Ọdọvịdị 16 - IWE ỌNỊNỊ

Ịsamịsịnị ọnịrị Iderira

¹ Ẹkụhị ọnya, Ịsamịsịnị ọ nọ ẹkụra Anihwirisiti ana aā hị́ Igaza. Ịzọọ ọ ya re ọsẹrẹka ọnya ọnị ọ na sụ ịda anị nị.

² Anigaza nịnị mẹ wụ́ ka Ịsamịsịnị ya ịdị ọsẹrẹka ọnọọ, dị ẹnịnị wara ẹngụ na tẹ̀ ee zi ọ ịrahụ ọyịvụrụ oze ọbanyị ana ngụ ẹkụra ọnọọ nị. Dị ẹ ka ẹnị ee be e na ngụ umeyọnị, ẹnị ẹ̀ẹ za a dị ẹnị ẹ wụ̀ ọ.

³ Ama Ịsamịsịnị vị ana sụ ịzọọ ne tu ụmẹ agẹvịrahụ, ộ ha kwẹẹtẹ dị aa na nị. Ịjị o tu oze ọbanyị ẹkụra, dị ọ sị ụvọ za ọbanaa oze eyi ẹnyị eyi ọsa ne beri ukere anị vabẹ dị ọ hu ọ, di o chema tụ́ ịrẹsụ ịza anị na ngụ ịrẹsụ ataba ana va eyi ka Ihebirọnị, dị ọ ne e tụ́ ịzọọ nị.

Iderira ô vene Ịsamịsịnị

⁴ Ịrẹma aanị, Ịsamịsịnị re ozi ọnẹẹ ene ze e eyi tụ ẹkụra ana ya inozi Isọrẹkị. Ịrẹha ozi ọnẹẹ ọnọọ ọ rị Iderira nị.

⁵ Ịjị ẹnị ohi-ohi ẹkụra Anihwirisiti nịnị re ka Ịsamịsịnị ọ raà nyị Iderira, dị e ne tù Iderira ka ò vene Ịsamịsịnị dị ọ kà a yị ọ iruvo ụkata ọdẹngụ ọnị ọ nyị aanị. O sì iruvo a mẹmẹ zụ huna a, dị ẹnị ẹ sụ́ ọ. Ẹ kà ọzịnya-ọzịnya ẹnịnị vaa sị achuchu oohu yị ọ.

⁶ Ịzẹyịza, dị Iderira kà a yị Ịsamịsịnị ka ọ kà yị ọnị ịsị ẹ maanị sị ọ nyị ụkata. Ọza mẹmẹ nyẹngụ sụ́ ọ, dị ọ tụ ọ ọkụmị?

⁷ Ịsamịsịnị ộ tụ ọ ohi ka, a sị ọ̀zá ịhịmba ẹnẹ ẹ yị wụ, dị a sị sụ ọnị. Ẹ̀ẹ vavọọ mẹ, ẹngụ anị vi ene su rẹgẹ-rẹgẹ, dị ọnị ya anka ọza ana vọ avọọ.

⁸ Obooboro ọnọọ ọdọvịdị Anihwirisiti nịnị na kụ ọ̀zá ọwọọwa ẹnẹ ẹ yị wụ ịhịmba va yị Iderira nị. Dị Iderira sị ọ̀zá ẹnẹẹ sụ́ Ịsamịsịnị tịtẹ nị.

⁹ Iderira ọ vịdị raà kụ ọmụha Anihwirisiti nịnị tẹ̀ ịnị aku ọsa ee zi ịjị ọnị ọ raa sụ Ịsamịsịnị ta, dị aza ẹnẹẹ ẹ jịnẹẹ ve tu Ịsamịsịnị. Iderira ộ hị́ Ịsamịsịnị ka Anihwirisiti nịnị ẹ sị ngụ tu ọ. Dị Ịsamịsịnị jị ọ̀zá ẹnẹẹ pẹrẹ-pẹrẹ va ha anka ịra o rere rị ọ avọọ nị. Ẹnịnị ẹ yị yẹ ịsị ẹ vị ụkata Ịsamịsịnị.

¹⁰ Ịjọnọọ, dị Iderira kà Ịsamịsịnị ka aa jị ọnị ụra, dị ẹ yị kà ịzẹyịza yị ọnị nị. Ọ kà Ịsamịsịnị ọ̀ ka ịzẹyịza yị ọnị a mẹmẹ zụ́ sụ ọọ dị asị ọ kụkụ nyị ụkata.

