Biblia Todo Logo
Bìoball air-loidhne

- Sanasan -

Odeyi 21 - IWE ỌNỊNỊ


Ịpọọrụ ộ varẹma nọ Ijerusarẹmị

1 Ịjị ị sị hụụ ịda ẹnịnị, dị ị ngụ ẹpa, dị ị và tụra oze taara va ngụ Ikosi nị. Eyinẹhẹ anị, dị ị na ngụ Irodesi nị, dị ị hụụ ịzọọ na ngụ Ipatara nị.

2 I mè tù ịzọọ, yê re ẹpa ana aa nọ Ihwonesiya, dị ị ngụ ọọ, dị yaa na nị.

3 Yê tù ịzị yee re Ịsayịpịrụsị, dị ị hụrẹẹ ụvọ tụ́ eyi ụvọha, dị yaa nọ Isiriya nị. Dị ị na jẹẹ Ịtaya nị, agụvị ka ẹpa aa jị ẹnya ịzọọ.

4 Yê re ezirẹma ẹnyị ịzọọ, dị ị yà ịzọọ pe wa mẹ ẹkụhị ịhịmba nị. Ụhwẹ Ọnịnị ộ mẹ̀ ka ẹ̀ kà a yị Ịpọọrụ ka asị ọ nọ Ijerusarẹmị.

5 Ịjị ẹkụhị ọnị yaa mẹ ịzọọ sị gụ, dị ị hụụ ịzọọ, dị ị sị oze ayị nị. Dị avaba ẹnịnị, ose beri ezi sị yị va tụ́ huuu va para ẹkụra hu nị. Dị avaba ayị ku ẹtẹ ụtọ oku, dị ị mẹ̀ aduwa nị.

6 Ịjị ị sị ẹngụ kụ́ nyaatụ, dị ẹyị ngụ ẹpa, dị ẹnị varẹma aa nọ eehi nị.

7 Ị mẹ̀ sị ụsẹ hụrẹ Ịtaya, dị ị nọ ngụ Ipitoremasi nị. Dị ị na kụ́ ọdọwụ ene hi ịzọọ, dị ị yà ịzọọ mẹ ẹkụhị ọnya nị.

8 Eyinẹhẹ anị, dị ị hụụ ịzọọ, dị ị na Isesariya nị. Dị ị nọ ini eehi Ihwiripi ana vị okenubọyịza ana vị ọnya ịnị ọnọgụvọ ịhịmba ẹnẹẹ, dị yà ịzọọ nị.

9 Ihwiripi ộ ma ezi anẹẹ ẹẹna ẹnẹ ẹ̀ yị yẹ ọnọrụ, ana vị ọnịsẹ.

10 Yâ yà ịzọọ mẹ ẹkụhị chee, dị ọnịsẹ ọnya ana aā hị́ Agabọsị hụrẹ Ijudiya chí vẹ nị.

11 O mè ve tù yi, dị ọ sị ịbanụ Ịpọọrụ, dị ọ sị sụ́ ahụ anị ọnịrị ụvọ anị nị. Dị ọ ka, “Ụhwẹ Ọnịnị ka aanị Ániju nịnị ene hi Ijerusarẹmị mẹ̀ vaa sụ́ ọza ana nyị ịbanụ ọnọnị nị, dị a sị ọọ chire Anigiriki nịnị ụvọ.”

12 Ị mẹ̀ maanị wụ́, dị ẹyịrị anịzọọ aa dá ịpẹẹ yị Ịpọọrụ ka asị ọ hịrẹ nọ Ijerusarẹmị nị.

13 Dị Ịpọọrụ ka, “Sụ waa mẹ nịnị aanị, dị waa jị òrèrè nịnị? U wee sì ka we du mi ayị nịnị nịị? Mê tenyi ẹngụ ka à wụ̀ mị Íjerusarẹmị agụvị ịrẹha Ijeesu Ananyị yị, ayị vị ka à sụ́ mi orupa kẹnẹ.”

14 Yâ kà pooro, yẹ yị zụ vara a ayị, dị ị và hụụnị anị nị. Dị ị ka Ohomorihi ọ̀ mẹ ịsị òo sì nị.

15 Yâ yà ịzọọ chee, dị ị kụ́ ẹnya ayị, dị yaa hịrẹẹ nọ Ijerusarẹmị nị.

16 Â nyị ezirẹma ẹnyị ana hụrẹ Isesariya vẹ, dị ẹnị anị nị. Ọza ọnọọ ọ rị Iminasoni nị. Ịsayịpịrụsị ọ hụrẹ vẹ nị. O si kù ọnọọ hụrẹ sị ayị tụra Ijeesu.


