Ọdọvịdị 12 - IWE ỌNỊNỊ

Anehwireemi nịnị ệ beri isoja Ịjẹhwịta kụ ịrẹkụ

¹ Ịjị Ịjẹhwịta vavọọ ra nyị ẹbẹẹba Anamọnị, dị Anehwireemi nịnị kụ ẹngụ gụ dị ẹ jịnẹ irehu Ijodani na ngụ ịzị aa hị́ Isihọnị nị. Ịjị e tu ịzọọ, dị ẹ họ̀ Ịjẹhwịta ka sị ẹ vẹ dị a nọ ịrẹkụ Anamọnị nịnị dị ẹẹ hị́ ẹnị ka ẹnị ẹ saasa ọnị? Dị ẹ ka ẹyị nyị ịsa ẹ mẹ ka asị ẹnị rị irehi anị ịra.

² Dị Ịjẹhwịta kà a yị wa ka, ẹnịnị ẹẹ yẹ ka ẹnịrị Anamọnị nịnị ẹẹ nyị ịraazị. Ọnị ọọ hị́ wa ka ẹ va gụ ọnị ụvọ ama ẹnịnị ẹyị vẹ va dọ ọnị hụrẹ wa ụvọ.

³ Ọ rẹ ka, ịjị ọnị sị yẹ ka ẹyị nyị ọza anaa va dọ ọnị hụrẹ wa ụvọ, dị ọnị sị ịrẹsụ tu isu dị ọnị jịnẹ tụ akẹnẹ dị ọnị gẹrị Anamọnị nịnị nị, dị Ẹnẹyịmavara va mẹ ka ọnị ọ nyị ẹbẹẹba ẹnịnị nị. Dị ọ họ̀ wa ka sị ẹ vị iruvo ẹnị ẹ sị kụ ịraazị ve tu ọnị booro aanị?

⁴ Dị Ịjẹhwịta va kụ avaba Anigiriyadi dị ẹ nọ ịrẹkụ Anehwireemi nịnị nị. Anigiriyadi ẹẹ wụ Anehwireemi nịnị agụvị ka ẹnịnị ẹ vịdị sị wa kụ ụhụ ka Anigiriyadi nịnị vị aza ẹnị Anehwireemi dụ na ra pe Anịmanasẹ nịnị. Ẹ ka Anigiriyadi ẹẹ yị Ehwireemi avọọ nị.

⁵ Ịnị ịrẹkụ ọnọọ Anigiriyadi ya dọ oze ana a zị jịnẹ irehu Ijodani nị, dị Anehwireemi nịnị ẹyị kụkụ re oze parahu nị. Ịjị Anehwireemi nịnị e ne zwe ẹ kụkụ tu ịzọọ dị ẹ ka ẹ naa parahu nị, dị Anigiriyadi họ̀ wa ka Anehwireemi ẹnịnị wa vị nị. Dị ẹnịnị ka eyiye.

⁶ Dị Anigiriyadi kà a yị wa ka, ẹ ka ẹnị ẹyị vị Anehwireemi, ẹnịnị ẹ kà a ka, “Ichiboreti”, ama dị Anehwireemi nịnị ka, “Isibọrẹtị”, agụvị ka ẹnịnị ẹyị yara hị́ ọ. Dị Anigiriyadi nịnị za wa dị ẹ wụ̀ wa ịzị a zị jịnẹ irehu Ijodani. Anehwireemi akahị-akahị oze ẹbẹẹva tụra ẹẹva a wụ̀ ụmẹ avọọ nị.

⁷ Ịrayị ẹbẹẹta Ịjẹhwịta mẹ ọdọvịdị Anisirẹrị nịnị vị nị. Ụmẹ ọnyara aanị dị Ịjẹhwịta ana vị Anigiriyadi aanị wusu nị, dị e ne nee tụ ẹkụra anị anaa hị́ Anigiriyadi nị.

Ẹnị ọdọvịdị Anisirẹrị nịnị ana vọ Ibizani

⁸ Ịjị Ịjẹhwịta vavọọ wusu, aa nyị ọnọrụ ọnya aanị anaa hị́ Ibizani, Anị Ịbẹtịrẹhẹmị ọ vị nị, dị ahịka ọnị ọ vana vara ọdọvịdị Anisirẹrị nịnị nị.

⁹ Ibizani ọnọnị ọ ma ezi ọnọrụ ohurẹẹwụ ọnịrị ezi anẹẹ ohurẹẹwụ. Ọọ kụ avaba ezi anẹẹ anị ga ọnọrụ, dị ọ rẹ nyị ezi anẹẹ ohurẹẹwụ hụrẹ ẹhẹ yị avaba ezi ọnọrụ anị nị. Ịrayị ịhịmba Ibizani mẹ ọdọvịdị yị Anisirẹrị nịnị vị nị.

¹⁰ Ụmẹ ọnya aanị, dị Ibizani wusu nị, dị e ne nee tụ Ịbẹtịrẹhẹmị nị.

Ẹrọnị

¹¹ Ịjị Ibizani wusu, aa nyị ọnọrụ ọsa anaa hị́ Ẹrọnị ana vị Anizeburuni. Ẹrọnị ọnọọ ọ vana vara ọdọvịdị Anisirẹrị nịnị nị, dị ọ mẹ̀ ẹ ịrayị ẹẹwụ nị.

¹² Ịnị ụmẹ ọnya aanị, dị Ẹrọnị ana vị Anizeburuni aanị wusu nị dị ene ne e tụ ịzị a hị́ Ayijaroni ịnị ẹtẹ Izeburuni nị.

Abidoni

¹³ Ịjị Ẹrọnị ọnị re wusu, dị a rẹ nyị ọnọrụ ọsa anaa Abidoni nị Ada anị aa hị́ Ihireri nị. Anipiratoni ọ vị nị.

¹⁴ Abidoni ọọ ma ezi ọnọrụ ẹbẹẹva beri aazị ọnọrụ-ọnọrụ ohurẹẹwụ. Ẹnịnị va naa tụra ịkẹrịkẹtẹ zị. Ịrayị ịhịnta Abidoni mẹ ọdọvịdị Anisirẹrị nịnị vị nị.

¹⁵ Ịnị ụmẹ ọnya aa nị, dị Abidoni ozi Ihireri ana vị Anipiratoni aanị wusu nị, dị ẹnịnị ne ne e tụ ẹkụra Ipiratọnị ịnị ẹtẹ Ehwireemi ana ya ịnị ataba Anamarẹkị nịnị nị.