¹¹ Ịsamịsịnị tụ ọ ohi ka ẹnịnị ẹ̀ẹ sị obo ọwọọwa ọnị ọza ẹ yị sị sụ ịsa da sụ ọnị, ọnị aa tụ ọkụmị anka ọza kẹnẹ avọọ nị.

¹² Ịzẹyịza, Iderira sị obo ọwọọwa sụ Ịsamịsịnị tịtẹ nị. Ụmẹ ọnọọ, anọrụ Anihwirisiti vị ana tẹ̀ ịnị aku ọsa ee zi kà Iderira ọ hị́ ẹnị. Ịjị ọ raà sụ Ịsamịsịnị, di o nowu hị́ ọ ka Anihwirisiti nịnị aa vẹ nị. Ama dị Ịsamịsịnị jị obo ẹnẹẹ và há pịrị-pịrị anka owu ihihiné avọọ nị.

¹³ Di Iderira kà a Ịsamịsịnị vana aa yịị jị ọnị ụra dị ẹ yị kà ịzẹyịza zụ ọnị. Ọ kà Ịsamịsịnị ọ̀ ka yị ọnị a mẹmẹ zụ sị sụ ọ dị ọ yị zụ jị. Dị Ịsamịsịnị kà ọ̀ọ ta ẹyị anị ana vị avụsụ ịhịmba aanị za oguntoro, dị ọ sị osi kanyị ọ za eteesu nị, ọnị ẹ yị kụkụ vaa nyị ụkata anka aza ana vọ avọọ.

¹⁴ Ịjị Ịsamịsịnị aa sụ ara, dị Iderira ta ẹyị anị avụsụ ịhịmba ẹnẹẹ za oguntoro biri-biri, dị ọ kanyị ọ za ugene nị. Dị ọ ha Ịsamịsịnị, dị ọ kà, ọ kwẹẹtẹ ka Anihwirisiti nịnị aa vaa za a nị. Dị Ịsamịsịnị ne kwẹẹtẹ hụụnị ara, di o hu oguntoro ọnọọ, dị ẹyị anị ngwara hụụnị anị nị.

¹⁵ Dị Iderira họ̀ Ịsamịsịnị use ka ọ mẹmẹ zụ kà a ka ọnị ó sì ịrẹyị anị ama dị ọ yị sị ịnẹ zụ ọnị? Ọ kà ọsọnị ọ tụ ọ ụpọhụta ọnị aa jị ọnị ụra, dị ọ yị kà a ịsị ẹ maanị sị ọ nyị ụkata nị.

¹⁶ Avọọ Iderira mẹ̀ kụ ọ hana Ịsamịsịnị eyinị-eyinị pooro di o du ọ eyi nị.

¹⁷ Ịjị ó si du Ịsamịsịnị eyi, dị ọ kà avaba iruvo ụkata anị zụ ọ nị. Ọ kà ọza ana a nyị tụ́ irenyi yị Ohomorihi ọnị vị dị a vaa yẹ ka aa ma ọnị nị. Agụvị avọọ ìrèkù ọ yị mā nọ ọnị ịrẹsụ. Àa kụ ọnị ịrẹsụ, ụkata anị aa hụrẹ ọnị ẹngụ, dị ọnị kụkụ ya anka aza ana vọ avọọ nị.

¹⁸ Ịjị Iderira re ka ọ raà kà ịzẹyịza zụ ọnị, dị ọ tụ hị́ Ọdọvịdị Anihwirisiti nịnị ka ẹ vẹ agụvị ka ọva anị ọ̀ raà sị ịzẹyịza ụkata anị zụ ọnị nị. Ịzẹyịza, dị ẹnịnị sị ẹkẹhị ọnị ẹnịrị ọ sẹ ohu anị yị ọ nị.

¹⁹ Dị Iderira mẹ̀ ka Ịsamịsịnị ọọ sụ ara tụra ọnị ahụ, dị ọ kà yị ọnọrụ ọnya ka ọ sị ịrẹkụ kụ ọ ẹyị anị avụsụ ịhịmba ẹnẹẹ kwooze nị. Ịjị a vavọọ raà kụ ẹyị anị, dị ụkata anị ta, dị Iderira sị obo sụ ọ tịtẹ,

²⁰ di o nowu hị́ Ịsamịsịnị ka Anihwirisiti nịnị ẹ vẹ ka ẹnị ẹ vaa za a nị. Ịsamịsịnị mẹ ha hụụnị ịnị ara, di o ro ka ọnị raa banyị ẹngụ anị ha anka ọ mẹẹ̄ vịdịị mẹ̀ avọọ nị. Ama ọ yị yẹ ka ụkata Ẹnẹyịmavara ọ sị hụrẹ ọnị ẹngụ.

