Odeyi 23 - IWE ỌNỊNỊ

¹ Dị Ịpọọrụ và eyi ká anikootu, dị ọ ka, “Ẹwụ nịnị anda ayị, mâ yẹ ka ẹ yị nyị ịsị mị mẹ anaa vọrọ ka ọ̀ jị ịvị yị ayị amị ọ́vịdị Ohomorihi pooro ve tù ajịnị.”

² Di ohirẹsụ ọbanyị irehi Ohomorihi ana aā hị́ Ananịya kà a yị aza ana jẹẹ gụrị Ịpọọrụ ka ẹ̀ nya a ịsa ini irenu nị.

³ Dị Ịpọọrụ ka, “Ohomorihi ọ vaa nya wụ ịsa nị, ẹwụ onogevegeve ọnọnị. Wa va yaayịtẹ ka wa mẹ̀ ọkarẹyị mị anka ọda, dị ụ vaa jịnẹ ọda ọnọọ kà a yị aza ka ẹ̀ nya mị ịsa.”

⁴ Dị aza ana jẹẹ gụrị Ịpọọrụ ka, “Ohirẹsụ ọbanyị irehi Ohomorihi oni Ohomorihi nyị, ụ waa kụ̀ ụhụ nịị?”

⁵ Dị Ịpọọrụ ka, “Ẹwụ nịnị ẹyịnyara amị, mẹyị yẹ ka ohirẹsụ ọbanyị irehi Ohomorihii yọ nị. Iwe Ohomorihi ộ kà a ka: Asị ụ kà ịrẹyị odivi hi ọdọvịdị anda awụ nịnị.”

⁶ Ịjị Ịpọọrụ re ka ẹnyị ini anikootu ẹnẹẹ vị Anisadusi, dị ẹnyị rẹ vị Anihwarisi nịnị, di o nowu ini ikootu, dị ọ ka, “Ẹwụ nịnị ẹyịnyara amị, Anihwarisi mị vị nị. Ada amị rẹ vị Anihwarisi. Mâ tụra eyi ka oku nịnị vaa haa hụụnị isu. Agụvị avọọ a za mị vẹ ịzẹnị aanị nị.”

⁷ Ịjị ọọ maanị sị kà kẹnẹ, dị Anihwarisi nịnị ọnịrị Anisadusi nịnị sị eyi và ká ẹngụ nị. Dị aza nịnị sị gà hi ẹẹva nị.

⁸ Anisadusi nịnị ẹnị ka oku ẹyị vaa haa hụụnị isu. Ẹ ka ẹ yị nyị anggẹẹrị nịnị, ẹ rẹ ka oku ẹyị vaa haa hụụnị isu. Ẹ ka ẹ yị nyị anggẹẹrị nịnị, ẹ rẹ ka ẹ yị nyị ịsa ọnị ọza ọ̀ yị zụ sị eyi re. Ama Anihwarisi nịnị, ẹnị ệ dọ ka â nyị avaba ẹsẹnị.

⁹ Dị aza ee nowuu hu avọọ nị. Dị ọzwọzọda nịnị ini ogu Anihwarisi kwẹẹtẹ, dị ẹ ka, “Ẹ yị nyị ịsa odivi oni i re ka ọnọrụ ọnọnị ộ mẹ̀. Ọ nyẹngụ hụ ọọ ahịka ụhwẹ ẹnyị, àa vị anggẹẹrị ọ kà ịrẹyịị yọ nị.”

¹⁰ Ịjị ahankata ọnọnị ta ngụra, dị ọga ọbanyị isoja nịnị ọnọọ kuku ee hí angwa ka asị aza gà Ịpọọrụ hi nị. Dị ọ ka isoja nịnị anị è chí nọ ịda aza ẹnẹẹ, dị ẹ̀ na sị ụkata sị Ịpọọrụ hụụ ịzọọ, dị ẹ̀ sị ọọ na tụ́ ini eehi isoja nịnị.

