Ọdọvịdị 14 - IWE ỌNỊNỊ

Ịsamịsịnị ọ nyị ọnẹẹ Anihwirisiti

¹ Ẹkụhị ọnyara, Ịsamịsịnị ọ nọ ịzị a hị́ Itimina. Ọ mẹ ya Itimina ịzọọ, dị ọ re ọnẹẹ ọnyara ịnị ẹngụ anẹẹ Anihwirisiti nị.

² Dị Ịsamịsịnị na kà a yị ada anị ọnịrị ọnyị anị nị. Dị ọ ka, ọnị ọ re ọnẹẹ Anihwirisiti nịnị ọnyara. Ọnị e sị ka ẹnịnị ẹ nyị ọ yị ọnị.

³ Dị ada anị ọnịrị ọnyị anị họ̀ ọ use ka, “Aanị ka ẹ yị nyị ọnẹẹ ịdị anda nịnị ana vọrọ ka wa nyị, dị ụ waa na nyị ọnẹẹ hụrẹ ịdị Anihwirisiti nịnị ẹnẹ ẹ yị maā jị ụvẹvẹnẹ?” Dị Ịsamịsịnị kà a yị ada anị ka, “Nyị ọnẹẹ ọnọnị yị mị ka o zee mị eyi.”

⁴ Ama ada anị ọnịrị ọnyị anị ẹ yị yẹ ka Ẹnẹyịmavara ọ nyị ụvọ tụ ịnị ịrẹyị ọnọọ nị. Ẹnẹyịmavara e si ka ọnị ọ zị oze ọnọọ họ̀ oponu ịrẹsụ Anihwirisiti nịnị. Ịnị ụmẹ ọnọọ Anihwirisiti nịnị a mẹ ịjọva tụra Anisirẹrị nịnị ịrẹsụ nị.

⁵ Ẹkụhị ọnya, Ịsamịsịnị ọnịrị ada anị beri ọnyị anị a nọ Itimina. Ẹ maanị e tu ụbazị ọnya aanị ana ya Itimina, kẹnẹ dị idu ọnya aanị vana hụrẹ hi wa, dị a hà, dị a tụra ka wa vẹ nị.

⁶ Dị Ẹnẹyịmavara sị ụkata yị Ịsamịsịnị dị ọ za idu ọnọọ dị ọ gara ha anka ọza o rere a wụ̀ ozi ẹvụ avọọ nị. Ẹ yị nyị ịsa ọ sị rị ụvọ dị ọ vavọọ mẹ, Ịsamịsịnị ẹ yị kà a yị ada anị ọnịrị ọnyị anị ọ mẹ vavọọ mẹ.

⁷ Dị Ịsamịsịnị naa dị ọ na ka ịrẹyị yị ozi ọnẹẹ ọnọọ nị. Ozi ọnẹẹ ọnọọ ọ zee eyi ẹtẹẹtẹrẹ.

⁸ Ịjị ọ sị mẹ ịrayị ọnya, dị Ịsamịsịnị varẹma ka ọnị ọ na nyị ose anị nị. Ọ maa na, dị ọ ha ka ọnị ọ re oku idu ọnị ọnị wụ ịhị ọnọọ nị. Wee re, dị ọ re ka ẹhụ ẹ tara ku oku idu ọnọọ dị ẹ sị enyi mẹ tụ ọ nị.

⁹ Dị Ịsamịsịnị jị ụvọ ngụ ọ, dị ọ da ẹhụ dị aa rị ọ na oze nị. Ọọ tu ịnị eehi dị ọ da ẹhụ dị ọ sị yị ada anị ọnịrị ọnyị anị nị, dị ẹ rị ọ nị. Ama Ịsamịsịnị ẹyị ka ẹ yị wa ka ịnị oku idu ọnị da ẹhụ ọnọọ hụrẹ nị.

¹⁰ Dị ada Ịsamịsịnị nọ ịdị ọnẹẹ ọnị Ịsamịsịnị ka ọnị e sị ka ọnị ọ nyị aanị nị. Dị Ịsamịsịnị mẹ ịsọyịrị gwẹtẹ beri eche nị. Avọọ ezwọọmụha anaa nyị ọnẹẹ mẹẹ mẹ nị.

