Odeyi 19 - IWE ỌNỊNỊ

Ịpọọrụ ộ nọ Ẹhwẹsọsị

¹ Aporo ọnị mẹ̀ yà Ịkọrịntị, dị Ịpọọrụ zị oze ịnị akakana ẹkụra ọnọọ, dị ọ na ngụ Ẹhwẹsọsị nị. Di o ne tù ezirẹma ẹnyị ịzọọ nị.

² Dị ọ họ̀ wa ka, “Wáá sị Ụhwẹ Ọnịnị dọ, ụ mẹ̀ dọ wụ́ nịnị?” Di e tụ́ ohi, dị ẹ ka, “Yẹẹ̀ yị hyakụ wụ́ ka â nyị Ụhwẹ Ọnịnị.”

³ Dị Ịpọọrụ va họ̀ wa ka, “Ye re ẹngụ ọyịhwenyi ana a va mẹ yị wụ nịnị?” Dị ẹ ka, “Ọyịhwọzenyi ọnị Ịjọọnụ mẹ yọ nị.”

⁴ Dị Ịpọọrụ ka, “Ịjọọnụ vị ana aa mẹ̀ ọyịhwọzenyi yị aza ene èe ro ịnẹ varẹma hụụnị ịvị ẹnịnị. Dị aa kà a yị Anisirẹrị ka ẹ̀ dọ ọza ana aa vẹ ịrẹma anị wụ́. Ọza ọnọọ ọ vị Ijeesu Ikirisiti nị.”

⁵ Ẹ mẹ̀ maanị wụ́, dị a mẹ̀ ọyịhwọzenyi yị wa ịnị ịrẹha Ijeesu nị.

⁶ Dị Ịpọọrụ sị ụvọ tụra wa, dị Ụhwẹ Ọnịnị dọ avaba ayị ẹnịnị, dị ẹyaa sị ẹkụra ọsaa kà ịrẹyị, dị ẹyaa kà ịsẹ nị.

⁷ Anọrụ ẹnịnị vị ẹhụụ ẹwụrẹva avọọ.

⁸ Ịpọọrụ ộ yà ịzọọ, ộ nọ ini irehi Ohomorihi Aniju nịnị mẹ ụhwẹ ẹẹta, dị aa sị ọtụtụrụma kà ịrẹyị, di ee sì ka ọnị ọ̀ mẹ wa ka ẹ̀ dọ ịrẹyị ịjọva Ohomorihi nị.

⁹ Aza ẹnyị ịnị aza ẹnẹẹ vị anayọkatẹngụ ọnịrị anakamawụ. Dị ẹyaa kà ịrẹyị odivii hi oze Ohomorihi ini eyi anịragụ nị. Agụvị avọọ, dị Ịpọọrụ hụụ ịzọọ yị wa, dị ọ rẹ kụ́ ezirẹma ene ịhị ịzọọ nị. Dị ọ kụkụ aa nọ ini isukuuru Ịtayịranọsị eyinị-eyinị, di ee pe azaa kà ịrẹyị ịzọọ nị.

¹⁰ Ịpọọrụ ộ vavọọ mẹ̀ ẹ mẹ ịrayị ẹẹva. Dị avaba aza ana ra ịnị ẹtẹ Esiya, Aniju ọnịrị Anigiriki, wụ́ ịrẹyị Ananyị yị nị.

Ezi Isikeva nịnị

¹¹ Ohomorihi ộ zị oze ịnị ụvọ Ịpọọrụ mẹ̀ ụkọrọ ohyozirenu irenyi-irenyi ọnị ọza oò yi re da.

¹² Ankasihu ọnịrị ịta ọnị Ịpọọrụ sị za vị ana aza hyakụ aa kụ́ụ nọ ịdị ọnịkụ nịnị; dị ụkụ ẹnịnị ta, dị ụhwẹ echu ene hi ẹngụ ẹnịnị zwe jịnẹ.

¹³ Â nyị Aniju ẹnyị anaā ngwọọ zị, dị ẹnị rẹẹ̄ dụ ụhwẹ echuu jịnẹ hụụnị ẹngụ aza nị. Ẹnị ree sì ka ẹnị ẹ̀ hị́ ịrẹha Ijeesu tụra aza ana nyị ụhwẹ echu. Dị ẹ ka, “Ịnị ịrẹha Ijeesu ọnị Ịpọọrụ aa kà ịrẹyị anị, yáa mẹ ọdaa wụ nịnị!”