Ịpọọrụ o ne hee Ijemiisi

17 Ị mẹ̀ va sị ngụ Ijerusarẹmị, ọdọwụ ene hi ịzọọ ê sì yi ọzọga ẹtẹẹtẹrẹ.

18 Eyinẹhẹ anị, dị ẹyịrị Ịpọọrụ zị ne hee Ijemiisi nị. Avaba azọkụ ịragụ Ohomorihi hi ịzọọ.

19 Dị Ịpọọrụ kụ́ wa, dị ọ kà enube yị wa ahụ-ahụ ịsị Ohomorihi zị oze ịnị ụvọ anị mẹ ịnị akakana Anigiriki nịnị nị.

20 Ẹ mẹ̀ wụ́ ọọ, dị ẹyaa sị ụgaa yị Ohomorihi nị. Dị ẹ kà a yị Ịpọọrụ ka, “Ẹnẹbẹnị ayị, wê re, ọ mẹ̀ yà avọọ. Aniju ọrụrụ-ọrụrụ ẹ sị dọ wụ́. Ẹnịnị vị ana nyayịnẹ sị ụvọ za ọda Imosiisi ẹtẹẹtẹrẹ.

21 A sị ọọ kà yị wa ka ụ waa sịị zụ̀ avaba Aniju ene hi ẹhẹ ka ẹ̀ và hụụnị ọda oni Imosiisi mẹ nị. A ka ẹwụ ka asị ẹ rẹ jị ozi ẹnịnị ụvẹvẹnẹ, dị ẹ̀ rẹ và hụụnị avaba ịsa ohiku Aniju nịnị.

22 Sị a vọrọ ka ya mẹ aanị? Agụvị ka ayị zụ nyị ka ẹnịnị ẹyị sị wụ́ ka wâ vẹ.

23 Ịsị yàa kà a wụ, ụ mẹẹ. Â nyị aza ẹnị ẹẹnị ịzẹnị ana zẹẹ ịzẹzẹ.

24 Kụ́ wa, dị ẹwụrị wa ọ̀ na vara ẹngụ awụ nịnị ọnịnị! Sí ụta yị wa, dị ẹ̀ zụ kụ́ ịrẹsụ ẹnịnị! Wàa maanị mẹ, avaba aza vaa yẹ ka ịrẹyị awụ anaa kà yị ẹnị vị ireche. E vee ree ka ẹwụ ụvọta vị ana rẹ sị ụvọ za ọda Imosiisi.

25 Ama àa vị ọdọwụ ẹnẹ ẹ̀ yị vị Aniju yọ, ya raà chẹrẹ iwe hi wa. Yâ kà a yị wa ka asị ẹ rị ịsa ana àa sị mẹ̀ ịsọvọ hi ori. Ị ka asị ẹ rị anya ọnịrị uye enee sima ọrọkọ wụ: dị asị ẹ rẹ sẹ̀ ịrẹka.”

26 Dị Ịpọọrụ sị aza ẹnẹẹ, eyinẹhẹ anị dị ọnịrị wa vara ẹngụ ẹnịnị ọnịnị nị. Dị ẹ nọ ini irehi Ohomorihi nị, agụvị aza ẹ̀ yẹ ka ịhị ẹnị vaa vara ẹngụ ẹnịnị ọnịnịị ta. Ịhị ẹkụhị ọ̀ọ sị gụ, dị a mẹ̀ ịsọvọ yị ọzịnya-ọzịnya ẹnịnị.


 za Ịpọọrụ ini irehi Ohomorihi

27 Ịjị ẹkụhị ịhịmba ọnọọ aa vaa gụ, Aniju ẹnyị ana hụrẹ ẹtẹ Esiya vẹ, ê re Ịpọọrụ ini irehi Ohomorihi. Dị ẹ wụsẹ tụ́ ọkọnị aza ịrẹyị, dị ẹ za Ịpọọrụ nị.