²¹ Ịjọnọọ, dị Anihwirisiti nịnị za a dị ẹ tụ eyi anị ẹyịịva, dị ẹ sị ọ nọ Igaza nị. Ịjị e tu ịzọọ, dị ẹ sị ẹba tụ ọ ahụ, dị ẹ sị ọ tụ ịnị ẹngwa nị, dị Ịsamịsịnị aa kwọ ịsa yị wa ịnị ẹngwa ịzọọ nị.

²² Ịjị ọ naa daa ku, ẹyị Ịsamịsịnị e si nyima ee hi.

Usu Ịsamịsịnị

²³ Ẹkụhị ọnya, dị ohirẹsụ Anihwirisiti nịnị wara ẹngụ gụ ka ẹnị a na a sị ịsọvọ ọbanyị gụ ori ẹnịnị ana aa hị́ Ịdagọnị, dị ẹnịnị aa jẹ ka ori ẹnịnị ọ ra sị Ịsamịsịnị ana vị ọnịvị ẹnịnị chire ẹnị ụvọọ nị.

²⁴ Ịjị aza ẹnẹẹ re Ịsamịsịnị kẹnẹ, di e nyima a gama ori ẹnịnị dị ẹ ka ori ẹnịnị ọ raà sị ọnịvị ẹnịnị ve chire ẹnị ụvọ. Ọza ene du ogu ẹnịnị ha, dị ọ rẹ wụ̀ aza ọrụrụ-ọrụrụ ẹnịnị va ha.

²⁵ Ịnẹ ẹnịnị o hine pooro ne tu ka ệ na owu ka a sị Ịsamịsịnị tu ẹhẹ dị ọ vaa sị aahẹ mẹ ẹnị unyi. Ịzẹyịza dị a hị́ Ịsamịsịnị jịnẹ hụrị ịnị irehi ẹngwa vẹ nị. Ịjị ọ vẹ, dị a sị ọ jẹ ịnị akakana ohinẹ irehi ọnọọ, dị Ịsamịsịnị aa nyị ẹzẹ zụ wa nị.

²⁶ Ịjọnọọ dị Ịsamịsịnị ka yi ozi ana sị ụvọ gẹ ẹ ka ọ zụ ọnị ịzị ohinẹ irehi ya ụvị ọ nyẹngụ sị ẹngụ vayịrẹ ẹ.

²⁷ Ịnị ụmẹ ọnọọ irehi ọ sị hi yị aza, anọrụ ọnịrị anẹẹ. Avaba ohi-ohi ọnịrị ọzọkụ Anihwirisiti nịnị hi ịzọọ. Aza ene hi ịrẹsụ utu ee re ẹtẹ vị akahị-akahị oze ẹẹta.

²⁸ Ụmẹ ọnọọ dị Ịsamịsịnị mẹ̀ aduwa hi Ẹnẹyịmavara nị dị ọ ka Ẹnẹyịmavara ana nyị avaba ẹhẹ ọ tamayị anị, ọ ka, Ohomorihi kwogwo ọ navọ ọ varẹma sị ụkata yị ọnị ụpẹ ọnya dị ọnị ọ zụ si atọ eyi anị ẹyịva ẹnẹ tụ.

²⁹ Ịjị ọnị ụvọ Ịsamịsịnị ku ohinẹ ịnị akakana ẹẹva ana za avaba irehi jẹẹ, dị ọ sị ụvọrị za ọnya, dị ọ sị ụvọha za ọsa, dị ọ tụ wa ụvọ nị.

³⁰ Di o nowu, dị ọ kà ọnị ọ dọ ka ọnịrị Anihwirisiti nịnị o su vabẹ. Dị Ịsamịsịnị sị avaba ụkata anị tụ ohinẹ ẹnẹẹ ụvọ, di irehi ọnọọ ne va ku avaba ọdọvịdị Anihwirisiti ọnịrị avaba aza ene hi ịzọọ nị. Avaba aza ene su beri Ịsamịsịnị ẹ rụrụ hu avaba aza ọnị ọ vịdị wụ ịjị ọ yara nị.

³¹ Ịsamịsịnị mẹ usu, dị ẹyịnyara anị ọnịrị avaba anda ẹnịnị na sị oku anị, dị e ne nee tụ ịnị ụsị ene é ne ada anị Imanowa tụ nị. Usi ọnọọ vana ya ini akakana ẹkụra Izora ọnịrị Esitawori. Ịrayị oohu Ịsamịsịnị mẹ ọdọvịdị Anisirẹrị nịnị vị dị o vee su nị.