Ọdọvịdị 18 - IWE ỌNỊNỊ

Anẹkụra Ịdaanị ẹ tụ aza ka e were ne re ẹtẹ

¹ Â nyị ụmẹ ọnya aanị, ịnị ụmẹ ọnọọ ẹ yị nyị ohinọyị ịnị ẹkụra Isirẹrị. Ịnị ụmẹ ọnọọ ẹnịnị evere Ịdaanị ẹ yee sị aha ana vọrọ ka ẹ ra hi. Ẹnịnị ẹ yị va nyị aha ọyị ra agụvị ka ẹnịnị ẹ yị zụ hụ aza ene hi ịnị ẹtẹ ana ga tu wa.

² Avọ, ẹnịnị evere Ịdaanị ẹ tụ ọmụha ọkọọka ẹẹhị hụrẹ Izora ọnịrị Esitawori ka ẹ ne chire ẹtẹ ahụ dị ẹ tangwa were zama uzoza ẹtẹ ọnọọ. Aza ẹnẹẹ ẹ kwẹẹtẹ aa jịnẹ, dị ẹ na ngụ ẹkụra ịnị ataba ịnị ẹtẹ Ehwireemi, ẹ na ngụ ịdị Imika, dị ẹnịnị chị ịzọọ ne ẹhẹ nị.

³ Ẹnịnị mẹ ya ịnị irehi Imika ẹẹ wụ ọngwẹ ozwọọmụha ọnya ana vị Anireevi, ọ mẹ ka ịrẹyị, dị ẹ yẹ ka Anireevi ọ vị nị. Ẹnịnị ệ kana eyi ne sị ọ, dị ẹ họ̀ use ka ịnẹ sị ọ vẹ ịzọọ, sị ẹ vị ụkọrọ anị ịzọọ?

⁴ Ịjọnọọ dị Anireevi ọnọọ kà a zụ wa ịsa ọnị Imika mẹ yị ọnị ọnịrị ka Imika ọ kụkụ sị ọnị dọ anka ọnụtụ tu ịnị akakana ọnịrị Ohomorihi.

⁵ Ịjọnọọ dị aza ẹnẹẹ ka yị Anireevi ọnọọ ka aarịhịnị o pe ẹnị họ̀ use ịnị ụvọ Ohomorihi ụtụ ana tụ ẹnị aanị oo vee zoza.

⁶ Anireevi, ọza Ohomorihi, ộ kà a yị wa ka ẹẹ na beri ayị ọnẹtẹ agụvị ka Ohomorihi ọ saasa wa, ọ vaa sị ụsẹ ẹnịnị zoza.

⁷ Ịjọnọọ dị ọnọrụ ẹẹhị ẹnẹẹ kwẹẹtẹ ụsẹ ẹnịnị dị ẹ na ngụ ịzị aa hị́ Irayisi nị. Ẹkụra Irayisi vị aha ọnị aza ra hi ẹngwọọrọ-ẹngwọọrọ, ẹyị nyị ịsị ẹẹ sị ọzaa hụrẹ ayịnẹ ịzọọ, anka Anisidoni nịnị mẹ ya avọọ, ẹyị nyị ịsa enee chire ọza angwa, ẹyị rẹ nyị ịsa anaa mẹ ehuna yị ọza ịzọọ. Avaba ịsa ana vọrọ ka ẹkụra ọ nyị vene hị́ ịzọọ. Avaba aza ẹnẹẹ vị ọnị o zee yị. Ịzị ẹnịnị ra o noze hi Anisidoni nịnị. Ẹ yị rẹ nyị ọza ọnyọọnyị ọnị ẹnịrị a mẹ ụna vụrụ-vụrụ.

⁸ Ịjị aza ẹnẹnị va varẹma va ngụ Izora ọnịrị Esitawori dị aza ẹnẹnị họ̀ wa use ka ụsẹ ẹnịnị mẹmẹ ya nị?

⁹ Ẹnịnị anaa tụ jịnẹ ẹẹ ka yị aza ẹnịnị ka ẹ ụsẹ kwẹẹtẹ dị ẹnị ẹ kụ ịrẹkụ ne tu ẹkụra ọnọọ, agụvị ka ẹnị ê re ka ẹtẹ ọnọọ ozoza ẹtẹẹtẹrẹ. A vị ka ẹ yị nyị ịsị ụ waa mẹẹ tụ́ ọ nịnị? Asị ụ za a tura ẹtẹ nịnị. Ẹ ka ẹ kwẹẹtẹ na dị ẹ na dọ wa ẹtẹ ọnọọ.