28 Di e nowu ka, “Ẹwụ nịnị Anisirẹrị, gụ yị ụvọ! Ọnọrụ ana aa ngụ ọọ zị yị, dị aa kà ịrẹyị odivi Anisirẹrị ọnịrị ọda Imosiisi beri irehi ọnịnị ọnọnịị yị avaba aza nị. Wee re, ọ mẹ̀ hyakụ kụ́ Anigiriki vẹ ịzẹnị ka è ve du irehi Ohomorihi ẹngụ!”

29 Ẹ́ vavọọ kà, agụvị ka ê vịdị re Ịpọọrụ ọnịrị Itirohwimọsị ana vị Anẹhwẹsọsị ịnị ẹkụra, dị ẹ sị ọọ hị́ ka vị Ịpọọrụ sị ọọ vẹ ini irehi Ohomorihi nị.

30 Avaba ẹkụra ọnọọ ọ sị vazi, dị avaba aza ee zwee va gụ nị. Dị ẹ za Ịpọọrụ, di e turaa jịnẹ hụụnị irehi Ohomorihi, dị ẹ wụsẹ gu oze irehi Ohomorihi nị.

31 Aza ẹnẹẹ ee sì ka ẹnị ẹ̀ wụ Ịpọọrụ. Dị a wụsẹ tụ́ ne tù ọga ọbanyị isoja nịnị ka ịrẹkụ ọ sị chị tụ́ Ijerusarẹmị nị.

32 Dị ọ wụsẹ nyị ọga isoja nịnị ẹchẹhị nịnị beri isoja nịnị ka è ne tù wa nị. Aza ẹnẹẹ mè yi re ọga ọbanyị ọnọọ beri isoja nịnị ẹnẹẹ kẹnẹ, di e kwooze yị Ịpọọrụ, dị è yi kuku tụ́ ọọ nị.

33 Dị ọga ọbanyị ọnọọ wụsẹ na za Ịpọọrụ, dị ọ ka à sị ẹba ẹẹva sụ́ ọọ nị Di o ve họ̀ use ka, “Ẹnẹ ọza ọnọnị vị? Sị ọ mẹ?”

34 Aza ẹnyị ịnị ọkọnị aza ẹnẹẹ ee nowu ịrẹyị ẹnyị, ọsa eni ree nowu ọsa. Ẹtẹ ọ sị vazi, ọga ọbanyị ọnọọ oyi re oze wụ́ ịsị ẹ mẹ ẹtẹẹtẹrẹ. Dị ọ ka isoja nịnị anị ẹ̀ sị Ịpọọrụ na tụ́ ini eehi isoja nịnị nị.

35 Ệ sị ọọ ne tù ẹbanoze, dị isoja nịnị ẹnẹẹ kuku chema Ịpọọrụ nị, agụvị ka aza ẹnẹẹ aa jị ayị baaba.

36 Avaba ẹnịnị vị ene zwee dụ Ịpọọrụ, di eyee nowu ka, “È tụ́ ọọ, à wụ ọọ!”


Ịpọọrụ ộ kụ́ irenu anị

37 A màa vaa sị Ịpọọrụ naa ngụ ini eehi isoja nịnị ẹnẹẹ, dị ọ kà a yị ọga ọbanyị ọnọọ ka, “Méé re oze pe wu kà ịrẹyị?” Dị ọga ọbanyị ọnọọ ka, “Wa zụ kà Igirikii?

38 Ọnọọ vị ka ayị vị ẹwa vị Anijipiti ọnọọ ana kụ́ ẹvazi ngụ ịnị ẹkụra ịnị ụmẹ ọnya? Ọnọrụ ọnọọ ộ kụ́ ọwọza ẹnị akawụ-akawụ oze ẹẹva (4,000), dị ẹ na ngụ ịnị ụnọmị nị.”

39 Dị Ịpọọrụ ka, “Aniju mị vị nị. Ẹkụra Ịtasọsị ịnị ẹtẹ Isirisiya a yà ma mị nị. Mẹ yị vị anẹkụra ịyẹyẹ. Aarịhịnị, jẹẹ ma kà ịrẹyị yị aza ẹnẹnị.”

40 Dị ọga ọbanyị ọnọọ ka ooho nị. Dị Ịpọọrụ jẹẹ ẹbanoze, di o mi aza ẹnẹẹ ụvọ nị. E mè si kú irenu, dị Ịpọọrụ aa sị ẹkụra Ihiburuu kà ịrẹyịị yị wa nị. Dị ọ ka:

Ebira First Bible © Bible Society of Nigeria, 2014.

Bible Society of Nigeria
Lean sinn:



Sanasan