Ọdọvịdị 11 - IWE ỌNỊNỊ

Ịtọpa Ịjẹhwịta

¹ Ịnị ụmẹ ọnyara, aa nyị ọnọrụ ọnyara anaa hị́ Ijẹhụta ana vị Igiriyadi. Ịjẹhwịta ọnọnị vị ọkụrẹkụ ọbanyị ọnị ayị anị vị ẹtẹẹtẹrẹ, ama ọnyị anị vị ọsẹrẹka. Ịrẹha ada anị ọ rị Anigiriyadi nị.

² Ọnẹẹ obooro ọnị Igiriyadi nyị ọ ma ezi ọnọrụ ọsa yị ọ. Ịjị ezi ose anị obooro ẹnẹnị sị vịra dị ẹ dụ Ijẹhụta hụụ ịnị eehi nị. Dị ẹ kà a yị ọ ka ozi ọsẹrẹka ọ vị nị agụvị avọọ, ẹ yị va nyị ogu ada ẹnịnị ana vaa gaa tu ọ.

³ Ịzẹyịza dị Ijẹhụta zwe hụụ ịnị eehi yị adẹnyara anị ẹnẹnị, dị ọ na ra ẹtẹ anaa hị́ Ịtọbị nị. Ẹtẹ Ịtọbị ịzọọ ọ ya ịjị o ne ku chee dị ọ hara ezi edivi ẹnyị ku ẹngụ ana kụkụ a dụ ọ zị nị.

⁴ Aa nyị ụmẹ ọnyara dị Anaamọnị nịnị kụ ịrẹkụ ne tu Isirẹrị nịnị nị.

⁵ Anamọnị nịnị mẹ vavọọ kụ ịrẹkụ ne tu Anisirẹrị nịnị dị ẹnị azọkụ Anigiriyadi va tụ ka ene si Ijẹhụta hụrị ẹtẹ Ịtọbị vẹ nị.

⁶ Ịjị e tu ịzọọ, dị ẹ ka yị Ijẹhụta ka ọ̀ va gụ ẹnị ụvọ pe Anamọnị nịnị kụ ịrẹkụ nị.

⁷ Ama dị Ijẹhụta tu wa ohi dị ọ̀ kà, aanị ka ẹ́ vị ẹnị ẹ nyị ịhyẹrẹ anị dị ẹ dụ ọnị hụụ ịnị eehi ada anị. Sị ẹ vẹ dị ẹngụkata ve tu wa booro aanị, dị ẹ yaa ka ọnị vẹ?

⁸ Dị ẹnị azọkụ Anigiriyadi tụ Ijẹhụta ohi dị ẹ ka, ịzẹyịza yọ, agụvị avọọ ẹnị varẹma kà a vẹ booro anị nị. Dị ẹ rẹ ka, Ijẹhụta ọ saasa ẹnị nọ ịrẹkụ Anamọnị dị ọ gụ ẹnị ụvọ nị, ẹnị vaa sị ọ mẹ ọdọvịdị avaba Anigiriyadi.

⁹ Dị Ijẹhụta tụ azọkụ Anigiriyadi ẹnẹnị ohi, dị ọ họ̀ wa ka ọnị ọ saasa wa nọ ịrẹkụ Anamọnị ọnọnị, dị Ẹnẹyịmavara mẹ ka ọnị ọ nyị ẹbẹẹba nị, ịzẹyịza ẹnịnị waa vaa sị ọnị mẹ ọdọvịdị nị?

¹⁰ Dị azọkụ ẹnẹnị tụ́ ohi, dị ẹ ka, Ẹnẹyịmavara ọ vị onivenu ẹnịnị, ka ẹnị mẹ kà a avọọ ẹnị va mẹẹ nị

¹¹ Ịzẹyịza dị Ịjẹhwịta saasa azọkụ Anigiriyadi nịnị na nị. Dị aza ẹnẹ sị Ịjẹhwịta mẹ ọdọvịdị ẹnịnị nị. Dị ẹ rẹ sị ọ mẹ ọga isoja ẹnịnị nị. Ịjị ẹ vavọọ sị ọ mẹ, dị Ịjẹhwịta nọ Imizipa dị ọ ya ọvịdị Ẹnẹyịmavara dị ọ re tenyi avaba ịrẹyị ọnị ọ vịdị ka yị ẹnị azọkụ Anigiriyadi nịnị ka nị.

