Ọdọvịdị 1 - IWE ỌNỊNỊ

Anisirẹrị nịnị ẹ̀ gẹ ịrẹkụ tu Anikenaani nịnị

¹ Â nyị ụmẹ ọnya aanị, ịnị ụmẹ ọnọọ Ijosuwa ô wusu, dị Anisirẹrị nịnị họ̀ Ẹnẹyịmavara use ka, yere ịrẹsụ ọnị ọ vọrọ tụra ka ẹ vịdị nọ ịrẹkụ Anikenaani nịnị?

² Dị Ẹnẹyịmavara kà ezi Ijuda yọ nị. Dị ọ kà ọnị vaa sị wa nyị ẹbẹẹba Anẹkụra ẹnẹẹ nị.

³ Dị ezi Ijuda na hị́ anda ẹnịnị ana vị ezi Isimiyọnị ẹnẹbẹnị ada ẹnịnị ka ẹ saasa ẹnị nọ ịrẹkụ Anikenaani ana ra ịnị ẹtẹ ana ga tu ịrẹsụ ẹnịnị. Ẹnị rẹ vaa saasa wa nọ ịrẹkụ ịhị òo tu wa. Ịzẹyịza dị ezi Isimiyọnị nịnị na gụ wa ụvọ nị.

⁴ Ẹ́nịnị mẹ nọ ịrẹkụ ọnọọ, dị Ẹnẹyịmavara sị wa nyị ẹbẹẹba Anikenaani ọnịrị Aniperizi nịnị nị. Dị ẹ̀ wụ̀ aza ịrịka akawụ-akawụ oze ẹẹhị eyi ịrẹkụ ẹkụra ana aā hị́ Ibezeki nị.

⁵ Ibezeki ịzọọ ẹnịnị ya hara ịrachị tụra Adoni-Ibezeki ana vị ohinọyị nị. Dị ẹ nyị ẹbẹẹba ọnịrị Anikenaani ne beri Aniperizi ẹ mẹẹ gẹ ịrẹkụ nị.

⁶ Ịjị ẹtẹ ka ịra za a, di o zwe nị, Dị ẹnịnị dụ ọ dị ẹ̀ za a, dị ẹ̀ da a ozi igege ọbanyị ahụ anị ọnịrị ụvọ anị nị.

⁷ Dị Adoni-Ibezeki kà a ịsị ọnị ọnị vịdị mẹ aza gẹdẹ-gẹdẹ o tu ọnị aanị nị. Ohinọyị ẹtarẹwụ ọnị kwọrọ igege ọbanyị ẹnịnị nị. Ohinọyị ẹnẹẹ hi ịdị anị booro aanị aa tọ ẹhụ ịsọyịrị anị rị. Ẹnẹyịmavara ee si ọnị atọ aanị nị. Dị ẹ sị ọ nọ Ijerusarẹmị ịzị o vene ne su tụ.

Ezi Ijuda ệ nyị ẹbẹẹba aza ana ya Ijerusarẹmị ọnịrị Ihebirọnị

⁸ Ịnị ọnọọ ọnyọọnya ezi Ijuda rẹ kụ́ ịrẹkụ ne tu Anijerusarẹmị dị rị ẹkụra ọnọọ nị. Dị ẹnịnị ệ sị ụ̀hwọ̀ wụ̀ aza ene hi ịzọọ ha, dị rị ẹkụra ẹnịnị ịra nị.

⁹ Ịrẹma ọnọọ, Anijuda nịnị va chi kụ ịrẹkụ ne tu Anikenaani nịnị ana ra ịnị ẹkụra ene hi ịrẹsụ ataba ọnịrị ẹtẹ Ịnẹgẹvị ne beri inozi.

¹⁰ Avọọ ẹ̀ mẹ rẹ kụ ịrẹkụ tu Anikenaani ene hi Ihebirọnị ana a vịdị aā hị́ Ikiriyati-Arịba, dị ẹ́ nyị ẹbẹẹba isoja Anisesayi ọnịrị Anahimani ne beri Itarimayi.