¹⁴ Â nyị ohirẹsụ ọbanyị irehi Ohomorihi ọnya aanị. Aniju ọ vị nị, aā hị́ ọọ Isikeva. Ezi anị ịhịmba ẹ maanị aa mẹ nị.

¹⁵ Ama dị ụhwẹ echu ọnọọ kà a yị wa ka, “Mâ yẹ Ijeesu, ma rẹ yẹ Ịpọọrụ, ama ẹwụ nịnị, ẹnị ụ vị nịnị?”

¹⁶ Dị ọnọrụ ana nyị ụhwẹ echu ọnọọ kú chire wa, di o ne kú wa, dị ọ sị wa huna nị. Avaba ẹnịnị ê zwe hụụnị eehi ọnọọ va jịnẹ ịnị ahwaahụ, dị ẹ rẹ tụ̀ ụnava bẹẹ nị.

¹⁷ Avaba Aniju ọnịrị Anigiriki ana ra hi Ẹhwẹsọsị, ệ wụ́ ịrẹyị ọnọọ, dị angwa kuku ee hí wa ẹtẹẹtẹrẹ nị. Dị a sị ụbanyị yị ịrẹha Ijeesu Ananyị yị hu avọọ nị.

¹⁸ Aza ọrụrụ-ọrụrụ ana sị dọ wụ́, ệ vẹ, dị ẹ va dọ irenu, dị ẹyaa sịị zụ̀ ịsa ẹnẹ ẹ vịdị mẹ nị.

¹⁹ Ọrụrụ-ọrụrụ ẹnịnị ana vịdị aa mẹ ẹbẹ, ệ kụ́ iwe ẹnịnị hi ẹhẹ, dị ẹ rị ọọ ịra éyi avaba aza nị. A mè ro ẹkẹhị iwe ẹnẹẹ, avaba anị vị achuchu akavarẹchẹhị.

²⁰ Avọọ ị́rẹyị Ohomorihi màa yaraa hu avọọ, dị aa nyị ụkata nị.

Ẹvazi ana ngụ Ẹhwẹsọsị

²¹ Ịrẹma ịsa ẹnẹnị, dị Ịpọọrụ ro o tụ́ ịnị ayị anị ka, ọnị ọ̀ọ raà zị oze Imasedoniya ọnịrị Akaya na para hu, ọnị raa nọ Ijerusarẹmị nị. Dị ọ ka, “Màa raà nọ ịzọọ, â nyị ka ma rẹ nọ Iroomi bẹẹ.”

²² Dị ọ tụ́ Itimoti ọnịrị Ẹrasịtụsị, aza ẹnị ẹẹva ịnị aza ene ee pee mẹ̀ ụkọrọ, nọ Imasedoniya nị. Dị ọnị yị yà ẹtẹ Esiya kù chee nị.

²³ Ịnị ụmẹ ọnọnị, ẹkụra Ẹhwẹsọsị ọ sị vazi agụvị oze Ikirisiti.

²⁴ Â nyị ọza ịnya aanị anaā mẹ̀ ụhị. Ịrẹha anị ọ rị Idemetiriyọsị nị. Ọọ̄ sị enyusẹ mẹ irehi ori ọnẹẹ ẹnẹ ẹẹ̄ hị́ Atemiisi ana aza ẹnyịị hị́ Idiyana. Ụkọrọ ọnọọ ộ nyị ọgụ yị anụkọrọ ẹnẹẹ ẹtẹẹtẹrẹ.

²⁵ Dị ọ hị́ avaba aza ọnị ọnịrịị̄ mẹ̀ ụkọrọ ọnọọ gụ, dị ọ ka, “Ẹwụ nịnị ẹyịnyara amị, wâ yẹ nịnị ka ụkọrọ ọnọnị ọ sị yị da hí nị.

²⁶ Wê ree nịnị, dị ụ rẹ wụ́ ọọ nịnị bẹẹ nị ka Ịpọọrụ ọnọnị ọ sị aza ọrụrụ-ọrụrụ vara ayị, ayị vị ini Ẹhwẹsọsị kẹnẹ, ama avaba ẹtẹ Esiya. Ọ kà ịsị aza sị ụvọ mẹ, ayị vị Ohomorihi ẹ vị.