¹² Ẹkụhị ọnyara dị Ịjẹhwịta tụ aza ka ẹ na họ̀ ohinọyị Anamọnị ka sẹ sụ ọnịrị ọ dị a kụ ịrẹkụ ve tu aza anị?

¹³ Ịjị ẹ maanị na ra họ̀ ọ, dị ohinọyị Anamọnị va tụ ohi dị ọ kà a yị ẹnịnị ọnụta Ịjẹhwịta ka ụmẹ ọnị Ansirẹrị hụrẹ Ijipiti a vẹ, ẹnịnị ẹ dọ ọnị ẹtẹ, daa hụrẹ ịzị a hị́ Arinọnị huu na ngụ Ijaboki ọnịrị na ngụ irehu Ijodani. Dị ọ rẹ ka ẹ kà a yị Ijẹhụta ka Anisirẹrị ẹ tangwa sị ẹngwọọrọ hụrẹ ẹtẹ ẹnẹ ụvọ varẹma booro aanị.

¹⁴ Ịhị ọsa, dị Ijẹhụta rẹ varẹma tụ ụtụ ne tu ohinọyị Anamọnị nị.

¹⁵ Dị ọ ka ọnụtụ anị nịnị ẹ na kà a yị ohinọyị Amọnị ka ọnị Ijẹhụta ka Anisirẹrị ẹ yị dọ ẹtẹ Animowabi ọnịrị ẹtẹ Anamọnị ọnyọọnyị.

¹⁶ Dị Ịjẹhwịta rẹ ka, Anisirẹrị mẹ hụrẹ Ijipiti aa vẹ, oze ịnị ụnọmị ẹ zị na ngụ oku ovivi nị, dị ẹ zị avọọ va ngụ ịzị aā hị́ Ikadesi nị.

¹⁷ Ịjẹhwịta ka ẹ mẹ vavọọ va sị ngụ Ikadesi dị Anisirẹrị tụ aza ne tu ohinọyị Anedomi ka aarịhịnị ọ jẹẹ dị ẹnị ẹ zị oze ịnị ẹtẹ anị parahu nị, ọ ka ama ohinọyị Anedomi ẹ yị zẹẹ. Ịjẹhwịta rẹ ka Anisirẹrị ẹ vavọọ rẹ tụ ụtụ ne tu ohinọyị Animowabi, ama ọnị ọ yị rẹ zẹẹ. Ịjẹhwịta ka ịjị ohinọyị ẹnẹnị vavọọ ka ẹnị ẹ yị dọ, dị Anisirẹrị nịnị kụkụ vavọọ hị́ Ikadesi nị.

¹⁸ Ịjẹhwịta ọ rẹ kà a ka Anisirẹrị nịnị vana zị oze ịnị ụnọmị jesi kara ẹtẹ Edomi ọnịrị ẹtẹ Imowabi dị ẹ va ngụ eyi ọnị ọyị zị hụrẹ ẹtẹ Imowabi nị. Ọ kà ịzọọ e tu dị ẹ jị udi va eyi ka irehu Arinọnị nị. Ịjẹhwịta ka ẹyị nyị ụmẹ ọnị Anisirẹrị sị jị ahụ ngụ ẹhwị ẹtẹ Imowabi ana vị Arinọnị.

¹⁹ Dị Ịjẹhwịta rẹ ka Anisirẹrị nịnị mẹ vavọọ hi ịzọọ, dị ẹnịnị tụ ẹnị ọnụtụ ọnọrụ ọnya aanị ana hị́ Isihoni nị. Isihoni ọnọnị ọ vị ohinọyị Anamọrị nị. Ẹnịnị ẹ rẹ tụ aza ne tu ohinọyị ẹkụra anaa hị́ Ịhẹsịbọnị, ọ ka, ẹnịnị ẹ tu ne tu wa ka aarịhịnị ẹ navọ vị ẹnị ẹ zị oze ịnị ẹtẹ ẹnịnị parahu na ngụ ịzị ẹnị aa nọ.

²⁰ Ịjẹhwịta ka Isihoni ẹ yị dọ ka Anisirẹrị ẹ zị oze ịnị ẹtẹ anị parahu agụvị ka ẹ yị sị ayị tụra wa. Ọ kà dị Isihoni na kụ isoja anị gụ ịzị aa hị́ Ijahazi dị ẹ kụ ịrẹkụ ne tu Anisirẹrị nị.