¹¹ Ịjị Anitimina vavọọ re, dị ẹ nyị ẹnị oto ọta ohurẹẹwụ ka ẹ na jẹẹ pe e nị.

¹² Dị Ịsamịsịnị kà a yị wa ka ọnị e si ka ọnị ọ che ụhị yị wa nị. Ọ kà a ẹ zụ swẹ ụhị ọnọọ yị ọnị ịnị akakana ẹkụhị ịhịmba ẹnị ẹnị a sị mẹ inohine aanị, ọnị va sị ịta ọkatarihi oturumi ohurẹẹwụ beri awuru irenyi-irenyi ohurẹẹwụ yị wa.

¹³ Dị ọ rẹ ka a ka, ẹnịnị ẹ yị zụ swẹ ụhị ọnọọ vị ẹnị rẹ vaa sị ịta ọkatarihi oturumi ohurẹẹwụ beri awuru irenyi-irenyi ohurẹẹwụ yị ọnị nị. Dị aza ẹnẹẹ kà o che ụhị ọnọọ, dị ẹnị ẹ wụ nị.

¹⁴ Dị Ịsamịsịnị kà, “hụụ ịnị ịsa anaā rị ịsa â sị ịsa anaā rị hụrẹ nị, hụụ ịnị isa ana nyị ụkata â sị ịsa ohine hụrẹ nị.” Ộ mẹ ẹkụhị ẹẹta ẹnịnị ẹ yị zụ swẹ ụhị ọnọọ.

¹⁵ Ịhyẹgwẹẹna aanị dị aza ẹnẹẹ ne tu ose Ịsamịsịnị, dị ẹ kà a yị ọ ka, o vene ọva anị dị ọ ka iruvo ụhị ọnọọ yị ẹnị nị. Ẹ̀ẹ yị vị avọọ vị ẹnị aa rị ọnịrị irehi ada anị ịra nị. Dị ẹ kà ọnịrị ọva wáá hị́ ẹnị vẹ ịzẹnị va tụ́ ẹnị avosusu nị?

¹⁶ Dị ose Ịsamịsịnị jị òrèrè ne tu ọva, dị ọ ka ọnị ọ yẹ ka ọva anị nyị ịhyẹrẹ anị, o yi sì ịrẹyị anị. Agụvị avọọ o che ụhị yị aza anị dị ẹ yị ka iruvo anị yị ọnị nị. Dị Ịsamịsịnị kà ọnị ẹ yị hyakụ kà a yị ada anị ọnịrị ọnyị anị. Sị ẹ vẹ dị ọnị aa ka a zụ ọ?

¹⁷ Avọọ ọ mẹ jị òrèrè hi Ịsamịsịnị ẹngụ pooro mẹ ẹkụhị ịhịmba ẹnị ẹ sị a mẹ inohine nị. Agụvị ka ộ vavọọ kụ ọ hana a, ịhyẹgwịhịmba anị, dị Ịsamịsịnị ka iruvo ụhị ọnọọ zụ ọ nị. Ịjị ọ sị ọ ka zụ ọ, dị ọ na ka a zụ aza anị nị.

¹⁸ Dị oruva ịhị ọnọọ gẹdẹ-gẹdẹ anọrụ ẹkụra ọnọọ va kà iruvo anị yị Ịsamịsịnị nị. Ệ họ̀ ọ ka, “Sị ẹ zụ hine hu ẹhụ? Sị ẹ zụ nyị ụkata huni idu?” Dị Ịsamịsịnị kà a yị wa ka ẹ yị vị ose anị ana sị iruvo anị zụ wa ẹnịnị ẹ yị yẹ.

¹⁹ Dị Ẹnẹyịmavara sị ụkata yị Ịsamịsịnị, dị ọ nọ ịzị a hị́ Asikerọnị dị ọ wụ̀ anọrụ ohurẹẹwụ ịzọọ nị. Ịjị ọ sị wa wụ̀, dị ọ kụ ẹnya ẹnịnị dị ọ va ga a yị aza ana swẹ ụhị anị nị. Ịsa ana mẹ aanị ộ kụ Ịsamịsịnị ayị ẹtẹẹtẹrẹ, dị ọ jị ayị dị aa nọ eehi anị nị.

²⁰ Dị a sị ose anị yị ọza ana vị ọta anị ọ maa nyị ose anị nị.