za Ẹnẹyịmavara, dị ọ sị ọnọrụ ana aā hị́ Ehudi ka ọ dọ wa ha nị. Ehudi vị ozi Igera, dị ọ vị Anịbẹnjamịnị nị. Ọnị ọnụvọha ọ vị nị. Anisirẹrị nịnị ệ sị ẹyịza tụ́ ọ ụtụ hi Egirọnị, Ohinọyị Imowabi.

¹⁶ Ehudi ô tu ụhwọ ana gọdọ ahụ ọnya rị ẹjịjị. Dị ọ sị ọ chire achị eyi ụvọrị.

¹⁷ Dị ọ sị ẹyịza na yị Egirọnị nị. Egirọnị vị ọza ana banyị ẹtẹẹtẹrẹ.

¹⁸ Ịjị Ehudi reè ụta ẹkẹhị irehi yọ, dị ọ kà a yị anọrụ ana sị ẹkẹhị ọnọọ saasa a vẹ ka ẹẹ nọ eehi nị.

¹⁹ Ama Ehudi me tu ịzị ịrẹta ana a bẹ hi, ọ̀ sị gụrị Igirigari, dị ọnị ịnya varẹma ne tu Egirọnị ohinọyị nị. Ộ kà yị Ohinọyị ka ọnị ọ nyị ịrẹyị ọyị were pe e ka nị. Agụvị avọọ, dị ohinọyị dụ ezi ahụ anị tụ ẹhẹ yị ọ nị.

²⁰ Ehudi ô ne tu ọ ịzị ọ yaayịtẹ ịnị ọtụrọsa anị aa dọ ahị, dị ọ kà Ohomorihi ộ tụ́ ọnị hi ọ. Egirọnị maa kwẹẹtẹ hụrị ịrẹsụ aga anị jẹẹ kẹnẹ,

²¹ Ehudi sị ụvọha anị tụ́ ụhwọ́ hụụnị usi eyi ụvọrị anị, dị ọ jị ụhwọ ọnọọ ngụ ọ ịnẹ nị.

²² Avaba ụhwọ ọnịrị ọchị anị ộ ngụ ọ ẹngụ na tụ́ ẹhẹ ịrẹma anị nị. Agụvị ka ộ banyị, di uye ịrẹka anị va ku ọchị ụhwọ ọnọọ nị.

²³ Dị Ehudi jịnẹ tụ ẹhẹ dị ọ gu oze, dị o chere e hi ọ tụ ịzọọ, nị.

²⁴ Ịrẹma ọnị Ehudi sị hu, di ezi ahụ Egirọnị ve tu ka avaba oze anị vị oyichire nị. Dị ẹnịnị ro ka vị aa tana ẹngụ kẹnẹ nị.

²⁵ Ẹnịnị ê zi pooro ne tu ụmẹ ana vọrọ ka ọ sị kwẹẹtẹ, dị ẹ sị ụkọkọrọ na oze, di e ne tu ka ô wusu tụ ini eteesu nị.

²⁶ Ụmẹ ọnị ezi ahụ Egirọnị ee si zi ka ọ ha, Ehudi si re oze zwe para ori ẹnẹ ẹ bẹ́ jẹẹ hu na ngụ ịzị aā hị́ Iseyira nị.

²⁷ Ịjị ọ na sị ngụ ịzọọ, dị o hú ọpanyị ịrẹkụ ịnị ẹkụra ana ya ịrẹsụ otutu ịnị ẹtẹ Ehwireemi, dị anọrụ Anisirẹrị kwẹẹtẹ, dị ọ kụ wa chi hi ẹtẹ, aa nọ ịrẹkụ aza Egirọnị nị.

²⁸ Ehudi ka, ẹ̀ saasa ọnị agụvị ka Ẹnẹyịmavara ọ raà sị ẹnị nyị ẹbẹẹba Animowabi ana vị ọnịvị ẹnịnị. Agụvị avọọ dị ẹ saasa chi na na dọ ẹtẹ Animowabi nịnị, hụrị ịzị ẹẹ̄ zịị jịnẹ irehu Ijodani nị. Ẹnịnị ẹ yị zẹẹ ka à nyị ọza ana jịnẹ enyi tụ́ akẹnẹ.

²⁹ Ịhị ọnọọ Anisirẹrị nịnị ệ wụ̀ aza akawụ-akawụ oze ẹẹhị. Ẹ yị nyị ọnọrụ Animowabi ana ha.

³⁰ Ịhị ọnọọ Anisirẹrị huna Animowabi, dị a vana nyị ẹngwọọrọ ịrayị ẹbẹẹna nị.

Ịsamịga

³¹ Ọdọvịdị ọsa ọnị Isirẹrị vị ana nyị ọ vị Ịsamịga ozi Anati nị, ọnị ọ sị akokoro ịrẹsụ ụnọ wụ̀ Anihwirisiti akata, dị ọ dọ Anisirẹrị nịnị tụ nị.