²¹ Dị Ẹnẹyịmavara ana vị Ohomorihi anị Anisirẹrị nịnị aa hẹkẹ mẹ ka ẹnị ẹ nyị ẹbẹẹba Isihoni ọnịrị isoja anị nị.

²² Dị Anisirẹrị wụ̀ wa, dị ẹ dọ wa avaba ẹtẹ ọnị Anamọrị nịnị ra nị. Dị Anisirẹrị dọ avaba ẹtẹ Anamọrị nịnị, hụrẹ Arinọnị huu na ngụ Ijaboki beri Okuha Ịjọdanị nị.

²³ Ijẹhụta ọ rẹ kà a ka, Ẹnẹyịmavara ana vị Ohomorihi anị Anisirẹrị nịnị aa hẹkẹ ọ nyị ẹbẹẹba Anamọrị yị aza anị Anaamori yị aza anị Anisirẹrị nịnị nị. Dị Ịjẹhwịta ọ họ̀ Isihoni ka vị o ro ka ọnị ọ nyẹngụ va nyị ẹbẹẹba ẹnịnị booro anị nị?

²⁴ Ịjẹhwịta ọ rẹ kà a yị ọ ka, ẹnịnị ẹ sị ụvọ za ẹhwị ịsa ọnị Ikemosi, ori ẹnịnị ọọ sị yị wa. Ẹnị rẹ va sị ụvọ za ịsa ọnị Ẹnẹyịmavara Ohomorihi ẹnịnị ra sị yị ẹnị.

²⁵ Ịjẹhwịta ọ rẹ kà a ka ọnị ọ yẹ ka Isihoni ọ hyakụ yẹ ọnọrụ anị a Ịbarakị anị a vị ozi Izipọ. Ịbarakị ọnọọ ọ vị ohinọyị Imowabi nị. Ọ kà, vị o ro ka ọnị o huna Ịbarakị ene e pe Anisirẹrị nịnị zị ịrazị nị?

²⁶ Ọ rẹ kà a ka hụrẹ ịrayị ọnị Anisirẹrị nịnị hụrẹ ra hị́ ẹtẹ Ịhẹsịbọnị ọnịrị ẹtẹ Aroyeri beri ẹkụra oweyi-oweyi ẹnị ẹ kụ gẹ ẹngụ avọọ, sị ẹ vẹ dị Isihoni ẹ yị sị vụrị ka ẹnị ẹ dọ ẹtẹ ẹnẹẹ varẹma va ngụ ọyaanị.

²⁷ Aa vị ọnị yọ, ọnị ọ yị mẹ odivi ọnyọọnyị hi Isihoni ama Isihoni aa mẹ odivi hi ọnị dị a kụ ịrẹkụ ve tu ọnị nị. Ẹnẹyịmavara anaa mẹ̀ ọkarẹyị vaa mẹ̀ ọkarẹyị yị Anisirẹrị ọnịrị Isihoni beri Anamọnị ajịnị nị.

²⁸ Ama ohinọyị Anamọnị ẹ yị dọ ịrẹyị ọnị Ịjẹhwịta maanị tụ na ka yị ọ aanị.

²⁹ Ịjọnọọ Ẹnẹyịmavara ọ sị ụkata anị yị Ịjẹhwịta. Dị ọ ngụ ẹtẹ Igiriyadi ọnịrị Ịmanasẹ zịịzị nị. Ọọ rẹ zị oze ẹkụra Imizipe ịnị ẹtẹ Anigiriyadi parahu. Ịzọọ ọ hụrẹ dị ọ na gẹrị Anaamọnị nịnị nị.

³⁰ Dị Ịjẹhwịta va na gẹrị Anamọnị nịnị, ọ hị́ eku yị Ẹnẹyịmavara kà ọọ zẹẹ ka ọnị ọ nyị ẹbẹẹba Anamọnị.

³¹ Ọnị ọ sị ẹngwọọrọ varẹma vẹ ịrẹma ịrẹkụ Anamọnị ọnọọ nị, ịsa tụra ịsa anaa vịdị hụrẹ ịnị irehi va gẹrị ọnị vị ọnị ọnị aa sị yị Ẹnẹyịmavara, ọ ka, ịzẹyịza vị ọnị vaa rị ọ̀ ịra saka-saka ọ yị sị mẹ̀ ịsọvọ yị Ẹnẹyịmavara nị.

