Odeyi 27 - IWE ỌNỊNỊ

Ịpọọrụ ộ ngụ ẹpa aa nọ Iroomi

¹ A mẹ̀ sị ọọ kà ka ya ngụ ẹpa, dị ya nọ Itari, â sị Ịpọọrụ ọnịrị anịnẹngwa ẹnyị chire ọga isoja nịnị ẹchẹhị ana aā hị́ Ijuriyọsị ụvọ. Ijuriyọsị vị ọnya ini isoja nịnị Ọgọsịtọsị.

² Yâ ngụ ẹpa ana hụrẹ Adiramitumi vẹ. Ẹpa ọnọọ vị ana aa nọ ụtọ oku ẹtẹ Esiya. Di i si hu aa na nị. Â nyị Animasedoniya ọnya aanị ana hụrẹ Ịtẹsaronika vẹ ẹnẹ ẹyịrịị zị. Ịrẹha anị ọ rị Arisitakọsị nị.

³ Eyinẹhẹ anị, ya na sị ngụ Ịsịdọnị. Ijuriyọsị, ộ ngụ ayị Ịpọọrụ, dị ọ sị oze yọ ka ò ne hee ọta anị, dị ẹ̀ zụ sị ịsa yọ nị.

⁴ Ị mẹ̀ sị hụụ ịzọọ, ahị aa tụ́ kú yi, dị ị sị ẹpa ayị zị oze Ịsayịpịrụsị éyi ọnị ọyịị̄ zịị hụrẹ nị.

⁵ Ẹ́pa ayị mẹ̀ sị para oku Isirisiya ọnịrị Ipamihwiriya hu, di i ve tù Imira ịnị ẹtẹ Irisiya nị.

⁶ Ọga isoja nịnị ẹchẹhị ọnọọ ô re ẹpa ọnya ịzọọ, ana hụrẹ Arekisandiriya aa nọ Itari; dị ọ kụ́ yị hi ọọ nị.

⁷ Yâ tangwa zị ụsẹ mẹ ẹkụhị ọrụrụ óze, dị ị vụrị va ngụ ọgụrị ẹkụra Ikinidu nị. Ahị ọyị kụkụ zẹẹ ka ya zị oze ọnọọ, dị ị va chí zị oze Ikirete, dị ị na para aha ọnya ụtọ oku hu ana aā hị́ Isarimone nị.

⁸ Dị ị vụrị-vụrị para ịzọọ hu, dị ị va ngụ aha ọnya ana aā hị́ “Aha ọyịza ẹnẹ ẹpaā jẹẹ” nị. Ịzọọ ộ gụrị ẹkụra Iraseya.

⁹ Ye reè du ụmẹ ha baaba; ịnị ụmẹ ọnọọ ọza ọ̀ọ sị ẹpa tụ́ ịnị oku, ộ nyị angwahi, agụvị ka ụmẹ ana Anisirẹrị nịnị sịị̄ ba awẹ, ọ sị para hu. Dị Ịpọọrụ kà ọ̀nọ̀

¹⁰ dị ọ ka, “Ẹwụ nịnị ẹyịnyara amị, mee re ka ụsẹ ayị hụrẹ ịzẹnị vaa nyị angwahi. Ẹnya ọrụrụ-ọrụrụ vee duu ha beri ẹpa. Ẹyịyara aza e zụ sú bẹẹ.”

¹¹ Ama ịrẹyị ọga ẹpa ọnịrị ọza ana nyị ẹpa ọ́ga isoja nịnị ọnọọ dọ wụ́ nị. Ọyị dọ ịrẹyị Ịpọọrụ wụ́.

¹² Ịzị ẹpa ọnọọ jẹẹ, oyi zoza yọ ịnị ụmẹ ọgụ, dị aza ọrụrụ-ọrụrụ ịnị ẹnị ene hi ịnị ẹpa ka àa na, ịsavọọ eni è zụ tù Iponiki, dị ẹpa ọ̀ yà ịzọọ ịnị ụmẹ ọgụ. Iponiki vị ịzị ẹpaā jẹẹ Íkirete. Ịzọọ vị ana và eyi ká eyi ụvẹtẹ ọ̀vàká eyi ọnị ọyịị̄ zịị ngụ ẹtẹ. Dị ọ rẹ và eyi ká eyẹba ọ̀vàká eyi ọnị ọyịị̄ zịị ngụ ẹtẹ nị eyi ẹbẹẹba.

Opomi ộ tụ́ kú wa

¹³ Ahị ẹnyị chee aanị ô nyima aa tụ́ hụrẹ eyi ụvẹtẹẹ vẹ. Dị aza ẹnẹẹ si oo ro ka ịrẹyị ẹnịnị ộ gẹẹ nị. Dị ẹ sị ẹpa tụ́ ini òkū, dị ẹ zị ụtọ oku ọgụrị Ikirete, dị ẹyaa na nị.