¹¹ Ịrahụ ịhị ọnọọ, dị Ananyị yị va jẹẹ pe Ịpọọrụ, dị ọ ka, “Ngwara eyi hi! Ụ mẹ̀ kà ịrẹyị amị Íjerusarẹmị aanị, â nyị ka wa rẹ dọ ivenu amị Íroomi.”

 gẹ eyi ka à wụ Ịpọọrụ

¹² Ẹnẹnẹ eyinẹhẹ anị, Aniju ẹnyị ê gẹ eyi, di e hị́ eku ka ẹnị ẹyị vaa rị, eni eyi re vee hú, àyị vị ẹnị wụ Ịpọọrụ.

¹³ Ẹnị ana vavọọ gẹ eyi ée huna ẹbẹẹva.

¹⁴ Dị ẹ vẹ ịda ohirẹsụ ẹbanyị irehi Ohomorihi ọnịrị azọkụ nịnị, dị ẹ ka, “Ya sị eku ọbanyị hị́ ka àyị vị ị wụ Ịpọọrụ, yẹ yị vaa rị ịsa.

¹⁵ Agụvị avọọ ẹwụ nịnị beri anikootu ọ̀ tụ́ hi ọga ọbanyị ọnọọ ka ọ̀ sị Ịpọọrụ va wụ nịnị, dị ọ̀ sị mẹẹ ka u wee sì ka we sì iruvo ịrẹyị anị ẹtẹẹtẹrẹ nịnị nị. Ẹ yị vee tenyi ẹngụ, di ye re ka yaa wụ ọọ, di ò ve tù ịzẹnị.”

¹⁶ Ẹ mẹ̀ maanị aa gẹ eyi ka ẹnị aa naa tẹ ózee zí Ịpọọrụ, ozi onyeyiza Ịpọọrụ ọnị ọ sị wụ́. Di o ne tù Ịpọọrụ ini eehi isoja nịnị, dị ọ kà a yọ nị.

¹⁷ Dị Ịpọọrụ hị́ ọnya ịnị ọga isoja nịnị ẹchẹhị ana yà ịzọọ, dị ọ ka, “Sị ozi ọnọrụ ọnọnị ne tù ọga awụ nịnị ka â nyị ịsị ee sì ka ọnị ọ̀ kà zụ̀ ọọ!”

¹⁸ Dị ọga ọnọọ sị ozi ọnọọ ne tù ọga ọbanyị ẹnịnị nị. Dị ọ ka, “Ịpọọrụ anaa za tụ́ ịnị ẹngwa ọ hị́ mị, dị ọ dá ịpẹ mị ka ma sị ozi ọnọnị ve tù wu nị. Ọ kà â nyị ịsị ee sì ka ọnị ọ̀ kà zụ̀ wụ.”

¹⁹ Dị ọga ọbanyị ọnọọ sị ụvọ gẹ ozi ọnọọ nọ oboka, dị ọ họ̀ ọ ka, “Su wee sì ka wa kà zụ̀ mị?”

²⁰ Di ozi ọnọọ ka, “Aniju nịnị ẹ sị eyi gẹ ka ẹnị ẹ̀ va kà a wụ ka wa sị Ịpọọrụ vẹ ini ikootu ụhwọọ, dị ọ̀ sị mẹẹ ka vi eyee vee sì iruvo ịrẹyị anị ẹtẹẹtẹrẹ nị.

²¹ Ẹ̀ẹ vẹ, asị ụ zẹẹ wa, agụvị ka aza ẹnyị, ê huna ẹbẹẹva, ẹ vaa tẹ ózee zí Ịpọọrụ. Ẹ sị eku hị́ ka ẹnị ẹyị vaa rị, eni eyi re vee hú, àyị vị ẹnị wụ Ịpọọrụ. Ẹ sị ẹngụ tenyi booro aanị, vi e kuku ee zí ịsụ wàa vaa kà nị.”