¹⁰ Ẹ ka ịjị ẹnịnị èe tu ịzọọ e vee re e ka aza ene hi ịzọọ ẹ yị tẹsị ka a nyị ịsa ana zụ vẹ, ẹnịnị ẹ yị tenyi ẹngụ ịrazị vụrụ-vụrụ. E vee re ka ẹtẹ ộ gana eyi vansaa. Ẹtẹ ọnọọ oni Ohomorihi si chire wa ụvọ vị ẹtẹ ana ahịka avaba ịsa ọnị ọza ee si vene hi ịnị anị.

¹¹ Ịjọnọọ dị aza ẹchịhịnọnyị ịnị evere Ịdaanị kụ ẹnya ịrẹkụ ẹnịnị dị ẹ kwẹẹtẹ hụrẹ Izora ọnịrị Esitawori di e hu ee nee pe aza ẹnẹẹ kụ ịrẹkụ nị.

¹² Ẹnịnị maa na dị ẹ kụ udi tụ Ikiriyati-Ijeyarimi ana vị ẹtẹ Ijuda nị. Agụvị avọọ a sị hi ịzọọ Imahane Ịdaanị (udi Ịdaanị) pooro ve tu ajịnị ọnọnị nị.

¹³ Ịzọọ ẹ kwẹẹtẹ hụrẹ nọ ẹkụra ana yà ịnị ataba ẹtẹ Ehwireemi, dị ẹ na ngụ ịnị eehi Imika nị.

¹⁴ Ịjọnọọ dị anọrụ ẹẹhị ana a tụ ka e ne were re ẹtẹ Irayisi va kà a yị ọnọhụva ẹnịnị ka ẹ́ẹ́ yẹ ka aa nyị awuru ịharamịra ọdọvịdị ahẹkẹ ne beri ọnyanọkụmị ana a sị ọchị bẹ ọnịrị ana a sị enyusẹ tu ịnị ọnya ịnị irehi ẹnẹẹ? Si a vọrọ ka ẹnịnị ẹ mẹ tụ ọ?

¹⁵ Agụvị avọọ ẹnịnị ha na kụ́ ozwọọmụha Anireevi ana ra ịnị irehi Imika. Dị ẹ họ̀ ọ use ka ẹtẹ mẹ ya nị.

¹⁶ Ịjọnọọ dị anọrụ Anịdanị akata kụ ẹnya ịrẹkụ na jẹẹ irenu oze ovwoovu ọbanyị ẹkụra nị.

¹⁷ Dị anọrụ ẹyịhị ene ne yi ẹtẹ re aanị ngụ ịnị eehi, dị ẹ sị ọnyanọkụmị ori ana wụ́ enyusẹ isiriva ku ọnịrị ọnyanọkụmị ana vọ beri ịharamịra ọdọvịdị ahẹkẹ. Ẹ mẹ maanị a kụ ịsa ẹnẹnị dị isoja ẹnị akata ẹnẹẹ beri ohirẹsụ irehi Ohomorihi jẹẹ irenu oze ovwoovu ọbanyị ẹkụra ee zi nị.

¹⁸ Ịjị ọnị ẹ vị avọọ na ngụ irehi Imika, dị ẹ yaa kụ ẹnya ori ọnịrị awuru ohirẹsụ irehi Ohomorihi, dị ohirẹsụ irehi Ohomorihi ohi ahẹkẹ họ̀ wa use ka sị ẹ yaa mẹ aanị nị?

¹⁹ Ẹnịnị ê tu ọ ohi ka ọ sị irenu anị ku oku dị a sị ọ ka ịrẹyị ọnyọọnyị. Ẹ ka ọ saasa ẹnị dị ọ vị ada ọnịrị ohi ahẹkẹ yị ẹnị. Ệ họ̀ ọ use ka yere ana sị ụbanyị yi ọ hu, ọ́ vị ohirẹsụ irehi Ohomorihi yị ịrẹsụ ọnya a vị avaba Anisirẹrị?