Ọtịnẹrị ộ rị ẹkụra ọbanyị ana aā hị́ Idebiri

¹¹ Ẹ vavọọ sị wa huna, dị ẹ hụụ ịzọọ kụ ịrẹkụ ne tu aza ene hi Idebiri nị. Ẹkụra ọnọọ vị ana vịdị aā hị́ Ikiriyati-Isehwa.

¹² Â nyị ọnọrụ ịnya aanị ana aā hị́ Ịkarẹbị. Ộ ma ozi ọnẹẹ ọnya aanị ọnị ịrẹha anị rị Akịsa. Dị ọ kà ọnị vaa sị ozi anị ọnọọ ga ọza tụra ọza anaa zụ kụ ịrẹkụ ne tu Ikiriyati-Isehwa ọnọọ dị ọ rị ọ.

¹³ Ịzẹyịza, dị Ọtịnẹrị ana vị ozi Ikenazi ana vị ọhụva Ịkarẹbị nọ ịrẹkụ ọnọọ, dị ộ nyị ẹbẹẹba aza ẹnẹẹ nị. Avọọ Ikarẹbị mẹmẹ sị ga Ọtịnẹrị dị ộ nyị ọ nị.

¹⁴ Ọ̀ mẹ ngụ ịdị ọva anị kẹnẹ, ọva anị nyima aa kụ ọ hi ọ ẹngụ ka ọ kà a yị ada anị ọ sị ẹtẹ yị ẹnị nị. Â vaa nyị ụmẹ ọnya ọnị o ne heyi ada anị. Ada me re e kẹnẹ ka ee chi hụrẹ ịrẹsụ ịkẹrịkẹtẹ anị, ọ́ họ̀ ọ ka ịsị e si ka ọnị ọ mẹ yọ nị.

¹⁵ Dị ọ ka ada anị ọ sị ẹtẹ apasị anị mẹ̀ ọnị ẹyịza vaka ẹtẹ ana ya Ịnẹgẹvị ọnị ọ vịdị sị yị ọnị nị. Ịzẹyịza, dị Ịkarẹbị sị ẹtẹ apasị eyi ẹbẹẹba ọnịrị eyi ụvẹtẹ yọ nị.

Evere Ịbẹnjamịnị ẹnịrị Ijuda nịnị ệ nyị ẹbẹẹba ọnịvị ẹnịnị

¹⁶ Â nyị evere Ikeeni ana vị ọyẹ Imosiisi ana vịdị ra Ijeriko. Ẹkụra ọnọọ vị ana aā rẹ hị́ ẹkụra ọsọchị. Aza ẹnẹnị ệ kụ̀rà hụrẹ ịzọọ saasa Anijuda nịnị na ra ịnị ụnọmị eyi ụvẹtẹ Ijuda ana gụrị ẹkụra ana aā hị́ Aradi.

¹⁷ Ezi Ijuda ẹnịrị ezi Isimiyọnị ẹ rẹ nọ ịrẹkụ Anikenaani ene hi Izehwati, dị ẹ wụ̀ avaba ẹnịnị saka-saka va ha nị. Dị ẹnịnị sị ịrẹha yị ịzọọ ka ọnị ọ rị Ịhọma nị. Uruvo anị ọ vị ịzị ê du ta.

¹⁸ Ịrẹma ọnọọ, ezi Ijuda vana rẹ rị ẹtẹ Igaza ọnịrị Asikeroni ne beri Ekironi ọnịrị ẹkụra eweyi-eweyi ana kara wa nị.

¹⁹ Ẹnẹyịmavara ộ jẹẹ isoja Anijuda nịnị ịrẹma, dị ẹ dọ ẹtẹ ẹkụra ene hi ịrẹsụ ataba nị. Ama ẹnịnị ẹ yị rẹ va zụ dụ aza ana ra inoze agụvị ka ẹnịnị ẹ nyị ịkẹkẹ ịrẹkụ enyusẹ.

²⁰ Ẹkụra Ihebirọnị vị ana a sị yị Ịkarẹbị anka Imosiisi mẹ̀ vịdị kà a. Dị Ịkarẹbị dụ aza ana vị evere ezi Anaki ẹyịta hụụnị ẹtẹ ọnọọ nị.

²¹ Ama Anịbẹnjamịnị nịnị ẹ rẹ vaa zụ dụ Anijebusi nịnị ana ra Ijerusarẹmị. Agụvị avọọ ẹnịnị ra vabẹ ịzọọ pooro ve tu ajịnị nị.