²⁷ Agụvị avọọ, ụkọrọ ayị ọnọnị ọ zụ rị ịrẹha odivi. À hyakụ va hụụnị ọnọọ, irehi ori ọnẹẹ ọbanyị Idiyana ayị ọnọnị vị ana kụkụ vaa vị ịrẹyị kẹnẹ-kẹnẹ. Dị a kụkụ aa sị eyii wụ ori ayị ịnyẹmba ana vịdị nyị ụbanyị, dị avaba Anesiya ọnịrị anẹhẹ aa hẹkẹ ẹ.”

²⁸ Ịjị ẹ maanị wụ́, dị ayị ẹnịnị aa dà ọva nị, di e nowu zẹtẹ, dị ẹ ka, “Ẹwụ Idiyana Anẹhwẹsọsị waa nyị ụbanyị!”

²⁹ Avaba ẹkụra ọnọọ ọ sị vazi. Dị aza ẹnẹẹ za Ịgayọsị ọnịrị Arisitakọsị, Animasedoniya ana aa dụ Ịpọọrụụ zị, di e tura wa di e dudu aa nọ ini orere ịzị a yàā mẹ aahẹ nị.

³⁰ Ịpọọrụ ọnị ụvọta ô sì ka ọnị ọ̀ ngụ eehi ọnọọ ne tù aza ẹnẹẹ, ama ezirẹma ene hi ịzọọ ẹyị zẹẹ.

³¹ Dị aza ẹnyị ana vị ọnọba tụ́ Esiya ana vị ọta Ịpọọrụ tụ́ hi ọọ ka asị ọ nọ ini orere ọnọọ nị.

³² Ịjọnọọ, avaba aza ẹ kụ́ vazi. Aza ẹnyị ee nowu ịrẹyị ẹnyị, ọsa eni ree nowu ọsa. Ọrụrụ-ọrụrụ aza ẹnyị ẹyị hyakụ yẹ ịsị ẹ vẹ dị ẹnị vavọọ kụ́ gụ.

³³ Aniju nịnị ệ sị Arẹkịsanda hụụnị akakana aza ka ọ̀ nọ ọvịdị, dị aza kụkụ tụ́ ọọ ụvọ tụ́ ọvịdị nị. Arẹkịsanda ô mi aza ẹnẹẹ ụvọ ka ọnị ọ̀ nyẹngụ kà ịrẹyị yị aza ẹnẹẹ.

³⁴ Ama aza ẹnẹẹ mè re ka Aniju ọ vị nị, dị ẹ kụkụ sị irenu tọ̀ ọnya ee nowu ka, “Idiyana Anẹhwẹsọsị wa nyị ụbanyị!” Ệ maanị nowu mẹ agogo ẹẹva.

³⁵ Ịjị ọga ọchẹrịsa ịnị ẹkụra ọnọọ vụrị raà mẹ ka aza ẹnẹẹ è kú irenu, dị ọ ka, “Ẹwụ nịnị Anẹhwẹsọsị avaba ọza ộ yẹ ka Anẹhwẹsọsị e sị eyi pe irehi ori ọnẹẹ ọbanyị Idiyana ọnịrị ori ene chí vẹ nị.

³⁶ Ẹ yị nyị ọza ana zụ kà a ka ọnị ọyị yẹ ịsa ẹnẹnị. Agụvị avọọ â vọrọ ka wa và ayị nẹtẹ nịnị, asị ụ sị eyiha mẹ ịrẹyị nịnị!

³⁷ Aza ẹnẹnị ọnị ụ za vẹ nịnị, eyi yi ẹnya hụụnị irehi ori, ẹyị rẹ kà ịrẹyị odivi hi ori ọnẹẹ awụ nịnị.

³⁸ Idemetiriyọsị ọnịrị anụkọrọ anị ẹ̀ẹ ka â nyị ọza ana nyị ịrẹyị ẹnịnị, ẹkụhị ikootu yà ịzọọ, ọnọba nịnị re hi ẹtẹ, ẹ nyẹngụ na hị́ ẹngụ ịrẹka ịzọọ.

³⁹ Ama àa nyị ịrẹyị ọsa oni u wee sì nịnị, a nyẹngụ kụ́ ọọ nọ ịzị ọdọvịdị ayị nịnịị̄ kụ́ gụ, di aa na kà a ịzọọ.

⁴⁰ Wâ yẹ ka a nyayịnẹ hị́ yị ka ya va kà ọ̀ kụ́ ẹvazi ọnọnị vẹ. Àa hị́ yị, di ye yi re ịrẹyị kà.”

⁴¹ Ịjị ọ maanị sị ịrẹyị kà, dị ọ ka aza ẹnẹẹ ẹ̀ẹ na nị.