¹⁴ Oò yi ve kù, di opomi ọbanyị ọnya aa tụ́ kú wa nị. Aā hị́ opomi ọnọọ “Ahị eyi akaha ẹbẹẹba ịzị ọyịị̄ zịị vẹ”. Oō hi avaba ẹpa ọnị o re ịrẹsụ enyi

¹⁵ Ịjị ahị ọnọọ aa tụ́ kú ẹpa, yẹ yị kụkụ zụ vara ẹpa eyi kà ahị, dị ị kụkụ hụrẹẹ ụvọ ka ahị ọ̀ọ sị ọọ na nị.

¹⁶ Yê ne tù aha ọnya aanị ana yà ịnị akakana enyi; ẹtẹ ọnọọ ọyị zẹẹ ka ahị ọ̀ tụ́ kú yi baaba. Ẹtẹ ọnọọ aā hị́ Ikawuda nị. Dị ị vụrị-vụrị za ẹpa oweyi anaa sụ́ vaka ẹpa ọbanyị nị.

¹⁷ Dị ẹ sị ọọ ngụ ịnị ẹpa nị. Dị ẹ sị obo, dị ẹ sị ịsa sị ọọ zị oze iruvo anị, dị ẹ sụ́ ọọ nị. Angwa ee hí wa ka ẹnị ve ne gu chire eteesu ịzị enyi ọ̀ yị nyịnẹ. Agụvị avọọ dị ẹ sị ịsa tụ́ ini enyi ka ẹpa ọ̀ tangwaa na hẹẹ nị.

¹⁸ Ahị odivi ọnọọ aa yịị tụ́ kú yi, eyinẹhẹ anị dị ẹyaa kụ́ ẹnya ene hi ịnị ẹpaa vàa hi enyi nị.

¹⁹ Ịhyẹgwẹta ọnọọ, dị ẹyaa sị ụvọ ẹnịnịị kụ́ ẹnya ụkọrọ ẹpaa vàa hi enyi nị.

²⁰ Ộ mẹ ẹkụhị ọrụrụ-ọrụrụ, ye yi re ọyị, ye yi re re ụzọmị, dị ahị aa yịị tụ́ hu avọọ kẹnẹ nị. Di i kuku hụrẹ eyi ka yẹ yị zụ há nị.

²¹ Ô kù pooro, aza ẹnẹẹ ẹyị rị ịsa. Dị Ịpọọrụ kwẹẹtẹ vẹ ọvịdị ẹnịnị, dị ọ ka, “Ẹwụ nịnị ẹyịnyara amị, wàa yaanị wụ́ ịrẹyị amị nịnị, dị yẹ̀ yị yaanị hụrẹ Ikirete nị, ẹnya ayị ẹnẹnị ẹ yị yaanị mẹ ịhị.

²² Ama aarịhịnị ngwara eyi hi nịnị, ẹ yị nyị ọza ọnị ụhwẹ anị vee vú ịnị ẹngụ awụ nịnị. Ama ẹpa kẹnẹ o vee du nị.

²³ Anggẹẹrị Ohomorihi ana nyị mị, ọnị maa hẹkẹ, ộ jẹẹ pe mi ịrahụ”,

²⁴ dị ọ ka, “Ịpọọrụ, asị u hí angwa! Ẹ yị zụ nyị ka we yi tù ọvịdị ohinọyị Aniroomi. Ohomorihi vaa hụ agụvị awụụ dọ avaba aza ẹnẹ ẹwụrịị ngụ ẹpaa há.

²⁵ Agụvị avọọ, ngwara eyi hi nịnị, anda ayị, agụvị ka mâ dọ Ohomorihi wụ́ ka, ọ mẹ̀ kà a mị, avọọ ọ vaa vị nị.

²⁶ Ama ị va naa ngụ ịnị ẹtẹ ọnya, ene enyi kara.”

²⁷ Ịhị ẹ tụ́ ọọ ịrahụ ẹwụrẹna, ana ahị hụrẹ aa tụ́ kú yi zịịzị ini Oku Adiriya, ịnị agẹvịrahụ dị aza ana aa họ̀ ẹpa ka ẹyịyara yaa gụrị ẹtẹ nị.

²⁸ Ê ne obo ngụ enyi ka ẹnị ẹ̀ sị mọ ọ, ọ mẹmẹ nyịnẹ. Di e re ka ahụ ẹbẹẹva ọ vị nị. Dị ẹ rẹ kà nọ ọvịdị, dị ẹ rẹ mọ ọ nị. Dị ọ vị ahụ ohurẹẹwụ nị.