Ịrẹsụ Ehwireemi ọnịrị Ịmanasẹ ệ rị Ịbẹtẹrị

²² Evere Ijosẹẹhụ ệ nọ ịrẹkụ anẹkụra Ịbẹtẹrị, dị Ẹnẹyịmavara jẹẹ wa ịrẹma nị.

²³ Ẹnịnị ệ vịdị tụ aza were-were nee re ẹtẹ Ịbẹtẹrị ana vịdị aa hị́ Iruzi.

²⁴ Aza ẹnẹẹ màa ngụ ẹkụra ọnọọ na, di e re ọnọrụ ọnya ana a jịnẹ vẹ, dị ẹ ka ọ zụ ẹnị oze ana na ngụ ịnị ẹkụra ka ẹ yị nyị ịsa anaa vaa mẹ̀ ẹ.

²⁵ Dị ọnọrụ ọnọọ sị oze zụ wa nị. Dị ẹ sị ụ̀hwọ̀ wụ̀ avaba aza ene hi ịzọọ, dị ẹ navọ ọnọrụ ọnọọ ọnịrị anovwoovu anị ka ẹ jịnẹ hụụ ịzọọ nị.

²⁶ Dị ẹnịnị nọ ẹtẹ Anihiti dị ẹ da ẹkụra ọnị ẹ yaā hị́ Iruzi pooro ve ajịnị nị.

Aza ana Anisirẹrị nịnị ẹ yị rẹ va zụ dụ

²⁷ Ezi Ịmanasẹ nịnị ẹ yị zụ dụ Anikenaani ana ra Ịbẹtị-Isani, Itaanaki, Ịdọ, Ibirimi, ọnịrị Imegido ne beri ẹkụra eweyi-eweyi ana kara wa Anikenaani ẹnẹẹ vị ene nyị jẹẹ ka ẹnị e hu ahụ hụrẹ aha ẹnịnị.

²⁸ Ịjị Anisirẹrị nịnị sị huna wa, dị ẹ sị ụkata za wa ọrịhị, ama ẹnịnị ẹ yị dụ wa hụrẹ ẹkụra saka-saka.

²⁹ Ezi Ehwireemi nịnị e yị dụ Anikenaani hụrẹ ẹtẹ Ịgẹzẹrị. Ẹnịnị ẹ navọ wa ka ẹnịrị wa ẹ ra vabẹ.

³⁰ Ezi Izeburuni nịnị ẹ yị dụ Anikenaani ana ra hi Ikitironi ọnịrị Ịnaharori. Dị ẹnịrị wa ra vabẹ nị, ama dị Ezi Izeburuni va na za wa ọrịhị nị.

³¹ Ezi Aseri ẹnị ẹ yị rẹ dụ Anikenaani ana ra hi Ako, Ịsịdọnị, Ahịravị, Achizibi, Iheriba, Ahwiki, ọnịrị Ịrẹhọbị.

³² Avọọ Ezi Aseri mẹ ra ịnị akakana Anikenaani nịnị ana nyị ẹtẹ ọnọọ nị. Ẹnịnị ẹ yị dụ wa.

³³ Ezi Inahwitari ẹ yị dụ Anikenaani ana ra Ịbẹtị-Isemesi, ọnịrị Ịbẹtị Anati. Dị ezi Inahwitari ra beri wa ama dị ẹ za wa ọrịhị nị.

³⁴ Ezi Ịdanị vị Anamọrị nịnị dụ varẹma ne hi ẹkụra ana ya ịrẹsụ otutu. Ẹnịnị ẹ yị zẹẹ ka e chi vẹ inozi.

³⁵ Dị Anamọrị nịnị ra hi Ayijaroni, Isaaribimi, ọnịrị ataba Ịharị-Ịhẹrẹsị nị. Ama dị ezi Ịmanasẹ ọnịrị ezi Ehwireemi za wa ọrịhị ka è hẹkẹ ẹnị nị.

³⁶ Ẹhwị ẹtẹ Anamọrị vị ana kwẹẹtẹ hụrị oze Akirabimi na ngụ Ịsẹra vavọọ va hịrẹ.