³² Ịjị Ịjẹhwịta maanị sị ka, dị ọ na ne pe Anamọnị nịnị kụ ịrẹkụ nị, ịzẹyịza dị Ẹnẹyịmavara mẹ ka ọ nyị ẹbẹẹba Anamọnị nịnị nị.

³³ Ịjẹhwịta ọ wụ̀ wa ha ẹtẹẹtẹrẹ, ọ wụ̀ wa hụrẹ oze Aroyeri na ngụ ịzị a hị́ Iminiti ọnịrị ịzị Ebẹrị-Ikeramimi. Ẹkụra oohu ẹ vị nị ịjị ụvọ Ịjẹhwịta vavọọ sị Anamọnị nịnị huna, dị ẹ kụkụ hụrẹ ẹngụ ẹnịnị ụvọ yị Anisirẹrị nịnị nị.

Ozi ọnẹẹ Ịjẹhwịta ộ va gẹrị ọ.

³⁴ Ịjị Ịjẹhwịta varẹma aa vẹ eehi anị Imizipa, dị ozi ọnẹẹ anị zwe va gẹrị ọ, dị e hu ịsa, dị a nyị ẹzẹ nị. Avọọ Ịjẹhwịta mẹ yị ma ozi ọnẹẹ ọnọọ ikonya nị. Ẹ yị ma ozi ọnọrụ àvị ọnẹẹ ọsa vaka a.

³⁵ Ịjị Ịjẹhwịta vavọọ re e kẹnẹ, dị ayị sị du, dị ọ na ẹnya anị hi ẹngụ anị ẹngụ, dị ọ ka, kwee-kwee, ozi emi, ẹngụkata ụ kụ ve tu mị aanị nọ. Mâ sị ọ kà yị Ẹnẹyịmavara kà aa nyị ịsa ẹmị vaa mẹ yị ọ, mẹ yị zụ mẹ ka mẹ yị mẹ̀ ịsa ọnọọ.

³⁶ Dị ozi ọnẹẹ ọnọọ ka, Ada amị, wa raà sị irenu awụ kà a yị Ẹnẹyịmavara kà â nyị ịsị ụ vaa mẹẹ yị ọ, sị mị mẹ̀ ịsa tụra ịsa ọnị ụ wàa kà a ka ụ vaa mẹẹ yị ọ ịjị ọ ra mẹ ka wa nyị ehuna Anamọnị nịnị ana vị ọnịvị awụ.

³⁷ Dị ozi ọnẹẹ ọnọọ rẹ kà a yị ada anị ka, ọ navọ ọ sị ụhwẹ ẹẹva yị ọnị dị ọnịrị ọta anị nịnị ẹ sị nọ ịnị ataba nị. Ọ kà ọnị vaa jị òrèrè agụvị ka ọnị ẹẹ yị yẹ ọnọrụ.

³⁸ Ịjọnọọ dị ada anị va kà a yị ọ ka ooho ọọ na nị. Dị ọ ka ọnị ọ sị ụhwẹ ẹẹva yị ọ ka ọnịrị ọta anị nịnị ẹ sị nọ ịnị ataba dị ẹ sị na jị òrèrè agụvị ka ẹẹ yị yẹ ọnọrụ nị.

³⁹ Ịzẹyịza, ịjị ụhwẹ ẹẹva sị za ẹtẹ, dị ozi ọnẹẹ varẹma ne tu ada anị nị. Dị ada anị sị ọ dị ọ sị mẹ̀ ịsa ọ ka ọnị vaa mẹ yị Ẹnẹyịmavara nị. Ozi ọnẹẹ ọnọọ ẹẹ yị yẹ ọnọrụ. Dị ọ kụkụ sị vara ịsa ozi ẹtẹ Anisirẹrị nịnị nị

⁴⁰ ozi ọnẹẹ Ịjẹhwịta ọnọọ nị dị ezi anẹẹ Anisirẹrị nịnị aa sị ụpọsa-ụpọsa naa jị òrèrè, ụpẹ ẹẹna ẹ vavọọ mẹ ịrayị-ịrayị nị. Ịjẹhwịta vị Anigiriyadi.