²⁰ Ịrẹyị ọnọnị o hine ohirẹsụ irehi Ohomorihi ọnọọ ayị ẹtẹẹtẹrẹ, dị ọ na sị awuru ahẹkẹ anị ọnịrị ọnyanọkụmị anị hụrẹ ịnị irehi dị ọ saasa aza ẹnẹẹ na nị.

²¹ Avaba ẹnịnị ẹ varẹma hụrẹ ẹkụra ọnọọ a na dị ẹ ku ezweyi ẹnịnị ọnịrị ịsụpa ẹnịnị ne beri ogu ẹnịnị hi ọvịdị nị.

²² Ịjị ẹ da zị noze chee rịrị irehi Imika aza ana ra kara Imika ẹ hị́ ẹngụ gụ dị ọ dụ aza Ịdaanị nịnị na saasa nị.

²³ Dị ẹnịnị na owu hi aza Ịdaanị nịnị nị. Dị aza Ịdaanị kana eyi vẹ ịrẹma dị ẹ họ̀ Imika ka o me re dị ọ kụ aza a dụ ẹnịnị vẹ?

²⁴ Imika oo tu wa ohi ka ẹ ra sị ori ọnị ọnịị bẹ ọnịrị ọnụtụ ori anị. Dị ọka sị ọnị kụkụ nyị ịrẹma ẹsẹnị? Ẹ mẹmẹ yara a họ̀ use ka sị ọnị re?

²⁵ Anịdanị nịnị ee tu ọ ohi ka a sị o pe ẹnị nyị ahankata, ẹyị vavọọ ọnị ọyịkụ ene hi ịnị ẹnịnị vaa gu chire wa dị ẹ dọ Imika ọnịrị ovwoovu anị ụhwẹ.

Evere Ịdaanị e ra Irayisi

²⁶ Ịjọnọọ dị aza Ịdaanị nịnị vara eyi dị ẹyaa sị ụsẹ ẹnịnịị tụ ọvịdị nị. Ịjị Imika ee re ka aza Ịdaanị nịnị ẹ nyị ụkata hu ọnị nị dị ọ vara eyi dị ọ nọ ineehi anị nị.

²⁷ Avọọ aza Ịdaanị mẹ kụ ịsa ọnị Imika mẹ hi ineehi anị dị ẹ rẹ sị ohirẹsụ irehi Ohomorihi anị dị ẹ ya nọ Irayisi nị. Ịjị e tu ịzọọ e re ka anị Irayisi vene hi ịnị ẹngwọọrọ ọnịrị ayị ọnẹtẹ. Ẹnịnị ẹ ị tenyi ẹngụ ịrẹkụ vụrụ-vụrụ. Ẹngwọọrọ-ẹngwọọrọ aza Ịdaanị nịnị sị sị ụ̀hwọ̀ wụ̀ Anirayisi nịnị nị dị ẹ rị irehi ẹnịnị ịra nị.

²⁸ Ẹ yị nyị aza ana vọrọ ka ẹ dọ Anirayisi tụ agụvị ka ẹkụra ọnọọ ọ noze rịrị Anisidoni nịnị. Anirayisi ẹ yị mẹ uzee beri ọzọnyọnyị. Ẹkụra Irayisi va na ya inozi ọgụrị Ịbẹtị-Irehobi. Aza Ịdaanị ee tenyi ẹkụra ọnọọ da, dị ẹ ra ịnị anị nị.

²⁹ Ẹnịnị ẹẹ vara ịrẹha ẹkụra ọnọọ tụ ịnị Ịdaanị. Ịdaanị vị ịrẹha ohiku ẹnịnị ọnị a ma yị Isirẹrị ama Irayisi ẹkụra ọnọọ vịdị rị nị.

³⁰ Ịjọnọọ dị aza Ịdaanị hi ori ọnọọ jẹ yị ẹngụ ẹnịnị nị dị Ijonatani ozi Igesomi ana vị ozi Imosiisi, ọnịrị ezi ẹnịnị vị ọnụtụ tu ịnị akakana yị ẹnịnị ori dị ẹ jẹẹ yị abara Ịdaanị pooro ne tu ụmẹ ana sị kụ wa ọrịhị na ngụ ẹtẹ ọsa.

³¹ Ori ọnọọ ọnị Imika bẹ yị ẹngụ anị aza Ịdaanị vana hẹkẹ pooro ịnị ụmẹ ọnị irehi Ohomorihi sị yị ẹkụra Isiro nị.