²⁹ Eyee hí angwa ka ẹpa ayị ve ne gu chire ịrẹta ini enyi, dị ẹ kụ́ ịsa ẹẹna ana vị enyusẹ anaa sịị̄ za ẹpaa jẹẹ nị. Dị ẹ kụ́ ọọ và hi ini enyi ị́rẹma ẹpa, dị ẹ jẹẹ dị ẹyaa mẹ̀ aduwa ka eyi ọ̀ nị nị.

³⁰ Aza ana aa họ̀ ẹpa ee sì ka eni è zwe hụụnị ẹpa, dị ẹ sị ẹpa oweyi ọnọọ, di e chí ọọ tụ́ ini enyi, dị ẹ mẹ apẹ ka vị ẹnị aa naa kụ́ enyusẹ ọsaa hi ọvịdị ẹpa ọbanyị nị.

³¹ Dị Ịpọọrụ kà a yị ọga isoja nịnị ọnọọ ọnịrị isoja nịnị anị dị ọ ka, “Aza ẹnẹẹ ẹ̀ yị yà ịnị ẹpa ọbanyị, wẹ yị zụ há nịnị.”

³² Dị isoja nịnị ẹnẹẹ yẹrẹ obo anaa sị sụ́ ẹpa ọnọọ vaka ọbanyị, dị ẹpa ọnọọ hụrẹ aa na nị.

³³ Éyi màa vaa nị, dị Ịpọọrụ dá ịpẹ yị wa ka ẹ̀ rị ịsa nị. Dị ọ ka, “Ajịnị ọ tụ́ ọọ ẹkụhị ẹwụrẹna ọnị ụ hụrẹ yaayịtẹ nịnị dị ẹ̀yị nyị ịsị ụ rị nịnị avọọ nị.

³⁴ Aarịhịnị, rị ịsa chee nịnị! Â nyị ka wa rị ịsa, dụ wa zụ há nịnị. Ẹyị awụ nịnị ikonya oyi vee vu tụ́ ịzẹnị.”

³⁵ Ịjị ọ maanị sị kà, dị Ịpọọrụ sị Ịbụrẹẹdị, dị ọ kụ́ Ohomorihi avọ tụ́ ọọ éyi avaba ẹnịnị, dị ọ dàa dị aa rị ọọ nị.

³⁶ Dị avaba ẹnịnị ngwara eyi hi, dị ẹnị rẹ rị ịsa nị.

³⁷ Avaba ayị ene hi ịnị ẹpa vị ịrẹka tụra ẹtarẹwụ ộ tụra ịhịnọnyị (276).

³⁸ Ịjị ẹ sị ịsa rị, dị ẹ kụ́ akụ ana vọ và hi enyi agụvị ẹpa ọ̀ hẹrẹ nị.

Ẹpa ẹnịnị ộ jaamụ

³⁹ Éyi mẹ̀ sị nị, ẹnịnị ẹyị yẹ ụtọ oku ẹnẹẹ yà. Ệ re aha ana nyị aarẹ, di e ro ka ịsavọọ ẹnị ẹ̀ sị ẹpa naa jẹẹ ịzọọ nị.

⁴⁰ Dị ẹ yẹrẹ obo ịsị a sịị̄ za ẹpaa jẹẹ tụ́ ini enyi nị. Dị ẹ rẹ ngwara obo anaa sị sụ́ ọchị anaa sịị̄ họ̀ ẹpa nị. Dị kụ̀rà ịta ẹpa ka ahị ọ̀ tụ́ ọọ ụvọọ tụ́ ọvịdị na ngụ ụtọ oku nị.

⁴¹ Ama dị ẹpa ne gu chire eteesu ini enyi, dị ọvịdị anị ngụ ẹtẹ, dị ọ̀yị kụkụ zụ zị ụsẹ nị. Dị ịrẹma ẹpa ọnọọ sị ụkata-ụkata chaka và ha nị.

⁴² Dị isoja nịnị ẹnẹẹ ka ẹnị aa wụ̀ avaba anịnẹngwa ẹnẹẹ, agụvị asị a nyị ana họ̀ enyi na jịnẹ nị.

⁴³ Ama ọga isoja nịnị ọnọọ oyi sì ka à wụ Ịpọọrụ, dị ọ ka asị ẹ vavọọ mẹ nị. Dị ọ ka aza ana àa zụ họ̀ enyi, è vịdị ji ngụ enyi, dị ẹ̀ na ngụ ini eteesu nị.

⁴⁴ Dị aza ana ọnọọ nị. Aanị avaba ẹnịnị mẹmẹ há, dị ẹ na ngụ ini eteesu nị.