²² Dị ọga ọbanyị ọnọọ ka ozi ọnọọ ọ̀ọ na, ama di o hú ọọ ụvọ ka asị ọ kà a yị ọzọnyị-ọzọnyị ka ọ va kà ịrẹyị zụ̀ ọnị.

 sị Ịpọọrụ nọ ịda ịgọvọnọ

²³ Ọga ọbanyị ọnọọ ộ hị́ ọga isoja nịnị ẹchẹhị anị ẹẹva, dị ọ kà a yị wa ka, “Nyị isoja nịnị ịrẹka dị ẹ̀ nọ Isesariya! Kụ́ onumaata ẹtarẹwụ beri ọnọha ịrẹka saasa wa, dụ wa kwẹẹtẹ nịnị ịnị ụmẹ agogo ịhịịna ịrahụ!

²⁴ Kụ́ umaata yị Ịpọọrụ dị ọ̀ tụraa, asị ụ zẹẹ ka à nyị ịsị ẹ kanyị ọọ nịnị, dụ wa sị ọọ na yị Ịhwẹrịsị ịgọvọnọ!”

²⁵ Dị ọ maanị chẹrẹ iwe ka:

²⁶ “Ẹma vị Ikirawudiyọsị Irisiya nị. Maa chẹrẹ iwe ọnọnịị tụ́ hi ẹwụ Ịhwẹrịsị ana vị ịgọvọnọ. Taarụ! Wáá dahi?

²⁷ Aniju nịnị ệ za ọnọrụ ọnọnị, di eyee sì ka ẹnị ẹ̀ wụ ọọ nị. Mâ wụ́ ka Aniroomi ọ vị nị, dị ẹmịrị isoja nịnị amị va zị nọ ịzọọ, dị ị na dọ ọ hụrẹ wa ụvọ nị.

²⁸ Mâ sị ọọ nọ ini ikootu ẹnịnị, agụvị ma zụ yẹ ịsị ẹ vẹ dị ẹ zaa.

²⁹ Me ve re ka ọyị mẹ ịrẹyị anaa vọrọ ka à sị wụ ọọ, à vị ka dị à zaa tụ́ ịnị ẹngwa. Mê re ka ịrẹyị ọda ẹnịnị ẹ́ yaa kụ́ ẹnẹẹ sị zaa nị.

³⁰ Ma rẹ va wụ́ ka Aniju ẹnyị aa gẹ eyi anị, dị mị ka ma wụsẹ sị ọọ va wụ nị. Mâ kà a yị aza ana zaa, ka ẹ̀ vaa kà a ọ́vịdị awụ ịrẹyị ẹnẹẹ sị zaa.”

³¹ Anka a mẹ̀ kà a yị isoja nịnị ẹnẹẹ, dị ẹ sị Ịpọọrụ ịrahụ-ịrahụ ne tù Antipatirisi nị.

³² Eyinẹhẹ anị, dị ẹ ka onumaata nịnị ẹ̀ saasa Ịpọọrụ na, dị ẹnị varẹma nọ ini eehi ẹnịnị nị.

³³ E mè tù Isesariya, dị ẹ sị iwe ọnọọ yị ịgọvọnọ ọnọọ, dị ẹ rẹ sị Ịpọọrụ chiree ụvọ nị.

³⁴ Ịjị ịgọvọnọ ọnọọ sị iwe kà, dị ọ họ̀ Ịpọọrụ ka ịzị ọ hụrẹ vẹ nị. Ọ mẹ̀ sị ọọ kà a yọ ka Isirisiya ọ́nị hụrẹ vẹ nị,

³⁵ dị ọ ka, “Mị vaa wụ́ ịrẹyị awụ, ịjị aza ana za wụ ẹnị ẹ̀ẹ rẹ vẹ.” Dị ọ mẹ ọda ka à sị eyi pe Ịpọọrụ tụ́ ịda Ịhẹrọdị ohinọyị nị.